ສົມແລ້ວທີ່ໄດ້ເປັນຄູຊຳນານການ

1.535 02 ພ.ຈ. 2011 ສຶກສາ

<p style="text-align: justify;"> ເນື່ອງ​ໃນ​ໂອ­ກາດ​ສະ­ເຫຼີມ­ສະ­ຫຼອງ ວັນ​ຄູ​ແຫ່ງ​ຊາດ ທີ 7 ຕຸ­ລາ 2011 ຄົບ­ຮອບ 17 ປີ (7/10/1994-7/10/ 2011) ໄດ້​ມີ​ການ​ສະ­ຫຼອງ​ຢູ່​ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໃນ​ວັນ​ທີ 5 ຕຸ­ລາ 2011 ທີ່​ຜ່ານ​ມາ ດ້ວຍ​ບັນ­ຍາ­ກາດ​ທີ່​ເຕັມ​ໄປ​ດ້ວຍ​ຄວາມ​ໝາຍ​ອັນ​ເລິກ­ເຊິ່ງ ໂດຍ​ໄດ້​ສະ­ແດງ​ໃຫ້​ເຫັນ​ຄຸນ­ງາມ­ຄວາມ­ດີ ຜົນ­ງານ​ຂອງ​ບັນ­ດາ​ຄູ-ອາ­ຈານ ທີ່​ມີ​ຕໍ່​ວຽກ​ງານ​ການ​ພັດ­ທະ­ນາ ສ້າງ­ສາ​ປະ­ເທດ​ຊາດ ເວົ້າ​ລວມ ເວົ້າ​ສະ­ເພາະ​ກໍ​ແມ່ນ​ການ​ພັດ­ທະ­ນາ​ຄົນ​ໃຫ້​ຫຼຸດ​ພົ້ນ​ອອກ​ຈາກ​ຄວາມ​ບໍ່​ຮູ້​ໜັງ­ສື ກາຍ­ເປັນ​ບຸກ​ຄະ­ລາ​ກອນ​ທີ່​ມີ​ຄວາມ​ຮູ້​ຄວາມ​ສາ­ມາດ.</p> <p style="text-align: justify;"> ການ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ໄດ້​ມີ​ການ​ເລົ່າ​ປະ­ຫວັດ​ຄວາມ​ເປັນ​ມາ​ຂອງ​ວັນ​ຄູ​ແຫ່ງ​ຊາດ ຮັບ​ຟັງ​ການ​ໂອ້​ລົມ​ຈາກ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພິ­ເສດ​ກໍ​ໄດ້​ມີ​ການ​ປະ­ກາດ​ຂໍ້​ຕົກ­ລົງ​ຂອງ​ລັດ­ຖະ­ມົນ­ຕີ​ວ່າ­ການ​ກະ­ຊວງ​ສຶກ​ສາ​ທິ​ການ ແລະ ກີ­ລາ ວ່າ​ດ້ວຍ​ການ​ແຕ່ງ­ຕັ້ງ​ພະ­ນັກ­ງານ ດຳ­ລົງ​ຕຳ­ແໜ່ງ​ວິ­ຊາ​ການ​ຄູ​ຂອງ​ພະ​ແນກ​ສຶກ​ສາ​ທິ​ການ ນະ­ຄອນ­ຫຼວງ​ວຽງ​ຈັນ ເຊິ່ງ​ມີ​ຄູ​ທີ່​ໄດ້​ຮັບ​ການ​ແຕ່ງ­ຕັ້ງ​ດຳ­ລົງ​ຕຳ­ແໜ່ງ​ວິ­ຊາ​ການ​ຄູ ເປັນ​ຄູ​ປະ­ສົບ​ການ​ຈຳ­ນວນ 25 ທ່ານ ຍິງ 20 ທ່ານ ແລະ ເປັນ​ຄູ​ຊຳ­ນານ​ການ​ຈຳ­ນວນ 4 ທ່ານ ຍິງ 3 ທ່ານ ຈາກ​ໂຮງ­ຮຽນ ມ.ປາຍ ໂນນ​ສະ­ຫວ່າງ 1 ທ່ານ ແລະ ມ.ສ ວຽງ​ຈັນ 3 ທ່ານ ໜຶ່ງ​ໃນ​ນັ້ນ​ກໍ​ມີ​ທ່ານ​ນາງ ວຽງ​ແກ້ວ ສີ​ປະ­ເສີດ ອາ­ຈານ​ສອນ​ວິ­ຊາ​ເຄ​ມີ​ສາດ ເປັນ​ອາ­ຈານ​ຜູ້​ມີ​ຜົນ­ງານ​ອັນ​ຫຼວງ­ຫຼາຍ ສ້າງ​ນັກ­ຮຽນ​ນັກ​ສຶກ​ສາ​ອອກ​ຮັບ​ໃຊ້​ສັງ­ຄົມ​ໄດ້​ຫຼາຍ​ລຸ້ນ​ຄົນ.</p> <p style="text-align: justify;"> ທ່ານ​ໄດ້​ໃຫ້​ສຳ­ພາດ​ວ່າ: ເລີ່ມ​ຕົ້ນ​ຈາກ​ການ​ເປັນ​ຄູ​ສອນ​ມາ​ແຕ່​ປີ 1981 ເປັນ­ຕົ້ນ​ມາ ໃນ​ວິ­ຊາ​ເຄ​ມີ​ສາດ ໂດຍ​ມີ ທ່ານ ສຈ.ດຣ. ສົມ​ອົກ ມັ່ງ​ໜໍ່​ເມກ ເມື່ອ​ກ່ອນ​ທ່ານ​ເປັນ​ອາ­ຈານ​ວິ­ຊາ​ເຄ​ມີ​ເຊັ່ນ​ດຽວ ແລະ ຕໍ່​ມາ​ທ່ານ​ໄດ້​ເປັນ​ລັດ­ຖະ­ມົນ­ຕີ​ວ່າ­ການ​ກະ­ຊວງ​ສຶກ​ສາ​ທິ​ການ ເຊິ່ງ​ປັດ­ຈຸ­ບັນ​ທ່ານ​ດຳ­ລົງ​ຕຳ­ແໜ່ງ​ເປັນ​ເຈົ້າ­ແຂວງ​ຊຽງ​ຂວາງ ມາ​ຮອດ​ທຸກ​ວັນ​ນີ້ ທຸກ​ຄຳ​ສັ່ງ­ສອນ​ແນະ­ນຳ​ຂອງ​ເພິ່ນ ກໍ​ຍັງ​ຄົງ​ດັງ​ກ້ອງ​ກັງ­ວານ​ເປັນ​ເຂັມ­ທິດ​ເຍືອງ​ທາງ​ໃຫ້​ກ້າວ​ເດີນ​ຕະ­ຫຼອດ​ມາ.</p> <p style="text-align: justify;"> <strong>ທ່ານ​ກ່າວ​ຕື່ມ​ວ່າ: </strong>ພໍ​ມາ​ເຖິງ​ສົກ­ຮຽນ 98-99 ກໍ​ໄດ້​ມີ​ໂອ­ກາດ​ໄປ​ເຝິກ­ອົບ­ຮົມ​ທີ່​ປະ­ເທດ​ຝຣັ່ງ ແລະ ກັບ​ຄືນ​ມາ​ສອນ​ຢູ່ ມ.ສ ວຽງ​ຈັນ ຄື­ເກົ່າ ໂດຍ​ມາ​ສອນ​ໃນ​ຫ້ອງ​ສອງ​ພາ­ສາ (ກາ​ສ​ບີ​ແລງ) ເຊິ່ງ​ໃນ​ການ​ສິດ­ສອນ​ສົ່ງ​ຄວາມ​ຮູ້​ໃນ​ແຕ່​ລະ​ຄັ້ງ ຕ້ອງ​ມີ​ການ​ຄົ້ນ​ຄ້ວ​າ ຄັດ​ຈ້ອນ​ບົດ­ຮຽນ​ເນັ້ນ​ໜັກ​ເຖິງ​ຄວາມ​ລະ­ອຽດ​ໃຫ້​ມັນ​ເລິກ­ເຊິ່ງ ງ່າຍ­ດາຍ ຮຽນ ແລະ ເຂົ້າ­ໃຈ​ງ່າຍ ໂດຍ​ການ​ຮຽນ​ທິດ​ສະ​ດີ ຄຽງ​ຄູ່​ກັບ​ການ​ແກ້​ບົດ​ເຝິກ​ຫັດ ທົດ​ລອງ​ຕົວ​ຈິງ ຈົນ​ໄດ້​ຮັບ​ການ​ຍ້ອງ­ຍໍ ເປັນ​ຄູ​ດີ­ເດັ່ນ​ຕະ­ຫຼອດ​ມາ.</p> <p style="text-align: justify;"> ໄປ​ຄຽງ​ຄູ່​ກັບ​ການ​ສິດ­ສອນ​ພາຍ​ໃນ​ໂຮງ­ຮຽນ​ແລ້ວ ກໍ​ຍັງ​ໄດ້​ເປັນ​ຄູ​ນິ­ເທດ​ໃຫ້​ກັບ​ແຂວງ​ຫຼວງ​ພະ​ບາງ ສະ­ຫວັນ​ນະ​ເຂດ ຈຳ­ປາ​ສັກ ແລະ ນະ­ຄອນ­ຫຼວງ ໃນ​ບັນ­ດາ​ໂຮງ­ຮຽນ​ທີ່​ມີ​ໂຄງ­ການ​ສິດ­ສອນ​ຫ້ອງ​ສອງ​ພາ­ສາ ຈາກ​ປະ­ສົບ​ການ​ຄວາມ​ຮູ້​ທີ່​ຮຽນ​ມາ ຜົນ­ງານ​ທີ່​ມີ​ຢ່າງ​ຫຼວງ­ຫຼາຍ ກ່ວ​າ​ຈະ​ໄດ້​ຕຳ­ແໜ່ງ​ຄູ​ຊຳ­ນານ​ການ​ມາ ກໍ​ຕ້ອງ​ມີ​ການ​ຂຽນ​ໂຄງ­ການ ແລະ ບົດ​ປ້ອງ​ກັນ ເພື່ອ​ເຂົ້າ​ໄປ​ຄັດ​ເລືອກ​ໃນ​ແຕ່​ລະ​ຂັ້ນ ຈົນ​ໃນ​ທີ່​ສຸດ​ໃນ​ສົກ­ຮຽນ 2009-2010 ຈຶ່ງ​ໄດ້​ມາ ກໍ​ນັບ​ວ່າ​ເປັນ­ຄວາມ​ພູມ­ໃຈ​ອັນ​ໜຶ່ງ​ໃນ​ຊີ­ວິດ​ຄູ ແລະ ສິ່ງ​ໜຶ່ງ​ທີ່​ພູມ­ໃຈ​ກ່ວ​າ​ນັ້ນ​ກໍ​ຄື ເຫັນ​ບັນ­ດາ​ລູກ­ສິດ​ຂອງ​ຕົນ ໄດ້​ເປັນ​ຄົນ­ຮູ້​ຜູ້­ດີ ມີ­ໜ້າ​ທີ່​ຕຳ­ແໜ່ງ​ປະ­ກອບ­ສ່ວນ​ສ້າງ­ສາ​ພັດ­ທະ­ນາ​ປະ­ເທດ​ຊາດ ແລະ ຍັງ​ຮູ້​ຄຳ­ນຶງ​ເຖິງ​ຄູ-ອາ­ຈານ​ຄົນ​ນີ້​ຢູ່.         </p> <p style="text-align: justify;"> <strong>ນຳ​ສະ­ເໜີ​ໂດຍ: ແວ່ນ​ຂາວ</strong></p>

ຂ່າວທີ່ກ່ຽວຂ້ອງ