ຂ່າວຫຼ້າສຸດ

ງົດ​ດື່ມ​ເຫຼົ້າ-ເບຍ ເມື່ອ​ເຂົ້າ​ພັນ​ສາ

2.119 24 ກ.ກ. 2013 ນານາສາລະ

<p style="text-align: justify;"> ເຫຼົ້າ​ເປັນ​ເຄື່ອງດື່ມ​ຄຽງ​ຄູ່​ກັບ​ສັງ­ຄົມ​ມະ­ນຸດ​ມາ​ແຕ່​ດົນ​ນານ ເຫຼົ້າ​ບາງ​ຊະ­ນິດ​ຍັງກາຍ­ເປັນ​ເຫຼົ້າ​ປະ​ເພນີ​ຂອງ​ສາ­ກົນ ເປັນ­ຕົ້ນ ຍາມ​ມີ​ການ​ບັນ­ລຸ​ຂໍ້​ຕົກ­ລົງ​ເຊັນ​ສັນ­ຍາ ສົນ­ທິ­ສັນ­ຍາ ເຊັນ​ບົດ​ບັນ­ທຶກ​ຊ່ວຍ​ຈຳ ຫຼື ອື່ນໆ ຫຼັງ​ຈາກເຊັນ​ແລ້ວ ແລກ­ປ່ຽນ​ເອ­ກະ­ສານ ພິ­ທີ­ການ​ກໍ​ຈະ​ນຳ​ຈອກເຫຼົ້າ​ຄູ່​ຕຳ­ແໜ່ງ​ບຸກ­ຄົນ​ສຳ­ຄັນ​ທີ່​ເຂົ້າ​ຮ່ວມ​ເປັນ​ສັກ­ຂີ​ພະ­ຍານ ແລ້ວ​ກໍ​ໃຫ້​ຄຳ​ໝັ້ນ​ສັນ­ຍາ​ດ້ວຍ​ວາ­ຈາ ຈາກ​ນັ້ນກໍ​ມີ​ສຽງ​ຕຳຈອກ​ກ່ອງ​ແກ່ງຕາມ​ມາ.</p> <p style="text-align: justify;"> ສະ­ເພາະ​ລາວ​ເຮົາ ເຫຼົ້າ​ໄດ້​ມີ​ສ່ວນ​ພົວ­ພັນ​ກັບ​ປະ­ເພ­ນີ ວັດທະ­ນະ​ທຳ​ຈຳ­ນວນ​ໜຶ່ງ ເປັນ­ຕົ້ນ ປະ­ເພ­ນີ​ການ​ເຮັດ­ບຸນ​ບັ້ງ­ໄຟ ບຸນ­ຊ່ວງ­ເຮືອ ບຸນ​ຄູນ​ເຂົ້າ ການ​ແຕ່ງ­ງານ​ໃໝ່ ການ​ຂຶ້ນ​ເຮືອນໃໝ່ ຫຼື​ອື່ນໆ ນອກ­ຈາກ​ນີ້ ເຫຼົ້າ​ຍັງ​ຖືກ​ຢາຍ ​ຖືກ​ສູ່​ ຕ້ອນ­ຮັບຍາມ​ພີ່­ນ້ອງ​ເພື່ອນ​ຝູງ​ມາ​ຢ້ຽມ­ຢາມເຖິງ​ເຮືອນ​ຊານ​ບ້ານຊ່ອງ ພໍ​ຫອມ​ປາກ​ຫອມ​ຄໍ ແລ້ວ​ກໍເລີກ­ລາ​ກັນ​ໄປ ລວມ​ທັງເຮັດ​ຮີດ­ຄອງ​ຕ່າງໆ ຍັງ​ໃຊ້​ເຫຼົ້າ​ຈຳ­ນວນ​ໜຶ່ງ ບາງ​ຕຳ­ລາ​ຢາພື້ນ­ເມືອງ​ຂອງ​ລາວ​ ຍັງ​ໃຊ້​ເຫຼົ້າ​ເປັນ​ຢາ​ດອງ ຫຼື ບອງ​ຢາ ເພື່ອໃຫ້​ຄົນ​ເຈັບ​ກິນ ເຊົ້າຈອກ​ແລງ​ຈອກ ພະ­ຍາດ​ກໍ​ຈະ​ຄ່ອຍໆຫາຍ​ຊ່ວງ​ເຊົາ.</p> <p style="text-align: justify;"> ພື້ນ­ຖານ​ວັດ­ຖຸ​ດິບ​ທີ່​ໃຊ້​ເຂົ້າ​ໃນ​ການ​ປຸງ​ແຕ່ງ​ເຫຼົ້າ​ລາວ​ເຮົາ ແມ່ນ​ເຂົ້າ ຫຼື ແປ້ງ​ຈາກມັນ​ຕ່າງໆ ຈາກ​ນ້ຳ­ຕານ ເພື່ອ​ເປັນເຫຼົ້າ​ຂາວ ເຫຼົ້າ​ຖ້າ​ດື່ມ​ຫຼາຍ ດື່ມ​ເປັນ​ອາ​ຈິນ ແມ່ນທຳ­ລາຍສຸ­ຂະ­ພາບ ກາຍ­ເປັນ​ສິ່ງ​ເສບ​ຕິດ​ຊະ­ນິດ​ໜຶ່ງ​ແບບ​ມິດ​ງຽບ ຜູ້ຕິດ​ເຫຼົ້າ​ເພິ່ນເອີ້ນ​ວ່າ ເປັນ​ພະ­ຍາດ​ພິດ​ສຸ­ລາ​ຊຳ​ເຮື້ອ ມັກ​ກາຍເປັນ​ພະ­ຍາດ​ຕັບ​ແຂງ ຫຼື ພະ­ຍາດແຊກ​ຊ້ອນ​ອື່ນໆ​ຕາມ​ມາ.</p> <p style="text-align: justify;"> ຄຳ​ສັ່ງ­ສອນ​ທາງ​ພຸດ​ທະ​ສາ­ສະ­ໜາ​ ໄດ້​ກຳ­ນົດ​ຢ່າງ​ຈະແຈ້ງ​ເຖິງ​ອະ­ບາຍ​ຍະ​ມຸກ ເຊິ່ງແມ່ນ​ການ​ປະ­ພຶດ​ທີ່​ພາ­ໃຫ້​ຄົນເຮົາ​ເສື່ອມ​ເສຍ (ເສຍ​ທາດ​ຂາດ​ຄຸນ) ໃນ​ນັ້ນ ມີ​ເຫຼົ້າຢູ່​ນຳ ສິນ 5 ຂໍ້ ເຊິ່ງ​ເປັນ​ພື້ນ­ຖານ​ບັນ­ຍັດ​ແກ່​ຄົນ​ທົ່ວ​ໄປ​ປະ­ຕິ­ບັດໃນຊີ­ວິດ​ປະ­ຈຳ​ວັນ ກໍ​ໄດ້​ລະ­ບຸ​ຢ່າງ​ຈະ­ແຈ້ງ​ໃນ​ຂໍ້​ທີ 5 ດັ່ງ­ນັ້ນ ພຽງ​ແຕ່​ເຫຼົ້າ​ຢ່າງ​ດຽວ​ເມື່ອ​ດື່ມ​ເຂົ້າ​ໄປ​ຈົນມຶນ­ເມົາ ແລ້ວ​ຂາດສະ­ຕິ​ ຈະ​ເຮັດ​ໃຫ້​ຄົນ​ເຮົາ​ປະ­ພຶດ​ຜິດ​ຮີດ​ຮອບ­ດ້ານ ນັບ​ແຕ່​ຮີດຄອງ​ປະ­ເພ­ນີ ລະ­ບຽບ​ກົດ­ໝາຍ​ຂອງ​ບ້ານ​ເມືອງ ດື່ມ​ເຫຼົ້າເມົາ​ ສາ­ມາດ​ລັກໂລບໂກດຫຼົງ ຕົວະ​ຕົ້ມ ຂ້າ​ສັດ​ຕັດ​ຊີ­ວິດ ໄດ້ ໃນ​ສູ່​ມື້­ນີ້ ອຸ­ບັດເຫດ​ບົນ​ທ້ອງ​ຖະ­ໜົນ­ຫຼວງ ສ່ວນ​ໃຫຍ່ມາ​ຈາກ​ສາ​ເຫດ­ການ​ດື່ມ​ເຫຼົ້າ “ເມົາແລ້ວ​ຂັບ” ເຊິ່ງ​ພາ­ໃຫ້​ມີການ​ເສຍ​ຊີ­ວິດ ໄດ້​ຮັບ​ບາດ­ເຈັບ ແລະ ຊັບ​ສິນ​ເສຍ​ຫາຍ​ຢ່າງຫຼວງ­ຫຼາຍ.</p> <p style="text-align: justify;"> ການ​ເຂົ້າ​ພັນ​ສາ ມີ​ໄລ­ຍະ​ປະ­ຕິ­ບັດ​ເປັນ​ເວ­ລາ 3 ເດືອນ ຄື ພະ­ສົງ​ຈະ​ບໍ່​ເດີນ­ທາງ​ໄປຄ້າງ​ຄືນ​ຢູ່​ບ່ອນ​ອື່ນ ນັບ​ແຕ່​ແຮມຄ່ຳ​ໜຶ່ງ ເດືອນ 8 ຫາ​ແຮມ​ຄ່ຳ​ໜຶ່ງ ເດືອນ 11 (ລາວ) ສ່ວນຊາວ​ພຸດ​ທົ່ວ​ໄປ ກໍ​ມີ­ໜ້າ​ທີ່​ບຳ­ເພັນ​ກຸ­ສົນ ແລະ ຊ່ວຍ​ອຸ­ປະຖາກ​ພຣະສົງ​ທີ່​ຈຳ​ພັນ​ສາ​ຢູ່​ໃນ​ວັດ​ນັ້ນ​ ເຊັ່ນ​ກັນ ຕາມ​ຮີດ​ເກົ່າແກ່​ຂອງ​ລາວ​ເຮົາ​ໃນ​ບາງ​ທ້ອງ­ຖິ່ນ​ທີ່​ເຄີຍ​ທຳ​ກັນ​ມາ ຍາມເຂົ້າ​ພັນ​ສາ​ແມ່ນ​ຫ້າມ​ການ​ລ່າ​ສັດ­ປ່າ ເນື່ອງ​ຈາ​ກວ່າ ເປັນລະ­ດູ​ແຫ່ງ​ການ​ອອກ​ແມ່​ແຜ່​ລູກ ບາງ​ທ້ອງ­ຖິ່ນ​ວັນ​ສິນ​ບໍ່​ຂ້າສັດ​ຕັດ​ຊີ­ວິດ ບໍ່ອອກ­ແຮງ​ງານ​ໜັກ ບໍ່​ສີ​ເຂົ້າ ບໍ່​ຕຳ​ເຂົ້າ ບໍ່​ດື່ມເຫຼົ້າ ເຊິ່ງ​ນິ­ຍົມ​ກັນ​ຮ້ອງ​ວ່າ: “ຄະ­ລຳ”.</p> <p style="text-align: justify;"> ໃນ​ໄລ­ຍະ​ຫຼັງໆ​ບໍ່​ຫຼາຍ​ປີ­ຜ່ານ­ມາ​ນີ້ ເກີດ​ມີ​ປະ­ເພ­ນີ​ໃໝ່​ໃນຄົນ​ລາວ ຄື: ປະ­ເພ­ນີ​ທີ່ໜ້າ​ຊົມ­ເຊີຍ​ແກ່​ຜູ້​ທີ່​ສາ­ມາດ​ປະ­ຕິ­ບັດໄດ້ ອັນ​ໄດ້­ແກ່: “ງົດ​ການ​ດື່ມ​ເຫຼົ້າ ​ເມື່ອ​ເຂົ້າພັນ​ສາ” ເປັນ​ຂະບວນ​ການ​ໜຶ່ງ​ທີ່​ມີ​ການ​ແຂ່ງ­ຂັນ​ກັນ​ຢ່າງ​ງຽບໆ ຜ່ານ​ມາ​ມີບາງ​ຄົນປະ­ຕິ­ບັດ​ໄດ້​ສຳ­ເລັດ​ຜົນ​ຢ່າງ​ໜ້າ​ຊົມ­ເຊີຍ ຈົນ​ສາມາດ​ສືບ­ຕໍ່​ງົດ​ການ​ດື່ມ​ເຫຼົ້າ​ເລີຍ​ກໍ​ມີ ບາງ​ຄົນ​ກໍ​ປະ­ຕິ­ບັດ​ໄດ້ຕາມ​ຄຳ​ໝັ້ນ​ສັນ­ຍາ ບາງ​ຄົນ​ກໍ​ທຳ​ແຕກ​ກ່ອນ ​ງົດ​ໄດ້ແຕ່ 20-30ວັນ ເຊິ່ງ​ກໍ​ເປັນ­ຕາ​ຍິນ​ດີ​ດອມ ແລະ ຄວນ​ມີ​ວິ­ທີການ​ທີ່​ອ່າວ​ດີ​ວ່າ​ນີ້.</p> <p style="text-align: justify;"> ການ​ງົດ​ດື່ມ​ເຫຼົ້າ​ດື່ມ​ເບຍ ເປັນ​ເລື່ອງ​ທີ່​ງ່າຍ­ດາຍ ຖ້າ​ການຕັດ­ສິນ​ໃຈ​ເຂັ້ມ­ແຂງ​ເດັດ­ດ່ຽວ​ໄດ້​ ກໍ​ຜ່ານ ບໍ່​ຕ່າງ​ຫຍັງ​ກັບການ​ເຊົາ​ຢາ­ສູບ ມັນ​ຂຶ້ນ​ຢູ່​ກັບ​ຈິດໃຈ​ເປັນ​ໃຫຍ່ ສຳ­ຄັນ​ບໍ່ຄວນ​ອອກໆ​ເຂົ້າໆ​ຢຸດໆ​ຢ່ອນໆ ເປັນ​ອັນ­ຕະ­ລາຍ​ຊ້ຳ ຄວນສ້າງ​ວັດ­ທະ­ນະ­ທຳໃໝ່​ໃຫ້​ກັບ​ຕົນ​ເອງ ​ດ້ວຍ​ການ​ສ້າງ​ຄ່າ​ນິຍົມ​ທີ່​ບໍ່​ກ່ຽວ​ກັບ​ການ​ກ່າວ​ເຖິງ​ເຫຼົ້າ ສ້າງ­ສັນ​ໝູ່​ເພື່ອນ​ດ້ວຍການ​ປາ­ສະ­ຈາກ​ເຫຼົ້າ ໃນ​ບາງ​ສາ­ສະ­ໜາ​ໃນ​ໂລກ​ນີ້ ກໍ​ຍັງຫ້າມ​ດື່ມ​ເຫຼົ້າ ແຕ່​ຢ່າງ­ໃດ​ກໍ​ດີ ຖ້າ​ງົດ​ບໍ່​ໄດ້​ ດື່ມ​ຫຼຸດໆ​ລົງ​ໃຫ້​ໄດ້ ເພາະ​ເຫຼົ້າ-ເບຍ ມັນຈະ​ດື່ມ​ເຮົາ ​ເວ­ລາ​ນັ້ນ​ຈະ​ພາ​ເຮົາ​ໄປ​ສູ່ການ​ເສື່ອມ​ເສຍ​ກຽດ ແລະ ຊື່​ສຽງ ນັ້ນ​ລະ​ນ່າ!.</p> <p style="text-align: right;"> <strong>ໂດຍ: ຊຽງ​ເອງ</strong></p>

ຂ່າວທີ່ກ່ຽວຂ້ອງ