ຂ່າວຫຼ້າສຸດ

ການທີ່ບໍ່ຖືພຶດຕິກຳສໍ້ລາດບັງຫຼວງ ເປັນການສໍ້ລາດບັງຫຼວງ

3.519 24 ມ.ກ. 2020 ນານາສາລະ

   ມື້­ກ່ອນ​ຜູ້​ຂຽນ​ເຂົ້າ​ເວັບ​ໄຊ ຂອງ​ຄະ­ນະ​ຈັດ​ຕັ້ງ​ສູນ​ກາງ​ພັກ ໄດ້​ອ່ານ​ພົບ​ບົດ​ໃນ​ຫົວ­ຂໍ້: “ສິ່ງ​ອັນ­ຕະ­ລາຍ​ກວ່າ​ການ​ສໍ້​ລາດ​ບັງ​ຫຼວງ’’ ເຫັນ​ວ່າ​ເປັນ​ບົດ​ຂຽນ​ທີ່​ກິນ­ໃຈ​ຫຼາຍ ເລີຍ​ຂໍ​ນຳ​ມາ​ລົງ​ພິມ​ໃຫ້​ເພື່ອນ​ຜູ້​ອ່ານ​ໄດ້​ສຳ­ຜັດ​ນຳ​ກັນ​ນໍ ? ບົດ​ນີ້​ແປ ແລະ ຮຽບ​ຮຽງ ໂດຍ: ສຳ­ນຽງ ເມກ​ລັນ​ດອນ ຈາກ​ສື່​ອອນ​ລາຍ(ເວັບ​ໄຊ​ປະ­ຊາ­ຊົນ) ຂອງ​ພັກ​ກອມ​ມູ​ນິດ​ຈີນ ເຊິ່ງ​ມີ​ເນື້ອ​ໃນ​ດັ່ງ­ນີ້:

   “...ຫຼາຍໆ​ປະ­ເທດ​ກຳ­ລັງ​ເຈັບ​ຫົວ​ກັບ​ບັນ­ຫາ​ການ​ສໍ້​ລາດ​ບັງ​ຫຼວງ ຍ້ອນ​ວ່າ ລະ­ຫວ່າງ​ຄຳ​ວ່າ: “ການ​ສໍ້​ລາດ​ບັງ​ຫຼວງ” ກັບ “ຄວາມ​ອັນ­ຕະ­ລາຍ” ນັ້ນ​ສາ ມາດ​ທີ່​ຈະ​ໃຊ້​ເຄື່ອງ­ໝາຍ​ທີ່ “ເທົ່າ​ກັນ” ໄດ້​ບັນ­ດາ​ປະ­ເທດ​ທີ່​ເກີດ​ເຫດ­ການ​ຄວາມ​ວຸ້ນ­ວາຍ​ສັບ­ສົນ​ທາງ​ການ­ເມືອງ ຈົນ​ກ້າວ​ໄປ​ເຖິງ​ສົງ­ຄາມ​ກາງ​ເມືອງ ແລະ ເຖິງ​ຂັ້ນ​ຮ້າຍ​ແຮງ​ມີ​ການ​ແບ່ງ​ແຍກ​ດິນ­ແດນ ບໍ່​ວ່າ​ຈະ​ເກີດ​ມາ​ຈາກ​ສາ­ເຫດ​ໃດ​ແດ່​ກໍ​ຕາມ ໜຶ່ງ​ໃນ​ນັ້ນ​ກໍ​ແມ່ນ​ບັນ­ຫາ​ການ​ສໍ້​ລາດ​ບັງ​ຫຼວງ​ທີ່​ເປັນ​ປັດ​ໄຈ​ໜຶ່ງ​ທີ່​ສຳ­ຄັນ​ຢ່າງ​ແນ່­ນອນ “ຄວາມ​ອັນ­ຕະ­ລາຍ​ທີ່​ໃຫຍ່​ທີ່​ສຸດ ໃນ​ສະ­ເພາະ​ໜ້າ ກໍ​ຄື ບັນ­ຫາ​ການ​ສໍ້​ລາດ​ບັງ​ຫຼວງ” ມັນ​ໄດ້​ກາຍ­ເປັນ​ບັນ­ຫາ​ທີ່​ແຜ່​ລາມ ແລະ ຮັບ​ຮູ້​ໄດ້​ຢ່າງ​ທົ່ວ​ເຖິງ​ກັນ​ໃນ​ທົ່ວ​ສັງ­ຄົມ.

   ການ​ສໍ້​ລາດ​ບັງ​ຫຼວງ​ແມ່ນ​ໄພ​ອັນ­ຕະ­ລາຍ ແຕ່​ມີ​ສິ່ງ​ທີ່​ອັນ­ຕະ­ລາຍ​ກວ່າ​ການ​ສໍ້​ລາດ​ບັງ​ຫຼວງ ຫຼື ບໍ່ ? ຄຳ​ຕອບ​ກໍ​ຄື: ມີ ມັນ​ກໍ​ແມ່ນ​ການ​ທີ່​ບໍ່​ຖື​ພຶດ­ຕິ​ກຳ​ສໍ້​ລາດ​ບັງ​ຫຼວງ ເປັນ​ການ​ສໍ້​ລາດ​ບັງ​ຫຼວງ ເຫດ­ການ​ຕົວ​ຈິງ ຈາກ​ຫຼາຍ​ປະ­ເທດ​ໄດ້​ສະ­ແດງ​ໃຫ້​ເຫັນ​ວ່າ ຜູ້​ທີ່​ໄດ້​ກະ­ທຳ​ການ​ສໍ້​ລາດ​ບັງ​ຫຼວງ ແຕ່​ເຂົາ­ເຈົ້າ​ກໍ​ບໍ່​ໄດ້​ຍອມ­ຮັບ​ວ່າ​ຕົນ​ເອງ​ນັ້ນ​ໄດ້​ສໍ້​ລາດ​ບັງ​ຫຼວງ ເຖິງ​ແມ່ນ​ວ່າ​ຈະ​ຖືກ​ຈັບ​ຕົວ​ເຂົ້າ​ຄຸມ​ຂັງ​ແລ້ວ​ກໍ​ຕາມ ເຂົາ­ເຈົ້າ​ກໍ​ຍັງ​ຊອກ​ຫາ​ຄຳ​ແກ້​ຕົວ​ຕ່າງໆ​ນາໆ ທັງໆ​ທີ່​ເປັນ​ລາຍ​ຮັບ​ທີ່​ໄດ້​ມາ​ແບບ​ບໍ່​ຈະ­ແຈ້ງ​ທີ່​ຖືກ​ຈັດ​ແບ່ງ​ຢູ່​ໃນ​ລາຍ​ຮັບ​ມືດ ແຕ່​ເຂົາ­ເຈົ້າ​ກໍ​ຍັງ​ເວົ້າ​ວ່າ ມັນ​ແມ່ນ​ລາຍ​ຮັບ​ທີ່​ຖືກ­ຕ້ອງ ແລະ ສົມ​ເຫດ​ສົມ​ຜົນ ທັງໆ​ທີ່​ເປັນ​ການ​ກະ­ທຳ​ທີ່​ຜິດ​ລະ­ບຽບ​ກົດ­ໝາຍ ເຂົາ­ເຈົ້າ​ກໍ​ເວົ້າ​ວ່າ​ແມ່ນ​ເປັນ​ປະ­ເພ­ນີ ຄວາມ​ຊິນ​ເຄີຍ​ທີ່​ປະ­ຕິ­ບັດ​ກັນ​ໂດຍ​ທົ່ວ​ໄປ ຈົນ​ວ່າ​ມັນ​ເປື່ອຍ​ເຍື່ອຍ​ໝົດ​ແລ້ວ ແຕ່​ເຂົາ­ເຈົ້າ​ກໍ​ຍັງ​ຄິດ​ວ່າ​ມັນ​ແມ່ນ “ເຕົ້າ­ຮູ້​ເໝັນ” ກິ່ນ​ເໝັນ ແຕ່​ກິນ​ແຊບ ນອກ​ນີ້ ຍັງ​ມີ​ຄົນ​ຈຳ­ນວນ​ໜຶ່ງ​ຖື​ການ​ສໍ້​ລາດ​ບັງ​ຫຼວງ​ທາງ​ດ້ານ​ເສດ­ຖະ­ກິດ​ວ່າ​ແມ່ນ​ການ​ສໍ້​ລາດ​ບັງ​ຫຼວງ ແຕ່​ຜັດ​ບໍ່​ຖື​ການ​ກະ­ທຳ​ໃນ​ແບບ​ດຽວ​ກັນ​ທາງ​ດ້ານ​ການ­ເມືອງ​ນັ້ນ ເປັນ​ການ​ສໍ້​ລາດ​ບັງ​ຫຼວງ “ການ​ທີ່​ບໍ່​ຖື​ພຶດ­ຕິ​ກຳ​ສໍ້​ລາດ​ບັງ​ຫຼວງ​ແມ່ນ​ການ​ສໍ້​ລາດ​ບັງ​ຫຼວງ” ນັ້ນ ບໍ່​ພຽງ​ແຕ່​ບໍ່​ເປັນ​ຜົນ​ດີ​ຕໍ່​ການ​ສະ­ກັດ​ກັ້ນ​ການ​ສໍ້​ລາດ​ບັງ​ຫຼວງ ແຕ່​ມັນ​ຫາກ​ຍັງ​ເປັນ​ການ​ສົ່ງ­ເສີມ​ເຮັດ​ໃຫ້​ສະ­ພາບ​ການ​ສໍ້​ລາດ​ບັງ​ຫຼວງ​ນັ້ນ ແຜ່​ລາມ​ອອກ​ໄປ ຈົນ​ກາຍ­ເປັນ “ການ​ສໍ້​ລາດ​ບັງ​ຫຼວງ​ທີ່​ມີ​ລັກ­ສະ­ນະ​ຊຳ​ເຮື້ອ”.

   “ການ​ທີ່​ບໍ່​ຖື​ພຶດ­ຕິ​ກຳ​ສໍ້​ລາດ​ບັງ​ຫຼວງ ແມ່ນ​ການ​ສໍ້​ລາດ​ບັງ​ຫຼວງ” ແມ່ນ​ມີ​ຄວາມ​ອັນ­ຕະ­ລາຍ​ກວ່າ ສະ­ນັ້ນ ມີ ຫຼື ບໍ່​ມີ​ສິ່ງ​ທີ່​ອັນ­ຕະ­ລາຍ​ກວ່າ​ມັນ ? ຄວນ​ທີ່​ຈະ​ຍອມ­ຮັບ​ວ່າ​ມັນ​ຕ້ອງ​ມີ​ຢ່າງ​ແນ່­ນອນ ແລະ ສິ່ງ​ນັ້ນ ກໍ​ຄື: ມີ​ມາດ​ຕະ­ການ​ປາບ​ປາມ​ການ​ສໍ້​ລາດ​ບັງ​ຫຼວງ​ຢ່າງ​ຄັກ­ແນ່ ແຕ່​ບໍ່​ໃຊ້ ມີ​ອຳ­ນາດ​ປາບ​ປາມ​ໃນ​ມື​ແຕ່​ບໍ່(ກ້າ)ໃຊ້​ມັນ.

   “ການ​ທີ່​ບໍ່​ຖື​ພຶດ­ຕິ​ກຳ​ສໍ້​ລາດ​ບັງ​ຫຼວງ ເປັນ​ການ​ສໍ້​ລາດ​ບັງ​ຫຼວງ” ແມ່ນ​ເວົ້າ​ສະ­ເພາະ​ເຈາະ​ຈົງ​ພະ­ນັກ­ງານ​ທີ່​ໄດ້​ມີ​ການ​ກະ­ທຳ​ການ​ສໍ້​ລາດ​ບັງ​ຫຼວງ​ແລ້ວ ເມື່ອ​ສົມ​ທຽບ​ເບິ່ງ​ແລ້ວ ສິ່ງ​ທີ່​ຄວນ​ໃຫ້​ຄວາມ​ສຳ­ຄັນ​ກວ່າ​ລະ​ແມ່ນ: ເປັນ​ຫຍັງ​ຜູ້​ຄົນ​ທີ່​ບໍ່​ເຄີຍ​ກະ­ທຳ​ການ​ສໍ້​ລາດ​ບັງ​ຫຼວງ​ມາ​ກ່ອນ ຈຶ່ງ​ໄດ້​ກາຍ­ເປັນ​ຄົນ​ສໍ້​ລາດ​ບັງ​ຫຼວງ ຄົນ​ທີ່​ໄດ້​ທຳ​ການ​ສໍ້​ລາດ​ບັງ​ຫຼວງ ໃນ​ເບື້ອງ​ຕົນ​ກໍ​ເປັນ​ຄົນ​ດີ ແລະ ບາງ​ຄົນ​ກໍ​ເປັນ​ເຖິງ​ພະ­ນັກ­ງານ​ທີ່​ເຮັດ​ວຽກ​ງານ​ປາບ​ປາມ​ການ​ສໍ້​ລາດ​ບັງ​ຫຼວງ ທີ່​ເປັນ​ແບບ­ຢ່າງ​ມາ​ກ່ອນ ດັ່ງ­ນັ້ນ ໃນ​ຂະ­ນະ​ທີ່​ພວກ​ເຮົາ​ກ່າວ​ຄຳ​ວ່າ “ລົງ­ໂທດ​ໃຫ້​ໜັກ” ຕໍ່​ຜູ້​ກະ­ທຳ​ຜິດ​ກໍ​ຄວນ​ທີ່​ຈະ​ຄິດ​ເສຍ­ດາຍ​ມັນ ໃນ​ຂະ­ນະ​ທີ່​ຕັດ­ສິນ​ໃຈ “ຈະ​ບໍ່​ປະ​ນິ​ປະ­ນອມ” ກັບ​ມັນ ກໍ​ບໍ່​ຄວນ​ທີ່​ຈະ “ພໍ​ອົກ​ພໍ­ໃຈ​ຕໍ່​ຜົນ­ງານ​ທີ່​ຍາດ​ມາ​ໄດ້” ແລ້ວ​ຢຸດ​ນິ້ງ ໃນ​ສະ­ພາ­ວະ​ປົກ­ກະ­ຕິ​ທົ່ວ​ໄປ ຈຳ­ນວນ​ຜູ້​ຄົນ​ທີ່​ກະ­ທຳ​ຜິດ​ສໍ້​ລາດ​ບັງ​ຫຼວງ​ກວມ​ຈຳ­ນວນ​ປະ­ຊາ­ກອນ​ທົ່ວ​ປະ­ເທດ ແລະ ກວມ​ຈຳ­ນວນ​ພະ­ນັກ­ງານ​ແມ່ນ​ມີ​ຕົວ​ເລກ​ໃນ​ຂອບ​ເຂດ​ລະ­ດັບ​ໃດ​ໜຶ່ງ​ທີ່​ແນ່​ແນນ ຖ້າ​ຫາກ​ຕົວ​ເລກ​ດັ່ງ­ກ່າວ​ນັ້ນ ຫາກ​ສູງ​ກວ່າ​ຄ່າ​ປົກ­ກະ­ຕິ ກໍ​ຈະ​ຕ້ອງ​ຊອກ​ຫາ​ສາ­ເຫດ​ຈາກ​ກົງ­ຈັກ​ໂຄງ​ບົນ ແລະ ຈະ​ຕ້ອງ​ກວດ​ສອບ​ຄືນ​ເຖິງ​ສະ­ພາບ​ການ​ນຳ​ໃຊ້​ບັນ­ດາ​ມາດ​ຕະ­ການ ລະ­ບຽບ​ກົດ­ໝາຍ​ປາບ​ປາມ​ການ​ສໍ້​ລາດ​ບັງ​ຫຼວງ​ວ່າ​ເປັນ​ຄື​ແນວ­ໃດ​ແລ້ວ.

   ແມ່ນ​ແຕ່​ແມ່­ເຖົ້າ​ທີ່​ກືກ​ໜັງ­ສື​ກໍ​ຍັງ​ຮູ້​ວ່າ ຄວນ​ທີ່​ຈະ​ເອົາ​ເຄື່ອງ­ນຸ່ງ​ຫົ່ມ​ອອກ​ມາ​ຕາກ­ແດດ​ກ່ອນ​ທີ່​ລະ­ດູ­ຝົນ ຫຼື ລະ­ດູ​ໜາວ​ຈະ​ມາ​ເຖິງ ຕ້ອງ​ຕັ້ງ​ຄຳ​ຖາມ​ວ່າ: ຕາກ­ແດດ​ເຮັດ​ຫຍັງ ? ຄຳ​ຕອບ ກໍ​ຄື ປ້ອງ​ກັນ​ບໍ່​ໃຫ້​ມັກ​ຕົກ­ໂມກ ບົດ­ຮຽນ​ທາງ​ດ້ານ​ປະ­ຫວັດ­ສາດ​ຈາກ​ຫຼາຍ​ປະ­ເທດ​ທີ່​ໄດ້​ຮັບ​ຜົນ­ສຳ­ເລັດ​ໃນ​ການ​ສະ­ກັດ​ກັ້ນ ແລະ ປາບ​ປາມ​ບັນ­ຫາ​ການ​ສໍ້​ລາດ​ບັງ​ຫຼວງ ກໍ​ຄື: ການ​ສໍ້​ລາດ​ບັງ​ຫຼວງ​ແມ່ນ​ຢ້ານ​ກົວ​ແສງ​ສະ­ຫວ່າງ​ທີ່​ສຸດ.

   ແສງ​ແດດ​ບໍ່​ສາ­ມາດ​ທີ່​ຈະ​ສ່ອງ​ເຂົ້າ​ຫ້ອງ​ມືດ​ໄດ້ ຢາກ​ປ້ອງ​ກັນ​ບໍ່​ໃຫ້​ເກີດ​ການ​ຕົກ­ໂມກ​ກໍ​ຕ້ອງ​ເຮັດ​ໃຫ້​ແສງ​ແດດ​ສາ­ມາດ​ສ່ອງ​ເຂົ້າ​ໄປ​ເຖິງ​ໄດ້ ເວົ້າ​ສຳ­ລັບ​ພະ­ນັກ­ງານ​ແລ້ວ​ກໍ​ແມ່ນ​ເປີດ ເຜີຍ​ລາຍ​ຮັບ ແລະ ຊັບ​ສິນ​ຂອງ​ຕົນ​ເອງ ການ​ນຳ ແລະ ພະ­ນັກ­ງານ​ໃນ​ທຸກ​ຕຳ­ແໜ່ງ​ງານ​ຂອງ​ພັກ-ລັດ ລ້ວນ​ແລ້ວ­ແຕ່​ເປັນ​ຕຳ­ແໜ່ງ​ທີ່​ສຳ­ຄັນ ແລະ ຈຳ­ເປັນ ປະ­ຊາ­ຊົນ​ອາດ​ຈະ​ບໍ່​ເຫັນ​ດີ​ເຫັນ​ພ້ອມ​ນຳ​ທັດ­ສະ­ນະ​ແນວ­ທາງ​ຂອງ​ລັດ ແຕ່​ທ້າຍ​ສຸດ​ແລ້ວ​ກໍ​ຍັງ​ຕ້ອງ​ໄດ້​ໄປ​ຕາມ​ຄຳ​ຕັດ­ສິນ​ຂອງ​ພະ­ນັກ­ງານ​ລັດ ຕາບ­ໃດ​ທີ່​ທ່ານ​ຍັງ​ຄົງ​ດຳ­ລົງ​ຕຳ­ແໜ່ງ​ຢູ່ ຜູ້​ຄົນ​ທົ່ວ​ໄປ​ກໍ​ຈະ​ຕ້ອງ​ໄດ້​ໄປ​ຕາມ​ທ່ານ ກໍ​ຍ້ອນ​ວ່າ​ເທິງ​ຫົວ​ທ່ານ​ມີ​ມຸງ­ກຸດ​ແຫ່ງ​ອຳ­ນາດ ດັ່ງ­ນັ້ນ ທ່ານ​ຈຶ່ງ​ສົມ­ຄວນ​ທີ່​ຈະ​ຕ້ອງ​ຖືກ​ຕິດ­ຕາມ​ກວດ­ກາ​ຢ່າງ​ເຂັ້ມ​ງວດ​ກວ່າ​ຜູ້​ອື່ນ​ຍ້ອນ​ວ່າ “ສິດ​ອຳ­ນາດ” ນັ້ນ​ມັນ​ງ່າຍ​ທີ່​ຈະ​ປ່ຽນ​ໄປ​ເປັນ “ຊັບ​ສິນ​ເງິນ​ທອງ” ສະ­ນັ້ນ ປະ­ຊາ­ຊົນ​ມີ​ສິດ​ທີ່​ຈະ​ຕິດ­ຕາມ​ກວດ­ກາ​ຊັບ​ສິນ​ເງິນ​ທອງ​ໃນ​ຄອບ​ຄອງ​ຂອງ​ທ່ານ ພະ­ນັກ­ງານ​ເປີດ­ເຜີຍ​ລາຍ​ຮັບ ແມ່ນ​ເປັນ​ທີ່​ຮັບ​ຮູ້​ກັນ​ໃນ​ສາ­ກົນ​ວ່າ​ເປັນ​ຢາ​ຂ້າ​ພະ­ຍາດ​ສໍ້​ລາດ​ບັງ​ຫຼວງ​ທີ່​ໄດ້​ຮັບ​ຜົນ​ດີ​ທີ່​ສຸດ ພະ­ນັກ­ງານ​ເປີດ­ເຜີຍ​ລາຍ​ຮັບ​ບໍ່​ພຽງ​ແຕ່​ສາ­ມາດ​ຍົກ​ສູງ​ຄວາມ​ສະ­ເໝີ­ພາບ ແລະ ຄວາມ​ເປັນ​ທຳ​ຂອງ​ລັດ­ຖະ­ບານ​ເທົ່າ​ນັ້ນ ຫາກ​ຍັງ​ສາ­ມາດ​ຍົກ​ສູງ​ຊື່​ສຽງ​ບາ​ລະ​ມີ​ຂອງ​ກະ​ໂຕ​ພະ­ນັກ­ງານ​ອີກ​ດ້ວຍ...ຯ

   ສະ­ເໜີ​ເປັນ​ການ​ແລກ­ປ່ຽນ.

ຂ່າວທີ່ກ່ຽວຂ້ອງ