ຂ່າວຫຼ້າສຸດ

ຫຼາຍສາເຫດ ທີ່ພາໃຫ້ເກັບລາຍຮັບບໍ່ໄດ້ຕາມແຜນການ

979 22 ມ.ກ. 2020 ຂ່າວໜ້າ​ໜຶ່ງ
ຫຼາຍສາເຫດ ທີ່ພາໃຫ້ເກັບລາຍຮັບບໍ່ໄດ້ຕາມແຜນການ

   ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ດຳ­ເນີນ​ມາ​ຮອດ​ວັນ​ທີ 21 ມັງ­ກອນ 2020 ຢູ່​ຫ້ອງ​ວ່າ­ການ​ປົກ­ຄອງ ນວ ເຊິ່ງ​ເປັນ​ມື້​ທີ​ສອງ​ຂອງ​ກອງ​ປະ­ຊຸມ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ ສປ ນວ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ຮອງ​ປະ­ທານ ສປ ນວ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ແລະ ສະ­ມາ­ຊິກ​ສະ­ພາ​ປະ­ຊາ­ຊົນ ນວ (ສສ ນວ) ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ສຳ­ລັບ​ມື້​ທີ 2 ນີ້ ໄດ້​ຮັບ​ຟັງ​ການ​ຊີ້​ແຈງ​ຂອງ​ພະ­ແນກ­ການ​ຕ່າງໆ ໃນ​ນີ້ ທ່ານ ຄຳ​ພັນ ມາ­ລາ​ບັນ­ດິດ ຫົວ­ໜ້າ​ພະ­ແນກ­ການ​ເງິນ ນວ ໄດ້​ຊີ້​ແຈງ​ຜົນ​ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ ປະ­ຈຳ​ປີ 2019 ແລະ ທິດ​ທາງ​ປີ 2020 ວ່າ: ການ​ເກັບ​ລາຍ​ຮັບ​ຂອງ​ຂະ­ແໜງ​ພາ­ສີ ປີ 2019 ບໍ່​ໄດ້​ຕາມ​ແຜນ­ການ ໃນ​ນີ້ ແຜນ­ການ​ແມ່ນ 4.800,75 ຕື້​ກີບ ໃນ​ນີ້ ພູດ​ສູນ​ກາງ (ພາ­ສີ) ທີ່​ຈັດ​ເກັບ​ຢູ່ ນວ 3.424,8 ຕື້​ກີບ ລາຍ​ຮັບ​ທ້ອງ­ຖິ່ນ ພູດ ນວ ຈັດ​ເກັບ 1.375,95 ຕື້​ກີບ ຜ່ານ​ການ​ປະ­ຕິ­ບັດ​ຕົວ​ຈິງ ເກັບ​ໄດ້ 4.432,24 ຕື້​ກີບ ເທົ່າ​ກັບ 92,32% ທຽບ­ໃສ່​ປີ 2018 ເພີ່ມ​ຂຶ້ນ 6,25% ເທົ່າ​ກັບ 260,87 ຕື້​ກີບ ການ​ເກັບ​ລາຍ​ຮັບ​ຂອງ​ຂະ­ແໜງ​ພາ­ສີ​ບໍ່​ສາ­ມາດ​ປະ­ຕິ­ບັດ​ໄດ້ ຍ້ອນ​ວ່າ ມີ​ການ​ຫຼຸດ­ຜ່ອນ​ອັດ­ຕາ​ພາ­ສີ​ຕາມ​ນະ­ໂຍ­ບາຍ​ການ​ສົ່ງ­ເສີມ​ການ​ລົງ­ທຶນ ເຊັ່ນ: ການ​ນຳ​ເຂົ້າ​ວັດ­ຖຸ​ອຸ­ປະ­ກອນ​ໃນ​ໂຄງ­ການ​ລົງ­ທຶນ​ໄດ້​ມີ​ການ​ຍົກ­ເວັ້ນ​ອາ­ກອນ​ມູນ​ຄ່າ​ເພີ່ມ (10%-0%) ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ ຍານ­ພາ­ຫະ­ນະ ເຄື່ອງ­ໃຊ້​ໄຟ­ຟ້າ ເຄື່ອງ​ກໍ່­ສ້າງ ແລະ ສິນ­ຄ້າ​ອື່ນໆ​ຫຼຸດ​ລົງ ຈຳ­ນວນ​ໜຶ່ງ​ໄດ້​ນຳ​ເຂົ້າ​ຢູ່​ດ່ານ​ສາ­ກົນ ແລະ ແຂວງ​ອື່ນໆ ເຊິ່ງ​ລາຍ​ຮັບ​ສ່ວນ​ໃຫຍ່​ແມ່ນ​ໄດ້​ຈາກ​ຄ່າ​ເຊົ່າ ສຳ​ປະ­ທານ ແລະ ລາຍ​ຮັບ​ບັງ­ເອີນ​ອື່ນໆ ເຊິ່ງ​ເປັນ​ຖານ​ລາຍ​ຮັບ​ບໍ່​ປົກ­ກະ­ຕິ ບາງ​ຂະ­ແໜງ ການ​ຢູ່ ນວ ກໍ​ຄື ຢູ່​ບັນ­ດາ​ເມືອງ​ມີ​ລາຍ​ຮັບ​ຄ່າ​ບໍ­ລິ­ການ​ວິ­ຊາ​ການ​ບໍ່​ທັນ​ລວມ​ສູນ ການ­ຈັດ­ຕັ້ງ​ປະ­ຕິ­ບັດ​ບໍ່​ໄດ້​ດີ​ເທົ່າ​ທີ່​ຄວນ ໂດຍ​ລວມ​ແລ້ວ ລາຍ​ຮັບ​ຫຼັກ​ຂອງ​ຂະ­ແໜງ​ພາ­ສີ ຍັງ​ອີງ­ໃສ່​ທຸ­ລະ​ກິດ​ນຳ​ເຂົ້າ-ສົ່ງ​ອອກ​ສິນ­ຄ້າ ແລະ ເຄື່ອງ​ຂອງ​ຕ່າງໆ ນອກ​ນີ້ ໄລ­ຍະ​ຜ່ານ​ມາ ພະ­ແນກ­ການ​ເງິນ ນວ ຍັງ​ໄດ້​ເອົາ­ໃຈ­ໃສ່​ຄຸ້ມ​ຄອງ​ການ​ນຳ​ເຂົ້າ-ສົ່ງ​ອອກ​ສິນ­ຄ້າ ເພື່ອ​ຊຸກ­ຍູ້​ການ​ເກັບ​ລາຍ​ຮັບ​ຢູ່​ດ່ານ​ທ້ອງ­ຖິ່ນ ແລະ ດ່ານ​ປະ­ເພ­ນີ ໄດ້​ຈັດ​ຕັ້ງ​ປະ­ຕິ­ບັດ​ຄຳ​ແນະ­ນຳ​ຂອງ​ກະ­ຊວງ​ການ​ເງິນ ໂດຍ​ສະ­ເພາະ ກົມ​ພາ­ສີ​ໄດ້​ແຕ່ງ­ຕັ້ງ​ຄະ­ນະ​ລົງ​ເຜີຍ­ແຜ່​ແນະ­ນຳ​ໃຫ້​ເມືອງ ທີ່​ມີ​ດ່ານ​ຕັ້ງ​ຢູ່ ຄື: ດ່ານ​ທ້ອງ­ຖິ່ນ​ທ່າ​ເດື່ອ ແລະ 3 ດ່ານ​ປະ­ເພ­ນີ (ໂຄກ​ແຮ່ ເມືອງ​ສັງ​ທອງ ໜອງ​ດາ ເມືອງ​ສີ​ໂຄດ​ຕະ­ບອງ ແລະ ດ່ານ​ບ້ານ​ໂດນ ເມືອງ​ປາກ​ງື່ມ) ພ້ອມ​ທັງ​ໄດ້​ລົງ​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ຄຳ​ແນະ­ນຳ​ດັ່ງ­ກ່າວ​ຢ່າງ​ເຂັ້ມ​ງວດ.

   ທ່ານ ເບີ​ລິນ ເພັດ​ຈັນ­ທະ​ຣາດ ຫົວ­ໜ້າ​ແພກ​ອຸດ­ສາ­ຫະ­ກຳ ແລະ ການ​ຄ້າ ນວ ກໍ​ໄດ້​ຊີ້​ແຈງ​ຕໍ່​ຄຳ​ຖາມ​ກ່ຽວ​ກັບ​ລາ ຄາ​ຊີ້ນ​ໝູ ທີ່​ມີ​ການ​ຂຶ້ນ​ລາ­ຄາ ສາ­ເຫດ​ຍ້ອນ​ວ່າ​ສະ­ພາບ​ໝູ​ຂາດ­ແຄນ ໃນ​ຂອດ​ນາຍ­ຮ້ອຍ ທີ່​ເກັບ​ຊື້​ໝູ​ຈາກ​ຕ່າງ​ແຂວງ ຟາມ​ຂະ­ໜາດ​ນ້ອຍ ແລະ ລ້ຽງ​ແບບ​ຄອບ­ຄົວ ໂດຍ​ສະ­ເພາະ ຟາມ​ຢູ່ ນວ ຫຼຸດ​ລົງ​ຈາກ 187 ຟາມ ຍັງ​ເຫຼືອ 137 ຟາມ ສາ­ເຫດ​ຕົ້ນ­ຕໍ​ທຶນ​ການ​ຜະ­ລິດ​ເພີ່ມ​ຂຶ້ນ ເນື່ອງ​ຈາກ​ໄລ­ຍະ​ທີ່​ພະ­ຍາດ​ໝູ​ອາ​ຟຣິ​ກາ​ລະ­ບາດ ທຸ­ລະ​ກິດ​ໝູ​ຕ້ອງ​ໄດ້​ແບກ​ຫາບ​ຕົ້ນ​ທຶນ ການ​ປ້ອງ​ກັນ​ໂລກ­ລະ­ບາດ ພະ­ຍາດ​ສັດ ແລະ ບວກ​ກັບ​ອັດ­ຕາ​ແລກ­ປ່ຽນ ຫຼື ອັດ­ຕາ​ເງິນ​ເຟີ້ ມີ​ການ​ເໜັງ​ຕີງ​ປັບ​ຂຶ້ນ ຕິດ​ພັນ​ກັບ​ຕົ້ນ​ທຶນ​ການ​ນຳ​ເຂົ້າ​ສ່ວນ​ປະ­ສົມ​ມາ​ຜະ­ລິດ​ຫົວ­ອາ­ຫານ​ສັດ ທີ່​ຕ້ອງ​ນຳ​ເຂົ້າ​ຈາກ​ຕ່າງ­ປະ­ເທດ ຄວາມ​ຕ້ອງ­ການ​ບໍ­ລິ­ໂພກ​ຊີ້ນ​ໝູ​ໃນ ນວ ມີ​ປະ­ມານ 60 ໂຕນ​ຕໍ່​ວັນ ຫຼື ປະ­ມານ 700-750 ໂຕ​ຕໍ່​ວັນ ຖ້າ​ມີ​ເທ​ສະ­ການ​ບຸນ​ປະ­ເພ­ນີ​ຕ່າງໆ ການ​ບໍ­ລິ­ໂພກ​ຊີ້ນ​ໝູ ຈະ​ເພີ່ມ​ຂຶ້ນ 68 ໂຕນ​ຕໍ່​ວັນ ຫຼື 800-900 ໂຕ​ຕໍ່​ວັນ ສ່ວນ​ການ​ສະ­ໜອງ​ໝູ​ຂອງ​ບັນ­ດາ​ຟາມ ຍັງ​ສາ­ມາດ​ສະ­ໜອງ​ໄດ້​ປົກ­ກະ­ຕິ 400-450 ໂຕ​ຕໍ່​ວັນ ເຫຼືອ​ນັ້ນ​ແມ່ນ​ຟາມ​ນ້ອຍ ຫຼື ລ້ຽງ​ໃນ​ຄົວ​ເຮືອນ.

   ພາຍ­ຫຼັງ​ໄດ້​ຮັບ​ຟັງ​ການ​ຊີ້​ແຈງ​ຈາກ​ພະ­ແນກ­ການ​ຕ່າງໆ ສສ ນວ ກໍ​ໄດ້​ລົງ​ຄະ­ແນນ​ສຽງ​ຮັບ­ຮອງ​ເອົາ​ຮ່າງ​ມະ­ຕິ ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ​ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ປະ­ຈຳ​ປີ 2019 ແລະ ທິດ​ທາງ​ປະ­ຈຳ​ປີ 2020 ຂອງ ນວ ຮັບ­ຮອງ​ເອົາ​ຮ່າງ​ມະ­ຕິ ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ​ຂອງ​ອົງ­ການ​ປົກ­ຄອງ ນວ ກ່ຽວ​ກັບ​ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ ແຜນ​ງົບ­ປະ­ມານ​ແຫ່ງ​ລັດ ປະ­ຈຳ​ປີ 2019 ແລະ ທິດ​ທາງ​ປີ 2020 ຮັບ­ຮອງ​ເອົາ​ຮ່າງ​ມະ­ຕິ​ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ​ຜົນ​ການ­ເຄື່ອນ­ໄຫວ​ວຽກ​ງານ ປີ 2019 ແລະ ທິດ​ທາງ​ປີ 2020 ຂອງ​ອົງ­ການ​ກວດ​ສອບ​ປະ­ຈຳ​ພາກ​ກາງ ແລະ ບົດ​ລາຍ​ງານ​ຜົນ​ການ​ກວດ​ສອບ​ບົດ​ສະ­ຫຼຸບ​ຂາດ​ຕົວ ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ປີ 2018 ຂອງ ນວ ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ