ຂ່າວຫຼ້າສຸດ

ອາເມຣິກາ ສືບຕໍ່ສະໜັບສະໜູນວຽກງານແກ້ໄຂລະເບີດບໍ່ທັນແຕກ 44 ຕື້ກວ່າກີບ

922 22 ມ.ກ. 2020 ຂ່າວໜ້າ​ໜຶ່ງ
ອາເມຣິກາ ສືບຕໍ່ສະໜັບສະໜູນວຽກງານແກ້ໄຂລະເບີດບໍ່ທັນແຕກ 44 ຕື້ກວ່າກີບ

   ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ “ໂຄງ­ການ​ສະ­ໜັບ­ສະ­ໜູນ​ວຽກ​ງານ​ແກ້​ໄຂ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ ຢູ່ ສປປ ລາວ’’ ຈັດ​ຂຶ້ນ​ວັນ​ທີ 21 ມັງ­ກອນ 2020 ຢູ່​ໂຮງ­ແຮມ​ລາວ​ພລາ​ຊາ ລະ­ຫວ່າງ​ທ່ານ ໂຈມ​ແຍງ ແພງ​ທອງ​ສະ​ຫວັດ ຫົວ­ໜ້າ​ຫ້ອງ­ການ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ (ຫຄຊກລ) ແລະ ທ່ານ ໄມ​ເຄິນ ເຣນ ຜູ້​ຈັດ­ການ​ບໍ­ລິ­ສັດ​ເທ​ທຼາ​ເທັກ ໂດຍ​ມີ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ທ່ານ​ນາງ ລີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ ສ ອາ​ເມ​ຣິ​ກາ ປະ­ຈຳ ສປປ ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ໂຈມ​ແຍງ ແພງ​ທອງ​ສະ​ຫວັດ ກ່າວ​ວ່າ: ໂຄງ­ການ​ສະ­ໜັບ­ສະ­ໜູນ​ວຽກ​ງານ​ແກ້​ໄຂ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ​ລັດ­ຖະ­ບານ​ອາ​ເມ​ຣິ​ກາ ມູນ​ຄ່າ 4.960.790 ໂດ​ລາ​ສະ­ຫະ­ລັດ ຫຼື ປະ­ມານ 44 ຕື້​ກີບ ໂດຍ​ມອບ​ໃຫ້​ບໍ­ລິ­ສັດ ເທ​ທຼາ​ເທັກ ເຮັດ​ໜ້າ­ທີ່​ການ​ຕິດ­ຕາມ​ກວດ­ກາ ແລະ ມອບ​ໃຫ້​ຫ້ອງ­ການ ຫຄຊກລ ແລະ ໂຄງ­ການ​ເກັບ​ກູ້​ລະ­ເບີດ​ແຫ່ງ​ຊາດ​ເປັນ​ຜູ້​ຈັດ​ຕັ້ງ​ປະ­ຕິ­ບັດ ໄລ­ຍະ​ເວ­ລາ 3 ປີ ເລີ່ມ​ແຕ່​ທ້າຍ​ປີ 2019-2021 ຈັດ​ຕັ້ງ​ປະ­ຕິ­ບັດ​ການ​ສຳ​ຫຼວດ ແລະ ກວດ​ກູ້​ລະ­ເບີດ​ບໍ່​ທັນ​ແຕກ​ຢູ່ 6 ແຂວງ ຄື: ຫົວ­ພັນ ຄຳ​ມ່ວນ ສະ­ຫວັນ​ນະ​ເຂດ ສາ­ລະ​ວັນ ຈຳ­ປາ​ສັກ ອັດ​ຕະ​ປຶ ເຊິ່ງ​ເງິນ​ໃນ​ຮ່ວງ​ດັ່ງ­ກ່າວ ເປັນ​ການ​ຊ່ວຍ­ເຫຼືອ​ຮ່ວງ​ສຸດ​ທ້າຍ ທີ່​ນອນ​ຢູ່​ໃນ 90 ລ້ານ​ໂດ​ລາ​ສະ­ຫະ­ລັດ ທີ່​ລັດ­ຖະ­ບານ​ອາ​ເມ​ຣິ​ກາ ປະ­ກາດ​ຊ່ວຍ­ເຫຼືອ​ໃນ​ໄລ­ຍະ​ຜ່ານ​ມາ ອີງ​ຕາມ​ການ​ປຶກ­ສາ​ຫາ­ລື​ເບື້ອງ​ຕົ້ນ ລັດ­ຖະ­ບານ​ສະ­ຫະ­ລັດ​ອາ​ເມ​ຣິ​ກາ ໄດ້​ສະ­ເໜີ​ຊ່ວຍ­ເຫຼືອ​ທຶນ​ໃນ​ປີ 2020 ສະ­ໜັບ­ສະ­ໜູນ​ວຽກ​ງານ​ແກ້​ໄຂ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສປປ ລາວ 20 ລ້ານ​ໂດ​ລາ​ສະ­ຫະ­ລັດ.

   ໄລ­ຍະ​ຜ່ານ​ມາ ລັດ­ຖະ­ບານ​ລາວ ໂດຍ​ສະ­ເພາະ ຄຊກລ ໄດ້​ເອົາ­ໃຈ­ໃສ່​ປະ­ສານ​ສົມ­ທົບ ແລະ ຊຸກ­ຍູ້​ການ­ຈັດ­ຕັ້ງ ປະ­ຕິ­ບັດ​ການ​ເກັບ​ກູ້​ລະ­ເບີດ​ບໍ່​ທັນ​ແຕກ ເພື່ອ​ເຮັດ​ໃຫ້​ປະ­ຊາ­ຊົນ​ສາ­ມາດ​ທຳ​ມາ​ຫາ​ກິນ ແລະ ດຳ­ລົງ​ຊີ­ວິດ​ຢ່າງ​ປອດ​ໄພ ຜ່ານ​ການ​ປະ­ຕິ­ບັດ​ໃນ​ປີ 2019 ສາ­ມາດ​ຈັດ​ຕັ້ງ​ປະ­ຕິ­ບັດ​ການ​ໂຄ­ສະ­ນາ​ສຶກ​ສາ​ຄວາມ​ສ່ຽງ ໄດ້ 572 ບ້ານ ສຳ​ຫຼວດ​ບໍ່ ແມ່ນ​ວິ­ຊາ​ການ 608 ບ້ານ ສຳ​ຫຼວດ​ວິ­ຊາ​ການ 27.000 ເຮັກ­ຕາ ທີ່​ຢັ້ງ­ຢືນ​ວ່າ​ເປັນ​ພື້ນ­ຖານ​ທີ່​ມີ​ຄວາມ​ສ່ຽງ​ຈາກ ລະ­ເບີດ​ບໍ່​ທັນ​ແຕກ ກວດ​ກູ້​ເນື້ອ­ທີ່​ໄດ້ 5.600 ເຮັກ­ຕາ ເກີດ​ອຸ­ບັດ­ເຫດ 24 ຄັ້ງ ເຖິງ​ວ່າ​ມີ​ຄວາມ​ພະ­ຍາ­ຍາມ ກໍ​ບໍ່​ສາມາດ​ບັນ­ລຸ​ໄດ້​ຕາມ​ແຜນ­ການ ແລະ ຄວາມ​ຕ້ອງ­ການ​ຂອງ​ການ​ນຳ​ໃຊ້​ພື້ນ​ທີ່​ປອດ​ໄພ​ຈາກ​ລະ­ເບີດ​ບໍ່​ທັນ​ແຕກ ສຳ­ລັບ​ປີ 2020 ມະ­ຕິ​ຂອງ​ສະ­ພາ​ແຫ່ງ​ຊາດ ໄດ້​ມອບ​ໃຫ້​ຂະ­ແໜງ­ການ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ ສູ້​ຊົນ​ກວດ​ກູ້​ລະ­ເບີດ​ໃຫ້​ໄດ້ 10.000 ເຮັກ­ຕາ

ຂ່າວທີ່ກ່ຽວຂ້ອງ