ຂ່າວຫຼ້າສຸດ

ບ້ານຕົວແບບໃນການປົກປັກຮັກສາປ່າສະຫງວນ

4.382 17 ພ.ພ. 2011 ຫຼຸດຜ່ອນຄວາມທຸກຍາກ

<p style="text-align: justify;"> ບ້ານ​ຖ້ຳ ເປັນ​ບ້ານ​ໜຶ່ງ​ທີ່​ຂຶ້ນ​ກັບ​ກຸ່ມ​ຍຸນ ຫ່າງ​ຈາກ​ເທດ­ສະ­ບານ​ເມືອງ​ປະ­ມານ 21 ກິ­ໂລ­ແມັດ ມີ 43 ຄອບ­ຄົວ 52 ຫຼັງ­ຄາ​ເຮືອນ ມີ​ຈຳ­ນວນ​ພົນ​ທັງ​ໝົດ 251 ຄົນ ຍິງ 124 ຄົນ ອາ­ຊີບ​ຕົ້ນ­ຕໍ​ຂອງ​ເຂົາ­ເຈົ້າ ແມ່ນ​ເຮັດ​ນາ​ປູກ​ເຂົ້າ ແລະ ປູກ​ພືດ​ລົ້ມ​ລຸກ​ເປັນ​ປະ­ຈຳ ພ້ອມ​ກັນ​ນີ້​ບ້ານ​ດັ່ງ­ກ່າວ​ຍັງ ເປັນ​ບ້ານ​ໜຶ່ງ​ທີ່​ມີ​ມູນ­ເຊື້ອ​ອັນ​ດຸ­ໝັ່ນ ຂະ­ຫຍັນ​ພຽນ ເມື່ອ​ກ່ອນ​ການ​ປົກ​ປັກ​ຮັກ­ສາ​ປ່າ­ໄມ້​ຂອງ​ບ້ານ ແມ່ນ​ແບ່ງ​ເປັນ​ຂອບ​ເຂດ​ຂອງ​ແຕ່​ລະ​ຄອບ­ຄົວ ຖ້າ​ຄອບ­ຄົວ​ໃດ​ຮູ້­ຈັກ​ປົກ​ປັກ​ຮັກ­ສາ​ປ່າ­ໄມ້​ຂອບ​ເຂດ​ນັ້ນ ຈຶ່ງ​ມີ​ຄວາມ​ສວຍ​ງາມ ແຕ່​ຖ້າ​ຄອບ­ຄົວ​ໃດ​ປົກ​ປັກ​ຮັກ­ສາ​ບໍ່​ໄດ້ ກໍ​ຈະ​ມີ​ການ​ຖາງ​ປ່າ​ແບບ​ຊະ­ຊາຍ​ເກີດ​ຂຶ້ນ ເມື່ອ​ເປັນ​ແນວ​ນີ້ ຊາວ­ບ້ານ​ຈຶ່ງ​ໄດ້​ພ້ອມ​ກັນ​ຫັນ​ເຂົ້າ​ສູ່​ການ​ແບ່ງ​ດິນ​ແບ່ງ​ປ່າ ເຊັ່ນ: ປ່າ​ຊົມ­ໃຊ້ ປ່າ​ສະ­ຫງວນ ແລະ ປ່າ​ຟື້ນ​ຟູ​ຂຶ້ນ.</p> <p style="text-align: justify;"> ມາ​ຮອດ​ວັນ​ທີ 16 ຫາ​ວັນ​ທີ 18 ພະ­ຈິກ 2006 ຈຶ່ງ​ໄດ້​ຮັບ​ການ​ຝຶກ​ອົບ­ຮົມ​ການ​ປົກ​ປັກ​ຮັກ­ສາ ຄຸ້ມ​ຄອງ​ປ່າ­ໄມ້ ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ແລະ ພ້ອມ​ກັນ​ສ້າງ​ລະ­ບຽບ​ການ​ຕ່າງໆ ຕໍ່​ບັນ­ດາ​ຜູ້​ທີ່​ລະ­ເມີດ​ຂອບ​ເຂດ​ປ່າ​ສະ­ຫງວນ ຈາກ​ຫ້ອງ­ການ​ກະ­ສິ­ກຳ-ປ່າ­ໄມ້​ເມືອງ ໂດຍ​ກອງ​ທຶນ​ຫຼຸດ­ຜ່ອນ​ຄວາມ­ທຸກ​ຍາກ (ທລຍ) ເປັນ​ຜູ້​ສະ­ໜັບ­ສະ­ໜູນ ສະ­ນັ້ນ​ໃນ​ວັນ​ທີ 19 ພະ­ຈິກ 2006 ຈຶ່ງ​ໄດ້​ປະ­ກາດ​ເປັນ​ປ່າ​ສະ­ຫງວນ​ຢ່າງ​ເປັນ​ທາງ​ການ ແລະ ມອບ​ໃຫ້​ນາຍ­ບ້ານ ຊາວ​ໜຸ່ມ ກອງ​ຫຼອນ ແລະ ປ້ອງ​ກັນ​ບ້ານ​ເຂົ້າ​ກວດ​ປ່າ ຢ່າງ​ເປັນ​ປົກ­ກະ­ຕິ.</p> <p style="text-align: justify;"> ມາ​ຮອດ​ປັດ­ຈຸ­ບັນ​ນີ້ ບ້ານ​ມີ​ປ່າ​ສະ­ຫງວນ ເອີ້ນ​ວ່າ​ປ່າ​ສະ­ຫງວນ​ຍອດ​ຫ້ວຍ​ປ່າ​ຫຼວງ ເຊິ່ງ​ມີ​ເນື້ອ­ທີ່​ທັງ​ໝົດ 39 ເຮັກ­ຕາ ໄດ້​ມີ​ປ່າ­ໄມ້​ອັນ​ສວຍ​ສົດ​ງົດ​ງາມ ມີ​ຕົ້ນ­ໄມ້​ທີ່​ເປັນ​ຢາ­ພື້ນ­ເມືອງ​ຫຼາຍ​ຊະ­ນິດ ເປັນ​ສະ­ຖານ­ທີ່​ສ້າງ​ລາຍ​ຮັບ​ໃຫ້​ແກ່​ປະ­ຊາ­ຊົນ ຄື: ຮັບ​ຈາກ​ການ​ເກັບ​ໝາກ​ກໍ່ ການ​ເກັບ​ເຫັດ​ໄປ​ຂາຍ​ຕາມ​ທ້ອງ​ຕະ­ຫຼາດ​ເມືອງ ຮອດ​ລະ­ດູ​ການ ທັງ​ເປັນ​ທີ່­ຢູ່​ອາ­ໄສ​ຂອງ​ສັດ­ປ່າ​ຫຼາຍໆ​ຊະ­ນິດ ພ້ອມ​ກັນ​ນີ້​ຍັງ​ມີ​ສັດ­ປ່າ​ຈຳ­ນວນ​ໜຶ່ງ​ທີ່​ປະ­ກົດ​ໃຫ້​ເຫັນ ເຊັ່ນ: ນົກ​ກະ­ຮອກ ໝູ​ປ່າ ຟານ ແລະ ລີງ ປະ­ມານ 30 ກ່ວ​າ​ໂຕ ມາ​ອາ­ໄສ​ຢູ່​ປ່າ​ສະ­ຫງວນ​ດັ່ງ­ກ່າວ​ນັ້ນ ໄດ້​ສະ­ແດງ​ໃຫ້​ເຫັນ​ວ່າ ປ່າ​ສະ­ຫງວນ​ດັ່ງ­ກ່າວ ໄດ້​ມີ​ຄວາມ​ອຸ­ດົມ­ສົມ­ບູນ​ໄປ ດ້ວຍ​ຊີ­ວະ​ນາໆພັນ ແລະ ເຮັດ​ໃຫ້​ຊາວ­ບ້ານ​ມີ​ຍອດ­ນ້ຳ​ອັນ​ອຸ­ດົມ­ສົມ­ບູນ ເພື່ອ​ນຳ​ໃຊ້​ເຂົ້າ​ໃສ່​ການ​ຜະ­ລິດ​ນາ­ປີ ແລະ ການ​ປູກ​ພືດ​ລະ­ດູ­ແລ້ງ​ຢ່າງ​ເປັນ​ປົກ­ກະ­ຕິ.</p> <p style="text-align: justify;"> <strong>ໂດຍ: ນາງ ວຽງ​ຄຳ ມະ­ນີ​ວົງ</strong></p>

ຂ່າວທີ່ກ່ຽວຂ້ອງ