ຂ່າວຫຼ້າສຸດ

ສິນຄ້າ ODOP ແຫ່ງຊາດ ເພີ່ມຂຶ້ນເປັນ 55 ຫົວໜ່ວຍ

1.004 27 ມ.ກ. 2020 ຂ່າວໜ້າ​ໜຶ່ງ

   ທ່ານ ເບີ​ລິນ ເພັດ​ຈັນ­ທະ​ຣາດ ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນະ­ຄອນ­ຫຼວງ​ວຽງ​ຈັນ (ນວ) ໄດ້​ລາຍ​ງານ​ຕໍ່​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ພາ​ປະ­ຊາ­ຊົນ ນວ ຊຸດ​ທີ I ວັນ​ທີ 21 ມັງ­ກອນ 2020 ວ່າ: ການ​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ໂດຍ​ສະ­ເພາະ ວຽກ​ງານ​ຊຸກ­ຍູ້-ສົ່ງ­ເສີມ​ສິນ­ຄ້າ ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ແຫ່ງ​ຊາດ (ODOP) ຂອງ ນວ ຮອດ​ປີ 2019 ວຽກ​ງານ​ຊຸກ­ຍູ້-ສົ່ງ­ເສີມ​ຜະ­ລິດ​ຕະ​ພັນ​ສິນ­ຄ້າ ເພື່ອ​ເຮັດ​ກາ​ໝາຍ​ສິນ­ຄ້າ ODOP ແຫ່ງ​ຊາດ ປະ­ຕິ­ບັດ​ໄດ້​ເພີ່ມ​ຂຶ້ນ 10 ຫົວ­ໜ່ວຍ.

   ປັດ­ຈຸ­ບັນ ຫົວ­ໜ່ວຍ​ທີ່​ໄດ້​ຮັບ​ກາ​ໝາຍ​ສິນ­ຄ້າ ODOP ແຫ່ງ​ຊາດ ມີ 55 ຫົວ­ໜ່ວຍ 13 ກຸ່ມ​ຜະ­ລິດ 42 ຫົວ­ໜ່ວຍ​ວິ​ສາ​ຫະ​ກິດ 250 ຜະ­ລິດ​ຕະ​ພັນ ຈາກ 51 ບ້ານ 9 ຕົວ​ເມືອງ ໃນ ນວ ທຽບ­ໃສ່ ປີ 2018 ຫົວ­ໜ່ວຍ​ສິນ­ຄ້າ ODOP ເພີ່ມ​ຂຶ້ນ 10 ຫົວ­ໜ່ວຍ ກຸ່ມ​ຜະ­ລິດ ເພີ່ມ​ຂຶ້ນ 6 ກຸ່ມ ຫົວ­ໜ່ວຍ​ວິ​ສາ​ຫະ​ກິດ ເພີ່ມ​ຂຶ້ນ 5 ຫົວ­ໜ່ວຍ ຜະ­ລິດ​ຕະ​ພັນ ເພີ່ມ​ຂຶ້ນ 53 ຜະ­ລິດ​ຕະ​ພັນ ບ້ານ​ເພີ່ມ​ຂຶ້ນ 12 ບ້ານ.

   ຫຼັງ​ຈາກ​ຫົວ­ໜ່ວຍ​ທີ່​ໄດ້​ຮັບ​ການ​ຢັ້ງ­ຢືນ​ເປັນ​ສິນ­ຄ້າ ODOP ແຫ່ງ​ຊາດ​ແລ້ວ ພາກ​ລັດ​ກໍ​ໄດ້​ມີ​ກົນ​ໄກ​ຊຸກ­ຍູ້​ເປັນ​ລວງ​ດຽວ​ກັບ​ແຜນ​ພັດ­ທະ­ນາ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ຮອດ​ປີ 2020 ຂອງ ນວ ນອກ​ນີ້ ໃນ​ໂອ­ກາດ​ເທ​ສະ­ການ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ສາ­ກົນ 2020 ຍັງ​ສາ­ມາດ​ຊຸກ­ຍູ້​ຫົວ­ໜ່ວຍ​ສິນ­ຄ້າ ODOP ຂອງ ນວ ຄື: ໂຮງ­ງານ​ຜະ­ລິດ​ຕະ​ພັນ​ຫັດ­ຖະ­ກຳ​ປຸງ​ແຕ່ງ​ຢາ­ພື້ນ­ເມືອງ​ກາ­ກະ­ທິງ​ທອງ ຢູ່​ບ້ານ​ສະ­ພານ​ທອງ​ໃຕ້ ເມືອງ​ສີ​ສັດ­ຕະ​ນາກ ທີ່​ປັບ­ປຸງ​ຮູບ​ແບບ​ການ​ຂາຍ​ຜະ­ລິດ​ຕະ​ພັນ ODOP ຂອງ​ຕົນ ໃນ​ຮູບ​ແບບ​ກະ­ຕ່າ​ຂອງ­ຂວັນ​ອວຍ­ພອນ​ປີ​ໃໝ່ ສາ­ມາດ​ຈຳ­ໜ່າຍ​ໄດ້ 359 ກະ­ຕ່າ ສ້າງ​ລາຍ​ຮັບ 103.800.000 ກີບ ໃນ​ນີ້ ມີ​ຜະ­ລິດ​ຕະ​ພັນ​ສິນ­ຄ້າ​ທີ່​ໄດ້​ຮັບ​ກາ​ໝາຍ ODOP ແຫ່ງ​ຊາດ ເຂົ້າ​ມາ​ມີ​ສ່ວນ​ຮ່ວມ​ຂາຍ​ຜະ­ລິດ​ຕະ​ພັນ 6 ຫົວ­ໜ່ວຍ.

ຂ່າວທີ່ກ່ຽວຂ້ອງ