ຂ່າວຫຼ້າສຸດ

ເລັ່ງແກ້ໄຂທັດສະນະຄວາມຮັບຮູ້ທີ່ບໍ່ຖືກຕ້ອງ

1.586 07 ກ.ກ. 2011 ສຶກສາ

<p style="text-align: justify;"> ໄລ­ຍະ​ຜ່ານ​ມາ ເຖິງ​ວ່າ​ຈະ​ມີ​ຫຼາຍ​ສິ່ງ​ຫຼາຍ​ຢ່າງ​ທີ່​ຫຍຸ້ງ­ຍາກ​ສັບ­ສົນ ເປັນ​ອຸ­ປະ­ສັກ ແລະ ສົ່ງ​ຜົນ​ກະ­ທົບ​ໂດຍ​ກົງ ກັບ​ການ​ພັດ­ທະ­ນາ​ວຽກ​ງານ​ການ​ສຶກ​ສາ ແຕ່​ດ້ວຍ​ຄວາມ​ເອົາ­ໃຈ­ໃສ່​ຂອງ​ພະ­ນັກ­ງານ​ການ​ນຳ ກໍ​ຄື​ບັນ­ດາ​ຄູ-ອາ­ຈານ ແລະ ພາກ­ສ່ວນ​ກ່ຽວ­ຂ້ອງ ບຸກ​ບືນ​ຜ່ານ​ຜ່າ​ອຸ­ປະ­ສັກ​ນາໆ​ປະ­ການ ອັນ​ໄດ້​ເຮັດ​ໃຫ້­ການ​ພັດ­ທະ­ນາ​ການ​ສຶກ​ສາ​ຢູ່​ຂອບ​ເຂດ​ທົ່ວ​ປະ­ເທດ ປະ­ສົບ​ຜົນ­ສຳ­ເລັດ​ສູງ​ສົມ­ຄວນ.</p> <p style="text-align: justify;"> ສົກ​ປີ 2010-2011 ການ​ສຶກ​ສາ​ໄດ້​ຮັບ​ການ​ພັດ­ທະ­ນາ​ໄປ​ສູ່​ບາດ­ກ້າວ​ໃໝ່ ເຮັດ​ໃຫ້­ການ​ສຶກ​ສາ​ໃນ​ທຸກ​ຊັ້ນ ທຸກ​ສາຍ ທັງ​ຕົວ​ເມືອງ ແລະ ຊົນ­ນະ­ບົດ ໄດ້​ຮັບ​ການ​ປັບ­ປຸງ​ດ້ານ​ປະ­ລິ­ມານ ແລະ ຄຸນ​ນະ​ພາບ ອັດ­ຕາ​ສ່ວນ​ເດັກ​ໃນ​ເກນ​ເຂົ້າ​ໂຮງ­ຮຽນ​ສູງ​ຂຶ້ນ ຈຳ­ນວນ​ໂຮງ­ຮຽນ-ຫ້ອງ​ຮຽນ ແລະ ບຸກ​ຄະ­ລາ​ກອນ​ກໍ​ເພີ່ມ​ຂຶ້ນ​ເຊັ່ນ​ກັນ ພ້ອມ​ນັ້ນ ດ້ານ​ຫຼັກ­ສູດ​ການ​ຮຽນ-ການ​ສອນ ຍັງ​ໄດ້​ຖືກ​ປັບ­ປຸງ​ແກ້​ໄຂ ໃຫ້​ແທດ­ເໝາະ​ກັບ​ສະ­ພາບ​ເສດ­ຖະ­ກິດ-ສັງ­ຄົມ ປັດ­ຈຸ­ບັນ ແລະ ອະ­ນາ­ຄົດ​ກ່ຽວ​ກັບ​ການ​ພັດ­ທະ­ນາ​ວຽກ​ງານ​ການ​ສຶກ​ສາ​ໃນ​ຊຸມ​ປີ​ຕໍ່­ໜ້າ.</p> <p style="text-align: justify;"> ທ່ານ ທອງ​ສິງ ທຳ​ມະ​ວົງ ນາ­ຍົກ­ລັດ­ຖະ­ມົນ­ຕີ ໄດ້​ເນັ້ນ​ໃຫ້​ກອງ​ປະ­ຊຸມ​ຜູ້​ບໍ­ລິ­ຫານ​ການ​ສຶກ​ສາ​ທົ່ວ​ປະ­ເທດ ປະ­ຈຳ​ປີ 2011 ທີ່​ໄດ້​ຈັດ​ຂຶ້ນ​ກາງ​ເດືອນ​ມິ­ຖຸ­ນາ 2011 ຢູ່​ນະ­ຄອນ­ຫຼວງ​ວຽງ​ຈັນ ບາງ​ຕອນ​ສຳ­ຄັນ ທ່ານ​ກ່າວ​ວ່າ: ເພື່ອ​ສູ້​ຊົນ​ຈັດ​ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ 9 ຂອງ​ພັກ ໃນ​ຂະ­ແໜງ­ການ​ສຶກ​ສາ ຕ້ອງ​ໃຫ້​ບັນ­ລຸ​ໄດ້ 2 ເປົ້າ​ໝາຍ​ຄື: 1. ຮອດ​ປີ 2015 ພົນ­ລະ­ເມືອງ​ບັນ­ດາ­ເຜົ່າ ຕ້ອງ​ສຳ­ເລັດ​ການ​ສຶກ​ສາ​ຂັ້ນ​ປະ­ຖົມ​ຢ່າງ​ທົ່ວ​ເຖິງ ແລະ ມີ​ຄຸນ​ນະ​ພາບ 2. ສົ່ງ­ເສີມ​ບົດ­ບາດ​ຍິງ-ຊາຍ ແລະ ສ້າງ​ຄວາມ​ເຂັ້ມ­ແຂງ​ແກ່​ແມ່­ຍິງ ໂດຍ​ຢາກ​ເຮັດ​ສຳ­ເລັດ​ເປົ້າ​ໝາຍ​ດັ່ງ­ກ່າວ ຂະ­ແໜງ­ການ​ສຶກ​ສາ ຕ້ອງ​ພ້ອມ​ກັນ​ປະ­ຕິ­ບັດ​ໃຫ້​ໄດ້ 4 ບາດ­ກ້າວ​ບຸກ​ທະ­ລຸ ຄື: ບຸກ​ທະ­ລຸ​ດ້ານ​ຈິນ­ຕະ­ນາ­ການ ຕ້ອງ​ພ້ອມ​ກັນ​ແກ້​ໄຂ​ທັດ­ສະ­ນະ​ຄວາມ​ຮັບ​ຮູ້​ທີ່​ບໍ່​ຖືກ­ຕ້ອງ ແນວ​ຄິດ​ຄຳ​ພີ​ຮັກ­ສາ​ເດີມ ຊ້າຍ​ຈັດ​ຂວາ​ໂພດ ເຫັນ​ແຕ່​ປະ­ໂຫຍດ​ຂອງ​ພາກ­ສ່ວນ ບໍ່​ຄຳ­ນຶງ​ເຖິງ​ປະ­ໂຫຍດ​ໂດຍ​ລວມ ບຸກ​ທະ­ລຸ​ດ້ານ​ລະ­ບົບ​ໂຄງ​ສ້າງ​ທາງ​ດ້ານ​ການ​ບໍ­ລິ­ຫານ ຕ້ອງ​ແກ້​ໄຂ​ພະ­ຍາດ​ອາດ­ຍາ​ສິດ ລະ­ບຽບ​ຫຼັກ­ການ ຫຼາຍ​ຂັ້ນ​ຫຼາຍ​ຂອດ ແລະ ແກ້​ໄຂ​ຊ່ອງ​ຫວ່າງ​ທີ່​ກໍ່­ໃຫ້­ເກີດ​ປະ­ກົດ​ການ​ຫຍໍ້­ທໍ້​ຕ່າງໆ ຢູ່​ໃນ​ກົງ­ຈັກ​ການ­ຈັດ­ຕັ້ງ ບຸກ​ທະ­ລຸ​ດ້ານ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ຕ້ອງ​ຕອບ​ສະ­ໜອງ​ໃຫ້​ໄດ້​ກັບ​ຄວາມ​ຮຽກ­ຮ້ອງ​ຕ້ອງ­ການ​ຕົວ​ຈິງ ຂອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຢູ່​ປະ­ເທດ​ເຮົາ​ໃນ​ປັດ­ຈຸ­ບັນ ແລະ ການ​ບຸກ​ທະ­ລຸ​ການ​ແກ້​ໄຂ​ຄວາມ­ທຸກ​ຍາກ ໝາຍ​ເຖິງ​ການ​ບຸກ​ທະ­ລຸ​ທີ່​ມີ​ຈຸດ​ສຸມ ຕ້ອງ​ໄດ້​ກຳ­ນົດ​ຄາດ­ໝາຍ​ລະ­ອຽດ ໃຫ້​ເລິກ­ເຊິ່ງ​ເຖິງ​ຖອງ​ໃນ​ການ​ພັດ­ທະ­ນາ​ຂະ­ແໜງ­ການ​ສຶກ​ສາ ໂດຍ​ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ຮຽກ­ຮ້ອງ​ໃຫ້​ຄະ­ນະ​ພັກ ຄະ­ນະ​ນຳ​ຂອງ​ຂະ­ແໜງ­ການ​ສຶກ​ສາ ຈັດ​ຕັ້ງ​ປະ­ຕິ­ບັດ​ວຽກ​ງານ​ຂອງ​ຕົນ ດ້ວຍ​ຄວາມ​ຮັບ­ຜິດ­ຊອບ​ສູງ ເອົາ­ໃຈ­ໃສ່​ສຶກ​ສາ​ອົບ​ຮົບ​ການ­ເມືອງ-ແນວ​ຄິດ ໃຫ້​ຖັນ​ແຖວ​ພະ­ນັກ­ງານ​ສຶກ​ສາ​ຢ່າງ​ເປັນ​ປົກ­ກະ­ຕິ ສືບ­ຕໍ່​ຈັດ​ຕັ້ງ​ປະ­ຕິ­ບັດ ແຜນ​ຍຸດ​ທະ​ສາດ​ການ​ປະ­ຕິ​ຮູບ​ລະ­ບົບ​ການ​ສຶກ​ສາ​ແຫ່ງ​ຊາດ ຢ່າງ​ມີ​ຫຼັກ­ການ ເອົາ­ໃຈ­ໃສ່​ຍົກ​ລະ­ດັບ​ຄຸນ​ນະ​ພາບ​ການ​ສຶກ​ສາ ໃຫ້​ມີ​ການ​ຫັນ­ປ່ຽນ​ຢ່າງ​ຕັ້ງ­ໜ້າ ເປັນ​ຮູບ​ປະ​ທຳ​ຫຼາຍ​ຂຶ້ນ ແລະ ເອົາ­ໃຈ­ໃສ່​ສືບ­ຕໍ່​ຂະ­ຫຍາຍ​ການ​ສຶກ​ສາ ໄປ​ສູ່​ເຂດ​ຫ່າງ​ໄກ​ສອກ­ຫຼີກ​ໃຫ້​ຫຼາຍ​ຂຶ້ນ ໂດຍ​ສະ­ເພາະ​ແມ່ນ​ການ​ສ້າງ­ຕັ້ງ​ບ້ານ​ໃດ​ໜຶ່ງ ກໍ​ຕ້ອງ​ສ້າງ​ໂຮງ­ຮຽນ​ຂຶ້ນ​ຢູ່​ພາຍ​ໃນ​ບ້ານ​ຂອງ​ຕົນ.</p> <p style="text-align: justify;"> <strong>ໂດຍ: ດາວ​ວອນ</strong></p>

ຂ່າວທີ່ກ່ຽວຂ້ອງ