ຂ່າວຫຼ້າສຸດ

ປະເພນີການນົບ ແລະ ຂາບ

2.354 03 ມ.ກ. 2012 ນານາສາລະ

<p style="text-align: justify;"> ການ​ນົບ ແລະ ຂາບ ເປັນ​ປະ­ເພ­ນີ​ອັນ​ເກົ່າ​ແກ່ ທີ່​ປະ­ພຶດ​ກັນ​ມາ​ແຕ່​ບູ­ຮານ​ນະ​ການ ແມ່ນ​ສັນ­ຍາ​ລັກ​ແຫ່ງ​ການ​ເຄົາ­ລົບ​ນັບ­ຖື​ຂອງ​ຄົນ​ລາວ​ເຮົາ ຕໍ່​ຜູ້​ທີ່​ຕົນ​ເຄົາ­ລົບ​ນັບ­ຖື ເຊື່ອ​ຖື​ການ​ນົບ​ເປັນ​ການ​ປະ­ນົມ​ມື​ນອບ​ນ້ອມ ອັນ​ເປັນ​ການ​ກະ­ທຳ​ທາງ​ກາຍ​ຢ່າງ​ໜຶ່ງ ລັກ­ສະ­ນະ​ທີ່​ຖືກ­ຕ້ອງ​ນັ້ນ ຄື​ໃຊ້​ມື​ທັງ​ສອງ​ກົບ​ເຂົ້າ­ກັນ ໂດຍ​ໃຫ້​ແນບ​ເຂົ້າ­ກັນ​ຢ່າງ​ສະ​ນິດ ນີ້ວ­ມື​ແຕ່​ລະ​ນີ້ວ​ທັງ​ສອງ​ກ້ຳ​ບໍ່​ໃຫ້​ສອດ ຫຼື ສານ​ເຂົ້າ­ກັນ​ແລ້ວ ຍົກ​ຂຶ້ນ​ກາງ​ໜ້າ​ອົກ ນີ້​ຄື​ການ​ປະ­ນົມ​ມື​ນົບ​ທີ່​ຖືກ­ຕ້ອງ​ຕາມ​ລັກ­ສະ­ນະ​ຂອງ​ການ​ນົບ ນອກ­ຈາກ​ນີ້ ການ​ນົບ​ຍັງ​ໃຊ້​ໃນ​ການ​ຖາມ​ສະ­ບາຍ­ດີ ຂອບ­ໃຈ ຂໍ​ອະ­ໄພ ລາ​ກ່ອນ.</p> <p style="text-align: justify;"> ການ​ຂາບ​ໄຫວ້ ຄື​ການ­ສະ­ແດງ​ອອກ​ເຖິງ​ຄວາມ​ເຄົາ­ລົບ​ນອບ​ນ້ອມ ອັນ​ສືບ​ເນື່ອງ​ມາ​ຈາກ​ການ​ນັ່ງ ແລະ ການ​ນົບ​ມື​ຢ່າງ​ຮຽບ​ຮ້ອຍ​ແລ້ວ ສະ­ນັ້ນ ຈຶ່ງ​ຂໍ​ເວົ້າ​ເຖິງ​ເລື່ອງ​ການ​ນັ່ງ ກ່ອນ​ການ​ນັ່ງ​ເພື່ອ​ຈະ​ຂາບ​ພະ​ນັ້ນ ຜູ້​ຊາຍ​ໃຫ້​ນັ່ງ​ຄຸ­ເຂົ່າ ໂດຍ​ໃຫ້​ສົ້ນ​ຕີນ​ທັງ​ສອງ ແລະ ປາຍ​ຕີນ​ທັງ​ສອງ​ດ້ານ​ໃນ ແນບ​ຕິດ​ຂະ­ໜານ​ກັນ​ໄປ​ທາງ​ຫຼັງ​ເຂົ່າ​ທັງ​ສອງ ຫ່າງ​ກັນ​ພໍ​ດີ­ງາມ ຖ້າ​ຜູ້­ຍິງ​ໃຫ້​ນັ່ງ​ທັບ​ຕີນ​ທັງ​ສອງ ໂດຍ​ໃຫ້​ປາຍ​ຕີນ​ທັງ​ສອງ​ຢຽດ​ໄປ​ທາງ​ຫຼັງ ຫຼື ນັ່ງ​ຢ່າງ​ທີ່​ເອີ້ນ​ວ່າ ແບບ​ເທບ​ທິ­ດາ ນີ້​ຄື​ການ​ນັ່ງ​ທີ່​ຖືກ ຕ້ອງ​ຕາມ​ລັກ­ສະ­ນະ ເມື່ອ​ໄດ້​ລັກ­ສະ­ນະ​ດັ່ງ­ກ່າວ​ແລ້ວ ກໍ​ປະ­ນົມ​ມື ຕາມ​ທີ່​ກ່າວ​ມາ​ເບື້ອງ​ຕົ້ນ ຍົກ​ມື​ປະ­ນົມ​ໄວ້​ບ່ອນ​ໜ້າ​ອົກ ຍົກ​ຂຶ້ນ​ໄປ​ເໜືອ​ລະ­ຫວ່າງ​ຄິ້ວ ແລ້ວ​ໝອບ​ລົງ​ໃຫ້​ສອກ​ທັງ​ສອງ​ຕໍ່​ຈາກ​ຫົວ­ເຂົ່າ​ທັງ​ສອງ ແບ­ມື​ທັງ​ສອງ​ທາບ​ລົງ​ກັບ​ພື້ນ ມື​ຫ່າງ​ອອກ​ຈາກ​ກັນ​ແຕ່​ພໍ­ງາມ ໃຫ້​ໜ້າ­ຜາກ​ລົງ​ຄຸງ​ພື້ນ ແລ້ວ​ເງີຍ​ຂຶ້ນ​ມາ​ຢູ່​ໃນ​ລັກ­ສະ­ນະ​ດີ ໂດຍ​ຕັ້ງ​ໂຕ​ໃຫ້​ຊື່ ແລະ ຂະ­ນະ​ກົ້ມ​ຂາບ​ບໍ່​ໃຫ້​ຫຼັງ​ຂົດ ຈຶ່ງ​ເກີດ​ຄວາມ​ສະ­ຫງ່າ​ງາມ ການ​ຂາບ​ນັ້ນ ຈຶ່ງ​ປະ­ກອບ​ດ້ວຍ​ເບັນ​ຈາງ​ຄະ​ປະ­ດິດ ຄື​ໃຫ້​ປະ­ກອບ​ດ້ວຍ 5 ຢ່າງ ອັນ​ໄດ້­ແກ່​ມື​ທັງ​ສອງ ເຂົ່າ​ທັງ​ສອງ​ໂຮມ​ກັນ​ເປັນ 4 ໜ້າ­ຜາກ​ອີກ​ໜຶ່ງ​ໂຮມ​ກັນ​ເປັນ 5 ພໍ­ດີ ເມື່ອ​ຄົບ​ດ້ວຍ 5 ອົງ​ນີ້ ຊື່­ວ່າ​ເປັນ​ການ​ຂາບ​ທີ່​ດີ­ງາມ ແລະ ຖືກ­ຕ້ອງ ການ​ຂາບ​ພະ​ນີ້ ເປັນ​ປະ­ເພ­ນີ​ສະ­ແດງ​ຄວາມ​ເຄົາ­ລົບ​ຢ່າງ​ໜຶ່ງ ມາ​ແຕ່​ສະ­ໄໝ​ພຸດ­ທະ­ການ ຊຶ່ງ​ມີ​ເລື່ອງ​ລາວ​ກ່າວ​ໄວ້​ວ່າ: ທ້າວ ໂກ­ສີ ພ້ອມ​ເທ​ພະ​ບໍ­ລິ­ວານ ເຂົ້າ​ໄປ​ເຝົ້າ​ພະ­ພຸດ­ທະ­ເຈົ້າ ພ້ອມ​ກັບ​ຖາມ​ບັນ­ຫາ​ຫຼາຍ​ຢ່າງ ແຕ່​ພະ­ພຸດ­ທະ­ເຈົ້າ​ໄດ້​ແກ້​ບັນ­ຫາ​ຈົດ​ໝົດ​ສ້ຽງ ຈົນ​ທ້າວ ໂກ­ສີ ພ້ອມ​ບໍ­ລິ­ວານ​ຫາຍ​ຄວາມ​ສົງ­ໄສ ທ້າວ ໂກ­ສີ ມີ​ຄວາມ​ປິ​ຕິ​ຍິນ​ດີ​ນຳ ແລະ ຊາບ​ຊຶມ​ໃນ​ລົດ​ພະ​ທຳ ຈຶ່ງ​ມີ​ຄວາມ​ເຄົາ­ລົບ​ພະ­ພຸດ­ທະ­ເຈົ້າ​ຢ່າງ​ໝົດ​ຈິດ​ໝົດ​ໃຈ ແລະ ມີ​ຄວາມ​ເຫຼື້ອ​ໃສ​ຫຼາຍ ຊົງ​ລູບ​ແຜ່ນ­ດິນ​ດ້ວຍ​ມື​ເຖິງ​ສາມ​ຄັ້ງ ແລ້ວ​ກ່າວ​ນະ­ໂມ​ຕັດ​ສະ​ພະ­ຄະ​ວະ​ໂຕ​ອາ​ຣ​ຣະ .. ດັ່ງ­ນັ້ນ ການ​ຂາບ​ຂອງ​ພວກ​ເຮົາ​ຕໍ່​ມາ ຈຶ່ງ​ນິ­ຍົມ​ກັນ​ຂາບ​ສາມ​ຄັ້ງ ນັບ​ແຕ່​ເວ­ລາ​ນັ້ນ​ເປັນ­ຕົ້ນ​ມາ.</p> <p style="text-align: justify;"> <strong>(ຊຽງ​ເອງ​ຮຽບ​ຮຽງ)</strong></p>

ຂ່າວທີ່ກ່ຽວຂ້ອງ