ຂ່າວຫຼ້າສຸດ

ນວ ມີ 114 ຫົວໜ່ວຍທຸລະກິດການພິມ-ຈຳໜ່າຍ

1.223 24 ມ.ກ. 2020 ຂ່າວໜ້າ​ໜຶ່ງ
ນວ ມີ 114 ຫົວໜ່ວຍທຸລະກິດການພິມ-ຈຳໜ່າຍ

   ກົມ​ພິມ​ຈຳ­ໜ່າຍ ກະ­ຊວງ​ຖະ­ແຫຼງ​ຂ່າວ-ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ຮ່ວມ​ກັບ​ພະ​ແນກ​ຖະ­ແຫຼງ​ຂ່າວ​ວັດ ທະ­ນະ​ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ໄດ້​ຈັດ​ກອງ​ປະ­ຊຸມ​ປະ​ເມີນ​ການ­ຈັດ­ຕັ້ງ​ປະ­ຕິ­ບັດ ກ່ຽວ​ກັບ​ການ​ແບ່ງ​ຄວາມ​ຮັບ­ຜິດ­ຊອບ​ໃນ​ການ​ຄຸ້ມ​ຄອງ​ວຽກ​ງານ​ການ​ພິມ​ຈຳ­ໜ່າຍ ຂຶ້ນ​ວັນ​ທີ 23 ມັງ­ກອນ 2020 ຢູ່​ພະ​ແນກ ຖວ​ທ ນວ ໂດຍ​ການ​ເປັນ​ປະ­ທານ​ຂອງ​ທ່ານ​ນາງ ບົວ​ໄຂ ເພັງ​ພະ­ຈັນ ຫົວ­ໜ້າ​ກົມ​ພິມ​ຈຳ­ໜ່າຍ ທ່ານ ພອນ​ຈັນ ແພງ​ພູ​ວັນ ຮອງ​ຫົວ­ໜ້າ​ພະ​ແນກ ຖວ​ທ ນວ ມີ​ຫົວ­ໜ້າ​ຫ້ອງ­ການ ຖວ​ທ 9 ຕົວ​ເມືອງ ກອງ​ເລ­ຂາ​ວຽກ​ງານ 3 ສ້າງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ພອນ​ຈັນ ແພງ​ພູ​ວັນ ຮອງ​ຫົວ­ໜ້າ​ພະ​ແນກ ຖວ​ທ ນວ ກ່າວ​ວ່າ: ໂດຍ​ອີງ​ຕາມ​ພາ­ລະ​ບົດ­ບາດ​ທີ່​ໄດ້​ຮັບ​ການ​ມອບ​ໝາຍ​ໃຫ້ ຂະ­ແໜງ​ວັດ­ທະ­ນະ­ທຳ ພະ​ແນກ ຖວ​ທ ນວ ເປັນ​ຜູ້​ຮັບ­ຜິດ­ຊອບ​ໃນ​ການ­ຈັດ­ຕັ້ງ​ເຄື່ອນ​ໄຫວ​ວຽກ​ງານ​ຄຸ້ມ​ຄອງ ກວດ ກາ​ຊຸກ­ຍູ້​ຕິດ­ຕາມ​ແກ້​ໄຂ​ອີງ​ຕາມ​ກົດ­ໝາຍ ແລະ ລະ­ບຽບ​ການ​ທີ່​ກ່ຽວ­ຂ້ອງ​ໃນ​ວຽກ​ງານ​ດັ່ງ­ກ່າວ ໂດຍ​ສາ­ມາດ​ຕິດ­ຕາມ​ກວດ­ກາ ແລະ ຄຸ້ມ​ຄອງ​ຫົວ­ໜ່ວຍ​ທຸ­ລະ​ກິດ ຂົງ­ເຂດ​ການ​ພິມ-ຈຳ­ໜ່າຍ ທີ່​ປະ­ກອບ​ດ້ວຍ ບໍ­ລິ­ການ ການ​ພິມ-ການ​ໂຄ­ສະ­ນາ ແປ​ພາ­ສາ ຈຳ­ໜ່າຍ​ສິ່ງ​ພິມ ໂຮງ­ພິມ ສຳ­ນັກ​ພິມ ໃນ ນວ ຕາມ​ຕົວ​ເລກ​ສະ­ຖິ­ຕິ ປະ­ຈຳ​ປີ 2019 ມີ​ທັງ​ໝົດ 114 ຫົວ­ໜ່ວຍ ສະ­ເພາະ​ການ​ອອກ​ອະ­ນຸ­ຍາດ​ບໍ­ລິ­ສັດ​ໂຄ­ສະ­ນາ ມີ 57 ຫົວ­ໜ່ວຍ ໃນ​ນັ້ນ ເປີດ​ໃໝ່​ມີ 9 ຫົວ­ໜ່ວຍ ບໍ່​ມາ​ຕໍ່ 19 ຫົວ­ໜ່ວຍ ຮ້ານ​ແປ​ພາ­ສາ ມີ 35 ຫົວ­ໜ່ວຍ ເປີດ​ໃໝ່ 12 ຫົວ­ໜ່ວຍ  ໂຮງ​ພີມ ມີ 12 ຫົວ­ໜ່ວຍ ເປີດ​ໃໝ່ 2 ຫົວ­ໜ່ວຍ ບໍ່​ມາ​ຕໍ່ 3 ຫົວ­ໜ່ວຍ​ແລະ  ສຳ­ນັກ​ພິມ​ມີ 10 ຫົວ­ໜ່ວຍ ເປີດ​ໃໝ່ 5 ຫົວ ໜ່ວຍ ແລະ ບໍ່​ມາ​ຕໍ່ 1 ຫົວ­ໜ່ວຍ.

   ສຳ­ລັບ​ການ­ຈັດ­ຕັ້ງ​ຜັນ​ຂະ­ຫຍາຍ​ວຽກ​ງານ 3 ສ້າງ ໃນ​ຂົງ­ເຂດ​ຄຸ້ມ​ຄອງ​ວຽກ​ງານ​ດັ່ງ­ກ່າວ ແຕ່​ປີ 2016 ເປັນ­ຕົ້ນ​ມາ ທີ່​ກະ­ຊວງ ຖວ​ທ ກໍ​ຄື ກົມ​ພິມ​ຈຳ­ໜ່າຍ ໄດ້​ມີ​ການ​ແບ່ງ​ຂັ້ນ​ຄຸ້ມ​ຄອງ​ຢ່າງ​ລະ­ອຽດ​ຊັດ​ເຈນ ໃນ​ການ​ມອບ​ໝາຍ​ໃຫ້ ນວ ກໍ​ຄື ພະ​ແນກ ແລະ ເມືອງ​ຄຸ້ມ​ຄອງ ໂດຍ​ມອບ​ຄວາມ​ຮັບ­ຜິດ­ຊອບ​ໃຫ້​ກັບ​ຂະ­ແໜງ​ວັດ­ທະ­ນະ­ທຳ ເປັນ​ຜູ້​ກວດ­ກາ​ຄຸ້ມ​ຄອງ ບັນ­ດາ​ຫົວ­ໜ່ວຍ​ທຸ­ລະ​ກິດ ເປັນ­ຕົ້ນ ວຽກ​ງານ​ສື່​ສິ່ງ​ພິມ ໂຄ­ສະ­ນາ ແປ​ພາ­ສາ ໂຮງ­ພິມ ແລະ ສຳ­ນັກ​ພິມ ເຫັນ​ວ່າ ສາ­ມາດ​ຍາດ​ໄດ້​ຜົນ­ສຳ­ເລັດ​ຫຼາຍ​ດ້ານ​ທີ່​ເປັນ​ໜ້າ​ເພິ່ງ​ພໍ­ໃຈ ສາ­ເຫດ​ຍ້ອນມີ​ການ​ປະ­ສານ​ສົມ­ທົບ ມີ​ການ​ແບ່ງ​ຂັ້ນ​ຄຸ້ມ​ຄອງ​ຢ່າງ​ລະ­ອຽດ ລະ­ຫວ່າງ ພາກ­ສ່ວນ​ກ່ຽວ­ຂ້ອງ ມີ​ການ​ຕິດ­ຕາມ​ກວດ­ກາ​ຢ່າງ​ໃກ້­ຊິດ ເກັບ​ກຳ​ໄດ້​ດ້ານ​ສະ­ຖິ­ຕິ​ຂອງ​ບັນ­ດາ​ຫົວ­ໜ່ວຍ​ທຸ­ລະ​ກິດ ຢູ່​ພາຍ​ໃນ ນວ ຄຽງ​ຄູ່​ກັນ​ນີ້ ພາກ­ສ່ວນ​ຜູ້​ປະ­ກອບ​ຍັງ​ໄດ້​ເອົາ­ໃຈ­ໃສ່​ພັດ­ທະ­ນາ​ວຽກ​ງານ​ຂອງ​ຕົນ ແລະ ໄດ້​ຍົກ​ລະ­ດັບ​ພື້ນ­ຖານ​ເຕັກ­ນິກ​ການ​ພິມ ເຮັດ​ໃຫ້​ຂະ­ແໜງ­ການ​ດັ່ງ­ກ່າວ​ນັບ​ມື້​ມີ​ການ​ຂະ­ຫຍາຍ­ຕົວ ແລະ ພັດ­ທະ­ນາ​ດີ​ຂຶ້ນ​ເປັນ​ກ້າວໆ.

   ນອກ​ນີ້ ກອງ​ປະ­ຊຸມ​ຍັງ​ໄດ້​ປຶກ­ສາ​ຫາ­ລື ແລກ­ປ່ຽນ​ບົດ­ຮຽນ ປະ­ສົບ​ການ ແລະ ຫາ​ວິ­ທີ​ທາງ​ແກ້​ໄຂ​ບັນ­ຫາ​ຫຍໍ້­ທໍ້​ທີ່​ເກີດ​ຂຶ້ນ​ໃນ​ຂະ­ແໜງ­ການ​ດັ່ງ­ກ່າວ ເພື່ອ​ຄວາມ​ເປັນ​ເອ­ກະ​ພາບ​ໃນ​ການ​ຄົ້ນ­ຄວ້າ ສ້າງ​ເນື້ອ​ໃນ​ນິ­ຕິ​ກຳ​ຄຸ້ມ​ຄອງ​ວຽກ​ງານ​ພິມ​ຈຳ­ໜ່າຍ​ໃນ​ຂັ້ນ​ຕ່າງໆ​ໃຫ້​ມີ​ຄວາມ​ຖືກ­ຕ້ອງ ແລະ ສອດ­ຄ່ອງ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ