ຂ່າວຫຼ້າສຸດ

ສາທາຢືນຢັນ ລາວເຮົາຍັງບໍ່ທັນພົບຜູ້ຕິດເຊື້ອ ພະຍາດໂຄໂຣນາສາຍພັນໃໝ່

608 28 ມ.ກ. 2020 ຂ່າວໜ້າ​ໜຶ່ງ
ສາທາຢືນຢັນ ລາວເຮົາຍັງບໍ່ທັນພົບຜູ້ຕິດເຊື້ອ ພະຍາດໂຄໂຣນາສາຍພັນໃໝ່

   ກະ­ຊວງ​ສາ­ທາ­ລະ­ນະ​ສຸກ ອອກ​ມາ​ຢືນ­ຢັນ​ວ່າ ລາວ​ເຮົາ​ຍັງ​ບໍ່​ທັນ​ພົບ​ກໍ­ລະ­ນີ​ຕິດ­ເຊື້ອ​ພະ­ຍາດ​ປອດ​ອັກ­ເສບ​ທີ່​ເກີດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (novel Corona Virus) ພຽງ​ແຕ່​ມີ​ກໍ­ລະ­ນີ​ສົງ­ໄສ​ຈຶ່ງ​ໄດ້​ນຳ​ເຂົ້າ​ຫ້ອງ​ແຍກ​ປ່ຽວ​ເພື່ອ​ກວດ​ຕິດ­ຕາມ​ຄົນ​ເຈັບ ແຕ່​ຜົນ​ການ​ກວດ​ໄດ້​ຢືນ­ຢັນ​ແລ້ວ​ວ່າ​ບໍ່​ພົບ​ການ​ຕິດ­ເຊື້ອ​ພະ­ຍາດ​ດັ່ງ­ກ່າວ ພ້ອມ​ນັ້ນ ກະ­ຊວງ​ສາ­ທາ­ລະ­ນະ​ສຸກ​ໄດ້​ມີ​ການ​ເຝົ້າ​ລະ­ວັງ​ສະ­ຖາ­ນະ​ການ​ຢ່າງ​ໃກ້­ຊິດ.

   ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ໄດ້​ຖະ­ແຫຼງ​ຂ່າວ​ກ່ຽວ​ກັບ​ພະ­ຍາດ​ປອດ​ອັກ­ເສບ​ທີ່​ເກີດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່  ໃນ​ວັນ​ທີ 27 ມັງ­ກອນ 2020 ທີ່​ກະ­ຊວງ​ສາ­ທາ­ລະ­ນະ​ສຸກ ວ່າ: ສຳ­ລັບ​ກໍ­ລະ­ນີ​ທີ່​ເປັນ​ຂ່າວ​ຢູ່​ໃນ​ຂ່າວ​ສັງ­ຄົມ​ອອນ​ລາຍ​ທີ່​ລະ­ບຸ​ວ່າ​ລາວ​ເຮົາ​ພົບ​ກໍ­ລະ­ນີ​ທີ່​ຕິດ­ເຊື້ອ​ພະ­ຍາດ​ປອດ​ອັກ­ເສບ​ທີ່​ເກີດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ນັ້ນ​ແມ່ນ​ບໍ່​ເປັນ­ຄວາມ​ຈິງ ສຳ­ລັບ​ກໍ­ລະ­ນີ​ສົງ­ໄສ​ປະ­ກອບ​ມີ​ນັກ​ທ່ອງ​ທ່ຽວ​ຈາກ​ປະ­ເທດ​ຈີນ ນັກ​ສຶກ​ສາ​ລາວ​ທີ່​ໄປ​ຮຽນ​ຢູ່​ຈີນ ແລະ ພະ­ນັກ­ງານ​ຕ້ອນ­ຮັບ​ໃນ​ສາຍ​ການ­ບິນ​ຈີນ​ຈຳ­ນວນ​ນີ້​ໄດ້​ນຳ​ເຂົ້າ​ໄປ​ແຍກ​ປ່ຽວ​ເພື່ອ​ຕິດ­ຕາມ ແລະ ວິ­ເຄາະ​ຈາກ​ທີມ​ແພດ​ຊ່ຽວ­ຊານ​ແລ້ວ​ໂດຍ​ຢັ້ງ­ຢືນ​ວ່າ​ທັງ 3 ກໍ­ລະ­ນີ​ຍັງ​ບໍ່​ພົບ​ການ​ຕິດ­ເຊື້ອ.

   ເຖິງ​ແມ່ນ​ວ່າ​ລາວ​ເຮົາ​ຍັງ​ບໍ່​ມີ​ລາຍ​ງານ​ກໍ­ລະ­ນີ​ຕິດ­ເຊື້ອ​ພະ­ຍາດ​ປອດ​ອັກ­ເສບ​ທີ່​ເກີດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ກໍ​ຕາມ ກະ­ຊວງ​ສາ​ທາ​ໄດ້​ມີ​ການ​ຕິດ­ຕາມ​ເຝົ້າ​ລະ­ວັງ​ຢ່າງ​ໃກ້­ຊິດ ແລະ ເຂັ້ມ​ງວດ ໂດຍ​ມີ​ການ​ກຳ­ນົດ​ຈຸດ​ປະ­ສານ​ງານ​ໃນ​ການ­ຈັດ­ຕັ້ງ​ປະ­ຕິ­ບັດ​ມາດ​ຕະ­ການ​ໃນ​ການ​ກະ­ກຽມ​ຄວາມ​ພ້ອມ ໂດຍ​ສະ­ເພາະ​ດ່ານ​ທາງ­ບົກ ແລະ ທາງ​ອາ­ກາດ 27 ດ່ານ ໃນ​ນັ້ນ ໄດ້​ຕິດ​ເຄື່ອງ​ກວດ​ອຸນ­ຫະ­ພູມ 3 ດ່ານ ນອກ​ນັ້ນ ໄດ້​ມີ​ເຄື່ອງ​ກວດ​ອຸນ­ຫະ­ພູມ​ພ້ອມ​ທີມ​ງານ​ປະ­ຈຳ​ຕະ­ຫຼອດ 24 ຊົ່ວ­ໂມງ ທັງ​ໄດ້​ໃຫ້​ຂໍ້​ມູນ​ຂ່າວ­ສານ​ຜູ້­ໂດຍ­ສານ​ຂາ​ເຂົ້າ ມີ​ການ​ຄັດ​ກ່ອງ​ຜູ້­ໂດຍ­ສານ​ທີ່​ເດີນ­ທາງ​ຈາກ​ປະ­ເທດ​ທີ່​ມີ​ລາຍ​ງານ​ການ​ລະ­ບາດ ບັນ­ດາ​ໂຮງ­ໝໍ​ໄດ້​ກະ­ກຽມ​ຫ້ອງ​ແຍກ​ປ່ຽວ ອຸ­ປະ­ກອນ​ປ້ອງ​ກັນ​ໂຕ​ເອງ ແລະ ລົດ​ຮັບ​ສົ່ງ​ຄົນ​ເຈັບ ຍົກ​ລະ­ດັບ​ຫ້ອງ​ວິ­ເຄາະ​ທີ່​ສາ­ມາດ​ກວດ​ຫາ​ເຊື້ອ​ຈຸ​ລະ​ໂຣກ​ດັ່ງ­ກ່າວ.

   ມາ​ຮອດ​ວັນ​ທີ 27 ມັງ­ກອນ 2020 ສປ ຈີນ ໄດ້​ພົບ​ກໍ­ລະ­ນີ​ຄົນ​ເຈັບ​ພະ­ຍາດ​ນີ້ 2.744 ກໍ­ລະ­ນີ ເສຍ​ຊີ­ວິດ 80 ກໍ­ລະ­ນີ ເຈັບ​ໜັກ 461 ກໍ­ລະ­ນີ ມີ​ລາຍ​ງານ​ທັງ​ໝົດ 30 ເມືອງ ພ້ອມ​ນີ້ ຍັງ​ພົບ​ຄົນ​ເຈັບ​ຢູ່​ຮົງ​ກົງ 8 ກໍ­ລະ­ນີ ມາ​ເກົ້າ 5 ກໍ­ລະ­ນີ ໄຕ້​ຫວັນ 4 ກໍ­ລະ­ນີ ໄທ 7 ກໍ­ລະ­ນີ ຍີ່­ປຸ່ນ 3 ກໍ­ລະ­ນີ ສ ເກົາ­ຫຼີ 3 ກໍ­ລະ­ນີ ຫວຽດ­ນາມ 2 ກໍ­ລະ­ນີ ສິງ­ກະ­ໂປ 4 ກໍ­ລະ­ນີ ສະ­ຫະ­ລັດ​ອາ​ເມ​ຣິ​ກາ 3 ກໍ­ລະ­ນີ ເນ​ປານ 1 ກໍ­ລະ­ນີ ຝຣັ່ງ 3 ກໍ­ລະ­ນີ ອົດ​ສະ​ຕຣາ​ລີ 4 ກໍ­ລະ­ນີ ມາ​ເລ​ເຊຍ 4 ກໍ­ລະ­ນີ ກາ​ນາ​ດາ 1 ກໍ­ລະ­ນີ ເຖິງ​ວ່າ​ລາວ​ເຮົາ​ຍັງ​ບໍ່​ພົບ​ກໍ­ລະ­ນີ​ຕິດ­ເຊື້ອ ແນວ­ໃດ​ກໍ​ຂໍ​ໃຫ້​ທຸກ​ພາກ­ສ່ວນ​ມີ​ສ່ວນ​ຮ່ວມ​ໃນ​ການ​ປ້ອງ​ກັນ ແລະ ຄວບ​ຄຸມ­ພະ​ຍາດ​ດັ່ງ­ກ່າວ​ຢ່າງ​ເຂັ້ມ​ງວດ ໃນ​ກໍ­ລະ­ນີ​ຜູ້​ທີ່​ເດີນ­ທາງ​ກັບ​ມາ​ຈາກ​ປະ­ເທດ​ດັ່ງ­ກ່າວ​ກໍ​ຄວນ​ເອົາ­ໃຈ­ໃສ່​ຕິດ­ຕາມ​ອາ­ການ​ຂອງ​ຕົນ​ເອງ ແລະ ສາ­ມາດ​ສອບ​ຖາມ​ຂໍ້​ມູນ​ເພີ່ມ​ເຕີມ ຫຼື ຖ້າ​ຫາກ​ພົບ​ເຫັນ​ຄົນ​ທີ່​ມີ​ອາ­ການ​ສົງ­ໄສ​ເປັນ​ພະ­ຍາດ​ນີ້ ແລະ ຕ້ອງ­ການ​ຄວາມ​ຊ່ວຍ­ເຫຼືອ ສາ­ມາດ​ໂທ​ຫາ​ເບີ 020 54066777 ຫຼື ສາຍ​ດ່ວນ 166 ໃນ​ໂມງ​ລັດ​ຖະ​ການ.

   ສ່ວນ​ວິ­ທີ​ປ້ອງ​ກັນ​ຄວນ​ຫຼີກ​ລ່ຽງ​ການ​ເດີນ­ທາງ​ໄປ​ເຂດ​ທີ່​ມີ​ການ​ລະ­ບາດ ຫຼື ຊຸມ​ຊົນ​ແອ​ອັດ ຖ້າ​ຈຳ­ເປັນ​ຈະ​ໄປ​ຕ້ອງ​ໄດ້​ປະ­ຕິ­ບັດ ຄື: ຫຼີກ​ລ່ຽງ​ການ​ສຳ­ຜັດ​ໃກ້­ຊິດ​ກັບ​ຄົນ​ທີ່​ມີ​ອາ­ການ​ຄ້າຍ­ຄື​ໄຂ້​ຫວັດ ເຊັ່ນ: ໄຂ້ ໄອ​ເຈັບ­ຄໍ ແລະ ຫາຍ­ໃຈ​ຍາກ ຖ້າ​ມີ​ອາ­ການ​ທີ່​ກ່າວ​ມາ​ຂ້າງ​ເທິງ​ນີ້​ກະ­ລຸ­ນາ​ໄປ​ພົບ​ແພດ​ທີ່­ຢູ່​ໃກ້ ຫຼີກ​ລ່ຽງ​ການ​ສຳ­ຜັດ​ສັດ​ເປັນ ຫຼື ສັດ​ຕາຍ ປະ­ຕິ­ບັດ​ມາ­ລະ­ຍາດ​ໃນ​ການ​ໄອ​ຈາມ​ດ້ວຍ​ການ​ອັດ​ປາກ ແລະ ດັງ ໃຊ້​ຜ້າ​ອັດ​ປາກ ລ້າງ​ມື​ຂອງ​ທ່ານ​ທຸກ​ຄັ້ງ​ດ້ວຍ​ສະ­ບູ ຫຼື ນ້ຳ​ຢາ​ຂ້າ​ເຊື້ອ ຫາກ​ທ່ານ​ມີ​ອາ­ການ​ດັ່ງ­ກ່າວ ກະ­ລຸ­ນາ​ພົບ​ແພດ​ແລະ ແຈ້ງ​ປະ­ຫວັດ​ການ​ເດີນ­ທາງ​ຂອງ​ທ່ານ ຖ້າ​ໄດ້​ໄປ​ເຂດ​ທີ່​ມີ​ການ​ລະ­ບາດ​ໃນ​ໄລ­ຍະ 14 ວັນ​ກ່ອນ​ມີ​ອາ­ການ.

ຂ່າວທີ່ກ່ຽວຂ້ອງ