ຂ່າວຫຼ້າສຸດ

ແລກປ່ຽນບົດຮຽນກ່ຽວກັບກະສິກຳສີຂຽວ-ຍືນຍົງ

1.231 22 ມ.ກ. 2020 ຂ່າວໜ້າ​ໜຶ່ງ

   ກອງ​ປະ­ຊຸມ​ພາກ​ພື້ນ ກ່ຽວ​ກັບ​ກະ­ສິ­ກຳ​ສີ­ຂຽວ ແລະ ຍືນ​ຍົງ ການ​ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ໃນ​ການ​ສ້າງ​ນະ­ໂຍ­ບາຍ​ກະ­ສິ­ກຳ​ຍືນ​ຍົງ ທີ່​ມີ​ປະ​ສິດ­ທິ​ຜົນ ແລະ ເໝາະ​ສົມ​ໃນ​ພາກ​ພື້ນ​ແມ່­ນ້ຳ​ຂອງ ຈັດ​ຂຶ້ນ​ວັນ​ທີ 21-22 ມັງ­ກອນ 2020 ຢູ່​ໂຮງ­ແຮມ​ຄຣາວ​ພາ​ຊາ ໂດຍ​ເປັນ​ປະ­ທານ​ຂອງ​ທ່ານ ລຽນ ທິ​ແກ້ວ ລັດ­ຖະ­ມົນ­ຕີ ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ Nasar Hayat ຜູ້­ຕາງ­ໜ້າ​ອົງ­ການ​ອາ­ຫານ ແລະ ການ​ກະ­ເສດ ປະ­ຈຳ​ລາວ ແລະ ທ່ານ Niall O’ Connor ຫົວ­ໜ້າ​ສະ​ຖາ​ບັນ​ສິ່ງ­ແວ­ດລ້ອມ​ສະ​ຕ໋ອກ​ໂຮມ ປະ­ຈຳ​ອາ­ຊີ ມີ​ຜູ້­ຕາງ­ໜ້າ​ຈາກ​ພາກ​ລັດ ອົງ­ການ​ທີ່​ບໍ່​ຂຶ້ນ​ກັບ​ລັດ­ຖະ­ບານ ພາກ​ເອ­ກະ​ຊົນ ແລະ ຄູ່​ຮ່ວມ​ງານ ທັງ​ພາຍ​ໃນ ແລະ ປະ­ເທດ​ໃນ​ພາກ​ພື້ນ​ແມ່­ນ້ຳ​ຂອງ ເຂົ້າ​ຮ່ວມ.

   ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ຟັງ​ການ​ສະ­ເໜີ​ຍຸດ​ທະ​ສາດ​ການ​ເຕີບ​ຂອງ​ສີ­ຂຽວ​ແຫ່ງ​ຊາດ ຂອງ ສປປ ລາວ ຮ່າງ​ຂອບ​ຍຸດ​ທະ​ສາດ​ສີ­ຂຽວ ແລະ ຍືນ​ຍົງ ພ້ອມ​ທັງ​ສົນ­ທະ­ນາ ແລກ­ປ່ຽນ​ປະ­ສົບ​ການ ແລະ ບົດ­ຮຽນ​ຕ່າງໆ​ຈາກ​ພາຍ​ໃນ ແລະ ພາກ​ພື້ນ ນອກ​ນີ້​ຜູ້​ເຂົ້າ​ຮ່ວມ​ປະ­ຊຸມ​ຍັງ​ໄດ້​ລົງ​ຢ້ຽມ­ຢາມ ບ້ານ​ທ່າ​ຊ້າງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເພື່ອ​ຮຽນ​ຮູ້​ກ່ຽວ​ກັບ​ເຕັກ­ນິກ​ການ​ຜະ­ລິດ​ກະ­ສິ­ກຳ​ອິນ​ຊີ ແລະ ການ​ຕະ­ຫຼາດ.

   ທ່ານ ລຽນ ທິ​ແກ້ວ ກ່າວ​ວ່າ: ການ​ເຕີບ​ໂຕ​ສີ­ຂຽວ ເປັນ​ໂອ­ກາດ​ໃນ​ການ​ປະ­ກອບ­ສ່ວນ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ ຄົມ ແລະ ສິ່ງ­ແວ­ດລ້ອມ ໃຫ້​ມີ​ຄວາມ​ໝັ້ນ­ຄົງ ຂະ­ແໜງ­ການ​ກະ­ສິ­ກຳ ແມ່ນ 1 ໃນ 7 ບຸ­ລິ­ມະ­ສິດ ທີ່​ມີ​ບົດ­ບາດ​ສຳ­ຄັນ​ໃນ​ຂະ​ບວນ​ການ­ຈັດ­ຕັ້ງ ເພື່ອ​ໃຫ້​ມີ​ຄວາມ​ຍືນ​ຍົງ ພ້ອມ​ທັງ​ເປັນ​ການ​ເປີດ​ຕະ­ຫຼາດ​ການ​ແລກ­ປ່ຽນ​ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ​ຕ່າງໆ ເພື່ອ​ສະ­ໜັບ­ສະ­ໜູນ​ການ​ເຕີບ​ໂຕ​ສີ­ຂຽວ.

   ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ ເປັນ​ສິ່ງ​ທ້າ​ທາຍ ແຕ່​ເປັນ​ໂອ­ກາດ​ສຳ­ລັບ​ຂະ­ແໜງ​ກະ­ສິ­ກຳ​ໃນ​ການ​ຫຼຸດ­ຜ່ອນ​ການ​ປ່ອຍ​ອາຍ​ພິດ​ເຮືອນ​ແກ້ວ ສານ​ຄາ​ບອນ ແລະ ຄວາມ​ຈຳ­ເປັນ​ໃນ​ການ​ປັບ​ຕົວ​ຂອງ​ຊາວ​ກະ­ສິ­ກອນ ຕາມ​ທີ່​ກຳ­ນົດ​ໄວ້​ໃນ​ຍຸດ​ທະ​ສາດ​ການ​ເຕີບ​ໂຕ​ສີ­ຂຽວ​ແຫ່ງ​ຊາດ ຂອບ​ຍຸດ​ທະ​ສາດ​ກະ­ສິ­ກຳ​ສີ­ຂຽວ ແລະ ຍືນ​ຍົງ ກຳ­ລັງ​ສ້າງ​ຂຶ້ນ ໂດຍ​ໃຫ້​ສອດ­ຄ່ອງ​ກັບ​ນະ­ໂຍ­ບາຍ ແລະ ຍຸດ​ທະ​ສາດ​ທີ່​ມີ​ໃນ​ປັດ­ຈຸ­ບັນ ໃນ​ລະ­ດັບ​ຊາດ ພາກ​ພື້ນ ແລະ ສາ­ກົນ ລວມ​ທັງ​ຂະ​ບວນ​ການ​ກະ­ກຽມ​ສ້າງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ 9 ແລະ ຍຸດ​ທະ​ສາດ​ການ​ພັດ­ທະ­ນາ​ກະ­ສິ­ກຳ ປີ 2021-2025 ສະ­ບັບ​ປັບ­ປຸງ.

   ການ​ຮ່ວມ​ມື​ທີ່​ແໜ້ນ​ແຟ້ນ ແລະ ການ​ປຶກ­ສາ​ຫາ­ລື​ຢ່າງ​ຕໍ່​ເນື່ອງ​ກ່ຽວ​ກັບ​ການ​ພັດ­ທະ­ນາ​ສີ­ຂຽວ ແລະ ຍືນ​ຍົງ ເປັນ​ສິ່ງ​ສຳ­ຄັນ​ໃນ​ການ​ປັບ­ປຸງ​ການ​ຮ່ວມ​ມື​ຈາກ​ພາກ­ສ່ວນ​ຕ່າງໆ ໂດຍ​ສະ­ເພາະ ເອ­ກະ​ຊົນ ແລະ ຊາວ​ກະ­ສິ­ກອນ ທີ່​ເປັນ​ພາກ­ສ່ວນ​ສຳ­ຄັນ​ໃນ​ຂອດ​ຈັດ​ຕັ້ງ​ປະ­ຕິ­ບັດ​ຕົວ​ຈິງ ນອກ​ນີ້ ຍັງ​ຕ້ອງ­ການ ການ​ຮ່ວມ​ມື ລະ­ຫວ່າງ​ກົມ​ວິ­ຊາ​ການ​ຕ່າງໆ​ຂອງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ກະ­ຊວງ​ຕ່າງໆ​ຂອງ​ລັດ­ຖະ­ບານ​ລາວ ແລະ ຄູ່​ຮ່ວມ​ພັດ­ທະ­ນາ ໂດຍ​ສະ­ເພາະ ອົງ­ການ​ອາ­ຫານ ແລະ ການ​ກະ­ເສດ ແລະ ສະ​ຖາ​ບັນ​ສິ່ງ­ແວ­ດລ້ອມ​ສະ​ຕ໋ອກ​ໂຮມ ຈະ​ເຮັດ​ວຽກ​ຮ່ວມ​ກັນ ເພື່ອ​ສະ­ໜັບ­ສະ­ໜູນ​ກະ­ສິ­ກຳ​ສີ­ຂຽວ ແລະ ຍືນ​ຍົງ ເຊິ່ງ​ຈະ​ຊ່ວຍ​ໃນ​ການ​ຜະ­ລິດ ຜະ­ລິດ​ຕະ​ພັນ​ກະ­ສິ­ກຳ ແລະ ອາ­ຫານ ທີ່​ປອດ​ໄພ ແລະ ມີ​ຄຸນ­ຄ່າ​ດ້ານ​ໂພ­ຊະ​ນາ​ການ ພ້ອມ​ທັງ​ສະ­ໜັບ­ສະ­ໜູນ​ການ​ຮັກ­ສາ​ຄວາມ​ຫຼວງ­ຫຼາຍ​ຂອງ​ຊີ­ວະ​ນາໆພັນ.

ຂ່າວທີ່ກ່ຽວຂ້ອງ