ການມີລົດ ແລະ ການຈອດລົດເລື່ອງນ້ອຍ ແຕ່ໃຫຍ່ໃນຫົວໃຈ

1.988 28 ມີ.ນ. 2012 ນານາສາລະ

<p>  </p> <p style="text-align: justify; "> ສຳ­ລັບ​ຜູ້​ບໍ່​ມີ​ເງື່ອນ­ໄຂ​ໃນ​ການ​ຈະ​ໄດ້​ມາ​ລົດ​ເກັງ​ເກົ່າໆ​ຄັນ​ໜຶ່ງ ທີ່​ບໍ່​ແມ່ນ​ມື​ປະ­ຖົມ​ມະ­ລຶກ​ນັ້ນ ມັນ​ບໍ່​ແມ່ນ​ທຳ​ມະ​ດາ ມະ­ນຸດ​ເງິນ­ເດືອນ​ຢ່າງ​ຊຸມ​ເຮົາ​ເຈົ້າ​ຂ້ອຍ ຈະ​ຕ້ອງ​ຜ່ານ​ຈາກ​ການ​ບຸກ​ບືນ ປະ­ຢັດ​ມັດ­ທະ­ຍັດ ປາກ​ກັດ​ຕີນ​ຖີບ​ຊອກ​ຫາ​ລາຍ​ໄດ້​ເພີ່ມ​ເຕີມ ເພາະ​ປັດ­ຈຸ­ບັນ​ມັນ​ມີ​ຫຼາຍ​ເຫດ­ຜົນ​ທີ່​ບໍ່​ສາ­ມາດ​ອ້າງ​ອີງ​ການ​ຊື້​ລົດ​ໄດ້​ໝົດ ຫຼັກໆ​ກໍ​ແມ່ນ​ລູກ​ຫຼາຍ​ຄົນ ຂືນ​ຊ້ອນ​ລົດ­ຈັກ​ໄປ​ສົ່ງ​ໂຮງ­ຮຽນ ກໍ​ເກີດ​ຄວາມ​ສ່ຽງ ຢ້ານ​ເພິ່ນ​ມາ​ດາດ​ມາ​ຊູນ ທັງ​ພໍ່​ແມ່ ແລະ ລູກ​ແລ້ວ​ບໍ່​ຮູ້​ຈະ​ເປັນ​ຢ່າງ­ໃດ ຈັກ​ໃຜ​ຈະ​ເບິ່ງ​ໃຜ ເພາະ​ການ​ຂີ່​ລົດ​ໃນ​ປັດ­ຈຸ­ບັນ ຂ້ອນ​ຂ້າງ​ປະ­ໝາດ ບໍ່​ເອົາ­ໃຈ­ໃສ່​ຕໍ່​ລະ­ບຽບ​ຈະ­ລາ­ຈອນ​ວາງ​ອອກ ໂດຍ​ສະ­ເພາະ​ຢ່າງ​ຍິ່ງ ອຸ­ປະ­ຕິ­ເຫດ​ເທິງ​ທ້ອງ​ຖະ­ໜົນ­ຫຼວງ ເປັນ​ໜຶ່ງ​ໃນ​ຫຼາຍໆ​ບັນ­ຫາ​ຂອງ​ປະ­ກົດ​ການ​ຫຍໍ້­ທໍ້​ໃນ​ຕົວ​ເມືອງ​ໃຫຍ່.</p> <p style="text-align: justify; "> ເມື່ອ​ມີ​ລົດ​ແລ້ວ ບັນ­ຫາ​ໃໝ່​ຕາມ​ມາ​ຄື ຕ້ອງ​ໃຫ້​ຖືກ­ຕ້ອງ​ຕາມ​ລະ­ບຽບ​ການ​ເດີນ​ລົດ ເພາະ​ກ່ວ​າ​ລົດ​ຈະ​ອອກ​ແລ່ນ​ໄດ້​ນັ້ນ ຈະ​ຕ້ອງ​ມີ​ການ​ເສຍ​ເງິນ​ເພີ່ມ​ຂຶ້ນ​ຫຼາຍ​ແນວ ເຊັ່ນ: ຄ່າ​ທາງ ຄ່າ​ກວດ​ເຕັກ­ນິກ ຄ່າ​ປະ­ກັນ​ໄພ ແຖມ​ບໍ່​ພໍ​ຍັງ​ຫາ​ບ່ອນ​ຈອດ​ຍາກ ແມ່ນ​ກະ​ທັ້ງ​ໃນ​ໂຮງ­ການ ເພາະ​ຜູ້​ອື່ນ​ເຂົາ​ມີ​ກັນ​ຫຼາຍ​ແລ້ວ​ເຮົາ​ຈຶ່ງ​ຕື່ນ​ຕົວ ແຕ່​ເມື່ອ​ເວ­ລາ​ມີ​ວຽກ​ບ່ອນ​ອື່ນ​ຫາ​ບ່ອນ​ຈອດ​ກໍ​ແສນ​ຍາກ ບາງ​ຄັ້ງ​ກ່ວ​າ​ຈະ​ໄດ້​ຈອດ​ກໍ​ຕ້ອງ​ເສຍ​ເງິນ ບ່ອນ​ຈອດ​ເສຍ​ເງິນ​ຕາມ​ແຄມ​ທາງ​ກໍ​ມີ​ຫຼາຍ ຮ້ອງ​ຂໍ 2-3ນາ­ທີ ພໍ​ແວ່​ຊື້​ຢາ​ກິນ​ກໍ​ບໍ່​ໄດ້ ເຖິງ​ໄດ້​ກໍ​ຟັງ​ແລ້ວ​ບໍ່​ມ່ວນ​ຫູ ເພາະ​ຜູ້​ຂາຍ​ປີ້​ຈອດ​ລົດ​ບາງ​ຄົນ ທຳ​ຕົວ​ປານ​ເທວະ​ດາ​ນ້ອຍ.</p> <p style="text-align: justify; "> ສ່ວນ​ບ່ອນ​ຈອດ​ລົດ​ທີ່​ພໍ​ຈອດ​ໄດ້ ກໍ​ມີ​ທັງ​ຜູ້​ຈອດ​ດີ ຜູ້​ຈອດ​ເກະ​ກະ​ບໍ່​ມີ​ລະ­ບຽບ ຖ້າ​ຄົນ​ປະ­ເທດ​ທີ່​ຈະ­ເລີນ​ມາ​ພົບ​ເຫັນ​ເຂົາ​ຄົງ​ທ້ວງ​ວ່າ ມັນ​ເຮັດ​ແນວ​ນີ້​ໄດ້​ແນວ­ໃດ​ກັນ ? ຈາກ​ນັ້ນ​ພາບ​ພົດ​ຂອງ ສ.ສະ­ເໜ ກໍ​ອາດ​ຈະ​ຫຼຸດ​ລົງ ມີ​ບາງ​ຄັ້ງ​ລົດ​ຂະ­ໂມະ​ກາງ​ທາງ ອັນ​ເນື່ອງ​ຈາກ​ຄວາມ​ຮີບ​ດ່ວນ ແລະ ຄວາມ​ບໍ່​ລະ­ວັງ​ທັງ​ສອງ​ຝ່າຍ ແທນ​ທີ່​ຈະ​ເວົ້າ​ກັນ​ດີໆ ເພາະ​ກາງ​ທາງ​ຄົນ​ຫຸ້​້ມ​ເບິ່ງ ກັບ​ເປັນ​ການ​ທັກ​ທາຍ​ດ້ວຍ​ການ​ດ່າ​ກັນ​ກ່ອນ ໂຍນ​ຄວາມ​ຜິດ​ໃສ່​ກັນ​ກ່ອນ ຈິ່ງ​ວ່າ​ດີ​ນຳ​ກັນ​ຕາມ​ຫຼັງ ເມື່ອ​ເຈົ້າ​ໜ້າ­ທີ່​ມາ​ເຖິງ.</p> <p style="text-align: justify; "> ບັນ­ຫາ​ທີ່​ມາ​ພ້ອມ​ລົດ​ຈະ​ຮູ້­ສຶກ​ດີ​ກໍ​ຕໍ່​ມີ​ລົດ ຖ້າ​ລົດ​ເກົ່າ​ຍິ່ງ​ບໍ່​ອາດ​ພັນ​ລະ​ນາ­ລາຍ​ເສຍ ດັ່ງ­ນັ້ນ ການ​ທີ່​ຄອບ­ຄົວ​ໃດ​ຈະ​ມີ​ລົດ​ໜ້ອຍ​ຫຼາຍ​ຄັນ​ປານ­ໃດ ມັນ​ສົມ­ຄວນ​ແລ້ວ ຈະ​ຕ້ອງ​ໃຫ້​ມີ​ການ​ພິ­ຈາ­ລະ­ນາ​ກຳ­ນົດ ເພາະ​ສະ­ພາບ​ປັດ­ຈຸ­ບັນ​ນີ້ ລົດ​ອັ່ງ​ທາງ​ລົ້ນ​ທາງ​ຫຼາຍ​ແລ້ວ ໄປ​ມາ​ຫຍຸ້ງ­ຍາກ​ຫຼາຍ ອີກ​ປະ­ການ​ໜຶ່ງ ທາງ​ເດີນ​ພັດ​ມີ​ໜ້ອຍ ລົດ​ພັດ​ມີ​ຫຼາຍ ມີ​ບາງ​ບ່ອນ​ສຳ­ນັກ­ງານ​ອົງ­ການ​ຢູ່​ມໍ່​ເປັນ​ຈຸ້ມ​ກັນ​ໂພດ ອັນ​ເປັນ​ສາ­ເຫດ​ເຮັດ​ໃຫ້​ລົດ​ຄາ ບໍ່​ສາ­ມາດ​ເໜັງ​ໃນ​ຍາມ​ຊົ່ວ­ໂມງ​ຟ້າວ​ຟັ່ງ​ໄດ້ ໃນ​ສ່ວນ​ທີ່​ຈະ​ແກ້​ບັນ­ຫາ​ລົດ​ອັ່ງ​ລົດ​ຕິດ​ໄດ້​ນັ້ນ ບໍ່​ແມ່ນ​ເລື່ອງ​ສະ­ບາຍ​ໃຈ​ເລີຍ ຖ້າ­ວ່າ​ມີ​ປະ­ຊຸມ​ມີ​ເລື່ອງ​ດ່ວນໆ ທີ່​ຈະ​ເຮັດ​ໃນ​ຕົ້ນ​ຊົ່ວ­ໂມງ​ແລ້ວ​ຫົວ­ໃຈ ຍິ່ງ​ປານ​ຈະ​ລະ­ເບີດ ເລື່ອງ​ນີ້​ບໍ່​ແມ່ນ​ແຕ່​ເຈົ້າ​ໜ້າ­ທີ່​ຜູ້​ມີ​ສ່ວນ​ກ່ຽວ­ຂ້ອງ​ເທົ່າ​ນັ້ນ ເປັນ​ຫ່ວງ​ຖົງ​ສົ້ງ​ມັນ​ກໍ​ຄຶດ​ນຳ ເພາະ­ວ່າ​ເຈົ້າ​ຂອງ​ລົດ​ຈະ​ຈົກ​ຖົງ​ຊື້​ນ້ຳ­ມັນ​ຕິດ​ຈັກ​ຫຼິ້ນ​ລ້າງໆ​ຢ່າງ​ດົນ​ນານ ການ​ແກ້​ໄຂ​ພື້ນ­ຖານ ແຕ່­ລະ­ຄົນ​ຈະ​ຕ້ອງ​ຈິງ​ຈັງ​ຈິງ​ໃຈ ດ້ວຍ​ການ​ຫຼຸດ­ຜ່ອນ​ການ​ນຳ​ລົດ​ຕົນ​ເອງ ທີ່​ມີ​ຫຼາຍ​ຄັນ​ອອກ​ແລ່ນ​ຕາມ​ທ້ອງ​ຖະ­ໜົນ​ພາບ​ດຽວ​ກັນ ຄວນ​ຂີ່​ນຳ​ກັນ​ແດ່ ຖ້າ​ໄປ​ສາຍ​ດຽວ ອັນ​ດັບ​ຕໍ່​ໄປ​ຕ້ອງ​ພັດ­ທະ­ນາ​ລະ­ບົບ​ຂົນ­ສົ່ງ​ມວນ​ຊົນ (ລົດ­ເມ) ບໍ­ລິ­ການ​ຖືກ​ໂມງ​ຖືກ​ຍາມ ໃຫ້​ຄົນ​ໄປ​ການ​ໄວ້­ໃຈ​ໄດ້ ສຳ­ນັກ­ງານ ອົງ­ການ ຄວນ​ຕັ້ງ​ຢູ່​ຫ່າງໆ​ກັນ​ແດ່ ບໍ່​ດັ່ງ­ນັ້ນ​ພວກ​ເຮົາ​ອາດ​ຈະ​ເຫັນ​ເສັ້ນ­ທາງ​ທີ່​ສັບ­ສົນ ລົດ​ແຫຍ້​ໃນ​ຍາມ​ເຂົ້າ​ການ​ເລີກ​ການ​ທຸກ​ມື້​ນັ້ນ​ແລ.</p> <p style="text-align: justify; "> <strong>ໂດຍ: ຊຽງ​ເອງ</strong></p>

ຂ່າວທີ່ກ່ຽວຂ້ອງ