ຂ່າວຫຼ້າສຸດ

“ຊຽງ​ຂວາງ ເກມ 2020” ມີ​ພຽງ 12 ປະເພດ ບໍ່​ຈຳກັດ​ນັກກີລາ​ທີມ​ຊາດ

1.110 24 ມ.ກ. 2020 ວົງຈອນກີລາ
“ຊຽງ​ຂວາງ ເກມ 2020” ມີ​ພຽງ 12 ປະເພດ ບໍ່​ຈຳກັດ​ນັກກີລາ​ທີມ​ຊາດ

   ອີງ​ຕາມ​ຂໍ້​ມູນ​ຈາກ​ກົມ​ກິລາ​ລະດັບ​ສູງ ກະຊວງ​ສຶກ​ສາ​ທິ​ການ ແລະ ກີລາ ແຈ້ງ​ໃຫ້​ຊາບ​ວ່າ: ຕາມ​ການ​ສັງ​ລວມ​ລະບຽບ​ການ​ແຂ່ງຂັນ​ກີລາ 28 ປະເພດ ໃນ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 22 ມີນາ ຫາ 1 ເມສາ 2020 ໂດຍ​ທາງ​ກົມ​ກີລາ​ລະດັບ​ສູງ ໄດ້​ມີ​ການ​ວາງ​ລະບຽບ ແລະ ເງື່ອນໄຂ​ຂອງ​ນັກ​ກິລາ​ໄວ້​ຢ່າງ​ລະອຽດ ເພື່ອ​ບໍ່​ໃຫ້​ມີ​ການ​ເອົາ​ລັດ​ເອົາ​ປຽບ​ກັນ​ໃນ​ເວລາ​ແຂ່ງຂັນ​ຕົວ​ຈິງ ຊຶ່ງ​ມີ​ພຽງ 12 ປະເພດ​ກີລາ​ເທົ່າ​ນັ້ນ ທີ່​ມີ​ການ​ເປີດ​ກວ້າງ​ບໍ່​ຈຳກັດ​ນັກ​ກິລາ​ທີມ​ຊາດ ຄື: ເປ​ຕັງ ປິ່ງ​ປ່ອງ ເທັນ​ນິດ ໝາກ​ຂ່າງ ເຮືອ​ຊ່ວງ ໜ້າ​ເກັກ ບານບ້ວງ ໝາກເສິກ ໝາກ​ແລ້ ​ກ໊ອຟ ໂບ​ລິງ ແລະ ລົດຖີບ.

     ຄຽງ​ຄູ່​ກັນ​ນັ້ນ ມີ​ເຖິງ 17 ປະເພດ​ກີລາ ທີ່​ມີ​ການ​ກຳນົດ​ເງື່ອນໄຂ​ນັກກີລາ​ທີມ​ຊາດ ເປັນຕົ້ນ​ແມ່ນ​ກີລາ​ບານເຕະ ນັກກີລາ​ທີ່​ສາມາດ​ລົງທະບຽນ​ເຂົ້າ​ຮ່ວມ​ແຂ່ງຂັນ​ໄດ້ ຈະ​ຕ້ອງ​ມີ​ອາຍຸ 16 ປີ​ຂຶ້ນ​ໄປ ຫຼື ເກີດ​ປີ 2003 ລົງ​ມາ ແລະ ນັກ​ກິລາ​ບານເຕະ​ທີມ​ຊາດ (ປະເພດ​ຊາຍ) ຊຸດ​ເຂົ້າ​ຮ່ວມ​ງານ​ກີລາ​ຊີເກມ ຄັ້ງ​ທີ XXX ທີ່​ປະເທດ​ຟີ​ລິບ​ປິນ ປີ 2019 ແລະ ນັກ​ເຕະ​ທີມ​ຊາດ​ຊຸດ​ໃຫຍ່​ທີ່​ມີ​ລາຍ​ຊື່​ເຄື່ອນ​ໄຫວ ໃນ​ປີ 2013-2020 ໂດຍ​ມີ​ໂຕ​ຫຍໍ້​ທີ່​ສະແດງ​ເຖິງ​ປະເພດ​ນັກກີລາ​ແມ່ນ (NT) ອະນຸຍາດ​ໃຫ້​ລົງທະບຽນ​ໄດ້​ສູງ​ສຸດ 4 ຄົນ​ຕໍ່​ທີມ ສາມາດ​ລົງ​ສະໜາມ​ໄດ້​ເທື່ອ​ລະ 2 ຄົນ ແລະ ສາມາດ​ປ່ຽນ​ຕົວ​ໄດ້.

    ສ່ວນ​ປະເພດ​ທີມ​ຍິງ ນັກ​ເຕະ​ທີມ​ຊາດ ຮຸ່ນ​ອາຍຸ​ບໍ່​ເກີນ 16 ປີ ຂຶ້ນ​ໄປ​ຫາ ຊຸດ​ໃຫຍ່​ທີ່​ເຄື່ອນ​ໄຫວ​ແຂ່ງຂັນ ລະຫວ່າງ​ປີ 2018-2020 ສາມາດ​ລົງທະບຽນ​ໄດ້ 4 ຄົນ​ຕໍ່​ທີມ ສາມາດ​ລົງ​ສະໜາມ​ໄດ້​ເທື່ອ​ລະ 2 ຄົນ ແລະ ປ່ຽນ​ຕົວ​ໄດ້ ກີລາ​ລອຍນ້ຳ ນັກກີລາ​ທີມ​ຊາດ​ຍິງ-ຊາຍ ສາມາດ​ລົງ​ແຂ່ງຂັນ​ປະເພດ​ດ່ຽວ​ໄດ້ 3 ລາຍການ ແລະ ປະເພດ​ທີມ​ໄດ້ 1 ລາຍການ ກີລາ​ບານສົ່ງ​ໃນ​ຮົ່ມ​ຍິງ-ຊາຍ ນັກກີລາ​ອາຍຸ 28 ປີ ລົງ​ມາ ລົງທະບຽນ​ໄດ້ 8 ຄົນ ແລະ ອາຍຸ​ເກີນ 28 ປີ ຂຶ້ນ​ໄປ​ລົງທະບຽນ​ໄດ້ 4 ຄົນ ແລະ ສາມາດ​ລົງ​ແຂ່ງຂັນ​ໄດ້ 2 ຄົນ ກີລາ​ບານສົ່ງ​ຫາດ​ຊາຍ​ຍິງ-ຊາຍ ນັກກີລາ​ອາຍຸ 28 ປີ​ລົງ​ມາ ລົງ​ໄດ້ 1 ຄົນ ແລະ ອາຍຸ​ເກີນ 28 ປີ ໄດ້ 1 ຄົນ ກີລາ​ປັນ​ຈັກ​ສີ​ລັດ ແຕ່​ລະ​ຄະນະ​ມີ​ສິດ​ສົ່ງ​ນັກກີລາ​ທີມ​ຊາດ​ໄດ້ ຄື: ປະເພດ​ຕໍ່ສູ້​ຊາຍ 1 ຄົນ ຍິງ 1 ຄົນ ແລະ ປະເພດ​ຟ້ອນ ຊາຍ 1 ຄົນ ຍິງ 1 ຄົນ ນັບ​ແຕ່​ຊີເກມ 2019 ຍົກເວັ້ນ​ປະເພດ​ຄູ່ ແລະ ທີມ ສາມາດ​ສົ່ງ​ໄດ້ 1 ຄູ່ ແລະ 1 ທີມ ກີລາ​ມວຍ​ສາກົນ ນັກກີລາ​ທີມ​ຊາດ​ເພດ​ຊາຍ ຕ້ອງ​ມີ​ອາຍຸ​ລະຫວ່າງ 17-32 ປີ  ແລະ ນັກກີລາ​ຍິງ ຕ້ອງ​ມີ​ອາຍຸ 16-30 ປີ  ແຕ່​ລະ​ຄະນະ​ມີ​ສິດ​ສົ່ງ​ນັກກີລາ​ໄດ້ ຊາຍ 2 ຮຸ່ນ ແລະ ຍິງ 2 ຮຸ່ນ ກີລາ​ມວຍ​ລາວ ແຕ່​ລະ​ຄະນະ​ມີ​ສິດ​ສົ່ງ​ນັກກີລາ​ທີມ​ຊາດ ນັບ​ແຕ່​ຊີເກມ 2019 ເພດ​ຊາຍ​ໄດ້ 2 ຄົນ ແລະ ເພດ​ຍິງ​ແມ່ນ​ບໍ່​ຈຳກັດ.

     ກິລາ​ຢູ​ໂດ ສາມາດ​ສົ່ງ​ນັກກີລາ​ເຂົ້າ​ຮ່ວມ​ແຂ່ງຂັນ​ໄດ້​ຈຳນວນ​ບໍ່​ເກີນ​ຮຸ່ນ​ລະ 1 ຄົນ ຫຼື ຊັ້ນ​ລະ 1 ທີມ ນັກກີລາ​ທີ່​ເປັນ​ທີມ​ຊາດ ລົງ​ແຂ່ງຂັນ​ໄດ້​ພຽງ 3 ຄົນ​ເທົ່າ​ນັ້ນ ການ​ແຂ່ງຂັນ​ປະເພດ​ທ່າ​ຟ້ອມ​ກະ​ຕະ​ຍິງ-ຊາຍ ຫ້າມ​ບໍ່​ໃຫ້​ນັກກີລາ​ທີມ​ຊາດ​ທີ່​ເຄີຍ​ຈັບ​ຄູ່​ກັນ ໃນ​ການ​ແຂ່ງຂັນ​ປະເພດ​ທ່າ​ທຸ້ມ​ມາດຕະຖານ ໃນ​ນາມ​ທີມ​ຊາດ ຈັບ​ຄູ່​ກັນ​ລົງ​ແຂ່ງຂັນ​ລາຍການ​ນີ້ ອະນຸຍາດ​ໃຫ້​ນັກກີລາ​ທີມ​ຊາດ ປະເພດ​ທ່າ​ອູ້ມ​ມາດຕະຖານ​ລົງ​ແຂ່ງຂັນ​ໄດ້​ພຽງ​ຄົນ​ດຽວ ແຕ່​ຕ້ອງ​ຈັບ​ຄູ່​ກັບ​ຄົນ​ອື່ນ​ທີ່​ບໍ່​ແມ່ນ​ນັກກີລາ​ທີມ​ຊາດ ໃນ​ປະເພດ​ທ່າ​ຟ້ອນ​ກະ​ຕະ ກີລາ​ຄາ​ຣາ​ເຕ​ໂດ ນັກກີລາ​ຄົນ​ໜຶ່ງ​ບໍ່​ສາມາດ​ລົງ​ແຂ່ງຂັນ​ໄດ້​ເກີນ 1 ປະເພດ ແຕ່​ສາມາດ​ລົງ​ແຂ່ງຂັນ​ໃນ​ກີລາ​ປະເພດ​ດຽວ​ກັນ​ໄດ້ 2 ລາຍການ ແລະ ນັກກີລາ​ທີມ​ຊາດ​ທີ່​ເຂົ້າ​ຮ່ວມ​ຊີເກມ 2017 ສາມາດ​ເຂົ້າ​ຮ່ວມ​ແຂ່ງຂັນ​ໄດ້​ໂດຍ​ມີ​ຂໍ້​ຈຳກັດ ຄື: ປະເພດ​ບຸກຄົນ​ຕໍ່ສູ້ ແລະ ປະເພດ​ກະ​ຕະ ສາມາດ​ລົງ​ແຂ່ງຂັນ​ໄດ້​ທີມ​ລະ 3 ຄົນ ໃນ​ນັ້ນ ນັກກີລາ​ຟ້ອນ​ກະ​ຕະ 1 ຄົນ ແລະ ປະເພດ​ຕໍ່ສູ້ 2 ຄົນ ກີລາ​ດອກ​ປີກ​ໄກ ແຕ່​ລະ​ຄະນະ​ສາມາດ​ມີ​ນັກກີລາ​ທີມ​ຊາດ​ຊຸດ​ໃຫຍ່​ໄດ້​ບໍ່​ເກີນ 2 ຄົນ​ຕໍ່​ທີມ (ທີມ​ຊາຍ-ທີມ​ຍິງ) ແລະ ກຳນົດ​ໃຫ້​ມີ​ອັນ​ດັບ 3 ຮ່ວມ ກີລາ​ສະນຸກ​ເກີ ຄະນະ​ໜຶ່ງ​ລົງ​ແຂ່ງຂັນ​ໄດ້​ລາຍການ​ໜຶ່ງ​ບໍ່​ເກີນ 3 ຄົນ ນັກກີລາ​ທີມ​ຊາດ​ຍິງ-ຊາຍ ສາມາດ​ລົງ​ແຂ່ງຂັນ​ໄດ້ 1 ຄົນ​ທຸກ​ລາຍການ ແລະ ມີ​ສິດ​ລົງ​ແຂ່ງຂັນ​ໄດ້ 3 ລາຍການ ກີລາ​ມວຍ​ປ້ຳ ນັກກີລາ​ທີມ​ຊາດ​ປີ 2019 ແຕ່​ລະ​ຄະນະ​ສາມາດ​ລົງທະບຽນ​ໄດ້ ຍິງ 1 ຄົນ ແລະ ຊາຍ 1 ຄົນ ກີລາ​ເທ​ຄວັນ​ໂດ ນັກກີລາ​ຊຸດ​ຊີເກມ ປີ 2013 ແລະ ນັກ​ກິລາ​ທີມ​ຊາດ​ຊຸດ​ເອ​ຊຽນ​ເກມ ປີ 2018 ອະນຸຍາດ​ໃຫ້​ເຂົ້າ​ຮ່ວມ​ແຂ່ງຂັນ​ໄດ້​ແບບ​ອັດຕະໂນມັດ ແຕ່​ລະ​ທີມ​ໃຫ້​ມີ​ນັກກີລາ​ປະເພດ​ຕໍ່ສູ້ 2 ຄົນ ແລະ ປຸ່ມ​ເຊ້ 2 ຄົນ.

     ກີລາ​ວູ​ຊູ ນັກ​ກິລາ​ທີມ​ຊາດ​ແຕ່​ລະ​ຄະນະ​ສາມາດ​ລົງທະບຽນ​ໄດ້ 2 ຄົນ ຍິງ 1 ຄົນ (ຍົກເວັ້ນ​ປະເພດ​ຟ້ອນ) ກີລາ​ແລ່ນ-ລານ ກຳນົດ​ໃຫ້​ນັກກີລາ​ທີມ​ຊາດ ຊຸດ​ຊີເກມ 2019 ແລະ ເອ​ຊຽນ​ເກມ 2018 ລົງ​ແຂ່ງຂັນ​ລາຍການ​ດ່ຽວ​ໄດ້ 2 ລາຍການ ແລະ ທີມ 1 ລາຍການ ກີລາ​ກະຕໍ້-ກະຕໍ້​ຊິນ​ລອນ ນັກກີລາ​ຊຸດ​ເອ​ຊຽນ ເກມ 2018 ອະນຸຍາດ​ໃຫ້​ແຕ່​ລະ​ພາກສ່ວນ​ເຂົ້າ​ຮ່ວມ​ແຂ່ງຂັນ​ໄດ້​ລາຍການ​ຄູ່ 1 ຄົນ ລາຍການ​ດ່ຽວ 1 ຄົນ ແລະ ລາຍການ​ທີມ​ຊຸດ​ຄູ່ 3 ຄົນ ແລະ ທີມ​ຊຸດ 1 ຄົນ ກີລາ​ຍິງ​ທະນູ ນັກກີລາ​ທີມ​ຊາດ​ຊຸດ​ເອ​ຊຽນ​ເກມ 2018 ອະນຸຍາດ​ໃຫ້​ແຕ່​ລະ​ພາກສ່ວນ​ເຂົ້າ​ຮ່ວມ​ແຂ່ງຂັນ​ໄດ້ ປະເພດ​ລະ 1 ຄົນ (ຊາຍ 1 ຄົນ ແລະ ຍິງ 1 ຄົນ) ກີລາ​ຍິງ​ປືນ ສະເພາະ​ປືນ​ເປົ້າ​ເລື່ອນ ນັກກີລາ​ທີມ​ຊາດ​ທີ່​ລົງ​ແຂ່ງຂັນ​ງານ​ກີລາ ອຸດົມ​ໄຊ ເກມ 2014 ບໍ່​ອະນຸຍາດ​ໃຫ້​ລົງ​ແຂ່ງຂັນ ໂດຍ​ການ​ແຂ່ງຂັນ​ປະເພດ​ນີ້​ຈະ​ຈັດ​ຂຶ້ນ​ທີ່​ສະໜາມ​ກີລາ​ຍິງ​ປືນ (ຫຼັກ) 16 ນະຄອນຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ