ຂ່າວຫຼ້າສຸດ

ບາບບຸນຄຸນໂທດ

2.667 27 ມ.ກ. 2020 ນານາສາລະ

   ສ່ວນ​ຕົວ​ຜູ້​ຂຽນ​ເຂົ້າ­ໃຈ​ວ່າ: ອາດ​ຍັງ​ມີ​ບາງ​ຄົນ​ເຂົ້າ­ໃຈ​ຜິດ​ວ່າ ບໍ່​ໄດ້​ເຂົ້າ​ວັດ​ເຮັດ­ບຸນ​ແລ້ວ​ຊິ​ບໍ່​ໄດ້​ບຸນ ຫຼື ມີ​ຈິດ​ສຳ­ນຶກ​ພຽງ​ແຕ່​ວ່າ ເຂົ້າ​ວັດ​ເຮັດ­ບຸນ​ຈິ່ງ​ໄດ້ ເຊິ່ງ​ບໍ່​ເຄີຍ​ຮູ້​ເລີຍ​ວ່າ: ບຸນ​ເກີດ​ຂຶ້ນ​ໄດ້​ກັບ​ທຸກ​ຄົນ ແລະ ທຸກ​ສະ­ຖານ­ທີ່ ຂໍ​ພຽງ​ແຕ່​ວ່າ​ຜູ້​ຈະ​ເຮັດ­ບຸນ​ໄດ້​ຕັ້ງ​ເຈດ​ຕະ​ນາ​ບໍ­ລິ­ສຸດ​ແທ້ ແລະ ຂອງ​ໃຫ້​ທານ ເຮັດ­ບຸນ​ແມ່ນ​ໄດ້​ມາ​ດ້ວຍ​ຄວາມ​ບໍ­ລິ­ສຸດ ບໍ່​ແມ່ນ​ວ່າ​ສໍ້​ໂກງ​ເຂົາ​ມາ ແລ້ວ​ຈຶ່ງ​ແບ່ງ​ເຮັດ­ບຸນ​ແບບ​ນີ້​ຖື​ວ່າ​ບໍ່​ໄດ້​ບຸນ​ເຕັມ​ເພາະ​ຂອງ​ທານ​ບໍ່​ບໍ­ລິ­ສຸດ.

   ໄລ­ຍະ​ນີ້​ບ້ານ​ເຮົາ​ເລີ່ມ​ລົງ­ມື​ເຮັດ­ບຸນ​ພະ​ເຫວດ ຫຼື ບຸນ​ຖວາຍ​ທານ​ຕ່າງໆ​ມີ​ກອງ​ຫົດ ກອງ​ບວດ ສົມ­ໂພດ​ພະ ສ້າງ​ສີມ ສ້າງ­ສາ​ລາ ຂຸດ​ນ້ຳ​ບໍ່ ສ້າງ​ໂຮງ­ໝໍ ໂຮງ­ຮຽນ​ໃຫ້​ເປັນ​ສາ­ທາ­ລະ­ນະ​ປະ­ໂຫຍດ​ຖື​ເປັນ​ການ​ເຮັດ­ບຸນ​ຄື​ການ​ສ້າງ​ຄວາມ​ດີ​ໃຫ້​ແກ່​ສັງ­ຄົມ ເປັນ​ການ​ສະ​ສົມ​ປາ­ລະ­ມີ ໄປ​ທາງ​ໃດ​ສັງ­ຄົມ​ກໍ​ຍົກ­ຍ້ອງ​ສັນ­ລະ­ເສີນ​ກົງ­ກັນ­ຂ້າມ​ກັບ​ເຮັດ​ບາບ ສໍ້​ໂກງ​ປຸ້ນ​ຈີ້ ເຂົາ​ໄປ​ມາ​ທາງ​ໃດ​ຄົນ​ເຂົາ​ກ່າວ​ຂວັນ​ນິນ­ທາ​ນີ້​ເອີ້ນ​ວ່າ: ເຮັດ​ບາບ ເຊິ່ງ​ມີ​ຜົນ​ຄື​ຄວາມ­ທຸກ​ຄື​ຕົກ​ນາ­ຮົກ​ທັງ​ເປັນ ແລະ ພຶດ­ຕິ​ກຳ​ບໍ່​ດີ ຈິດ­ໃຈ​ກໍ​ວຸ້ນ­ວາຍ​ສັບ­ສົນ​ຢ້ານ​ແຕ່​ເຈົ້າ​ໜ້າ­ທີ່​ຈັບ​ໄດ້​ໄລ່​ທັນ.

   ແກ່ນ​ແທ້​ຂອງ​ບຸນ​ຄື: ການ​ສ້າງ​ຄວາມ​ດີ ດັ່ງ­ນັ້ນ ການ​ເຮັດ­ບຸນ​ຄື​ການ​ເຮັດ​ຄວາມ​ດີ ພະ­ພຸດ­ທະ­ເຈົ້າ​ສອນ​ໄວ້ 10 ປະ­ການ​ຄື: (1) ເຮັດ­ບຸນ​ດ້ວຍ​ການ​ໃຫ້​ທານ​ວັດ­ຖຸ​ສິ່ງ​ຂອງ​ແກ່​ພະ­ສົງ ຫຼື ຄົນ​ຈົນ​ທົ່ວ​ໄປ (2) ເຮັດ­ບຸນ​ດ້ວຍ​ການ​ຮັກ­ສາ​ສິນ​ຄື: ປະ­ພຶດ​ຕາມ​ລະ­ບຽບ​ວິ­ໄນ​ຂອງ​ບ້ານ​ເມືອງ (3) ເຮັດ­ບຸນ​ດ້ວຍ​ການ​ເຝິກ­ອົບ­ຮົມ​ຈິດ­ໃຈ​ໃຫ້​ຈະ­ເລີນ (4) ເຮັດ­ບຸນ​ດ້ວຍ​ການ​ປະ­ພຶດ​ອ່ອນ​ນ້ອມ​ຖ່ອມ​ຕົນ (5) ເຮັດ­ບຸນ​ດ້ວຍ​ການ​ຂົນ­ຂວາຍ​ຮັບ​ໃຊ້​ພໍ່​ແມ່ ຫຼື ຊາດ​ບ້ານ​ເມືອງ (6) ເຮັດ­ບຸນ​ດ້ວຍ​ການ​ແບ່ງ­ປັນ​ນ້ຳ​ໃຈ­ຄວາມ​ດີ​ແກ່​ຄົນ​ອື່ນ (7) ເຮັດ­ບຸນ​ດ້ວຍ​ການ​ຍິນ​ດີ​ນຳ​ຄົນ​ອື່ນ (8) ເຮັດ­ບຸນ​ດ້ວຍ​ການ​ສຶກ​ສາ​ຟັງ​ທຳ​ຫາ​ຄວາມ​ຮູ້ (9) ເຮັດ­ບຸນ​ດ້ວຍ​ການ​ສັ່ງ­ສອນ​ທຳ​ມະ​ແກ່​ຜູ້​ບໍ່​ທັນ​ຮູ້ (10) ເຮັດ­ບຸນ​ດ້ວຍ​ການ​ສ້າງ​ຄວາມ​ຮູ້​ປັນ­ຍາ​ໃຫ້​ເກີດ​ຢ່າງ​ຖືກ­ຕ້ອງ.

   ການ​ເຮັດ­ບຸນ 10 ປະ­ການ​ນີ້ ຈຶ່ງ​ເໝາະ​ສົມ​ກັບ​ແຕ່­ລະ­ຄົນ ເພາະ​ແຕ່­ລະ­ຄົນ​ມີ​ອາ­ຊີບ​ຕ່າງ​ກັນ ຊາວ​ພຸດ​ເຮົາ​ຈຶ່ງ​ຄວນ​ສຶກ​ສາ​ໃຫ້​ຮູ້ ເຂົ້າ­ໃຈ​ຫຼັກ­ການ​ເຮັດ­ບຸນ​ໃຫ້​ຖືກ­ຕ້ອງ​ຈຶ່ງ​ເຮັດ­ບຸນ​ໄດ້​ບຸນ​ບໍ່​ແມ່ນ​ເອົາ​ບຸນ​ບັງ​ໜ້າ​ໃຫ້​ກາຍ ເປັນ​ພຸດ​ທະ​ພາ­ນິດ...!

ໂດຍ: ດັ້ນກີບເມກ

ຂ່າວທີ່ກ່ຽວຂ້ອງ