ຂ່າວຫຼ້າສຸດ

ມູນເຊື້ອຂອງກອງທັບທີ່ຄວນຮູ້

2.076 13 ມ.ກ. 2012 ນານາສາລະ

<p style="text-align: justify;"> ຍັງ​ອີກ​ບໍ່​ພໍ​ທໍ່​ໃດ​ວັນ ກໍ​ຈະ​ເຖິງ​ວັນ​ສຳ­ຄັນ​ຂອງ​ຊາດ​ເຮົາ​ນັ້ນ​ຄື ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 63 ປີ ໃນ​ແຕ່​ລະ​ປີ ຄໍ​ລຳ​ພວກ​ເຮົາ ໄດ້​ລົງ​ພິມ​ບົດ​ຮຽກ­ຮ້ອງ​ໃຫ້​ຄົນ​ລຸ້ນ​ໃໝ່ ຊອກ​ຮູ້​ຮ່ຳ­ຮຽນ​ມູນ­ເຊື້ອ ແລະ ພ້ອມ​ດຽວ​ກັນ ກໍ​ຮຽກ­ຮ້ອງ​ໃຫ້​ມີ​ການ​ໄປ​ຢ້ຽມ­ຢາມ​ອ້າຍ​ນ້ອງ​ທະ­ຫານ ທີ່​ປະ­ຕິ­ບັດ​ໜ້າ­ທີ່​ຢູ່​ເຂດ​ຊາຍ​ແດນ ຫ່າງ​ໄກ​ສອກ­ຫຼີກ.</p> <p style="text-align: justify;"> ເມື່ອ​ເວົ້າ​ເຖິງ​ມູນ­ເຊື້ອ ຄໍ​ລຳ​ພວກ​ເຮົາ​ຂໍ​ສະ­ເໜີ​ໃຫ້​ເພື່ອນ​ຜູ້​ອ່ານ ໄດ້​ຮູ້ 6 ມູນ­ເຊື້ອ​ຂອງ​ກອງ­ທັບ​ເຮົາ​ດັ່ງ­ນີ້:</p> <p style="text-align: justify;"> 1. ກອງ­ທັບ​ປະ­ຊາ­ຊົນ​ລາວ ມີ​ຄວາມ​ຈົ່ງ​ຮັກ​ພັກ­ດີ​ຕໍ່​ພັກ ຕໍ່​ປະ­ຊາ­ຊົນ ຕໍ່​ອຸ­ດົມ​ການ​ສັງ­ຄົມ​ນິ­ຍົມ ໃນ​ພຶດ­ຕິ​ກຳ​ແຫ່ງ​ການ​ຕໍ່­ສູ້​ກູ້​ຊາດ​ຍືດ​ເຍື້ອ​ຍາວ​ນານ ໄດ້​ຢັ້ງ­ຢືນ​ຢ່າງ​ຈະ​ແຈ້ງ­ວ່າ ກອງ­ທັບ​ປະ­ຊາ­ຊົນ​ລາວ ມາ​ຈາກ​ປະ­ຊາ­ຊົນ ໂດຍ​ປະ­ຊາ­ຊົນ ແລະ ເພື່ອ​ປະ­ຊາ­ຊົນ ພາຍ​ໃຕ້​ການ​ນຳ­ພາ ແລະ ຝຶກ​ຝົນ​ຫຼໍ່​ຫຼອມ​ຈາກ​ພັກ ຍາມ​ໃດ​ກໍ​ມີ​ຄວາມ​ຈົ່ງ​ຮັກ​ພັກ­ດີ ມີ​ຄວາມ​ບໍ­ລິ­ສຸດ​ຜຸດ​ຜ່ອງ ມີ​ຄວາມ​ເດັດ­ດ່ຽວ​ໜຽວ​ແໜ້ນ ມີ​ລະ­ບຽບ​ແບບ­ແຜນ​ທີ່​ເຂັ້ມ​ງວດ ມີ​ຄວາມ​ອົງ­ອາດ​ກ້າ­ຫານ ມີ​ນ້ຳ­ໃຈ​ເສຍ­ສະ­ຫຼະ​ອັນ​ສູງ​ສົ່ງ ພ້ອມ​ທັງ​ຍອມ​ເສຍ­ສະ­ຫຼະ​ຊີ­ວິດ​ຕົນ ເພື່ອ​ຊາດ ເພື່ອ​ປະ­ຊາ­ຊົນ ເຊິ່ງ​ສິ່ງ​ເຫຼົ່າ​ນີ້ ມັນ​ໄດ້​ກາຍ­ເປັນ​ມູນ­ເຊື້ອ​ອັນ​ສະ­ຫງ່າ​ອົງ­ອາດ​ຂອງ​ກອງ­ທັບ ແລະ ກຳ­ລັງ​ປະ­ກອບ​ອາ­ວຸດ​ຂອງ​ປະ­ຊາ­ຊົນ​ເຮົາ​ຕະ­ຫຼອດ​ມາ.</p> <p style="text-align: justify;"> 2. ກອງ­ທັບ​ປະ­ຊາ­ຊົນ​ລາວ ມີ​ນ້ຳ­ໃຈ​ຕໍ່­ສູ້​ພິ­ລະ​ອາດ​ຫານ ກ້າ­ແກ່ນ ໜຽວ​ແໜ້ນ ມີ​ໄຫວ​ພິບ ແລະ ປະ­ດິດ​ສ້າງ ໃນ​ເບື້ອງ​ຕົ້ນ ກອງ­ທັບ​ເຮົາ​ໄດ້​ຮັບ​ການ​ກໍ່​ຕັ້ງ ມີ​ກຳ­ລັງ​ບໍ່​ເທົ່າ­ໃດ​ຄົນ ເຊິ່ງ​ປະ­ກອບ​ອາ­ວຸດ​ປະ­ຖົມ​ປະ​ຖານ ແຕ່​ພາຍ​ໃຕ້​ການ​ນຳ­ພາ​ຂອງ​ພັກ ກອງ­ທັບ​ເຮົາ​ໄດ້​ຮັບ​ການ​ກໍ່­ສ້າງ ແລະ ປັບ­ປຸງ​ໃຫ້​ເຕີບ​ໃຫຍ່​ຂະ­ຫຍາຍ­ຕົວ ທັງ​ດ້ານ​ປະ­ລິ­ມານ ແລະ ຄຸນ​ນະ​ພາບ​ຢ່າງ​ບໍ່​ຢຸດ​ຢັ້ງ ມີ​ຄວາມ​ອົງ­ອາດ​ກ້າ­ຫານ ບໍ່​ຫວັ່ນ­ໄຫວ​ຄອນ​ແຄນ​ຕໍ່​ຄວາມ​ລຳ­ບາກ​ທຸ­ລະ­ກັນ­ດານ​ໃດໆ ຍິ່ງ​ຕີ​ກໍ​ຍິ່ງ​ໄດ້​ຮັບ​ໄຊ­ຊະ­ນະ ຍິ່ງ​ສູ້​ຮົບ​ກໍ​ຍິ່ງ​ເຕີບ​ໃຫຍ່​ເຂັ້ມ­ແຂງ ເຊິ່ງ​ຜ່ານ​ໄລ­ຍະ​ການ​ຕໍ່­ສູ້​ກູ້​ຊາດ ຕ້ານ​ຈັກ­ກະ­ພັດ​ຜູ້​ຮຸກ​ຮານ​ອັນ​ຍືດ​ເຍື້ອ​ຍາວ​ນານ ໄດ້​ເກີດ​ມີ​ບັນ­ດາ​ນັກ­ຮົບ​ດີ­ເດັ່ນ ນັກ­ຮົບ​ແຂ່ງ­ຂັນ ແລະ ນັກ­ຮົບ​ວິ­ລະ​ຊົນ ເຊິ່ງ​ລ້ວນ​ແຕ່​ໄດ້​ສັງ­ກັດ​ຢູ່​ໃນ​ກຳ­ລັງ​ທະ­ຫານ​ຫຼວງ ທະ­ຫານ​ທ້ອງ­ຖິ່ນ ແລະ ກອງ​ຫຼອນ ມີ​ທັງ​ກຳ­ລັງ​ເພດ​ຍິງ ແລະ ເພດ​ຊາຍ ຢ່າງ​ຫຼວງ­ຫຼາຍ.</p> <p style="text-align: justify;"> 3. ກອງ­ທັບ​ປະ­ຊາ­ຊົນ​ລາວ ມີ​ນ້ຳ­ໃຈ​ດຸ​ໜັ່ນ​ຂະ­ຫຍັນ​ພຽນ ອອກ­ແຮງ​ງານ​ເພີ່ມ​ພູນ​ຜະ­ລິດ­ຜົນ ແລະ ປະ­ຢັດ​ມັດ­ທະ­ຍັດ ກອງ­ທັບ​ເຮົາ​ເປັນ​ລູກ​ຫຼານ​ຂອງ​ປະ­ຊາ­ຊົນ ເຊິ່ງ​ໄດ້​ສືບ​ທອດ​ຮັກ­ສາ​ມູນ­ເຊື້ອ​ອັນ​ດີ­ງາມ​ໃນ​ການ​ອອກ­ແຮງ​ງານ ເພີ່ມ​ພູນ​ຜະ­ລິດ­ຜົນ​ດ້ວຍ​ຄວາມ​ດຸ­ໝັ່ນ​ຂະ­ຫຍັນ​ພຽນ ບົນ​ຈິດ­ໃຈ​ເພິ່ງ​ຕົນ​ເອງ ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ເຂົ້າ​ຮ່ວມ​ໃນ​ການ​ສ້າງ­ສາ​ພັດ­ທະ­ນາ​ເສດ­ຖະ­ກິດ-ສັງ­ຄົມ ປະ­ກອບ­ສ່ວນ​ເຂົ້າ​ໃນ​ການ​ສ້າງ​ພື້ນ­ຖານ​ວັດ­ຖຸ-ເຕັກ­ນິກ​ໃຫ້​ແກ່​ປະ­ເທດ​ຊາດ ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ກອງ­ທັບ ແລະ ປະ­ຊາ­ຊົນ​ໃຫ້​ດີ​ຂຶ້ນ.</p> <p style="text-align: justify;"> 4. ກອງ­ທັບ​ປະ­ຊາ­ຊົນ​ລາວ ຍາມ​ໃດ​ກໍ​ມີ​ຄວາມ​ສາ­ມັກ­ຄີ​ອັນ​ແໜ້ນ​ແຟ້ນ​ກັບ​ປະ­ຊາ­ຊົນ​ບັນ­ດາ­ເຜົ່າ.</p> <p style="text-align: justify;"> ຄວາມ​ສາ­ມັກ­ຄີ​ເປັນ​ມູນ­ເຊື້ອ​ອັນ​ປະ­ເສີດ​ຂອງ​ຊາວ​ລາວ ແລະ ເປັນ​ທາດ​ແທ້​ອັນ​ດີ­ງາມ​ທີ່​ມີ​ມາ​ແຕ່­ໃດໆ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ດ້ວຍ​ເຫດ​ນັ້ນ ກອງ­ທັບ​ເຮົາ​ເວ­ລາ​ໃດ​ກໍ​ຖື​ວ່າ ຄວາມ​ສາ­ມັກ­ຄີ ເປັນ​ປັດ​ໄຈ​ສຳ­ຄັນ​ກ່ວ​າ​ໝູ່ ຂອງ​ຄວາມ​ເປັນ​ເອ­ກະ​ພາບ​ແຫ່ງ​ຊາດ ສະ­ນັ້ນ ກອງ­ທັບ​ເຮົາ ຍາມ​ໃດ​ກໍ​ໄດ້​ເອົາ­ໃຈ­ໃສ່​ຢ່າງ​ຈົດ­ຈໍ່​ຕໍ່​ຄວາມ​ສາ­ມັກ­ຄີ​ປອງ​ດອງ ອີງ­ໃສ່​ປະ­ຊາ­ຊົນ​ຢ່າງ​ໜັກ​ແໜ້ນ ເພື່ອ​ຕໍ່­ສູ້​ຕ້ານ​ສັດ­ຕູ​ຜູ້​ຮຸກ​ຮານ ເຮັດ​ໃຫ້­ການ​ຕໍ່­ສູ້​ກູ້​ຊາດ​ຂອງ​ກອງ­ທັບ​ປະ­ຊາ­ຊົນ​ລາວ ເຕີບ​ໃຫຍ່​ຂະ­ຫຍາຍ­ຕົວ ແລະ ຍາດ​ໄດ້​ໄຊ­ຊະ­ນະ​ຢ່າງ​ສົມ­ບູນ ໃນ​ປັດ­ຈຸ­ບັນ ການ​ເສີມ​ຂະ­ຫຍາຍ​ມູນ­ເຊື້ອ​ສາ­ມັກ­ຄີ​ປອງ​ດອງ ກໍ​ຍິ່ງ​ມີ​ຄວາມ​ໝາຍ​ສຳ­ຄັນ ຕໍ່​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ​ໃຫ້​ມັ່ງ​ຄັ່ງ​ເຂັ້ມ­ແຂງ ປະ­ຊາ­ຊົນ​ຮັ່ງ­ມີ​ຜາ​ສຸກ ສັງ­ຄົມ​ມີ​ຄວາມ​ສາ­ມັກ­ຄີ​ປອງ​ດອງ ປະ­ຊາ­ທິ­ປະ­ໄຕ ຍຸ­ຕິ​ທຳ ແລະ ສີ­ວິ­ໄລ.</p> <p style="text-align: justify;"> 5. ກອງ­ທັບ​ປະ­ຊາ­ຊົນ​ລາວ ໄດ້​ສາ­ມັກ­ຄີ​ກັບ​ກອງ­ທັບ​ປະ­ຊາ­ຊົນ ບັນ­ດາ​ປະ­ເທດ​ສັງ­ຄົມ​ນິ­ຍົມ​ອ້າຍ​ນ້ອງ ແລະ ບັນ­ດາ​ປະ­ເທດ​ເພື່ອນ​ມິດ​ທີ່​ກ້າວ­ໜ້າ​ໃນ​ໂລກ ໂດຍ​ສະ­ເພາະ​ແມ່ນ​ຄວາມ​ສາ­ມັກ­ຄີ​ຮ່ວມ​ສຳ­ພັນ ສູ້​ຮົບ​ແບບ​ພິ­ເສດ​ກັບ​ກອງ­ທັບ ແລະ ປະ­ຊາ­ຊົນ​ຫວຽດ­ນາມ​ອ້າຍ​ນ້ອງ.</p> <p style="text-align: justify;"> ໃນ​ພາ­ລະ­ກິດ​ປະ­ຕິ­ວັດ​ປົດ​ປ່ອຍ​ຊາດ ກອງ­ທັບ​ເຮົາ​ກໍ​ໄດ້​ຖື​ສຳ­ຄັນ ຄວາມ​ສາ­ມັກ­ຄີ​ສູ້​ຮົບ​ຕ້ານ​ຈັກ­ກະ­ພັດ​ຜູ້​ຮຸກ​ຮານ ເຊິ່ງ​ໄດ້​ກາຍ­ເປັນ​ກົດ­ເກນ​ແນ່­ນອນ​ອັນ​ໜຶ່ງ ເພື່ອ​ຍາດ​ເອົາ​ໄຊ­ຊະ­ນະ​ພິ­ເສດ ໃນ​ສາຍ​ພົວ­ພັນ​ສາ­ມັກ­ຄີ​ສູ້​ຮົບ​ອັນ​ແໜ້ນ​ແຟ້ນ ເລິກ­ເຊິ່ງ ລະ­ຫວ່າງ​ລາວ​ກັບ​ຫວຽດ­ນາມ ເຊິ່ງ​ກຳ­ລັງ​ປະ­ກອບ​ອາ­ວຸດ​ປະ­ຊາ­ຊົນ​ລາວ​ເຮົາ ຍາມ​ໃດ​ກໍ​ໄດ້​ຄຽງ​ບ່າ​ຄຽງ​ໄຫຼ່​ສູ້​ຮົບ ແລະ ໄດ້​ຮັບ​ການ​ຊ່ວຍ­ເຫຼືອ​ຢ່າງ​ຈິງ​ໃຈ​ຈາກ​ພັກ-ລັດ ແລະ ປະ­ຊາ­ຊົນ​ຫວຽດ­ນາມ ພ້ອມ​ກັນ​ນັ້ນ ກໍ​ໄດ້​ຍາດ​ແຍ່ງ​ການ​ສະ­ໜັບ­ສະ­ໜູນ ແລະ ການ​ຊ່ວຍ­ເຫຼືອ​ຂອງ​ສາ­ກົນ ໂດຍ​ສະ­ເພາະ​ແມ່ນ​ບັນ­ດາ​ປະ­ເທດ​ສັງ­ຄົມ​ນິ­ຍົມ​ອ້າຍ​ນ້ອງ.</p> <p style="text-align: justify;"> 6. ກອງ­ທັບ​ປະ­ຊາ­ຊົນ​ລາວ ເວ­ລາ​ໃດ​ກໍ​ຮັກ­ສາ​ມູນ­ເຊື້ອ​ອັນ​ດີ­ງາມ ມີ​ປະ­ຊາ­ທິ­ປະ­ໄຕ ແລະ ມີ​ລະ­ບຽບ​ວິ­ໄນ ພັກ​ເຮົາ​ຖື​ວ່າ: ປະ­ຊາ­ທິ­ປະ­ໄຕ ທັງ​ແມ່ນ​ຈຸດ­ໝາຍ ທັງ​ແມ່ນ​ກຳ­ລັງ​ດັນ​ຂອງ​ພາ­ລະ­ກິດ​ປະ­ຕິ­ວັດ​ຂອງ​ປະ­ເທດ​ເຮົາ ການ​ເສີມ​ຂະ­ຫຍາຍ​ປະ­ຊາ­ທິ­ປະ­ໄຕ ແມ່ນ​ຂະ​ບວນ​ວິ­ວັດ​ໜຶ່ງ ທີ່​ຕິດ​ພັນ​ກັບ​ຈັງ­ຫວະ​ຂະ­ຫຍາຍ­ຕົວ ໃນ​ທຸກ​ດ້ານ​ຂອງ​ປະ­ເທດ​ຊາດ ດັ່ງ­ນັ້ນ ກອງ­ທັບ​ເຮົາ ເວ­ລາ​ໃດ​ກໍ​ໄດ້​ຍົກ​ສູງ ແລະ ເປີດ​ກ້ວ​າງ​ປະ­ຊາ­ທິ­ປະ­ໄຕ ເຄົາ­ລົບ ແລະ ປະ­ຕິ­ບັດ​ລະ­ບຽບ​ວິ­ໄນ​ເຂັ້ມ​ງວດ ປະ­ຕິ­ບັດ​ສິດ​ເປັນ​ເຈົ້າ​ຂອງ​ປະ­ຊາ­ຊົນ​ຢ່າງ​ເຕັມ​ສ່ວນ ແລະ ຄົບ​ຖ້ວນ ຕັ້ງ­ໜ້າ​ປົກ​ປັກ​ຮັກ­ສາ​ຄວາມ​ເປັນ​ເອ­ກະ­ລາດ ອະ­ທິ­ປະ​ໄຕ​ຂອງ​ຊາດ ແລະ ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ໄວ້​ໄດ້​ຢ່າງ​ໝັ້ນ­ຄົງ.</p> <p style="text-align: justify;"> ມູນ­ເຊື້ອ​ເຫຼົ່າ­ນັ້ນ ສົມ­ຄວນ​ແກ່​ທຸກ​ຊັ້ນ​ຄົນ ທຸກ​ເຜົ່າ​ຊົນ ໃນ​ທົ່ວ​ປະ­ເທດ ຄວນ​ຮຽນ​ຮູ້ ແລະ ເອົາ​ເປັນ​ແບບ­ຢ່າງ.</p> <p style="text-align: justify;"> <strong>ນ້ຳ­ໃຈ​ວັນ​ທີ 20 ມັງ­ກອນ ໝັ້ນ­ຍືນ</strong></p>

ຂ່າວທີ່ກ່ຽວຂ້ອງ