ຂ່າວຫຼ້າສຸດ

ລົດ​ແກ້ວ” ຕັ້ງ​ເປົ້າ​ຄວ້າ 2 ຫຼຽນ​ຄຳໃຫ້​ແຂວງ​ວຽງ​ຈັນ ໃນ​ຊຽງ​ຂວາງ ເກມ

1.108 24 ມ.ກ. 2020 ວົງຈອນກີລາ
ລົດ​ແກ້ວ” ຕັ້ງ​ເປົ້າ​ຄວ້າ 2 ຫຼຽນ​ຄຳໃຫ້​ແຂວງ​ວຽງ​ຈັນ ໃນ​ຊຽງ​ຂວາງ ເກມ

   ນາງ ລົດ​ແກ້ວ ອິນ​ທະ​ກຸມມານ ນັກກີລາ​ແລ່ນ​ທີມ​ຊາດ​ລາວ ເຈົ້າ​ຂອງ 3 ຫຼຽນ​ຄຳ ແລະ 1 ຫຼຽນ​ເງິນ ໃນ​ການ​ແຂ່ງຂັນ​ກີລາ​ແລ່ນ-ລານ ງານ​ກີລາ​ມະຫາວິທະຍາໄລ​ແຫ່ງ​ປະເທດ​ໄທ ຄັ້ງ​ທີ XXXXVll  ຫຼື “The Sun Games 2020” ທີ່​ມະຫາວິທະຍາໄລ​ຣັງ​ສິດ ນະຄອນຫຼວງ​ບາງກອກ ປະເທດ​ໄທ ໃຫ້​ກັບ​ຕົ້ນ​ສັງກັດ ມະຫາວິທະຍາໄລ​ກຸງ​ເທບ ທົນ​ບູ​ລີ ຕັ້ງ​ເປົ້າ​ໝາຍ​ຈະ​ພະຍາຍາມ​ສູ້​ຊົນ​ຍາດ​ໃຫ້​ໄດ້​ຢ່າງ​ໜ້ອຍ 2 ຫຼຽນ​ຄຳ ໃຫ້​ທັບ​ນັກ​ກິລາ​ແຂວງ​ວຽງ​ຈັນ ໃນ​ງານ​ມະ​ຫະ​ກຳ​ກິລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 22 ມີນາ ຫາ 1 ເມສາ 2020.

     ນາງ ລົດ​ແກ້ວ ອິນ​ທະ​ກຸມມານ ນັກກີລາ​ແລ່ນ​ທີມ​ຊາດ​ລາວ ໃຫ້​ສຳພາດ​ວ່າ: ເປັນ​ທີ່​ໜ້າ​ເສຍດາຍ​ທີ່​ຕົນ​ເອງ​ບໍ່​ສາມາດ​ສ້າງ​ຝັນ​ໃຫ້​ເປັນ​ຈິງ ໃຫ້​ແກ່​ປະເທດ​ຊາດ ໃນ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ XXX ທີ່​ປະເທດ​ຟີ​ລິບ​ປິນ ປີ 2019 ຜ່ານ​ມາ ແຕ່​ກໍ​ບໍ່​ເປັນ​ຫຍັງ​ຢ່າງ​ໜ້ອຍ ກໍ​ຍັງ​ສາມາດ​ສ້າງ​ຜົນງານ​ໃຫ້​ກັບ​ຕົ້ນ​ສັງກັດ​ມະຫາວິທະຍາໄລ​ກຸງ​ເທບ ທົນ​ບູ​ລີ ດ້ວຍ​ການ​ຄວ້າ 3 ຫຼຽນ​ຄຳ ແລະ 1 ຫຼຽນ​ເງິນ ໃນ​ການ​ແຂ່ງຂັນ​ກີລາ​ແລ່ນ-ລານ ລາຍການ The Sun Games 2020 ພ້ອມ​ທັງ​ໄດ້​ຮັບ​ທຶນ​ການ​ສຶກ​ສາ​ພິເສດ​ຈາກ​ມະຫາວິທະຍາໄລ​ດັ່ງກ່າວ ຫຼາຍ​ພໍ​ສົມຄວນ ເຊິ່ງ​ເປັນ​ອີກ​ຜົນງານ​ໜຶ່ງ​ທີ່​ເຮັດ​ໃຫ້​ນ້ອງ​ມີ​ກຳລັງ​ໃຈ​ຢືນ​ສູ້​ຕໍ່ ໃນ​ວົງ​ການ​ກິລາ​ແລ່ນ-ລານ ແລະ ສາມາດ​ຕໍ່​ຍອດ​ໃຫ້​ຕົນ​ເອງ​ມີ​ຄວາມ​ຕັ້ງໃຈ​ສູງ​ເຂົ້າ​ໃນ​ການ​ເຝິກຝົນ​ຫຼໍ່​ຫຼອມ ເພື່ອ​ກຽມ​ສ້າງ​ຄວາມ​ຝັນ ໃຫ້​ເປັນ​ຈິງ ໃນ​ງານ​ມະ​ຫະ​ກຳ​ກີລາ​ຊີເກມ ໃນ​ຄັ້ງ​ຕໍ່​ໄປ ແລະ ອີກ​ຢ່າງ​ສຳລັບ​ເງິນ​ລາງວັນ​ທີ່​ນ້ອງ​ໄດ້​ຮັບ​ໃນ​ຄັ້ງ​ນີ້ ກໍ​ຄິດ​ໄວ້​ແລ້ວ​ວ່າ ຈະ​ບິ​ແບ່ງ​ຈຳນວນ​ໜຶ່ງ ນຳໄປ​ຊື້​ເຄື່ອງ​ບຳລຸງ​ສຸຂະພາບ ແລະ ເຂົ້າ​ປາ​ອາຫານ​ແຫ້ງ​ນຳໄປ​ມອບ​ໃຫ້​ນັກກີລາ​ແລ່ນ-ລານ​ຂອງ​ນະຄອນຫຼວງ​ວຽງ​ຈັນ ແຂວງ​ວຽງ​ຈັນ ບ້ານ​ເກີດ​ຂອງ​ແມ່ ແຂວງ​ຈຳປາ​ສັກ ບ້ານ​ເກີດ​ຂອງ​ພໍ່ ນັກກີລາ​ແລ່ນ​ຄົນ​ພິການ​ລາວ ແລະ ນັກກີລາ​ແລ່ນ​ໃນ​ທີມ​ດຽວ​ກັນ ເຊິ່ງ​ໄດ້​ເກັບ​ຕົວ​ຝຶກ​ຊ້ອມ​ກຽມ​ເຂົ້າ​ຮ່ວມ ຊຽງ​ຂວາງ ເກມ ທີ່​ຈະ​ເປີດ​ສາກ​ຂຶ້ນ​ໃນ​ມໍ່ໆ​ນີ້.

    ສະນັ້ນ ເພື່ອ​ເປັນ​ການ​ຕອບ​ສະໜອງ​ຕໍ່​ການ​ສ້າງ​ຜົນສຳເລັດ​ໃນ​ງານ​ຕ່າງໆ​ໃນຕໍ່ໜ້າ ນ້ອງ​ເອງ​ກໍ​ຍັງ​ມີ​ຄວາມ​ຕ້ອງການ​ຂໍ​ຄວາມ​ຊ່ວຍເຫຼືອ​ຫຼາຍ​ດ້ານ ຈຶ່ງ​ຖື​ເອົາ​ໂອກາດ​ນີ້​ຂໍ​ຮຽກຮ້ອງ​ມາ​ຍັງ​ບັນດາ​ພາກສ່ວນ​ບໍລິສັດ ແລະ ຜູ້​ທີ່​ຢາກ​ສະໜັບສະໜູນ​ການ​ພັດທະນາ ເພື່ອ​ສ້າງ​ຜົນງານ​ໃຫ້​ແກ່​ປະເທດ​ຊາດ ກໍ​ສາມາດ​ສະໜັບສະໜູນ​ນ້ອງ​ໄດ້​ທຸກ​ເວລາ ບໍ່​ຈຳກັດ​ພາກສ່ວນ ແລະ ສາມາດ​ພົວພັນ​ມາ​ຫາ​ດ້ວຍ​ຕົນ​ເອງ​ໂດຍ​ກົງ ທີ່​ເຟດ​ບຸກ Lodkeo Inthakoumman.

    ນາງ ລົດ​ແກ້ວ ອິນ​ທະ​ກຸມມານ ບອກ​ຕື່ມ​ອີ​ກວ່າ: ສຳລັບ​ແຜນການ​ໃນຕໍ່ໜ້າ ເປົ້າ​ໝາຍ​ແມ່ນ​ຊຽງ​ຂວາງ ເກມ ສະນັ້ນ ນ້ອງ​ຈຶ່ງ​ໄດ້​ຕັດສິນ​ໃຈ​ໄວ້​ແລ້ວ ຈະ​ລົງ​ແຂ່ງຂັນ​ກີລາ ແລ່ນ 2 ລາຍການ ຄື: ແລ່ນ 800 ແມັດ​ຍິງ ແລະ ແລ່ນ 1.500 ແມັດ​ຍິງ ໃນ​ນາມ​ນັກກີລາ​ແຂວງ​ວຽງ​ຈັນ ເຊິ່ງ​ເປັນ​ແຂວງ​ທີ່​ນ້ອງ​ເກີດ ແລະ ເປັນ​ແຂວງ​ບ້ານ​ເກີດ​ຂອງ​ແມ່​ອີກ​ດ້ວຍ.

    ສຳລັບ​ຜົນງານ​ຫຼ້າ​ສຸດ​ຂອງ ນາງ ລົດ​ແກ້ວ ອິນ​ທະ​ກຸມມານ ຮ່ວມ​ແຂ່ງຂັນ​ແລ່ນ 2 ລາຍການ ໃນ​ປະເພດ 800 ແມັດ​ຍິງ ແລະ 1.500 ແມັດ​ຍິງ ໃນ​ງານ​ກີລາ ຊີເກມ 2019 ທີ່​ຟີ​ລິບ​ປິນ ແມ່ນ​ບໍ່​ສາມາດ​ສ້າງ​ຜົນງານ​ໄດ້​ຈັກ​ຫຼຽນ ແຕ່​ມີ​ຜົນງານ​ຄວ້າ 3 ຫຼຽນ​ຄຳ ຈາກ​ປະເພດ​ແລ່ນ 800 ແມັດ 1.500 ແມັດ 5.000 ແມັດ​ຍິງ ແລະ 1 ຫຼຽນ​ເງິນ ແລ່ນ 10.000 ແມັດ​ຍິງ ໃນ​ລາຍການ The Sun Games 2020 ທີ່​ຫາ​ກໍ​ສຳເລັດ​ລົງ​ເມື່ອ​ບໍ່​ດົນ​ມາ​ນີ້. 

ຂ່າວທີ່ກ່ຽວຂ້ອງ