ຂ່າວຫຼ້າສຸດ

ຈະສົ່ງໜໍ່ໄມ້ຝຣັ່ງ ໄປ ສ ເກົາຫຼີ

627 22 ມ.ກ. 2020 ຂ່າວໜ້າ​ໜຶ່ງ
ຈະສົ່ງໜໍ່ໄມ້ຝຣັ່ງ ໄປ ສ ເກົາຫຼີ

   ພິ­ທີ​ລົງ​ນາມ​ສັນ­ຍາ​ຮ່ວມ​ມື​ສົ່ງ​ໜໍ່­ໄມ້​ຝຣັ່ງ ໄປ ສ ເກົາ­ຫຼີ ຈັດ​ຂຶ້ນ​ວັນ​ທີ 17 ມັງ­ກອນ 2020 ຢູ່​ສວນ ໜໍ່­ໄມ້​ຝຣັ່ງ (ບ້ານ​ນາ​ງ່າ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ) ລະ­ຫວ່າງ​ທ່ານ ຢູນ ປະ­ທານ​ບໍ­ລິ­ສັດ FARM AND FARM SOLE CO.,LTD ແລະ ທ່ານ ພັກ ຊິງ ກິວ ອຳ­ນວຍ​ການ​ບໍ­ລິ­ສັດ JSB INTERNATIONAL CO.,LTD ໂດຍ​ມີ​ທ່ານ ສົມ​ຈິດ ອິນ​ທະ​ມິດ ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ການ​ຮ່ວມ​ມື​ສົ່ງ​ໜໍ່­ໄມ້​ຝຣັ່ງ​ຄັ້ງ​ນີ້ ມີ​ໄລ­ຍະ​ສັນ­ຍາ 1 ປີ ແລະ ສາ­ມາດ​ຕໍ່​ສັນ­ຍາ​ໄດ້​ປີ​ຕໍ່​ປີ ໂດຍ​ອີງ​ຕາມ​ທ່າ­ແຮງ​ປັດ­ຈຸ­ບັນ ສວນ​ດັ່ງ­ກ່າວ​ປູກ​ໜໍ່­ໄມ້​ຝຣັ່ງ​ໃນ​ເນື້ອ­ທີ່ 5 ເຮັກ­ຕາ ທີ່​ກຽມ­ພ້ອມ​ສົ່ງ​ອອກ 300 ກິ​ໂລ​ຕໍ່​ອາ­ທິດ ຫຼື ປະ­ມານ 1 ໂຕນ​ຕໍ່​ເດືອນ ໃນ​ລາ­ຄາ 5 ໂດ​ລາ​ສະ­ຫະ­ລັດ ຫຼື ປະ­ມານ 44.000 ກີບ​ຕໍ່​ກິ​ໂລ.

   ທ່ານ ຢູນ ໃຫ້​ສຳ­ພາດ​ວ່າ: ປັດ­ຈຸ­ບັນ ຢູ່ ສ ເກົາ­ຫຼີ ມີ​ຄວມ​ຕ້ອງ­ການ​ໜໍ່­ໄມ້​ຝຣັ່ງ​ເປັນ​ຈຳ­ນວນ​ຫຼາຍ ເພື່ອ​ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ​ລາວ ຕົນ​ຈຶ່ງ​ໄດ້​ຂໍ​ການ​ສະ­ໜັບ­ສະ­ໜູນ​ຈາກ​ອົງ­ການ​ກອຍ​ກາ ເພື່ອ​ລົງ­ທຶນ​ປູກ​ໜໍ່­ໄມ້​ຝຣັ່ງ ຢູ່​ບ້ານ​ນາ​ງ່າ ໂດຍ​ໄດ້​ເຊົ່າ​ທີ່​ດິນ​ປະ­ຊາ­ຊົນ 5 ເຮັກ­ຕາ ແລະ ໄດ້​ລົງ­ມື​ປູກ​ແຕ່​ເດືອນ​ພະ­ຈິກ 2018 ເປັນ­ຕົ້ນ​ມາ ປັດ­ຈຸ­ບັນ ໜໍ່­ໄມ້​ຢູ່​ສວນ​ດັ່ງ­ກ່າວ​ມີ​ຄວາມ​ພ້ອມ​ທີ່​ຈະ​ສົ່ງ​ອອກ​ໄປ ສ ເກົາ­ຫຼີ ນອກ​ນີ້ ຍັງ​ໄດ້​ປູກ​ໜໍ່­ໄມ້​ຝຣັ່ງ ຢູ່​ບ້ານ​ປາກ​ຊາບ ເມືອງ​ໄຊ​ທາ­ນີ ເນື້ອ­ທີ່ 3 ເຮັກ­ຕາ ຕື່ມ​ອີກ.

   ໂອ­ກາດ​ນີ້ ບໍ­ລິ­ສັດ BARM FACTORLY INC ຍັງ​ມອບ​ງົວ 10 ໂຕ ມູນ​ຄ່າ 4.000 ໂດ​ລາ​ສະ­ຫະ­ລັດ ຫຼື ປະ­ມານ 35,53 ລ້ານ​ກີບ ໃຫ້​ບໍ­ລິ­ສັດ FARM AND FARM SOLE CO.,LTD ເພື່ອ​ມອບ​ຕໍ່­ໃຫ້ 6 ຄອບ­ຄົວ ທີ່​ເຮັດ​ວຽກ​ຢູ່​ສວນ​ໜໍ່­ໄມ້​ຝຣັ່ງ ບ້ານ​ນາ​ງ່າ ລ້ຽງ​ຕື່ມ​ອີກ.

ຂ່າວທີ່ກ່ຽວຂ້ອງ