ຕ້ອງດັບມອດ !

<p style="text-align: justify;"> ຂ່າວ​ຄາວ​ເລື່ອງ​ການ​ປຸ້ນ​ຈີ້... ຊີງ​ຊັບ ປະ­ກົດ​ວ່າ​ພົ້ນ​ເດັ່ນ​ຂຶ້ນ​ຢູ່​ນະ­ຄອນ­ຫຼວງ​ໃນ​ທ້າຍ​ປີ 2011 ແລະ ຕົ້ນ​ປີ 2012 ຜູ້​ຕ້ອງ​ຫາ​ສ່ວນ​ຫຼາຍ​ແມ່ນ​ຊາຍ​ໜຸ່ມ​ທີ່​ມີ​ອາ­ຍຸ​ລະ­ຫວ່າງ 22-28 ປີ ພວກ​ດັ່ງ­ກ່າວ​ນີ້​ຊາບ​ວ່າ ມີ​ຜົນ​ມາ​ຈາກ​ການ​ເສບ​ຢາ​ເສບ​ຕິດ ເປັນ­ຕົ້ນ ຢາ​ບ້າ ເລີຍ​ພາ­ໃຫ້​ຄຶກ​ຄະ­ນອງ​ບໍ່​ເກງ​ກົວ​ກົດ­ໝາຍ​ບ້ານ​ເມືອງ... ຄິດ​ຫາ​ເງິນ​ທາງ​ລັດ ຫາ​ງ່າຍ​ເພື່ອ​ມາ​ເປັນ​ສິ່ງ​ບັນ­ລຸ​ຄວາມ​ມຶນ­ເມົາ​ດັ່ງ­ກ່າວ.</p> <p style="text-align: justify;"> ຕໍ່​ສະ­ພາບ​ປະ­ກົດ​ການ​ຫຍໍ້­ທໍ້​ດັ່ງ­ກ່າວ​ທີ່​ເກີດ​ຂຶ້ນ​ນັ້ນ ກໍ​ບໍ່​ແມ່ນ​ວ່າ​ເຈົ້າ​ໜ້າ­ທີ່​ເຮົາ​ຊິ​ດັບ​ມອດ​ບໍ່​ໄດ້​ເນີ ! ເຈົ້າ​ໜ້າ­ທີ່​ປາບ ແລະ ຈັບ​ກຸມ​ໄດ້​ຫຼາຍ​ຄະ­ດີ​ດັ່ງ​ທີ່​ເປັນ​ຂ່າວ​ຕາມ​ສື່​ມວນ​ຊົນ ແລະ ໄດ້​ປະ­ກອບ​ສຳ­ນວນ​ຄະ­ດີ​ສົ່ງ​ໃຫ້​ໄອ​ຍະ​ການ ເພື່ອ​ດຳ­ເນີນ​ການ​ຮ້ອງ​ຟ້ອງ​ສານ​ຕັດ­ສິນ​ຕາມ​ກົດ­ໝາຍ.</p> <p style="text-align: justify;"> ເບື້ອງ​ການ​ນຳ​ນະ­ຄອນ­ຫຼວງ​ເພິ່ນ​ກໍ​ໄດ້​ຕິດ­ຕາມ ແລະ ໃຫ້​ທິດ​ຊີ້​ນຳ​ຢ່າງ​ໃກ້­ຊິດ ໂດຍ​ຜ່ານ​ຂະ​ບວນ​ການ​ກໍ່­ສ້າງ​ຮາກ​ຖານ​ການ­ເມືອງ ແລະ ພັດ­ທະ­ນາ​ຊົນ­ນະ­ບົດ ແນ­ໃສ່​ສະ­ກັດ​ກັ້ນ​ບໍ່​ໃຫ້​ມັນ​ແຜ່​ລາມ ໂດຍ​ຖື​ວຽກ​ນີ້​ເປັນ​ໜຶ່ງ​ໃນ 6 ສ ທີ່​ນະ­ຄອນ­ຫຼວງ​ຕ້ອງ​ສູ້​ຊົນ​ໃຫ້​ເຮັດ​ສຳ­ເລັດ​ຜົນ.</p> <p style="text-align: justify;"> ສ່ວນ​ຂັ້ນ​ເທິງ​ກໍ​ບໍ່​ໄດ້​ນິ້ງ​ນອນ​ໃຈ ເຊິ່ງ​ຫຼ້າ​ສຸດ​ນີ້​ຄື​ໃນ​ວັນ​ທີ 9 ມັງ­ກອນ 2012 ໃນ​ໂອ­ກາດ​ມີ​ກອງ​ປະ­ຊຸມ​ກ່ຽວ​ກັບ​ວຽກ​ງານ​ຕ້ານ-ສະ­ກັດ​ກັ້ນ ແລະ ແກ້​ໄຂ​ປະ­ກົດ​ການ​ຫຍໍ້­ທໍ້​ທີ່​ເກີດ​ຂຶ້ນ​ຢູ່​ນະ­ຄອນ­ຫຼວງ​ວຽງ​ຈັນ.... ທ່ານ​ນາ­ຍົກ­ລັດ­ຖະ­ມົນ­ຕີ​ກໍ​ໃຫ້​ກຽດ​ເຂົ້າ​ຮ່ວມ ແລະ ໃຫ້​ທິດ​ຊີ້​ນຳ​ຕໍ່​ກອງ​ປະ­ຊຸມ ເຊິ່ງ​ທ່ານ​ໄດ້​ເນັ້ນ​ວ່າ: ສາ­ເຫດ​ຕົ້ນ­ຕໍ​ວ່າ​ແມ່ນ​ຄວາມ​ຮັບ­ຜິດ­ຊອບ​ການ­ເມືອງ​ຂອງ​ພະ­ນັກ­ງານ ທະ­ຫານ ຕຳ­ຫຼວດ ແລະ ປະ­ຊາ­ຊົນ​ຈຳ­ນວນ​ໜຶ່ງ ຍັງ​ບໍ່​ທັນ​ເປັນ​ເຈົ້າ​ການ​ແກ້​ໄຂ​ປະ­ກົດ​ການ​ຫຍໍ້­ທໍ້​ຢ່າງ​ຈິງ​ຈັງ ບໍ່​ທັນ​ເດັດ­ຂາດ ບໍ່​ທັນ​ເຂັ້ມ​ງວດ​ແທ້.</p> <p style="text-align: justify;"> ກ່ຽວ​ກັບ​ບັນ­ຫາ​ປະ­ກົດ​ການ​ຫຍໍ້­ທໍ້​ທີ່​ເກີດ​ຂຶ້ນ ນາ­ຍົກ­ລັດ­ຖະ­ມົນ­ຕີ​ໄດ້​ສະ­ເໜີ​ບາງ​ທັດ­ສະ­ນະ ເພື່ອ​ແກ້​ໄຂ​ບັນ­ຫາ ແລະ ໃຫ້​ຜູ້​ທີ່​ກ່ຽວ­ຂ້ອງ ຕ້ອງ​ເອົາ­ໃຈ­ໃສ່​ປະ­ຕິ­ບັດ​ບາງ​ຄາດ­ໝາຍ​ຕົ້ນ­ຕໍ ຄື: ຕ້ອງ​ຊອກ​ຫາ​ສາ­ເຫດ ແລະ ທີ່​ມາ​ຢ່າງ​ເລິກ­ເຊິ່ງ ຖືກ­ຕ້ອງ ຈະ­ແຈ້ງ ແລ້ວ​ຈຶ່ງ​ດຳ­ເນີນ​ມາດ​ຕະ­ການ​ແກ້​ໄຂ​ຢ່າງ​ເປັນ​ລະ­ບົບ ການ​ແກ້​ໄຂ​ບັນ­ຫາ​ປະ­ກົດ​ການ​ຫຍໍ້­ທໍ້ ບໍ່​ແມ່ນ​ຈະ​ລໍ­ຖ້າ​ເຫດ­ການ​ເກີດ​ຂຶ້ນ​ແລ້ວ​ຈຶ່ງ​ແກ້​ໄຂ ຕ້ອງ​ມີ​ແຜນ​ແກ້​ສະ­ເພາະ​ໜ້າ ແລະ ຍາວ​ນານ ໄລ­ຍະ​ໃດ​ຄວນ​ແກ້​ໄຂ​ແນວ­ໃດ.</p> <p style="text-align: justify;"> ທຸກໆ​ປະ­ກົດ​ການ​ຫຍໍ້­ທໍ້​ທີ່​ເກີດ​ຂຶ້ນ ນາ­ຍົກ­ລັດ­ຖະ­ມົນ­ຕີ​ເຫັນ​ຄວນ ມອບ​ໃຫ້​ເຈົ້າ​ໜ້າ­ທີ່​ຕຳ­ຫຼວດ​ປະ­ຕິ­ບັດ​ຫຼັກ​ວິ­ຊາ​ສະ­ເພາະ ແລະ ຂັ້ນ​ຕອນ​ຂອງ​ກົດ­ໝາຍ ຜູ້​ມີ​ສິດ​ອຳ­ນາດ​ຕ່າງໆ ທີ່​ບໍ່​ແມ່ນ​ຄວາມ​ຮັບ­ຜິດ­ຊອບ​ຂອງ​ຕົນ ໃຫ້​ຢຸດ​ຫຍຸ້ງ​ກ່ຽວ​ແຊກ​ແຊງ​ຕໍ່​ການ​ດຳ­ເນີນ​ຄະ­ດີ ຫຼື ມ້າງ​ຄະ­ດີ​ຂອງ​ເຈົ້າ​ໜ້າ­ທີ່​ຕຳ­ຫຼວດ ຖ້າ​ກວດ​ເຫັນ​ການ​ດຳ­ເນີນ​ຄະ­ດີ​ທີ່​ບໍ່​ຖືກ­ຕ້ອງ ແລະ ບໍ່​ເປັນ​ທຳ ຜູ້​ອັບ​ປະ­ໂຫຍດ​ສາ­ມາດ​ຮ້ອງ​ຟ້ອງ ແລະ ລາຍ​ງານ​ຕໍ່​ພາກ­ສ່ວນ​ກ່ຽວ­ຂ້ອງ​ຕາມ​ລະ­ບຽບ​ກົດ­ໝາຍ ຖ້າ​ກວດ​ເຫັນ​ຄວາມ​ຜິດ ຫຼື ພຶດ­ຕິ​ກຳ​ທີ່​ບໍ່​ປອດ​ໃສ​ຂອງ​ເຈົ້າ​ໜ້າ­ທີ່ ຕ້ອງ​ດຳ­ເນີນ​ຄະ­ດີ​ຕາມ​ລະ­ບຽບ​ກົດ­ໝາຍ​ຢ່າງ​ເດັດ­ຂາດ.</p> <p style="text-align: justify;"> ຈາກ​ຄວາມ​ເດັດ­ຂາດ ແລະ ການ​ແບ່ງ​ຄວາມ​ຮັບ­ຜິດ­ຊອບ​ຢ່າງ​ຮັດ­ກຸມ ຄິດ​ວ່າ​ປະ­ກົດ​ການ​ຫຍໍ້­ທໍ້​ຢູ່​ນະ­ຄອນ­ຫຼວງ​ພວກ​ເຮົາ ຈະ​ໄດ້​ຖືກ​ດັບ​ມອບ​ບໍ່​ໄດ້​ແຜ່​ລາມ​ຢ່າງ​ແນ່­ນອນ.</p>