ຂ່າວຫຼ້າສຸດ

ເຫັນ​ຊ້າງ​ຂີ້ ຢ້າ​ຂີ້​ຄື​ຊ້າງ

2.844 27 ມິ.ນ. 2013 ນານາສາລະ

<p style="text-align: justify;"> ເມື່ອ​ສະ­ໄໝ​ບູ­ຮານຫຼື ຄົນຮຸ່ນ​ກ່ອນໆ ເພິ່ນ​ກໍ​ໄດ້​ມີ​ການ​ຖື​ເອົາ​ການ​ສັ່ງ­ສອນ ຫຼື ການ​ສຶກສາ​ອົບ­ຮົມ​ແກ່​ລູກ​ຫຼານ​ຜູ້​ສືບທອດ​ເປັນ​ບັນ­ຫາ​ຫຼັກ ດັ່ງ​ຈະ​ເຫັນ​ໄດ້​ຄຳ​ເວົ້າ​ທີ່​ເປັນ​ປິດ​ສະໜາ​ຈາກ​ໜັງ­ສື​ຜູກ​ໃບ​ລານ ປຶ້ມ​ຕ່າງໆ ຫຼື ສຸ­ພາ­ສິດ​ບູ­ຮານ ທີ່​ກາຍ­ເປັນ​ຕຳ­ນານ​ເລົ່າ​ຂານກັນ​ປາກ​ຕໍ່­ປາກ​ຈົນ​ຈວບ​ເຖິງປັດ­ຈຸ­ບັນ ເຊັ່ນ: ແກ້ວ​ບໍ່​ຜັດ​ຫຼາຍ​ປີ​ເປັນ​ແຮ່ ພີ່­ນ້ອງ​ບໍ່​ແວ່​ຈະກາຍ­ເປັນ​ເພິ່ນ ສິບ​ສະ­ຫຼຶງ​ຢູ່​ຟາກ​ນ້ຳ​ຢ່າ​ໄດ້​ອ່າວ​ຄະ​ນຶງ​ຫາ ສອງ​ສະ­ຫຼຶງ​ແລ່ນ​ມາ​ມື​ໃຫ້​ຮີບກຳ​ເອົາ​ໄວ້ ຜົວ​ເປັນ​ເພຍຍ້ອນເມຍ​ຊ່າງ​ຍ້ອງ ມີ​ເມຍ​ໃຫ້​ຊ່າງ​ຍ້ອງ ມີ​ຄ້ອງ​ໃຫ້​ຊ່າງ​ຕີ ໄມ້ລຳດຽວ​ລ້ອມ​ຮົ້ວ​ບໍ່​ໄຂວ່ ໄຜ່​ບໍ່​ພ້ອມ​ແປງ​ບ້ານ​ບໍ່​ເຮືອງ ເຮັດ​ຈັ່ງເພິ່ນ​ແຕ່​ຢ່າ​ເຮັດ​ຈັ່ງ​ເພິ່ນ ປາ​ໂຕ​ດຽວ​ເນົ່າ​ໝົດ​ຂ້ອງ ຄ້ອງໜ່ວຍ​ດຽວ​ດັງ​ໝົດ​ເມືອງ ແລະ ອື່ນໆ ເຊິ່ງ​ທັງ​ໝົດ​ນັ້ນ​ເມື່ອນຳ​ມາ​ວິ­ເຄາະ​ຈະ​ເຫັນ​ໄດ້​ວ່າ ຄົນ​ຮຸ່ນ​ກ່ອນ​ເພິ່ນ​ປະ​ໃຫ້​ພວກເຮົາ​ໄດ້​ຄົ້ນ­ຄວ້າ​ຄິດ​ຫງຳ ແລະ ຄຳ​ເວົ້າ​ເຫຼົ່າ­ນັ້ນ​ແມ່ນ​ຊີ້​ໃຫ້ເຫັນ​ຢ່າງ​ຈະ­ແຈ້ງ​ເຖິງ​ອັນ​ຖືກ​ອັນ​ຜິດ ອັນ​ຄວນ​ທຳ ແລະ ບໍ່ຄວນ​ທຳ ເປັນ​ການ​ເພີ່ມ​ພູນ​ຄຸ້ມ​ກັນ​ສຳ­ຄັນ​ໃຫ້​ແກ່​ຜູ້​ທີ່​ຮຽນ​ຮູ້ໃນ​ຄຳ​ເວົ້າ​ຂອງ​ເພິ່ນ​ນັ້ນ.</p> <p style="text-align: justify;"> <strong>ເຫັນ​ຊ້າງ​ຂີ້ ຢ່າ​ຂີ້​ຄື​ຊ້າງ</strong>ເປັນ​ຄຳ​ເວົ້າ​ຂ້ອນ​ຂ້າງ​ທຳ​ມະ​ດາ ແຕ່​ເມື່ອ​ວິ­ເຄາະ​ຕີ​ແຕກ​ຄຳ​ປິດ­ສະ­ໜາ​ດັ່ງ­ກ່າວ​ກໍ​ຈະ​ຮູ້​ວ່າ ມັນບໍ່​ທຳ​ມະ​ດາ ຄຳ​ນີ້​ມັນ​ກໍ​ຄ້າຍ­ຄື​ຄຳ​ວ່າ: ເຮັດ​ຈັ່ງ​ເພິ່ນ ແຕ່​ຢ່າເຮັດ​ຈັ່ງ​ເພິ່ນ ເຫັນ​ຊ້າງ​ຂີ້ ແຕ່​ຢ່າ​ຂີ້​ຄື​ຊ້າງ ໃນ​ແງ່​ມູມ​ຂອງ​ໃຈຄວາມ​ແມ່ນ ເພິ່ນ​ຢາກ​ສື່​ໃຫ້ເຫັນ​ເຖິງ​ການ​ດຳ­ລົງ​ຊີ­ວິດ​ຂອງຄົນ​ເຮົາ ແມ່ນ​ຢູ່​ບົນ​ພື້ນ­ຖານ​ແຫ່ງ​ຄວາມ​ພໍ­ດີ​ພໍ­ງາມ ຄືການຢືນ​ຢູ່​ພື້ນ­ຖານ​ລາຍ​ຮັບ​ຈາກ​ການ​ອອກ­ແຮງ​ງານ​ທາງ​ຕີນ​ມື ແລະ ມັນ­ສະ­ໝອງ ​ຂອງແຕ່​ລະ​ວັນ ແຕ່​ລະ​ເດືອນ ໃຫ້​ສອດຄ່ອງ​ກັບ​ລາຍ​ຈ່າຍ.</p> <p style="text-align: justify;"> ລາຍ​ຮັບ​ມີ​ເທົ່າ­ໃດ​ກໍ​ແມ່ນ​ຕົນ​ເອງ​ເປັນ​ຜູ້​ບໍ­ລິ­ຫານ​ໃຫ້​ສອດຄ່ອງ ຈະ​ໃຫ້​ຜູ້​ອື່ນ​ມາ​ຄຸ້ມ​ຄອງບໍ­ລິ­ຫານ​ໃຫ້​ຄົງ​ເປັນ​ໄປ​ບໍ່​ໄດ້ ການ​ບໍ­ລິ­ຫານ​ໃຊ້​ຈ່າຍ​ແມ່ນ​ໃຫ້​ພໍ­ດີ​ ລະ­ຫວ່າງ​ລາຍ​ຮັບ​ກັບລາຍ​ຈ່າຍ ແລະ ມີ​ສ່ວນ​ສະ​ສົມ​ແຮ​ໄວ້ເພື່ອ​ອະ­ນາ­ຄົດ ແລະ ເຫດ­ການ​ບັງ­ເອີນ​ສຸກ​ເສີນເກີດ​ຂຶ້ນ ເຫັນ​ຊ້າງ​ຂີ້ ແຕ່​ຢ່າ​ຂີ້​ຄືຊ້າງ ຍັງ​ສະ­ທ້ອນ​ໃຫ້​ເຫັນ​ເຖິງ​ການ​ຈຳ­ກັດ​ການ​ຟຸມ​ເຟືອຍ​ໃຊ້ຈ່າຍ​ເກີນ​ຕົວ​ນຳ​ອີກ ຕົນ​ມີ​ລາຍ​ຮັບ​ແນວ​ໜຶ່ງ ແຕ່​ພັດ​ການ​ໃຊ້ຈ່າຍ​ຢາກ​ໃຫ້​ທຽມ​ທັນກັບ​ຜູ້​ມີ​ລາຍ​ຮັບ​ສູງ ຍ່ອມ​ເປັນ​ສິ່ງ​ທີ່​ບໍ່ເໝາະ​ສົມ ອາດ​ຈະ​ກ້າວ​ໄປ​ສູ່​ການ​ຈ່າຍ​ຕິດ​ລົບ ຫາກູ້​ໜີ້ຢືມສິນ​ມາ​ໃສ່​ຕົນ ບາງ­ເທື່ອ​ກູ້​ຢືມ​ໃນ​ທາງ​ບໍ່​ຊອບ​ມາ​ພາ​ກົນ​ກໍ​ມີ ເປັນ­ຕົ້ນ ກູ້​ນອກ​ລະ­ບົບ ອັນ​ເປັນ​ເສັ້ນ­ທາງ​ສູ່​ຄວາມ​ເສຍ​ຫາຍຢ່າງ​ຫຼີກ​ບໍ່​ມົ້ມ​ກົ້ມ​ບໍ່​ຫວິດ​ນັ້ນ​ເອງ.</p> <p style="text-align: justify;"> ສັງ­ຄົມ​ເຮົາ​ຍຸກ​ປັດ­ຈຸ­ບັນ ກໍ​ມີ​ຜູ້​ຄົນ​ຈຳ­ນວນ​ໜຶ່ງ​ທີ່​ແລ່ນ­ນຳກະ­ແສ​ບໍ­ລິ­ໂພກ​ນິ­ຍົມ ຄື​ມີຄວາມ​ນິ­ຍົມ​ຊົມ​ຊອບ​ກັບ​ວັດ­ຖຸ​ສິ່ງຂອງ ເຄື່ອງ­ໃຊ້​ຂອງ​ສອຍ​ຕ່າງໆ​ທີ່​ເປັນ​ຂອງ​ຕ່າງ­ປະ­ເທດ ໂດຍ​ສະ­ເພາະສິນ­ຄ້າ​ທີ່​ມີ​ຍີ່­ຫໍ້​ຖືກ​ໂຄ­ສະ­ນາ​ຜ່ານ​ສື່ ດຳ­ລົງ​ຊີວິດ​ແບບ​ເຖົ້າ​ແກ່ອາເສ່ຍ ໂດຍ​ບໍ່​ຄຳ­ນຶງ​ເຖິງ​ລາຍ​ໄດ້ ແລະ ເງິນ​ໃນ​ຖົງ​ຕົນ​ເອງ ບາງ​ລາຍ​ພໍ­ໄດ້​ດິນ​ດອນ​ຕອນຫຍ້າ​ທີ່​ພໍ່ແມ່​ແບ່ງ​ໃຫ້​ເພື່ອ​ສ້າງ​ອະ­ນາ­ຄົດ​ ກໍ​ເອົາ​ໄປ​ຂາຍ ໄປ​ຊວດ​ໄປ​ຈຳ ຫຼື ຢາກ​ໄດ້​ຕື່ມ​ໂດຍ​ເພິ່ງ​ການ​ພະ­ນັນ ບາງ​ກໍ​ເກີດ​ຂໍ້​ຂັດ​ແຍ່ງກັນ​ໃນ​ບັນ­ຫາ​ດັ່ງ­ກ່າວ ພໍ​ມີ​ເງິນ​ແລ້ວ​ແທນ​ທີ່ຈະ​ໃຊ້​ໃນ​ທາງພັດ­ທະ­ນາ​ເພື່ອ​ຕໍ່​ຍອດ​ເອົາ​ໝາກ­ຜົນ​ຕື່ມ​ນັ້ນ ຊ້ຳ­ພັດ​ແລ່ນ​ໃສ່ຊື້​ລົດ​ກ່ອນ ເຂົ້າ​ເທັກ ເຂົ້າ​ບາ ​ແຮກ​ໝານ​ກ່ອນ ແລະ ໃຊ້​ໃນທາງ​ຟຸມ​ເຟືອຍ​ບໍ່​ພັດ­ທະ­ນາ ການ​ໃຊ້ຈ່າຍ​ເກີນ​ຕົວ ແມ່ນ​ມາຈາກ​ການ​ຈ່າຍ​ງ່າຍ​ຂາດ​ການ​ວາງ​ແຜນ­ທີ່​ຮອບ​ຄອບ ເງິນຈະໜ້ອຍ ຫຼື ຫຼາຍ​ ຖ້າ​ຈ່າຍ​ຂາດ​ການ​ວາງ​ແຜນ​ມີ​ຫວັງ​ໝົດກ້ຽງໃນ​ທີ່​ສຸດ​ແທ້ໆ ເພາະ​ສິ່ງ​ຍົວະຍວນ​ກວນ​ໃຈ ນັບ​ແຕ່​ຂອງ​ກິນຫາ​ຂອງ​ໃຊ້​ມີ​ຢ່າງ​ມະ­ຫາ­ສານ ສູ່​ມື້­ນີ້​ບໍ່​ຈຳ­ເປັນ​ຍ່າງ​ໄປ​ຕະຫຼາດ​ຊ້ຳ ອ່ານ​ຕາມ​ສື່​ແລ້ວ​ຍົກ​ໂທລະ­ສັບ ສິນ­ຄ້າ​ສັ່ງ​ມັນ​ກໍມາ​ເອງ.</p> <p style="text-align: justify;"> ເຖິງ​ຢ່າງ­ໃດ​ກໍ​ດີ ໃນ​ຂະ­ນະ​ທີ່​ຍັງ​ເປັນ​ໄວ​ໜຸ່ມໄວ​ຄະ­ນອງ ພວມ​ກໍ່​ຮ່າງ​ສ້າງ​ຕົວຊອກ​ຫາຄວາມ​ກ້າວ­ໜ້າ​ມາ​ໃສ່​ຕົນ ຄວນ​ລະ­ມັດ­ລະ­ວັງ​ບໍ່​ໃຫ້​ຕົນ​ເອງ​ຕົກ​ເຂົ້າ​ໃນ​ຫ່ວງ​ແຫ່ງ​ການສຸກ​ກ່ອນ​ເຫີ່ມ ການ​ເຮັດ​ຄື​ເພິ່ນ​ນັ້ນແມ່ນ​ການ​ເຮັດ​ທີ່​ສ້າງຄວາມ​ກ້າວ­ໜ້າ​ຫາ​ຮ່ຳ­ຮຽນ ຫຼື ຖ້າ​ຊື້​ຂາຍ​ລົງ­ທຶນ​ກໍ​ເສລີ​ຖືກກົດ­ໝາຍ ລອງ​ຊອກ​ເບິ່ງ​ຕົວ​ແບບ​ທີ່​ຮັ່ງ­ມີ​ເປັນ​ເສດ­ຖີ​ໃນ​ໂລກນີ້ ທາດ​ແທ້​ການ​ຮັ່ງ­ມີ​ລ້ຳ​ລວຍ​ຂອງ​ພວກ​ເຂົາ​ແມ່ນ​ມາ​ຈາກປະ­ຢັດມັດ­ທະ­ຍັດ ຮັດ​ສາຍ­ແອວ ເກັບ​ເລັກ​ປະ­ສົມ​ນ້ອຍ ບໍ່ຟຸມ​ເຟືອຍ ຖ້າ­ວ່າ​ຈະ​ເຮັດ​ວຽກ​ງານ​ທຸ­ລະ​ກິດ​ເລີ່ມ​ຕົ້ນ​ຈາກການ​ໃຊ້​ຈ່າຍ​ເກີນ​ຕົວ ກິນ​ດື່ມ​ເຂົ້າ​ຮ້ານ​ນັ້ນ​ຮ້ານ​ນີ້ ຫຼິ້ນ​ສາວ ເອົາ​ເມຍ​ນ້ອຍ​ຫ້ອຍ​ເມຍປາຍ ມັກ​ໃຊ້​ເຄື່ອງ​ຂອງ​ແພງໆແລ້ວ ​ກໍ​ລໍ​ຟັງ​ຂ່າວ​ກັນ​ຕໍ່​ໄປ​ວ່າ ລົງ­ທ້າຍ​ຈະ​ເປັນ​ຈັ່ງ​ໃດ ດັ່ງ­ນັ້ນ ເຫັນ​ຊ້າງ​ຂີ້ ຈະ​ຂີ້​ຄື​ຊ້າງ ​ເປັນ​ຄຳ​ເວົ້າ​ໜຶ່ງ​ທີ່​ເຕືອນ​ໃຫ້​ເຮົາ​ລະມັດ​ລະ­ວັງ ຢ່າ​ທະ​ເຍີທະ­ຍານ ເຫັນ​ຜູ້​ອື່ນ​ເຮັດ​ໃນ​ສິ່ງ​ທີ່​ບໍ່​ຖືກຕ້ອງ ບໍ່​ກ້າວ­ໜ້າ​ ກໍ​ບໍ່​ຄວນ​ຮຽນ​ແບບ ຕ້ອງ​ເປີດສາຍ­ຕາ​ອອກກວ້າງ ເປີດ​ຫົວ­ໃຈ​ຮັບ​ເອົາ​ຂໍ້​ມູນ​ຂ່າວ­ສານ​ທີ່​ໃໝ່​ຖືກ­ຕ້ອງ ຊັດເຈນ ເບິ່ງ​ຕົວ­ຢ່າງ​ຄົນ​ດີ​ໃນ​ບ້ານ​ເຮົາ ແລະ ທົ່ວ​ໂລກ​ມີ​ຖົມ​ເຖ ແລ້ວ​ຕັດ­ສິນ​ໃຈ​ເຮັດ​ໃນ​ສິ່ງ​ທີ່​ຄົນ​ສ່ວນໃຫຍ່​ນິ­ຍົມ​ເຮັດ ຖື​ວ່າຄົງ​ຈະ​ມີ​ການ​ຜິດ­ພາດ​ໜ້ອຍ​ທີ່​ສຸດ​ນັ້ນ​ເອງ.</p> <p style="text-align: justify;"> <strong>ໂດຍ: ຊຽງ​ເອງ</strong></p>

ຂ່າວທີ່ກ່ຽວຂ້ອງ