ຂ່າວຫຼ້າສຸດ

ເພື່ອ​ຄວາມ​ເປັນ​ເອ­ກະ​ພາບ

2.294 12 ສ.ຫ. 2013 ນານາສາລະ

<p style="text-align: justify;"> ໄດ້​ອ່ານ​ບົດ “ສັບ­ສົນ​ຍ້ອນ​ຄົນ​ຫັ້ນ​ລະ” ພິມ​ລົງ​ໃນ​ຄໍ​ລຳ “ ບັນ­ຫາ​ຈານ​ແຍ່” ໜັງ­ສື­ພິມລາວ​ພັດ­ທະ­ນາປະຈຳວັນທີ26/7/2013 ກໍເລີຍ​ມີ​ເລື່ອງ​ຢາກ​ມາ​ເວົ້າ​ເສີມ ບັນ­ຫາ​ທີ່​ຕົນ​ເອງ​ເຄີຍ​ພົບ​ມາ ກ່ອນ​ອື່ນ​ຂໍບອກ​ວ່າ ທາງ​ການ​ຂອງ​ພວກ​ເຮົາ ໂດຍ​ສະ­ເພາະແມ່ນພາກ­ສ່ວນ​ກ່ຽວ­ຂ້ອງ ຄວນ​ມີ​ມາດ­ຕາ​ການ​ຊີ້​ແນະ ແລະ ຄຸ້ມ​ຄອງ​ການ​ນຳ​ໃຊ້ຫົວ­ໜ່ວຍ​ວັດ­ແທກ ແລະ ຊັ່ງ​ນ້ຳ­ໜັກ ໃຫ້​ເປັນ​ເອ­ກະ​ພາບ ບໍ່​ອະ­ນຸ­ຍາດ​ໃຫ້​ໃຊ້ ຫຼື ເອີ້ນ​ຕາມ​ຫົວໜ່ວຍ​ທີ່​ແຕກ​ຕ່າງ​ກັນ <strong>ຕົວ­ຢ່າງ</strong> ການ­ແທກ​ໄລ­ຍະ​ໃກ້-ໄກ ສູງ-ຕ່ຳ ຕ້ອງ​ໃຊ້​ຫົວ­ໜ່ວຍ “ແມັດ” ຫຼື “ມ” ເຊັ່ນ: ເສັ້ນທາງ​ຍາວ 5 ພັນ​ແມັດ ຫຼື 5 ກິ­ໂລ­ແມັດ ບໍ່​ຄວນ​ເລືອກ​ໃຊ້ “ໄມ” ເພາະ​ບໍ່​ແມ່ນ​ຫົວ­ໜ່ວຍ​ທີ່​ບ້ານ​ເຮົາ​ເຄີຍ​ນຳ​ໃຊ້ ພວກເຮົາຕ້ອງ​ໃຊ້​ຫົວ­ໜ່ວຍ​ທີ່​ສັງ­ຄົມ​ເຮົາ​ຮູ້​ເຂົ້າ­ໃຈ ແລະ ເຄີຍ​ໃຊ້ມາ​ແຕ່­ໃດໆ ການ​ນຳ​ໃຊ້ຄຳວ່າ “ນິ້ວ” ເພື່ອ​ວັດ​ຄວາມກວ້າງ​ຂອງ​ໜ້າ​ຈໍ​ໂທລະ­ພາບ​ນັ້ນ ກໍ​ຄົງ​ເຂົ້າ­ໃຈ​ກັນ​ໃນ​ວົງແຄບເທົ່າ​ນັ້ນ ນ້ຳ­ໜັກ​ຄຳ​ທີ່​ໃຊ້​ຫົວ­ໜ່ວຍ “ອອນ” ຊັ່ງ​ນ້ຳ­ໜັກ​ນັ້ນ ເມື່ອ​ເວົ້າ ຫຼື ຂຽນ​ໃຫ້​ຄົນ​ລາວ​ເຮົາ​ເຂົ້າ­ໃຈ ກໍ​ຄວນ​ເວົ້າ “ບາດ” ຫຼື ຫົວ­ໜ່ວຍ​ຊັ່ງ​ນ້ຳ­ໜັກ​ເປັນ “ກຼາມ” “ກິໂລ” ເພື່ອໃຫ້​ຄົນ​ລາວ​ເຮົາ​ເຂົ້າ­ໃຈ​ໂລດ ບໍ່​ຕ້ອງ​ໄປ​ຖາມ​ອີ​ກວ່າ “ອອນ” ໜຶ່ງ​ໜັກຫຼາຍ​ປານ­ໃດ ການ​ເອົາ​ຫົວ­ໜ່ວຍ “ຟຸດ” “ຟິດ” ຫຼື “ອິນ inch” ມາ​ວັດ­ແທກ​ໄລ­ຍະຍາວ-ສັ້ນ ສູງ-ຕ່ຳ ນັ້ນມີ​ແຕ່​ຈະ​ສ້າງ​ຄວາມ​ສັບ­ສົນ​ໃຫ້​ຄົນ​ຈຳ­ນວນ​ຫຼາຍ​ໃນ​ປະເທດເຮົາ ສົນ­ໃຈ​ຢູ່​ວ່າ ​ເປັນ​ຫຍັງ​ບໍ່​ບອກ​ວ່າ ເຄື່ອງ​ບິນ​ເຮົາ​ບິນສູງ​ຈາກ​ໜ້າ­ດິນ 8 ພັນແມັດ ແທນ​ທີ່​ຈະ​ເວົ້າ​ເປັນ “ຟິດ” ສ່ວນ​ຕົວ​ແລ້ວ​ຍັງ​ຄິດ​ບໍ່​ອອກ​ວ່າ ຟິດ ຫຼື ຟຸດ​ນັ້ນ ມີ​ຂະ­ໜາດໃດ ເພາະ​ບໍ່​ເຄີຍ​ໃຊ້​ຫົວ­ໜ່ວຍ​ນີ້​ມາ​ກ່ອນ ຈະ​ວ່າ​ຜູ້​ຂຽນ​ໂງ່​ກໍຍອມ ແຕ່​ຂໍ​ບອກ​ວ່າ​ຕົນ​ເອງ ບໍ່​ມີ​ເວ­ລາ​ສຶກ​ສາ​ໃຫ້​ຮູ້​ໝົດຫົວໜ່ວຍ​ວັດ­ແທກ​ຈາກ​ທົ່ວ​ມຸມໂລກ ນອກ­ຈາກ “ຟຸດໆ​ຟິດໆ” ແລ້ວ ກໍ​ຍັງ​ມີ​ຫົວ­ໜ່ວຍ​ວັດ­ແທກ​ການ​ບັນ­ຈຸ​ເອີ້ນ​ວ່າ “ບາແຣນ” ເວ­ລາ​ເວົ້າ​ເຖິງ​ການ​ຜະ­ລິດ​ນ້ຳ­ມັນ​ເຊື້ອ​ໄຟ ຖ້າ​ຈຳ­ເປັນໃຊ້​ຄຳ​ວ່າ “ບາແຣນ” ​ແທ້ໆ (ເພາະ​ຖ້າ​ບໍ່​ໃຊ້ມັນ​ຊິ​ເຖິງ​ລົ້ມ​ເຖິງຕາຍ) ນັ້ນ ກໍ​ຄວນ​ຂຽນ​ໄວ້​ໃນວົງ­ເລັບ​ວ່າ ມັນ​ເທົ່າ​ກັບ​ຈັກ​ລິດແຕ່­ໃດໆ​ມາ ພວກ​ເຮົາ​ເຄີຍ​ເວົ້າ​ວ່າ “ແມັດ​ມົນ­ທົນ” ເຊັ່ນ: ດິນ​ຕອນ​ນີ້ມີ​ຂະ­ໜາດ 800 ແມັດ​ມົນ­ທົນ ແຕ່​ດຽວ­ນີ້ພັດ​ໃຊ້ສັບ­ປົນ​ກັນ​ກັບ​ຄຳວ່າ “ຕະ­ລາງ​ແມັດ” ເປັນ​ຫຍັງ​ບໍ່​ກຳ­ນົດ​ເອົາຫົວ­ໜ່ວຍ​ດຽວ ການ​ເຮັດ​ແບບ​ນີ້ ພາ­ໃຫ້ເກີດ​ສະ­ພາບ​ສັບ­ສົນໃນ​ເອ­ກະ­ສານ​ທາງ​ການ ບໍ່​ແມ່ນ​ຂອງ​ໜ້ອຍ.</p> <p style="text-align: justify;"> ຜູ້​ຂຽນ​ເຫັນ​ວ່າມີ​ແຕ່​ຢູ່​ບ້ານ​ເຮົາ​ນີ້​ແລ້ວ​ ທີ່​ໃຜ​ທັນ​ຫຍັງ​ກໍໃຊ້​ອັນ​ນັ້ນ ໂດຍ​ບໍ່​ຮິ່ນ­ຕອງເຖິງ​ຄວາມ​ເປັນ​ເອ­ກະ​ພາບ ແລະ ຜົນ​ເສຍ​ຫາຍ ຢາກ​ໜີ​ຈາກ​ຄວາມ​ສັບ­ສົນ​ນີ້ ຂໍ​ຢ່າຖື​ເລື່ອງ​ນີ້ເປັນ​ເລື່ອງ​ນ້ອຍ ທາງ​ການ​ກ່ຽວ­ຂ້ອງ​ຂອງ​ພວກ​ເຮົາ​ຕ້ອງອອກ​ມາ​ເປົ່າ​ໝາກ­ຫວີດ​ດ່ວນ.</p> <p style="text-align: right;"> <strong>ໂດຍ: ຄົນ​ແດດ​ດຽວ</strong></p>

ຂ່າວທີ່ກ່ຽວຂ້ອງ