ຂ່າວຫຼ້າສຸດ

ສສ ນວ ຮັບຮອງຫຼາຍບັນຫາສຳຄັນ ພ້ອມແຕ່ງຕັ້ງບຸຄະລາກອນ 3 ພະແນກການ

764 27 ມ.ກ. 2020 ຂ່າວໜ້າ​ໜຶ່ງ
ສສ ນວ ຮັບຮອງຫຼາຍບັນຫາສຳຄັນ ພ້ອມແຕ່ງຕັ້ງບຸຄະລາກອນ 3 ພະແນກການ

   ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ດຳ­ເນີນ​ມາ​ເປັນ​ເວ­ລາ 5 ວັນ ເຖິງ​ວັນ​ທີ 24 ມັງ­ກອນ 2020 ຈຶ່ງ​ໄດ້​ອັດ​ລົງ​ດ້ວຍ​ຜົນ­ສຳ­ເລັດ​ຈົບ­ງາມ ຢູ່ ຫ້ອງ​ວ່າ­ການ​ປົກ­ຄອງ ນວ ໂດຍ​ການ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ ສປ ນວ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ການ​ນຳ ນວ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ສະ­ມາ­ຊິກ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສສ ນວ) ເຂົ້າ​ຮ່ວມ.

   ທ່ານ ອາ­ນຸ­ພາບ ຕຸ​ນາ​ລົມ ກ່າວ​ອັດ​ກອງ​ປະ­ຊຸມ​ວ່າ: ກອງ​ປະ­ຊຸມ​ຄັ້ງ​ນີ້ ໄດ້​ຮັບ­ຮອງ​ເອົາ​ບົດ​ລາຍ​ງານ​ຂອງ​ທ່ານ​ເຈົ້າ​ຄອງ ນວ ກ່ຽວ​ກັບ​ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ ປະ­ມານ​ປີ 2019 ແລະ ທິດ​ທາງ​ປີ 2020 ເຊິ່ງ​ຕີ​ລາ­ຄາ​ສູງ​ຕໍ່​ຄວາມ​ພະ­ຍາ­ຍາມ​ຂອງ​ອົງ­ການ​ປົກ­ຄອງ ໃນ​ການ​ຊີ້​ນຳ-ນຳ­ພາ ບັນ­ດາ​ພະ­ແນກ­ການ ອົງ­ການ ໃນ​ການ​ສູ້​ຊົນ​ຈັດ​ຕັ້ງ​ປະ­ຕິ­ບັດ​ແຜນ​ພັດ­ທະ­ນາ ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ປີ 2019 ໄດ້​ຮັບ​ຜົນ­ສຳ­ເລັດ​ຫຼາຍ​ດ້ານ ເຮັດ​ໃຫ້ ນວ ສືບ­ຕໍ່​ມີ​ສະ­ຖຽນ​ລະ​ພາບ​ດ້ານ​ການ­ເມືອງ ສັງ­ຄົມ​ມີ​ຄວາມ​ສະ­ຫງົບ​ໂດຍ​ພື້ນ­ຖານ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໄດ້​ຮັບ​ການ​ຍົກ​ລະ­ດັບ​ດີ​ຂຶ້ນ​ເປັນ​ກ້າວໆ ຄຽງ​ຄູ່​ກັນ​ນີ້ ກອງ​ປະ­ຊຸມ​ຍັງ​ໄດ້​ປະ­ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ​ຕໍ່​ບັນ­ຫາ​ຂໍ້­ຄົງ­ຄ້າງ ສິ່ງ​ທ້າ​ທາຍ ແລະ ອຸດ​ຕັນ ໃນ​ການ​ຄຸ້ມ​ຄອງ​ບໍ­ລິ­ຫານ​ລັດ ດ້ານ​ເສດ­ຖະ­ກິດ-ສັງ­ຄົມ ພ້ອມ​ທັງ​ສະ­ເໜີ​ຫຼາຍ​ມາດ​ຕະ­ການ ແລະ ວິ­ທີ​ແກ້​ໄຂ​ຕົວ​ຈິງ ເພື່ອ​ສູ້​ຊົນ​ຈັດ​ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ​ຖະ ກິດ-ສັງ­ຄົມ ແລະ ແຜນ​ງົບ­ປະ­ມານ​ປີ 2020 ໃຫ້​ບັນ­ລຸ​ຕາມ​ຄາດ­ໝາຍ​ທີ່​ວາງ​ໄວ້ ນອກ​ນີ້ ຍັງ​ໄດ້​ຮັບ­ຮອງ​ເອົາ​ບົດ​ລາຍ​ງານ​ຜົນ​ການ­ເຄື່ອນ­ໄຫວ​ວຽກ​ງານ ປີ 2019 ແລະ ທິດ​ທາງ ປີ 2020 ຂອງ​ອົງ­ການ​ກວດ​ສອບ​ປະ­ຈຳ​ພາກ​ກາງ ບົດ​ລາຍ​ງານ​ຜົນ​ການ​ກວດ​ສອບ​ບົດ​ສະ­ຫຼຸບ​ຂາດ​ຕົວ ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ ປີ 2018 ຂອງ ນວ ໂດຍ​ໄດ້​ສະ­ແດງ​ຄວາມ​ຊົມ­ເຊີຍ​ອົງ­ການ​ດັ່ງ­ກ່າວ ທີ່​ພະ­ຍາ­ຍາມ​ກວດ​ສອບ ແລະ ສາ­ມາດ​ລາຍ​ງານ​ຜົນ​ຂອງ​ການ​ກວດ​ສອບ ເຊິ່ງ​ໄດ້​ສະ­ເໜີ​ຕໍ່​ອົງ­ການ​ປົກ­ຄອງ ໂດຍ​ສະ­ເພາະ ພະ ແນກ​ການ​ເອົາ­ໃຈ­ໃສ່​ຊີ້​ນຳ ແລະ ຊຸກ­ຍູ້ ແກ້​ໄຂ​ຜົນ​ການ​ກວດ​ສອບ ຕາມ​ມະ­ຕິ​ກອງ​ປະ­ຊຸມ​ສະ­ພາ​ຄັ້ງ​ນີ້ ໃຫ້​ເປັນ​ຮູບ​ປະ​ທຳ ແນ­ໃສ່​ສະ­ກັດ​ກັ້ນ​ປາ­ກົດ­ການ​ຫຍໍ້­ທໍ້ ໃນ​ການ​ລະ­ເມີດ​ວິ­ໄນ​ແຜນ­ການ-ວິ­ໄນ​ການ​ເງິນ ແລະ ກົດ­ໝາຍ​ໃຫ້​ຫຼຸດ​ລົງ.

   ຮັບ­ຮອງ​ເອົາ​ບົດ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ ປີ 2019 ແລະ ທິດ​ທາງ​ການ ເຄື່ອນ​ໄຫວ ປີ 2020 ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ ແລະ ສານ​ປະ­ຊາ­ຊົນ ນວ ເຊິ່ງ​ໄດ້​ສະ­ເໜີ​ໃຫ້​ສອງ​ອົງ­ການ​ດັ່ງ­ກ່າວ ສຸມ​ໃສ່​ສຶກ​ສາ​ອົບ­ຮົມ​ການ­ເມືອງ-ແນວ​ຄິດ ປັບ­ປຸງ​ບູ­ລະ­ນະ​ການ­ຈັດ­ຕັ້ງ​ພາຍ​ໃນ​ອົງ­ການ​ໃຫ້​ເຂັ້ມ­ແຂງ ສູ້​ຊົນ​ປະ­ຕິ­ບັດ​ໜ້າ­ທີ່​ວິ­ຊາ​ສະ­ເພາະ​ຂອງ​ຕົນ​ໃຫ້​ເລິກ­ເຊິ່ງ ຮອບ­ດ້ານ​ພາ­ວະ​ວິ­ໄສ ຮັບ­ປະ­ກັນ​ຄວາມ​ຍຸ­ຕິ​ທຳ​ໃນ​ສັງ­ຄົມ ຮັບ­ຮອງ​ເອົາ​ບົດ​ລາຍ​ງານ​ຜົນ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ ປີ 2019 ແລະ ທິດ​ທາງ​ການ­ເຄື່ອນ­ໄຫວ ປີ 2020 ຂອງ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ ກອງ​ປະ­ຊຸມ​ຕີ​ລາ­ຄາ​ວ່າ ການ­ຈັດ­ຕັ້ງ​ປະ­ຕິ­ບັດ ສິດ ແລະ ໜ້າ­ທີ່​ຂອງ ສປ ນວ ມື້​ນັບ​ດີ​ຂຶ້ນ ແລະ ມີ​ຜົນ­ສຳ­ເລັດ​ເປັນ​ກ້າວໆ ໂດຍ​ສະ­ເພາະ ການ​ປະ­ຕິ­ບັດ 3 ພາ­ລະ​ບົດ­ບາດ ຄື: ດ້ານ​ນິ­ຕິ​ກຳ ດ້ານ​ການ​ຕົກ­ລົງ​ບັນ­ຫາ​ສຳ­ຄັນ​ຂອງ ນວ ແລະ ດ້ານ​ການ​ຕິດ­ຕາມ​ກວດ­ກາ ເຮັດ​ໃຫ້​ບົດ­ບາດ​ຂອງ ສປ ນວ ນັບ​ມື້​ສູງ ແລະ ພົ້ນ​ເດັ່ນ​ຂຶ້ນ ຮັບ­ຮອງ​ເອົາ​ຜົນ​ປະ​ເມີນ​ການ​ປະ­ຕິ­ບັດ​ໜ້າ­ທີ່​ຂອງ​ບຸ​ຄະ­ລາ​ກອນ​ດຳ­ລົງ​ຕຳ­ແໜ່ງ ທີ່ ສປ ນວ ເລືອກ​ຕັ້ງ ແລະ ຮັບ ຮອງ​ເອົາ​ການ​ແຕ່ງ­ຕັ້ງ 38 ທ່ານ ເຊິ່ງ​ເປັນ​ຄັ້ງ​ທຳ​ອິດ​ທີ່​ມີ​ການ​ປະ​ເມີນ​ຜົນ​ດັ່ງ­ກ່າວ ຮັບ­ຮອງ​ເອົາ​ຂໍ້​ຕົກ­ລົງ ຂອງ​ທ່ານ​ເຈົ້າ​ຄອງ ນວ 4 ສະ­ບັບ ຄື: ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ​ປະ​ເມີນ​ຫົວ­ໜ່ວຍ​ລາ­ຄາ​ທີ່​ດິນ​ທົ່ວ ນວ ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ​ພັດ­ທະ­ນາ ນວ ໃຫ້​ເປັນ​ຕົວ​ເມືອງ​ສີ­ຂຽວ (ສ ສີ­ຂຽວ) ຮ່າງ​ຂໍ້​ຕົກ­ລົງ​ວ່າ​ດ້ວຍ​ໂຄງ ການ​ສ້າງ ນວ ສະ­ຫວ່າງ (ສ ສະ­ຫວ່າງ) ແລະ ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ​ຄວບ​ຄຸມ​ສຽງ​ເນືອງ​ນັນ ຢູ່ ນວ.

   ໃນ​ວາ­ລະ​ກອງ​ປະ­ຊຸມ​ຄັ້ງ​ນີ້ ຍັງ​ໄດ້​ຮັບ­ຮອງ​ເອົາ​ການ​ສະ­ເໜີ​ແຕ່ງ­ຕັ້ງ​ສະ­ມາ­ຊິກ​ອົງ­ການ​ປົກ­ຄອງ ນວ ບາງ​ຕຳ­ແໜ່ງ ຄື: ຮັບ­ຮອງ​ເອົາ​ທ່ານ ສິ­ລິ​ລາດ​ທົງ​ສິນ ທອງ​ເພັງ ເປັນ​ຫົວ­ໜ້າ​ພະ­ແນກ­ການ​ເງິນ ນວ ທ່ານ ສຸ​ລິ​ວັນ ພົມ​ມະ­ຫາ​ໄຊ ເປັນ​ຫົວ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນວ ທ່ານ​ນາງ ວັນ​ມະ­ນີ ພິມ​ມະ​ສານ ເປັນ​ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ຕື່ມ​ອີກ.

ຂ່າວທີ່ກ່ຽວຂ້ອງ