ຂ່າວຫຼ້າສຸດ

ມີລາຍຮັບຈາກການປູກມັນເພົາ ເປັນສິນຄ້າເກືອບ 200 ລ້ານກີບຕໍ່ປີ

499 27 ມ.ກ. 2020 ຂ່າວໜ້າ​ໜຶ່ງ
ມີລາຍຮັບຈາກການປູກມັນເພົາ ເປັນສິນຄ້າເກືອບ 200 ລ້ານກີບຕໍ່ປີ

   ບ້ານ​ຊຽງ​ຄວນ ນອກ­ຈາກ​ຈະ​ເປັນ​ທີ່​ຕັ້ງ​ຂອງ​ສະ­ຖານ­ທີ່​ທ່ອງ​ທ່ຽວ ທີ່​ມີ​ຊື່​ສຽງ​ເປັນ​ທີ່​ຮູ້­ຈັກ​ຂອງ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ເຊັ່ນ: ສວນ​ວັດ­ທະ­ນະ­ທຳ​ຊຽງ​ຄວນ​ແລ້ວ ກໍ​ຍັງ​ເປັນ​ບ້ານ​ທີ່​ມີ​ທ່າ­ແຮງ ດ້ານ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ປະ­ຊາ­ຊົນ​ພາຍ​ໃນ​ບ້ານ​ສ່ວນ​ຫຼາຍ​ດຳ­ລົງ​ຊີ­ວິດ​ແບບ​ປະ­ຖົມ​ປະ​ຖານ ຢຶດ​ຖື​ອາ­ຊີບ​ຊາວ​ສວນ​ປູກ​ມັນ​ເພົາ​ເປັນ​ຫຼັກ ຮອງ​ລົງ​ມາ​ແມ່ນ​ປູກ​ມັນ​ດ້າງ ໝາກ​ເລັ່ນ ໝາກ­ເຜັດ ໝາກ­ເຂືອ ສາ­ລີ ແລະ ອື່ນໆ ເພື່ອ​ສ້າງ​ລາຍ​ຮັບ​ໃຫ້​ກັບ​ຄອບ­ຄົວ.

   ນາງ ບົວ​ຄຳ ລະ­ຄອນ​ໄຊ ຄອບ­ຄົວ​ຕົວ​ແບບ​ດ້ານ​ການ​ຜະ­ລິດ​ມັນ​ເພົາ​ເປັນ​ສິນ­ຄ້າ​ຂອງ​ບ້ານ​ຊຽງ​ຄວນ ໄດ້​ໃຫ້​ສຳ­ພາດ​ວ່າ: ມັນ​ເພົາ​ຈະ​ເລີ່ມ​ປູກ​ກາງ​ເດືອນ​ຕຸ­ລາ​ໄລ­ຍະ​ລະ­ດູ­ແລ້ງ ແລະ ໃຊ້​ເວ­ລາ​ປູກ​ປະ­ມານ 75-100 ວັນ ຈຶ່ງ​ສາ­ມາດ​ເກັບ​ກູ້​ຜົນ​ຜະ­ລິດ​ໄດ້ ແຕ່​ມັນ​ເພົາ​ເປັນ​ພືດ​ປະ­ເພດ​ໝາກ​ທີ່​ບໍ່​ຕ້ອງ­ການ ການ​ບົວ­ລະ­ບັດ​ຮັກ­ສາ​ຫຼາຍ ເປັນ​ພືດ​ທີ່​ບໍ່​ມັກ​ນ້ຳ​ຈຶ່ງ​ບໍ່​ຕ້ອງ​ໃສ່​ນ້ຳ ຫຼື ໃສ່​ຝຸ່ນ ພຽງ​ແຕ່​ປູກ​ໄວ້​ແລ້ວ ຫຼັງ​ຈາກ​ນັ້ນ ໜຶ່ງ​ເດືອນ​ກໍ​ເສຍ​ຫຍ້າ ລໍ­ຖ້າ​ເກັບ​ກູ້​ເທົ່າ​ນັ້ນ ການ​ເກັບ​ກູ້​ແມ່ນ​ຈ້າງ​ແຮງ​ງານ​ຄົນ​ຂຸດ ຄ່າ​ຂຸດ 4.000 ກີບ​ຕໍ່​ໝື່ນ (1 ໜື່ນ ເທົ່າ​ກັບ 12 ກິ​ໂລ) ລາ­ຄາ​ຂາຍ​ສົ່ງ​ຢູ່​ສວນ​ປີ​ນີ້ 30.000 ກີບ​ຕໍ່​ໝື່ນ ມີ​ແມ່​ຄ້າ​ມາ​ຮັບ​ໄປ​ຂາຍ​ຕໍ່​ໝື່ນ​ລະ 50.000 ກີບ ຫຼື 5.000 ກີບ​ຕໍ່​ກິ​ໂລ ທຽບ​ກັບ​ປີ­ຜ່ານ­ມາ​ແມ່ນ​ລາ­ຄາ​ສູງ​ຂຶ້ນ.

   ນອກ​ນີ້ ການ​ປູກ​ມັນ​ເພົາ​ຍັງ​ໄດ້​ຮັບ​ຜົນ​ຕອບ​ແທນ ກໍ​ຄື ກຳ­ໄລ​ທີ່​ສູງ​ຫຼາຍ​ກວ່າ​ການ​ປູກ​ພືດ​ຊະ­ນິດ​ອື່ນໆ ເຊັ່ນ: ປີ 2020 ຄອບ­ຄົວ​ຂອງ​ນາງ ບົວ​ຄຳ ປູກ​ມັນ​ເພົາ​ເນື້ອ­ທີ່ 50 ໄລ່ ໃຊ້​ເວ­ລາ​ເກັບ​ກູ້​ປະ­ມານ 2 ເດືອນ ຄາດ​ວ່າ​ຈະ​ສ້າງ​ລາຍ​ຮັບ​ປະ­ມານ 250 ລ້ານ​ກີບ ຖ້າ​ຫັກ​ຕົ້ນ​ທຶນ 60 ລ້ານ​ກີບ​ອອກ ຍັງ​ເຫຼືອ​ເປັນ​ກຳ­ໄລ 190 ລ້ານ​ກີບ ຜ່ານ​ການ​ສູ້​ຊົນ​ສ້າງ​ຜົນ​ຜະ­ລິດ​ປູກ​ມັນ​ເພົາ​ເປັນ​ສິນ­ຄ້າ ມາ 4-5 ປີ ໄດ້​ເຮັດ​ໃຫ້​ຄອບ­ຄົວ​ຂອງ​ລາວ​ມີ​ລາຍ​ຮັບ​ຈາກ​ການ​ຂາຍ​ມັນ​ເພົາ ສາ­ມາດ​ຊື້​ລົດ​ໄຖ​ໃຫຍ່ 2 ຄັນ ລົດ​ເກງ 1 ຄັນ ລົດ​ກະ­ບະ​ຣີ​ໂວ 1 ຄັນ ລົດ­ຈັກ 4 ຄັນ ແລະ ປຸກ­ເຮືອນ​ໄດ້ 1 ຫຼັງ ໂດຍ​ລວມ​ແລ້ວ ສາ­ມາດ​ສ້າງ​ລາຍ​ຮັບ​ອັນ​ແນ່­ນອນ​ໃຫ້​ຄອບ­ຄົວ ແລະ ທີ່​ສຳ­ຄັນ​ໄດ້​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ຄອບ­ຄົວ​ນັບ​ມື້​ດີ​ຂຶ້ນ​ກາຍ­ເປັນ​ຄອບ­ຄົວ​ທີ່​ເຂັ້ມ­ແຂງ​ທາງ​ດ້ານ​ເສດ­ຖະ­ກິດ ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ.

   ສຳ­ລັບ​ການ​ຜະ­ລິດ​ມັນ​ເພົາ​ຂອງ​ບ້ານ​ຊຽງ​ຄວນ​ນີ້ ແມ່ນ​ມີ​ລັກ­ສະ­ນະ​ແຜ່​ຫຼາຍ​ສາ­ມາດ​ເວົ້າ​ໄດ້​ວ່າ ເປັນ​ລາຍ​ໃຫຍ່​ທີ່​ສຸດ​ໃນ​ນະ­ຄອນ­ຫຼວງ​ວຽງ​ຈັນ ກໍ​ຄື ໃນ​ທົ່ວ​ປະ­ເທດ ເຊິ່ງ​ວັນ​ໜຶ່ງ​ອາດ​ເກັບ​ກູ້​ມັນ​ເພົາ​ໄດ້ 180-300 ໝື່ນ ເພື່ອ​ສະ­ໜອງ​ໃຫ້​ຕະ­ຫຼາດ ກໍ​ຄື ຜູ້​ບໍ­ລິ­ໂພກ.

ຂ່າວທີ່ກ່ຽວຂ້ອງ