ຂອງຂວັນປີໃໝ່ຄືໃບປະລິນຍາ

3.021 03 ມ.ກ. 2012 ສຶກສາ
ຂອງຂວັນປີໃໝ່ຄືໃບປະລິນຍາ

<p style="text-align: justify;"> ຂອງ­ຂວັນ​ລາ­ງວັນ​ທີ່​ໄດ້​ມາ ແມ່ນ​ມີ­ຄ່າ​ທີ່​ສຸດ​ສຳ­ລັບ​ທຸກໆ​ຄົນ ຍິ່ງ​ເປັນ​ຂອງ­ຂວັນ​ທີ່​ໄດ້​ມາ​ຍ້ອນ​ການ​ແລກ­ປ່ຽນ​ຢາດ ເຫື່ອ­ແຮງ​ກາຍ​ຂອງ​ຕົນ​ເອງ​ຂອງ​ຜູ້​ທີ່​ເຮົາ​ຮັກ ເຄົາ­ລົບ​ບູ­ຊາ ຍິ່ງ​ພາ­ໃຫ້​ຂອງ​ທີ່​ໄດ້​ມາ​ນັ້ນ​ມີ­ຄ່າ​ສູງ​ຂຶ້ນ​ຫຼາຍ​ເທົ່າ.</p> <p style="text-align: justify;"> ທ້າວ ບຸນ​ມີ ວຽງ​ໄຊ ຫາ​ກໍ​ຮັບ​ປະ­ລິນ­ຍາ​ໃໝ່ໆ​ໃນ​ທ້າຍ​ເດືອນ​ທັນ­ວາ 2011 ທີ່​ຜ່ານ​ມາ ຈາກ​ວິ­ທະ­ຍາ­ໄລ​ກົດ­ໝາຍ​ພາກ​ກາງ ນະ­ຄອນ­ຫຼວງ​ວຽງ​ຈັນ ອັນ​ເປັນ­ຄວາມ​ພາກ­ພູມ​ໃຈ​ໃນ​ຊີ­ວິດ ຂອງ​ການ​ຕັ້ງ­ໃຈ​ໄຝ່​ຝັນ​ມາ​ດົນ​ນານ ດ້ວຍ​ຄວາມ​ອົດ­ສາ​ພະ­ຍາ­ຍາມ​ມາ​ໂດຍ​ຕະ­ຫຼອດ.</p> <p style="text-align: justify;"> <strong>ລາວ​ກ່າວ​ວ່າ: </strong>ເນື່ອງ​ຈາກ​ເປັນ​ເດັກ​ກຳ­ພ້າ​ພໍ່​ມາ​ແຕ່​ຍັງ​ນ້ອຍ ບວກ​ກັບ​ຖາ­ນະ​ທາງ​ຄອບ­ຄົວ​ກໍ​ບໍ່​ຄ່ອຍ​ມີ​ປານ­ໃດ ເປັນ​ຊາວ­ນາ ແລະ ມີ​ນ້ອງ​ຍັງ​ນ້ອຍ ໃນ​ຖາ­ນະ​ທີ່​ເປັນ​ລູກ​ຊາຍ​ກົກ ຈະ​ຕ້ອງ​ເຮັດ​ໜ້າ­ທີ່​ຊ່ວຍ​ແມ່​ທຳ​ມາ​ຫາ​ກິນ​ລ້ຽງ​ນ້ອງ ແຕ່​ຍ້ອນ​ຄວາມ​ໄຝ່​ຝັນ​ຢາກ​ມີ​ປະ­ລິນ­ຍາ​ຄື​ກັບ​ຄົນ​ອື່ນ ພາຍ­ຫຼັງ​ທີ່​ຮຽນ​ຈົບ ມສ.ຜາ​ເມືອງ ເມືອງ​ບໍ​ລິ​ຄຳ ແຂວງ​ບໍ​ລິ​ຄຳ​ໄຊ ກໍ​ມຸ່ງ​ໜ້າ​ເຂົ້າ​ສູ່​ນະ­ຄອນ­ຫຼວງ​ວຽງ​ຈັນ ເພື່ອ​ມາ​ສຶກ​ສາ​ຮ່ຳ­ຮຽນ​ເອົາ​ວິ­ຊາ​ຄວາມ​ຮູ້ ຊຶ່ງ​ໄດ້​ປະ​ແມ່ ແລະ ນ້ອງ ຕ້ອງ​ສູ້​ຊົນ​ທຳ​ມາ​ຫາ​ກິນ​ຊ່ວຍ​ກັນ ແລະ ທັງ​ຫາ​ເງິນ​ເປັນ​ທຶນ­ຮອນ​ມາ​ຊ່ວຍ​ຕົນ​ເອງ ເພື່ອ​ຮຽນ​ຕໍ່­ໃຫ້​ຈົນ​ຈົບ​ໄລ­ຍະ 5 ປີ.</p> <p style="text-align: justify;"> ດ້ວຍ​ຄວາມ​ຕັ້ງ­ໃຈ ບວກ​ກັບ​ແຮງ​ງານ​ຊຸກ­ຍູ້​ຂອງ​ຜູ້​ເປັນ​ແມ່ ແລະ ນ້ອງ ເຮັດ​ໃຫ້​ຕົນ​ເອງ​ຍິ່ງ​ມີ​ກຳ­ລັງ​ສຶກ​ສາ​ຮ່ຳ­ຮຽນ ປະ­ພຶດ​ປະ­ຕິ­ບັດ​ຕົນ​ເອງ​ໃຫ້​ດີ ຊຶ່ງ​ຕະ­ຫຼອດ​ໄລ­ຍະ 5 ປີ ທີ່​ຮຽນ​ຢູ່​ວິ­ທະ­ຍາ­ໄລ​ແຫ່ງ​ນີ້ ນອກ­ຈາກ​ຈະ​ຕັ້ງ­ໃຈ​ສຶກ​ສາ​ຄົ້ນ​ຄ້ວ​າ​ຮ່ຳ­ຮຽນ​ແລ້ວ ຍັງ​ຫາ​ໂອ­ກາດ​ຍາດ​ເວ­ລາ​ຫາ​ວຽກ​ເພີ່ມ ເພື່ອ​ຫາ​ເງິນ​ຊ່ວຍ​ຕົນ​ເອງ ໃນ​ການ​ຮຽນ​ແບ່ງ​ເບົາ​ພາ­ລະ​ຄອບ­ຄົວ.</p> <p style="text-align: justify;"> ເຖິງ​ຢ່າງ­ໃດ​ກໍ​ດີ ຕົນ​ເອງ​ໃນ​ຖາ­ນະ​ເປັນ​ອ້າຍ​ກົກ ມີ​ໂອ­ກາດ​ໄດ້​ເຂົ້າ​ມາ​ຮຽນ​ຢູ່​ສະ​ຖາ​ບັນ​ການ​ສຶກ​ສາ​ທີ່​ສະ​ຖາ​ບັນ​ກົດ­ໝາຍ ເຊິ່ງ​ໃນ​ເບື້ອງ​ຕົ້ນ​ການ​ເຂົ້າ​ມາ​ຮຽນ​ຢູ່​ສະ­ຖານ­ທີ່​ແຫ່ງ​ນີ້ ຕົນ​ເອງ​ກໍ​ຕ້ອງ​ໄດ້​ປັບ​ຕົວ​ເຂົ້າ​ກັບ​ສະ­ພາບ​ແວດ​ລ້ອມ​ອັນ​ໃໝ່​ຫຼາຍ​ດ້ານ ຍ້ອນ​ອອກ​ຈາກ​ຕ່າງ​ຖິ່ນ​ຕ້ອງ​ໄດ້​ອົດ­ທົນ​ທຸກ​ຢ່າງ ພໍ​ມີ​ໂອ­ກາດ​ກໍ​ຍາດ​ເວ­ລາ​ໄປ​ເຮັດ​ວຽກ ເປັນ​ຜູ້​ເສີບ​ອາ­ຫານ​ຢູ່​ຕາມ​ຮ້ານ​ບັນ­ເທີງ​ໃນ​ຍາມ​ຄ່ຳ​ຄືນ ເຮັດ​ໄດ້​ປະ­ມານ 2 ປີ​ແລ້ວ ມາ​ເຮັດ​ວຽກ​ເປັນ​ຄົນ​ຍາມ​ສັງ­ກັດ​ຢູ່ ລປພ ແຫ່ງ​ໜຶ່ງ ຈົນ​ເຖິງ​ປີ​ສຸດ​ທ້າຍ ເຫັນ​ວ່າ​ຖ້າ​ເຮັດ​ວຽກ​ຫຼາຍ ຢ້ານ​ບໍ່​ມີ​ເວ­ລາ​ຄົ້ນ​ຄ້ວ​າ ກໍ​ເລີຍ​ອອກ​ມາ​ສຸມ​ໃສ່​ການ​ຄົ້ນ​ຄ້ວ​າ​ຮ່ຳ­ຮຽນ.</p> <p style="text-align: justify;"> ຕະ­ຫຼອດ​ໄລ­ຍະ 5 ປີ­ຜ່ານ­ມາ ຜົນ​ການ​ຮຽນ​ກໍ​ຮຽນ​ດີ​ຮຽນ​ເກັ່ງ​ມາ​ຕະ­ຫຼອດ ເຖິງ​ແມ່ນ​ວ່າ​ຈະ​ໄປ​ເຮັດ​ວຽກ​ຫາ​ເງິນ ມາ​ຊ່ວຍ​ແບ່ງ​ເບົາ​ຄ່າ​ໃຊ້​ຈ່າຍ​ຂອງ​ຄອບ­ຄົວ ແຕ່​ການ​ຄົ້ນ​ຄ້ວ​າ​ຮ່ຳ­ຮຽນ​ກໍ​ບໍ່​ໄດ້​ປະ­ປ່ອຍ ຈົນ​ໃນ​ທີ່​ສຸດ​ສາ­ມາດ​ຮຽນ​ຈົບ​ໄດ້​ຢ່າງ​ສົມ­ບູນ ເຖິງ​ບໍ່​ໄດ້​ໃບ​ປະ­ກາດ​ແດງ ແຕ່​ກໍ​ໄດ້​ຮັບ​ໃບ​ຍ້ອງ­ຍໍ​ໃນ​ນາມ​ນັກ​ສຶກ​ສາ ຮຽນ​ດີ ມີ​ຄຸນ­ສົມ­ບັດ ເຊິ່ງ​ພາຍ­ຫຼັງ​ທີ່​ຮຽນ​ຈົບ​ແລ້ວ ຈະ​ກັບ​ຄືນ​ໄປ​ປະ­ກອບ­ສ່ວນ​ເຮັດ​ວຽກ​ງານ​ຢູ່​ບ້ານ​ເກີດ​ເມືອງ​ນອນ​ຂອງ​ຕົນ.</p> <p style="text-align: justify;"> <strong>ໂດຍ: ແວ່ນ​ຂາວ</strong></p>

ຂ່າວທີ່ກ່ຽວຂ້ອງ