ຂ່າວຫຼ້າສຸດ

ລາວ​ໂຕ​ໂຢ​ຕ້າ ເສຍ​ໃຫ້ ພີ​ທີ ປຣະ​ຈວບ ຕົກ​ຮອບ ເຕະບານ​ລີ​ໂອ​ຄັບ

429 28 ມ.ກ. 2020 ວົງຈອນກີລາ
ລາວ​ໂຕ​ໂຢ​ຕ້າ ເສຍ​ໃຫ້ ພີ​ທີ ປຣະ​ຈວບ ຕົກ​ຮອບ ເຕະບານ​ລີ​ໂອ​ຄັບ

    ການ​ແຂ່ງຂັນ​ເຕະບານ ລາຍການ ລີ​ໂອ​ຄັບ 2020 ຈັດ​ຂຶ້ນ​ເພື່ອ​ເປັນ​ການ​ອຸ່ນ​ເຄື່ອງ​ທົດ​ສອບ​ທີມ​ກ່ອນ​ເລີ່ມ​ລີກ​ລະດູ​ການ​ໃໝ່ ປີ 2020 ການ​ແຂ່ງຂັນ​ຮອບ 8 ທີມ​ສຸດ​ທ້າຍ​ສອງ​ຄູ່​ໃນ​ວັນ​ທີ 26 ມັງ ກອນ 2020 ສະໂມສອນ ພີ​ທີ ປຣະ​ຈວບ ເອ​​ັຟ​ຊີ ທີມ​ໃນ​ລີກ​ສູງ​ສຸດ​ຂອງ​ປະເທດ​ໄທ ແຊັມ​ລີກ​ຄັບ ປະເທດ​ໄທ ປີ 2019 ເປີດ​ສະໜາມ​ສາມ​ອ່າວ ແຂວງ​ປຣະ​ຈວບ​ຄີ​ຣີ​ຂັນ ພົບ​ກັບ ລາວ ໂຕ​ໂຢ​ຕ້າ ເອ​​ຟ​ຊີ ທີມ​ແຊັມ​ລາວ​ພຣີ​ເມຍ​ລີກ 3 ສະໄໝ​ຕິດຕໍ່​ກັນ ແລະ ແຊັມ LFF Cup 2019.

     ເລີ່ມ​ເກມ​ພາບ​ລວມ​ທັງ​ສອງ​ທີມ​ສູ້​ກັນ​ບໍ່​ຂາດ​ຂັ້ນ ແຕ່​ເຈົ້າ​ບ້ານ​ຄອງ​ບານ ແລະ ສ້າງສັນ​ໂອກາດ​ໄດ້​ດີ​ກວ່າ​ເລັກ​ໜ້ອຍ ແລະ ໄດ້​ປະຕູ​ຂຶ້ນ​ນຳ​ຈາກ ວິນ​ລ້ຽມ ເຮັນ​ຣີ​ເກ້ ນາທີໆ 40 ຈົບ​ເຄິ່ງ​ເວລາ​ທີ​ໜຶ່ງ ພີ​ທີ ປຣະ​ຈວບ ນຳ ລາວ​ໂຕ​ໂຢ​ຕ້າ 1-0 ມາ​ເຄິ່ງ​ຫຼັງ ລາວ​ໂຕ​ໂຢ​ຕ້າ ເດີນ​ໜ້າ​ບຸກ​ໃສ່​ຫຼາຍ​ກວ່າ​ເກົ່າ ແລະ ມີ​ໂອກາດ​ຕີ​ສະເໝີ ແຕ່​ຂາດ​ຄວາມ​ເດັດຂາດ ສຸດ​ທ້າຍ​ເປັນ​ເຈົ້າ​ບ້ານ ພີ​ທີ ປຣະ​ຈວບ ມາ​ໄດ້​ປະຕູ​ປິດ​ທ້າຍ​ຈາກ ວີ​ຣະ​ວຸດ ກາ​ເຢັມ ນາທີໆ 78 ຈົບ​ເກມ ພີ​ທີ ປຣະ​ຈວບ ເອ​​ຟ​ຊີ ຊະນະ ລາວ​ໂຕ​ໂຢ​ຕ້າ 2-0 ເຂົ້າ​ຮອບ 4 ທີມ​ສຸດ​ທ້າຍ​ພົບ​ກັບ ການ​ທ່າເຮືອ ເອ​​ັຟ​ຊີ ແຊັມ​ເອ​ເອ​​ັຟ​ຄັບ ປະເທດ​ໄທ ປີ 2019 ທີ່​ຊະນະ ເຊ​ເຣ​ໂຊ້ ໂອຊາ​ກະ ທີມ​ອັນ​ດັບ 5 ຈາກ​ລີກ​ສູງ​ສຸດ​ຍີ່ປຸ່ນ ປີ 2019 ດ້ວຍ​ຜົນ 3-0.

    ການ​ແຂ່ງຂັນ​ລາຍການ​ຕໍ່​ໄປ​ຂອງ ລາວ​ໂຕ​ໂຢ​ຕ້າ ຈະ​ລົງ​ຫຼິ້ນ​ເກມ AFC Cup 2020 ຮອບ​ແບ່ງ​ກຸ່ມ ກຸ່ມ F ປະກອບ​ມີ: ໂຮ​ຈີ່​ມິນ ຊິ​ຕີ້ ຈາກ​ຫວຽດນາມ Hougang United FC ຈາກ​ສິງກະໂປ ແລະ ທີມ​ຊະນະ​ໃນ​ຮອບ​ເພລ​​ອັອຟ ລະຫວ່າງ INDERA SC ຈາກ​ບຣູ​ໄນ ພົບ YANGON UNITED FC ຈາກ​ມຽນ​ມາ ຈະ​ແຂ່ງຂັນ​ໃນ​ວັນ​ທີ 11 ກຸມພາ ຫາ​ວັນ​ທີ 13 ພຶດສະພາ 2020.

                                                                             

ຂ່າວທີ່ກ່ຽວຂ້ອງ