ສ້າງຄົນໃຫ້ເປັນຄົນດີ ຄືວິທີປູກໄມ້ໃຫ້ງົດງາມ

2.264 31 ພ.ພ. 2011 ສຶກສາ
ສ້າງຄົນໃຫ້ເປັນຄົນດີ ຄືວິທີປູກໄມ້ໃຫ້ງົດງາມ

<p style="text-align: justify;"> ການ​ປູກ​ຕົ້ນ­ໄມ້ ຕ້ອງ​ດຸ­ໝັ່ນ​ເອົາ­ໃຈ­ໃສ່​ຫົດ​ນ້ຳ ພູນ​ດິນ ໃສ່​ຝຸ່ນ ດູ​ແລ​ປົກ​ປັກ​ຮັກ­ສາ ບໍ່​ໃຫ້​ສັດ­ຕູ​ພືດ​ມາ​ທຳ­ລາຍ ຈຶ່ງ​ຈະ​ເຮັດ​ໃຫ້​ຕົ້ນ­ໄມ້​ຕົ້ນ​ນັ້ນ ເຕີບ​ໃຫຍ່​ມີ​ຮາກ​ຖານ​ທີ່​ແຂງ­ແຮງ ສາ­ມາດ​ຮອງ​ຮັບ​ການ​ແຕກ​ງ່າ​ສາ­ຂາ ເພື່ອ​ເປັນ​ເງົາ​ຮົ່ມ​ເຢັນ​ໃຫ້​ອາ­ກາດ​ສົດ­ຊື່ນ​ແກ່​ຜູ້​ຄົນ​ທັງ­ຫຼາຍ.</p> <p style="text-align: justify;"> ທ່ານ​ນາງ ບຸນ​ລ້ຽງ ໄຊ​ໂພ​ສີ ແມ່ນ 1 ໃນ​ຄະ­ນະ​ຮັບ­ຜິດ­ຊອບ <strong>ສອນ​ພາ­ສາ​ປິດ­ສະ­ໜາ ທຳ​ມະ​ສອນ​ໃຈ </strong>ທີ່​ວັດ​ປ່າ​ວິ­ໂມກ ຊຳ​ປັກ​ແຮດ ບ້ານ​ສາ­ລາ​ຄຳ ເມືອງ​ຫາດ​ຊາຍ​ຟອງ ນະ­ຄອນ​ຫຼຼວງ​ວຽງ​ຈັນ ໄດ້​ກ່າວ​ວ່າ: ການ​ຈະ​ເປັນ​ຄົນ​ດີ​ໄດ້​ນັ້ນ ກ່ອນ​ອື່ນ​ໝົດ ຕ້ອງ​ມີ​ທຳ​ມະ​ຢູ່​ໃນ​ໃຈ ບໍ່​ວ່າ​ເດັກ­ນ້ອຍ ຫຼື ຜູ້​ໃຫຍ່​ທຸກ​ເພດ​ທຸກ​ໄວ ຄື​ດັ່ງ​ຜູ້­ນຳ​ທີ່​ແສນ​ເຄົາ­ລົບ​ຮັກ ຂອງ​ປວງ​ຊົນ​ລາວ​ທັງ​ຊາດ ຄື: ທ່ານ​ປະ­ທານ ສຸ​ພາ­ນຸ​ວົງ ແລະ ປະ­ທານ ໄກ­ສອນ ພົມ­ວິ­ຫານ ເຊິ່ງ​ເປັນ​ຜູ້­ນຳ​ທີ່​ມີ​ຄຸນ​ນະ​ທຳ ຂອງ​ຄວາມ​ເປັນ​ພຣະ​ໂພ­ທິ­ສັດ (ເປັນ​ພຣະ​ໃນ​ໃຈ) ປະ­ກອບ​ດ້ວຍ​ປັດ​ໄຈ 4 ປະ­ການ 1. ມີ​ຄວາມ​ບໍ­ລິ­ສຸດ 2. ມີ​ປັນ­ຍາ 3. ມີ​ເມດ​ຕາ 4. ມີ​ຂັນ​ຕິ ມີ​ຄວາມ​ອົດ​ກັ້ນ ອົດ­ທົນ ພວກ​ທ່ານ​ເປັນ​ຜູ້​ໃຫ້​ຄວາມ­ສຸກ​ແກ່​ຄົນ​ອື່ນ ທ່ານ​ບໍ່​ໄດ້​ບວດ​ນຸ່ງ​ເຄື່ອງ​ຫົ່ມ​ເຫຼືອງ ແຖ​ຜົມ ແຕ່​ຈິດ­ໃຈ​ຂອງ​ທ່ານ​ເປັນ​ພຣະ ແລະ ກໍ​ຍັງ​ມີ​ວິ­ລະ​ບູ​ລຸດ ວິ­ລະ​ກະ­ສັດ ລວມ​ທັງ​ນັກ­ຮົບ​ວິ­ລະ​ຊົນ​ອີກ​ຫຼາຍໆ​ທ່ານ ທີ່​ຍອມ​ເສຍ­ສະ­ຫຼະ​ຄວາມ­ສຸກ​ສ່ວນ​ຕົວ ອອກ​ຈາກ​ເຮືອນ​ຊານ​ບ້ານ​ຊ່ອງ​ໄປ ເຂົ້າ​ດົງ​ເຂົ້າ​ປ່າ ເຊັ່ນ: ທ່ານ ສຸ​ພາ­ນຸ​ວົງ ອອກ​ຈາກ​ເຊື້ອ​ກະ­ສັດ ມາ​ເປັນ​ສາ­ມັນ​ຊົນ​ທຳ​ມະ​ດາ ນອນ​ດິນ​ກິນ​ເຂົ້າ­ຫຸງ​ຢູ່​ຖ້ຳ ຢູ່​ໃນ​ເຫວ ເຊິ່ງ​ສ່ຽງ​ກັບ​ຄວາມ​ຕາຍ ເພິ່ນ​ກໍ​ຍັງ​ບໍ່​ໄດ້​ຫວັ່ນ­ໄຫວ ໃນ​ທີ່​ສຸດ ທ່ານ​ກໍ​ໄດ້​ນຳ­ພາ​ປົດ​ປ່ອຍ­ປະ​ເທດ​ຊາດ​ໄດ້​ຢ່າງ​ສົມ­ບູນ.</p> <p style="text-align: justify;"> ເພື່ອ​ຮຽນ​ເອົາ​ເປັນ​ແບບ­ຢ່າງ​ສືບ​ທອດ​ມູນ­ເຊື້ອ​ດັ່ງ­ກ່າວ ເຊິ່ງ​ເນື່ອງ​ໃນ​ໂອ­ກາດ ວັນ​ວິ​ສາ​ຄະ​ບູ­ຊາ ປີ 2011 ລະ­ຫວ່າງ​ວັນ​ທີ 10-18 ພຶດ­ສະ­ພາ 2011 ທີ່​ຜ່ານ​ມາ ຢູ່​ທີ່​ວັດ​ຊຳ​ປັກ​ແຮດ ກໍ​ໄດ້​ຈັດ​ກິດ­ຈະ­ກຳ​ດີໆ ໃຫ້​ແກ່​ບັນ­ດາ​ນ້ອງ​ນັກ­ຮຽນ-ນັກ​ສຶກ​ສາ ລວມ​ທັງ​ມວນ​ຊົນ​ທີ່​ມາ​ຈາກ​ຫຼາຍ​ສາ­ຂາ​ອາ­ຊີບ ໃນ​ທົ່ວ​ປະ­ເທດ ພ້ອມ​ກັນ​ເຂົ້າ​ຮ່ວມ ປະ­ຕິ­ບັດ​ທຳ​ວິ­ປັດ­ສະ­ນາ ກຳ​ມະ​ຖານ ບວດ​ຂາວ ຟັງ​ທຳ​ມະ​ເທດ​ສະ­ໜາ ພາຍ​ໃນ​ງານ​ມີ​ກາ­ນວາງ­ສະ­ແດງ​ພາບ​ປິດ­ສະ­ໜາ ທຳ​ມະ​ສອນ​ໃຈ ມີ​ປຶ້ມ​ທຳ​ມະ​ສອນ​ໃຈ ແລະ ແຜ່ນ​ຊີ​ດີ​ທຳ​ແຈກ​ໃຫ້​ລ້າໆ​ບໍ່​ໄດ້​ເສຍ​ຄ່າ ເພື່ອ​ສອນ​ຄົນ​ໃຫ້​ເປັນ​ຄົນ​ດີ​ມີ​ສິນ​ທຳ​ໃນ​ດວງ​ໃຈ ນອກ­ຈາກ​ນີ້ ພາຍ​ໃນ​ງານ​ກໍ​ຍັງ​ມີ​ການ​ສອນ​ທຳ​ມະ ອະ­ທິ­ບາຍ​ຜ່ານ​ຮູບ​ພາບ​ປະ­ຈັກ​ຕາ ໂດຍ​ມີ​ບັນ­ດາ​ທ່ານ​ຜູ້​ທີ່​ຜ່ານ​ປະ­ສົບ​ການ​ຊີ­ວິດ​ຕົວ​ຈິງ ແລະ ປະ­ສົບ​ຜົນ­ສຳ­ເລັດ​ໃນ​ໜ້າ­ທີ່​ວຽກ​ງານ​ມາ​ແລ້ວ ໂດຍ​ການ​ເອົາ​ສິ­ລະ​ທຳ​ປະ­ຈຳ​ໃຈ​ໄປ​ເປັນ​ຫຼັກ ໃນ​ການ​ດຳ­ລົງ​ຊີ­ວິດ.</p> <p style="text-align: justify;"> ທ່ານ​ກ່າວ​ອີ​ກວ່າ: ກິດ­ຈະ­ກຳ​ດີໆແນວ​ນີ້ ໄດ້​ຈັດ​ຂຶ້ນ​ທຸກໆ​ປີ ປີ​ລະ 2 ຄັ້ງ ໃນ​ລະ­ຫວ່າງ​ກາງ​ປີ ແລະ ທ້າຍ​ປີ ທັງ​ນີ້​ເພື່ອ​ເຝິກ­ຝົນ​ຫຼໍ່​ຫຼອມ​ຜູ້​ຄົນ ໃຫ້​ເປັນ​ຄົນ­ຮູ້​ຜູ້­ດີ ຮູ້​ຫຼັກ​ໃນ​ການ​ດຳ­ລົງ​ຊີ­ວິດ ເບິ່ງ​ໂລກ​ທີ່​ຖືກ­ຕ້ອງ ບໍ່​ງົມ­ງວາຍ ໄຝ່​ຝັນ​ໃນ​ສິ່ງ​ທີ່​ບໍ່​ເປັນ­ຄວາມ​ຈິງ ກ້າ​ຄິດ ກ້າ​ສະ­ແດງ​ອອກ​ໃນ​ສິ່ງ​ທີ່​ຖືກ​ທີ່​ຄວນ ສາ­ມາດ​ປະ­ກອບ­ສ່ວນ​ຊ່ວຍ­ເຫຼືອ​ສັງ­ຄົມ ແລະ ພັດ­ທະ­ນາ​ຈິດ­ໃຈ​ຕົນ​ເອງ ໃຫ້​ມີ​ຄວາມ​ເຂັ້ມ­ແຂງ ແລະ ມີ​ສ່ວນ​ຮ່ວມ​ໃນ​ການ​ພັດ­ທະ­ນາ​ປະ­ເທດ​ຊາດ ໃຫ້​ຫຼຸດ​ພົ້ນ​ອອກ​ຈາກ​ຄວາມ​ດ້ອຍ​ພັດ­ທະ­ນາ ໃນ​ປີ 2020.</p>

ຂ່າວທີ່ກ່ຽວຂ້ອງ