ຂ່າວຫຼ້າສຸດ

ສະຫຼອງວັນຊາດອົດສະຕຣາລີ ຄົບຮອບ 68 ປີ

1.031 27 ມ.ກ. 2020 ຂ່າວໜ້າ​ໜຶ່ງ

   ສະ­ຖານ­ທູດ​ອົດ​ສະ​ຕຣາ​ລີ ປະ­ຈຳ​ລາວ ຈັດ​ງານ​ລ້ຽງ​ສະ­ເຫຼີມ­ສະ­ຫຼອງ​ວັນ­ຊາດ​ອົດ​ສະ​ຕຣາ​ລີ ຄົບ­ຮອບ 68 ປີ (26 ມັງ­ກອນ 1952-26 ມັງ­ກອນ 2020) ຂຶ້ນ​ວັນ​ທີ 23 ມັງ­ກອນ 2020 ຢູ່​ສະ­ຖານ­ທູດ​ດັ່ງ­ກ່າວ ໂດຍ​ມີ​ທ່ານ​ນາງ ສູນ​ທອນ ໄຊ​ຍະ​ຈັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ທ່ານ ຊ໋ອງ ເບີ​ນາດ ຄາ​ຣັດ​ສ​ໂກ ເອກ​ອັກ​ຄະ​ລັດ​ຖະ​ທູດ​ອົດ​ສະ​ຕຣາ​ລີ ປະ­ຈຳ​ລາວ ພ້ອມ​ດ້ວຍ​ບັນ­ດາ​ຮອງ​ລັດ­ຖະ­ມົນ­ຕີ ທູ­ຕາ­ນຸ­ທູດ ແລະ ອົງ​ການ­ຈັດ­ຕັ້ງ​ສາ­ກົນ ເຂົ້າ​ຮ່ວມ.

   ທ່ານ ຊ໋ອງ ເບີ​ນາດ ຄາ​ຣັດ​ສ​ໂກ ກ່າວ​ວ່າ: ລັດ­ຖະ­ບານ​ອົດ​ສະ​ຕຣາ​ລີ ໄດ້​ສືບ­ຕໍ່​ແກ້​ໄຂ​ບັນ­ຫາ​ໄຟ​ໄໝ້​ປ່າ ໂດຍ​ໄດ້​ໃຫ້­ການ​ສະ­ໜັບ­ສະ­ໜູນ ແລະ ໃຫ້​ກຳ­ລັງ​ໃຈ​ຕໍ່​ຄອບ­ຄົວ ຊາວ​ກະ­ສິ­ກອນ ແລະ ຫົວ­ໜ່ວຍ​ທຸ­ລະ​ກິດ ທີ່​ໄດ້​ຮັບ ຜົນ​ກະ­ທົບ​ຈາກ​ເຫດ­ການ​ດັ່ງ­ກ່າວ ດ້ວຍ​ຄວາມ​ເອົາ­ໃຈ­ໃສ່ ແລະ ຮີບ​ຮ້ອນ​ຟື້ນ​ຟູ​ສະ­ພາບ​ແວດ​ລ້ອມ ໃຫ້​ກັບ​ຄືນ​ສູ່​ສະ ພາບ​ເດີມ​ໂດຍ​ໄວ ຂໍ​ສະ­ແດງ​ຄວາມ​ຂອບ­ໃຈ​ຕໍ່​ທຸກ​ພາກ­ສ່ວນ ທີ່​ໄດ້​ສະ­ແດງ​ຄວາມ​ເປັນ​ຫ່ວງ​ເປັນ​ໄຍ ແລະ ໃຫ້­ການ​ສະ­ໜັບ­ສະ­ໜູນ​ອົດ​ສະ​ຕຣາ​ລີ ທັງ​ຈາກ​ລັດ­ຖະ­ບານ ກໍ​ຄື ປະ­ຊາ­ຊົນ​ລາວ ສົ່ງ​ເຖິງ​ອົດ​ສະ​ຕຣາ​ລີ​ໃນ​ເວ­ລາ​ທີ່​ຫຍຸ້ງ ຍາກ ເຮັດ​ໃຫ້​ພວກ​ເຮົາ​ເຫັນ​ໄດ້​ເຖິງ​ສາຍ​ພົວ­ພັນ ແລະ ມິດ­ຕະ­ພາບ​ອັນ​ແໜ້ນ​ແຟ້ນ ລະ­ຫວ່າງ​ອົດ​ສະ​ຕຣາ​ລີ ກັບ ສປປ ລາວ ແລະ ກັບ​ບັນ­ດາ​ປະ­ເທດ​ເພື່ອນ​ມິດ​ຂອງ​ອົດ​ສະ​ຕຣາ​ລີ ຈະ­ແຈ້ງ​ຂຶ້ນ.

   ລັດ­ຖະ­ບານ​ອົດ​ສະ​ຕຣາ​ລີ ໄດ້​ສະ­ໜັບ­ສະ­ໜູນ​ແກ່ ສປປ ລາວ ໃນ​ການ​ສ້າງ​ຄວາມ​ສາ­ມາດ​ທີ່​ຈຳ­ເປັນ​ແຕ່​ລະ​ດ້ານ ເຊັ່ນ: ການ​ປັບ­ປຸງ​ນະ­ໂຍ­ບາຍ​ດ້ານ​ການ​ສຶກ​ສາ ທີ່ ສປປ ລາວ ໃຫ້​ຄວາມ​ສຳ­ຄັນ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ດ້ານ​ແຮງ​ງານ​ຂອງ​ຕະ­ຫຼາດ​ທີ່​ນັບ​ມື້​ເພີ່ມ​ຂຶ້ນ ການ​ປັບ­ປຸງ​ນະ­ໂຍ­ບາຍ​ທີ່​ເຮັດ​ໃຫ້​ເດັກ​ຍິງ ຄົນ​ພິ­ການ ແລະ ຊົນ­ເຜົ່າ ບໍ່​ຖືກ​ປ່ອຍ­ປະ​ວຽກ​ງານ​ສ້າງ​ຊັບ­ພະ­ຍາ­ກອນ​ມະ­ນຸດ ແລະ​ອື່ນໆ ນອກ​ນີ້ ໃນ​ປີ 2020 ລັດ­ຖະ­ບານ​ອົດ​ສະ ຕຣາ​ລີ ຈະ​ສືບ­ຕໍ່​ເພີ່ມ​ທະ­ວີ​ຮັດ​ແໜ້ນ​ສ້າງ​ສາຍ​ພົວ­ພັນ ລະ­ຫວ່າງ​ສອງ​ປະ­ເທດ​ໃຫ້​ແໜ້ນ​ແຟ້ນ​ຂຶ້ນ ໂດຍ​ການ​ແລກ­ປ່ຽນ​ໄປ-ມາ​ຫາ​ສູ່ ລະ­ຫວ່າງ​ການ​ນຳ​ຂອງ​ສອງ​ປະ­ເທດ ແລະ ໂອ­ກາດ​ອັນ​ໃກ້​ນີ້ ຈະ​ມີ​ການ​ໄຂ​ນຳ​ໃຊ້​ສະ ຖານ​ທູດ​ລາວ​ຫຼັງ​ໃໝ່ ຢູ່​ນະ­ຄອນ­ຫຼວງ​ແຄນ​ເບີ​ລາ​ຕື່ມ​ອີກ.

ຂ່າວທີ່ກ່ຽວຂ້ອງ