ຂ່າວຫຼ້າສຸດ

ເພີ່ມທະວີເຝົ້າລະວັງ ເຊື້ອຈຸລະໂລກ ໂຄໂລນາ ສາຍພັນໃໝ່

1.308 24 ມ.ກ. 2020 ຂ່າວໜ້າ​ໜຶ່ງ
ເພີ່ມທະວີເຝົ້າລະວັງ ເຊື້ອຈຸລະໂລກ ໂຄໂລນາ ສາຍພັນໃໝ່

   ໄລ­ຍະ​ຕົ້ນ​ປີ​ນີ້ ກະ­ຊວງ​ສາ­ທາ­ລະ­ນະ​ສຸກ ສປ ຈີນ ໄດ້​ລາຍ​ງານ​ກ່ຽວ​ກັບ​ພະ­ຍາດ​ປອດ​ອັກ­ເສບ​ທີ່​ເກີດ ຈາກ​ເຊື້ອ​ຈຸ​ລະ​ໂລກ​ສາຍ​ພັນ​ໃໝ່ novel corona Virus pneumonia (nCoV) ຢູ່​ເມືອງ​ອູ​ຫັ້ນ ແຂວງ​ຫູ ເປີ່ຍ ສປ ຈີນ ປັດ­ຈຸ­ບັນ ເຊື້ອ​ພະ­ຍາດ​ດັ່ງ­ກ່າວ​ໄດ້​ແຜ່​ລະ­ບາດ​ຈາກ​ຄົນ​ສູ່​ຄົນ ແລະ ມີ​ການ​ຕິດ­ເຊື້ອ​ໄປ​ຍັງ ປະ­ເທດ​ອ້ອມ​ຂ້າງ ສປປ ລາວ ກໍ​ເປັນ​ປະ­ເທດ​ໜຶ່ງ​ທີ່​ມີ​ຊາຍ​ແດນ​ຕິດ​ຈອດ ແລະ ມີ​ການ​ເດີນ­ທາງ​ໄປ-ມາ​ຫາ​ສູ່​ເຊິ່ງ​ກັນ ແລະ ກັນ​ກັບ​ປະ­ເທດ​ດັ່ງ­ກ່າວ ຈຶ່ງ​ກໍ່­ໃຫ້­ເກີດ​ມີ​ຄວາມ​ສ່ຽງ​ຕິດ­ເຊື້ອ​ພະ­ຍາດ​ນີ້ ກະ­ຊວງ​ສາ​ທາ ລະ­ນະ​ສຸກ ຈຶ່ງ​ໄດ້​ວາງ​ມາດ​ຕະ­ການ​ປ້ອງ​ກັນ ໂດຍ​ເນັ້ນ​ໜັກ​ໃສ່​ດ່ານ​ສາ­ກົນ ແລະ ດ່ານ​ຊາຍ​ແດນ ເອົາ­ໃຈ ໃສ່​ປ້ອງ​ກັນ ແລະ ສະ­ກັດ​ກັ້ນ​ຢ່າງ​ເຂັ້ມ​ງວດ.

   ທ່ານ ຣັດ​ຕະ​ນະ​ໄຊ ເພັດ​ສຸ­ວັນ ຫົວ­ໜ້າ​ກົມ​ຄວບ​ຄຸມ­ພະ​ຍາດ​ຕິດ­ຕໍ່ ກະ­ຊວງ​ສາ­ທາ­ລະ­ນະ​ສຸກ ໄດ້​ຖະ ແຫຼງ​ຂ່າວ​ຕໍ່​ສື່​ມວນ​ຊົນ ວັນ​ທີ 23 ມັງ­ກອນ 2020 ວ່າ: ພະ­ຍາດ​ປອດ​ອັກ­ເສບ​ທີ່​ເກີດ​ຈາກ​ເຊື້ອ​ຈຸ​ລະ​ໂລກ ສາຍ​ພັນ​ໃໝ່ novel corona Virus pneumonia (nCoV) ມີ​ຈຸດ​ເລີ່ມ​ຕົ້ນ​ຢູ່​ເມືອງ​ອູ​ຫັ້ນ ແຂວງ​ຫູ​ເປີ່ຍ  ເຊິ່ງ​ກໍ­ລະ­ນີ​ສ່ວນ​ໃຫຍ່​ມີ​ປະ­ຫວັດ​ການ​ເດີນ­ທາງ​ໄປ​ຕະ­ຫຼາດ​ຂາຍ​ອາ­ຫານ​ທະ­ເລ ແລະ ສັດ​ອື່ນໆ ປັດ­ຈຸ­ບັນ ມີ ການ​ຢັ້ງ­ຢືນ​ວ່າ ມີ​ການ​ຕິດ­ຕໍ່​ຈາກ​ຄົນ​ສູ່​ຄົນ ອີງ​ຕາມ​ຕົວ​ເລກ​ລາຍ​ງານ​ຮອດ​ທ່ຽງ​ຄືນ ວັນ​ທີ 22 ມັງ­ກອນ 2020 ມີ​ຄົນ​ເຈັບ 571 ກໍ­ລະ­ນີ ເສຍ​ຊີ­ວິດ 17 ກໍ­ລະ­ນີ ສ່ວນ​ໃຫຍ່​ແມ່ນ​ເກີດ​ຢູ່​ເມືອງ​ອູ​ຫັ້ນ ນອກ­ຈາກ​ມີ ລາຍ​ງານ​ຈາກ 25 ເມືອງ ໃນ ສປ ຈີນ ແລ້ວ ຍັງ​ມີ​ລາຍ​ງານ​ພົບ​ຄົນ​ເຈັບ​ຢູ່​ປະ­ເທດ​ອ້ອມ​ຂ້າງ ເຊິ່ງ​ສ່ວນ ໃຫຍ່​ເປັນ​ນັກ​ທ່ອງ​ທ່ຽວ​ທີ່​ມາ​ຈາກ​ເມືອງ​ອູ​ຫັ້ນ ເຊັ່ນ: ໄທ ສ ເກົາ­ຫຼີ ຍີ່­ປຸ່ນ ໄຕ້​ຫວັນ ແລະ ສ ອາ​ເມ​ຣິ​ກາ ໂດຍ​ຊ່ຽວ­ຊານ​ຈີນ​ຢັ້ງ­ຢືນ​ວ່າ ເຊື້ອ​ທີ່​ເປັນ​ສາ­ເຫດ​ຂອງ​ພະ­ຍາດ​ດັ່ງ­ກ່າວ ຈັດ​ຢູ່​ໃນ​ຄອບ­ຄົວ​ຈຸ​ລະ​ໂລກ corona Virus ອາ­ການ​ຂອງ​ພະ­ຍາດ​ລວມ​ມີ: ໄຂ້ ໄອ ເຈັບ­ຄໍ ແລະ ຫາຍ­ໃຈ​ຍາກ ພະ­ຍາດ​ນີ້​ສາ­ມາດ​ຕິດ ຕໍ່​ໂດຍ​ກົງ ຈາກ​ຄົນ​ຫາ​ຄົນ ການ​ສຳ­ຜັດ ໄອ ຈາມ ຈາກ​ຄົນ ແລະ ສັດ​ທີ່​ຕິດ­ເຊື້ອ ຖ້າ​ຄົນ​ເຈັບ​ບໍ່​ໄປ​ພົບ​ແພດ​ແຕ່​ຫົວ­ທີ ອາ­ການ​ອາດ​ຮຸນ​ແຮງ ແລະ ເຮັດ​ໃຫ້​ເສຍ​ຊີ­ວິດ​ໄດ້.

   ສຳ­ລັບ ສປປ ລາວ ຍັງ​ບໍ່​ທັນ​ມີ​ກໍ­ລະ­ນີ​ຕິດ­ເຊື້ອ​ພະ­ຍາດ​ດັ່ງ­ກ່າວ ແຕ່​ກະ­ຊວງ​ສາ­ທາ­ລະ­ນະ​ສຸກ ໄດ້​ເຝົ້າ ລະ­ວັງ​ສະ­ຖາ­ນະ​ການ​ຢ່າງ​ໃກ້­ຊິດ ໂດຍ​ການ​ນຳ​ຈຸດ​ປະ­ສານ​ງານ​ໃນ​ປະ­ຕິ­ບັດ​ມາດ​ຕະ­ການ ກຽມ​ຄວາມ​ພ້ອມ ແລະ ບັນ­ດາ​ດ່ານ​ສາ­ກົນ​ໄດ້​ມີ​ການ​ໃຫ້​ຂໍ້​ມູນ​ຂ່າວ­ສານ​ແກ່​ຜູ້­ໂດຍ­ສານ​ຂາ​ເຂົ້າ ແລະ ມີ​ການ​ກຽມ​ຄວາມ​ພ້ອມ ໃນ​ການ​ຄັດ​ກອງ​ຜູ້­ໂດຍ­ສານ ທີ່​ເດີນ­ທາງ​ມາ​ຈາກ​ປະ­ເທດ​ທີ່​ມີ​ການ​ລະ­ບາດ ພ້ອມ​ທັງ​ບັນ­ດາ​ໂຮງ­ໝໍ​ໄດ້​ມີ​ການ​ກະ­ກຽມ​ຫ້ອງ​ແຍກ​ດ່ຽວ ອຸ­ປະ­ກອນ​ປ້ອງ​ກັນ​ຕົນ​ເອງ ແລະ ລົດ​ຮັບ​ສົ່ງ​ຄົນ​ເຈັບ ທັງ​ກະ­ກຽມ​ເຝິກ­ອົບ­ຮົມ​ຄືນ​ໃຫ້​ພະ­ນັກ­ງານ​ແພດ​ໝໍ ດ້ານ​ວຽກ​ງານ​ປິ່ນ­ປົວ ກັນ ແລະ ການ​ຄວບ​ຄຸມ​ການ​ຕິດ­ເຊື້ອ ກໍ­ລະ­ນີ​ຜູ້​ທີ່​ເດີນ­ທາງ​ກັບ​ມາ​ຈາກ​ປະ­ເທດ​ດັ່ງ­ກ່າວ ຄວນ​ເອົາ­ໃຈ­ໃສ່​ຕິດ­ຕາມ​ອາ­ການ​ຂອງ​ຕົນ​ເອງ ແລະ ສາ­ມາດ​ສອບ​ຖາມ​ຂໍ້​ມູນ​ເພີ່ມ​ເຕີມ ຫຼື ຖ້າ​ພົບ​ເຫັນ​ຄົນ​ທີ່​ມີ​ອາ­ການ​ສົງ​ໃສ​ເປັນ​ພະ­ຍາດ​ດັ່ງ­ກ່າວ ແລະ ຕ້ອງ­ການ​ຄວາມ​ຊ່ວຍ­ເຫຼືອ ສາ­ມາດ​ໂທ​ໄດ້​ທີ່​ເບີ 020 54066777 ຫຼື ສາຍ​ດ່ວນ 166 ໃນ​ໂມງ​ລັດ​ຖະ​ການ.

   ສ່ວນ​ວິ­ທີ​ປ້ອງ​ກັນ ຄວນ​ຫຼີກ​ລ່ຽງ​ການ​ເດີນ­ທາງ​ໄປ​ເຂດ​ທີ່​ມີ​ການ​ລະ­ບາດ ຫຼື ຊຸມ​ຊົນ​ແອ​ອັດ ຖ້າ​ມີ​ຄວາມ​ຈຳ­ເປັນ​ຄວນ​ປະ­ຕິ­ບັດ ຄື: ຫຼີກ​ລ່ຽງ​ການ​ສຳ­ຜັດ ໃກ້­ຊິດ​ກັບ​ຄົນ​ທີ່​ມີ​ອາ­ການ​ຄ້າຍ­ຄື​ໄຂ້​ຫວັດ ເຊັ່ນ: ໄຂ້ ໄອ ເຈັບ­ຄໍ ແລະ ຫາຍ­ໃຈ​ຍາກ ຖ້າ​ມີ​ອາ­ການ​ທີ່​ກ່າວ​ມາ​ນັ້ນ​ຕ້ອງ​ໄປ​ພົບ​ແພດ ຫຼີກ​ລ່ຽງ​ການ​ສຳ­ຜັດ​ສັດ​ເປັນ ຫຼື ຕາຍ ປະ­ຕິ­ບັດ​ມາ­ລະ­ຍາດ​ໃນ​ການ ໄອ ຈາມ ດ້ວຍ​ການ​ອັດ​ປາກ ແລະ ດັງ ໃຊ້​ຜ້າ​ອັດ​ປາກ ລ້າງ​ມື​ດ້ວຍ​ສະ­ບູ ຫຼື ນ້ຳ​ຢາ​ຂ້າ​ເຊື້ອ ຖ້າ​ມີ​ອາ­ການ​ດັ່ງ­ກ່າວ​ຄວນ​ໄປ​ພົບ​ແພດ ແລະ ແຈ້ງ​ປະ­ຫວັດ​ການ​ເດີນ­ທາງ ຖ້າ​ໄດ້​ໄປ​ເຂດ​ທີ່​ມີ​ການ​ລະ­ບາດ​ໃນ​ໄລ­ຍະ 14 ວັນ ກ່ອນ​ມີ​ອາ­ການ.

   ສປປ ລາວ ມີ​ຄວາມ​ພ້ອມ​ໃນ​ການ​ກັນ ແລະ ຄວບ​ຄຸມ­ພະ​ຍາດ ໂດຍ​ສາ­ມາດ​ບົ່ງ­ມະ­ຕິ​ພະ­ຍາດ​ດັ່ງ­ກ່າວ ເພາະ​ມີ​ສູນ​ບົ່ງ­ມະ­ຕິ​ພະ­ຍາດ​ທີ່​ໄດ້​ຮັບ​ການ​ຮັບ­ຮອງ​ຈາກ​ສາ­ກົນ ພ້ອມ​ທັງ​ຍັງ​ມີ​ທີມ​ແພດ​ປິ່ນ­ປົວ​ສະ­ເພາະ​ທາງ ນອກ​ນີ້ ຍັງ​ແຕ່ງ­ຕັ້ງ​ທີມ​ແພດ​ເຄື່ອນ​ທີ່ ເພື່ອ​ຮອງ​ຮັບ​ໃນ​ກໍ­ລະ­ນີ​ທີ່​ພົບ​ຜູ້​ຕິດ­ເຊື້ອ​ພະ­ຍາດ​ດັ່ງ­ກ່າວ ເພື່ອ​ນຳ​ຄົນ​ເຈັບ​ເຂົ້າ​ມາ​ປິ່ນ­ປົວ​ໃນ​ຫ້ອງ​ແຍກ​ດ່ຽວ​ທີ່​ກະ­ກຽມ​ໄວ້ ເພື່ອ​ປ້ອງ​ກັນ​ບໍ່​ໃຫ້​ພະ­ຍາດ​ດັ່ງ­ກ່າວ​ແຜ່​ລາມ.

ຂ່າວທີ່ກ່ຽວຂ້ອງ