ຂ່າວຫຼ້າສຸດ

ເຈົ້າຄອງ ຕ້ອນຮັບທູດໄທປະຈຳລາວ

1.098 24 ມ.ກ. 2020 ຂ່າວໜ້າ​ໜຶ່ງ
ເຈົ້າຄອງ ຕ້ອນຮັບທູດໄທປະຈຳລາວ

   ວັນ​ທີ 22 ມັງ­ກອນ 2020 ທີ່​ຫ້ອງ​ວ່າ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ດຳ​ຣົງ ໃຄ່​ຄວນ ເອກ​ອັກ­ຄະ­ລາ­ຊະ­ທູດ ແຫ່ງ ລາ­ຊະ​ອາ­ນາ­ຈັກ​ໄທ ປະ­ຈຳ ສປປ ລາວ ເນື່ອງ​ໃນ​ໂອ­ກາດ​ທີ່​ໄດ້​ມາ​ດຳ­ລົງ​ຕຳ­ແໜ່ງ​ໃໝ່ ປະ­ຈຳ​ລາວ.

   ໂອ­ກາດ​ນີ້ ທ່ານ ສິນ​ລະ​ວົງ ຄຸດ​ໄພ­ທູນ ໄດ້​ຕີ​ລາ­ຄາ​ສູງ​ຕໍ່​ການ​ມາ​ດຳ­ລົງ​ຕຳ­ແໜ່ງ​ເປັນ​ເອກ​ອັກ­ຄະ­ລາ­ຊະ­ທູດ​ຄົນ​ໃໝ່ ປະ­ຈຳ​ລາວ ຂອງ​ທ່ານ ດຳ​ຣົງ ໃຄ່​ຄວນ ເຊິ່ງ​ເປັນ​ການ​ປະ­ກອບ­ສ່ວນ​ສຳ­ຄັນ ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ​ຄວາມ​ສາ­ມັກ­ຄີ​ລະ­ຫວ່າງ​ສອງ​ປະ­ເທດ ລາວ-ໄທ ເວົ້າ​ລວມ ເວົ້າ​ສະ­ເພາະ ກໍ​ຄື ປະ­ເທດ​ໄທ ແລະ ນະ­ຄອນ ຫຼວງ​ວຽງ​ຈັນ ທີ່​ເປັນ​ປະ­ເທດ​ບ້ານ​ໃກ້​ເຮືອນ​ຄຽງ​ກັນ​ມາ​ແຕ່​ດົນ​ນານ ໃຫ້​ມີ​ຄວາມ​ແໜ້ນ​ແຟ້ນ​ຍິ່ງໆ​ຂຶ້ນ ພ້ອມ​ນັ້ນ ຍັງ​ໄດ້​ສະ­ເໜີ​ໃຫ້​ມີ​ການ​ເພີ່ມ​ທະ­ວີ​ການ​ຮ່ວມ​ມື​ສາຍ​ພົວ­ພັນ ລະ­ຫວ່າງ ນະ­ຄອນ­ຫຼວງ​ວຽງ​ຈັນ-ໜອງ​ຄາຍ ແລະ ສະ­ເໜີ​ໃຫ້​ມີ​ການ​ຢ້ຽມ­ຢາມ​ກັນ​ເປັນ​ປົກ­ກະ­ຕິ ລະ­ຫວ່າງ​ເຈົ້າ​ຄອງ ນະ­ຄອນ­ຫຼວງ​ວຽງ​ຈັນ ແລະ ເຈົ້າ​ຄອງ​ນະ­ຄອນ​ບາງ­ກອກ ແຫ່ງ​ລາ­ຊະ​ອາ­ນາ­ຈັກ​ໄທ.

   ໂອ­ກາດ​ນີ້ ທ່ານ ດຳ​ຣົງ ໃຄ່​ຄວນ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ທ່ານ ສິນ​ລະ​ວົງ ຄຸດ​ໄພ­ທູນ ທີ່​ໄດ້​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ນັ້ນ ໃນ​ໄລ­ຍະ​ເວ­ລາ​ທີ່​ຕົນ​ມາ​ດຳ­ລົງ​ປະ­ຕິ­ບັດ​ໜ້າ­ທີ່​ເປັນ​ເອກ​ອັກ­ຄະ­ລາ­ຊະ­ທູດ ແຫ່ງ ລາ­ຊະ​ອາ­ນາ­ຈັກ​ໄທ ປະ­ຈຳ​ລາວ ກໍ​ຈະ​ຕັ້ງ­ໜ້າ​ປະ­ກອບ­ສ່ວນ​ເຂົ້າ​ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ ຄວາມ​ສາ­ມັກ­ຄີ ພ້ອມ​ນັ້ນ ຈະ​ນຳ​ນັກ​ລົງ­ທຶນ​ຈາກ​ປະ­ເທດ​ໄທ​ມາ​ລົງ­ທຶນ​ຢູ່ ນະ­ຄອນ­ຫຼວງ​ວຽງ​ຈັນ ໃຫ້​ນັບ​ມື້​ເພີ່ມ​ຂຶ້ນ​ເປັນ​ກ້າວໆ ແລະ ຈະ​ນຳ​ເອົາ​ຄຳ​ສະ­ເໜີ​ຂອງ​ທ່ານ​ເຈົ້າ​ຄອງ​ໄປ​ພິ­ຈາ­ລະ­ນາ​ໃຫ້​ເກີດ​ເປັນ​ຮູບ​ປະ​ທຳ.

ຂ່າວທີ່ກ່ຽວຂ້ອງ