ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 22-01-2020

2.108 22 ມ.ກ. 2020 ຫົວຂໍ້ຂ່າວອື່ນໆ

   ໃນ​ຄໍ​ລຳ​ນີ້ ທ່ານ​ຜູ້​ອ່ານ​ຈະ​ໄດ້​ຮູ້​ກັບ​ລະ­ບົບ​ສະ​ແກນ​ໃບ​ໜ້າ​ລົງ​ໜ້າ​ໂທລະ­ສັບ​ຈໍ​ມື​ຖື​ຢູ່​ຈີນ ເພື່ອ​ຢັ້ງ­ຢືນ​ຕົນ​ໂຕ​ຂອງ​ຜູ້​ຊົມ­ໃຊ້ ເລື່ອງ​ຫວຽດ­ນາມ​ກັບ​ແຜນ­ການ​ເຈາະ​ຕະ­ຫຼາດ​ສະ­ຫະ­ພາບ​ເອີ​ຣົບ.

   ທີ່ ສປ ຈີນ: ຂ່າວ​ຕ່າງ­ປະ­ເທດ​ໃນ​ອາ­ທິດ​ທີ 2 ຂອງ​ເດືອນ​ທັນ­ວາ ປີ­ຜ່ານ­ມາ ໃຫ້​ຮູ້​ວ່າ: ທາງ​ການ​ຈີນ ໄດ້​ປະ­ກາດ​ໃຊ້​ກົດ­ໝາຍ​ສື່­ສານ​ສະ­ບັບ​ໃໝ່​ອ່ຽມ ທີ່​ກຳ­ນົດ​ໃຫ້​ຜູ້​ໃຊ້​ບໍ­ລິ­ການ​ເຄືອ​ຄ່າຍ​ສື່ ສານ​ຕ້ອງ​ໄດ້​ສະ​ແກນ​ໃບ​ໜ້າ​ຂອງ​ຕົນ ເພື່ອ​ຢັ້ງ ຢືນ​ຕົວ​ຕົນ​ທີ່­ແທ້​ຈິງ​ຂອງ​ເລກ​ໝາຍ​ໂທລະ­ສັບ.

   ນັບ​ແຕ່​ນີ້​ເປັນ­ຕົ້ນ​ໄປ ຜູ້​ສະ­ໝັກ​ໃຊ້​ບໍ­ລິ­ການ​ເຄືອ​ຄ່າຍ​ການ​ສື່­ສານ​ໃໝ່ ຫຼື ຊື້​ໂທລະ­ສັບ​ໜ່ວຍ​ໃໝ່​ຕ້ອງ​ຈົດ​ທະ­ບຽນ​ດ້ວຍ​ບັດ​ປະ­ຊາ­ຊົນ ຫຼື ສະ​ແກນ​ໃບ​ໜ້າ​ຂອງ​ຕົນ​ກ່ອນ​ຈະ​ມີ​ສິດ​ໃຊ້​ບໍ­ລິ­ການ ເປົ້າ​ໝາຍ​ຂອງ​ກົດ­ໝາຍ​ສະ­ບັບ​ນີ້​ແມ່ນ​ເພື່ອ​ຈຳ­ກັດ​ເລກ​ໝາຍ​ໂທລະ­ສັບ ແລະ ບັນ­ຊີ​ການ​ນຳ​ໃຊ້​ໂທລະ­ສັບ​ທີ່​ບໍ່​ສາ­ມາດ​ລະ­ບຸ​ຕົວ​ຕົນ​ຜູ້​ເປັນ​ເຈົ້າ​ຂອງ​ໄດ້ ເຊິ່ງ​ຈະ​ຊ່ວຍ​ໃຫ້​ທາງ​ການ​ສາ­ມາດ​ຕິດ­ຕາມ​ການ­ເຄື່ອນ­ໄຫວ​ຂອງ​ປະ­ຊາ­ຊົນ​ພາຍ​ໃນ​ປະ­ເທດ​ໄດ້​ດີ​ຂຶ້ນ ແລະ ສາ­ມາດ​ຫຼຸດ­ຜ່ອນ​ບັນ­ຫາ​ການ​ໃຊ້​ເຄືອ​ຄ່າຍ​ສື່­ສານ​ອອນ​ລາຍ ເພື່ອ​ເປົ້າ​ໝາຍ​ຫຼອກ​ລວງ ຕົ້ມ​ຕຸ໋ນ ຂອງ​ກຸ່ມ​ຄົນ​ບໍ່​ດີ​ລົງ.

   ອີກ​ຂ່າວ​ໜຶ່ງ​ທີ່​ໜ້າ​ສົນ­ໃຈ​ກ່ຽວ​ກັບ ສປ ຈີນ ກໍ​ຄື ການ​ສ້າງ​ກົດ­ໝາຍ​ຄຸ້ມ​ຄອງ​ລົດ­ໄຟ​ໃຕ້​ດິນ ສະ­ບັບ​ໃໝ່ ເຊິ່ງ​ຈະ​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ເມ­ສາ ປີ 2020 ນີ້​ເປັນ­ຕົ້ນ​ໄປ ໃນ​ໄລ­ຍະ​ຜ່ານ​ມາ ການ​ຄຸ້ມ​ຄອງ​ລະ­ບົບ​ລົດ­ໄຟ​ໃຕ້​ດິນ​ຢູ່ ສປ ຈີນ ນັ້ນ ແມ່ນ​ອີງ­ໃສ່​ຂໍ້​ກຳ­ນົດ​ກົດ​ລະ­ບຽບ​ສະ­ເພາະ​ຂອງ​ບັນ­ດາ​ແຂວງ​ທີ່​ມີ​ລະ­ບົບ​ລົດ­ໄຟ​ໃຕ້​ດິນ ໃນ​ປັດ­ຈຸ­ບັນ 33 ຕົວ​ເມືອງ​ຂອງ​ຈີນ ໄດ້​ມີ​ການ​ບໍ​ລິ ການ​ໂດຍ­ສານ​ທາງ​ລົດ­ໄຟ​ໃຕ້​ດິນ​ແລ້ວ ໂດຍ​ມີ​ຈຳ­ນວນ​ຜູ້​ໃຊ້​ບໍ­ລິ­ການ​ຫຼາຍ​ເປັນ​ລະ­ດັບ​ທີ 2 ຂອງ​ໂລກ ຖັດ​ຈາກ​ຍີ່­ປຸ່ນ

   ກົດ­ໝາຍ​ສະ­ບັບ​ໃໝ່​ນີ້ ໄດ້​ກຳ­ນົດ​ແນວ­ທາງ​ປະ­ຕິ­ບັດ​ໃນ​ການ​ໃຊ້​ບໍ­ລິ­ການ​ລົດ­ໄຟ​ໃຕ້​ດິນ​ທົ່ວ​ປະ­ເທດ ດ້ວຍ​ລະ­ບຽບ​ການ​ທີ່​ເຄັ່ງ​ຄັດ​ຮັດ­ກຸມ ເຊັ່ນ: ຫ້າມ​ຜູ້­ໂດຍ­ສານ​ນຳ​ເຄື່ອງ​ດື່ມ ແລະ ອາ­ຫານ​ເຂົ້າ​ບໍ­ລິ­ໂພກ​ພາຍ​ໃນ​ລົດ­ໄຟ ຫ້າມ​ຢືນ ຫຼື ນອນ​ຢຽດ​ຢູ່​ຕັ່ງ​ນັ່ງ ຫ້າມ​ເປີດ​ເພງ-ວິ​ດີ​ໂອ ທີ່​ປ່ອຍ​ສຽງ​ລົບ​ກວນ​ຜູ້­ໂດຍ­ສານ​ຄົນ​ອື່ນໆ ກົດ­ໝາຍ​ໄດ້​ກຳ­ນົດ​ຂໍ້​ຍົກ­ເວັ້ນ​ຈຳ­ນວນ​ໜຶ່ງ​ໃຫ້​ຜູ້​ມີ​ບັນ­ຫາ​ທາງ​ສຸ­ຂະ­ພາບ ເດັກ­ນ້ອຍ-ເດັກ​ແດງ ສາ­ມາດ​ນຳ​ເອົາ​ອາ­ຫານ-ເຄື່ອງ​ດື່ມ​ເຂົ້າ​ມາ​ບໍ­ລິ­ໂພກ​ພາຍ​ໃນ​ລົດ​ໄດ້.

   ທີ່ ຫວຽດ­ນາມ: ມີ​ຂ່າວ​ທີ່​ໜ້າ​ສົນ­ໃຈ​ກ່ຽວ​ກັບ​ແຜນ­ການ​ຂອງ​ຫວຽດ­ນາມ ເພື່ອ​ເຈາະ​ຕະ­ຫຼາດ​ສິນ­ຄ້າ​ຢູ່​ສະ­ຫະ­ພາບ​ເອີ​ຣົບ​ໃຫ້​ໄດ້ ດ້ວຍ​ການ​ປັບ­ປຸງ​ຮູບ​ແບບ​ການ​ຜະ­ລິດ​ສິນ­ຄ້າ ແລະ ການ​ໃຫ້​ຄວາມ​ສຳ­ຄັນ​ກ່ຽວ​ກັບ​ລິ​ຂະ​ສິດ-ຊັບ​ສິນ​ທາງ​ປັນ­ຍາ.

   ຂ່າວ​ບອກ​ວ່າ: ໃນ​ທ້າຍ​ເດືອນ​ກໍ­ລະ­ກົດ​ປີ 2019 ຢູ່​ນະ­ຄອນ​ໂຮ​ຈິ​ມິງ ໄດ້​ຈັດ​ໃຫ້​ມີ​ກອງ​ປະ­ຊຸມ​ກ່ຽວ​ກັບ​ທິດ​ທາງ​ສົ່ງ​ອອກ​ສິນ­ຄ້າ​ຫວຽດ­ນາມ​ໄປ​ສະ­ຫະ­ພາບ​ເອີ​ຣົບ ໃນ​ກອງ​ປະ­ຊຸມ ທ່ານ ຫງວ​ຽນ ຮວຍ ນາມ ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ຫວຽດ­ນາມ ທີ່​ປະ­ເທດ​ຝຣັ່ງ ບອກ​ວ່າ: ຫວຽດ­ນາມ​ຕ້ອງ​ຍາດ​ໃຫ້​ໄດ້­ຜົນ​ປະ­ໂຫຍດ​ສູງ​ສຸດ ຈາກ​ຂໍ້​ຕົກ­ລົງ​ວ່າ​ດ້ວຍ​ການ​ຄ້າ​ເສລີ​ລະ­ຫວ່າງ​ຫວຽດ­ນາມ​ກັບ​ເອີ​ຣົບ ດ້ວຍ​ການ​ເອົາ­ໃຈ­ໃສ່​ສິດ­ທິ​ຊັບ​ສິນ​ທາງ​ປັນ­ຍາ ໄປ​ຄຽງ​ຄູ່​ການ​ປະ­ຕິ­ບັດ​ຫຼັກ ການ​ລວມ​ຂອງ​ບັນ­ດາ​ປະ­ເທດ​ນຳ​ເຂົ້າ ລະ­ບຽບ​ການ​ກ່ຽວ​ກັບ​ຕົ້ນ​ກຳ­ເນີດ​ຂອງ​ສິນ­ຄ້າ ກໍ​ຄື ການ​ປົກ​ປ້ອງ​ແຮງ​ງານ ສ່ວນ​ທີ່​ພົວ­ພັນ​ກັບ​ສິດ­ທິ​ທາງ​ຊັບ​ສິນ​ທາງ​ປັນ­ຍາ​ນັ້ນ ຫວຽດ­ນາມ​ຕ້ອງ​ຮັບ­ປະ­ກັນ​ເລື່ອງ​ລິ​ຂະ​ສິດ ຕ້ອງ​ມີ​ລະ­ບົບ​ປ້ອງ​ກັນ​ສູງ​ສຳ­ລັບ​ເຄື່ອງ­ໝາຍ​ການ​ຜະ­ລິດ ແລະ ພູ­ມີ­ພາກ.

   ບັນ­ດາ​ທຸ­ລະ​ກິດ​ຫວຽດ­ນາມ ຕ້ອງ​ກຳ​ຈັດ­ການ​ຜະ­ລິດ ກໍ​ຄື ການ​ນຳ​ໃຊ້​ການ​ຜະ­ລິດ​ທີ່​ສົ່ງ​ຜົນ​ກະ­ທົບ​ທາງ​ລົບ​ໂດຍ​ກົງ ຫຼື ໂດຍ​ທາງ​ອ້ອມ​ຕໍ່​ສິ່ງ­ແວ­ດລ້ອມ ເຊັ່ນ: ຜະ­ລິດ​ຕະ​ພັນ​ທີ່​ຫຸ້ມ​ຫໍ່​ດ້ວຍ​ປຼັສ​ຕິກ ກໍ​ຄື ຜະ­ລິດ​ຕະ​ພັນ​ບັນ­ຈຸ​ໃນ​ກະ​ປ໋ອງ ເພາະ­ວ່າ​ບັນ­ດາ​ລູກ​ຄ້າ​ໃນ​ສະ­ຫະ­ພາບ​ເອີ​ຣົບ​ມີ​ຄວາມ​ກັງ­ວົນ​ໃຈ​ກ່ຽວ​ກັບ​ບັນ­ຫາ​ນີ້ ຢູ່​ກອງ​ປະ­ຊຸມ​ຍັງ​ມີ​ຄຳ​ເຫັນ​ທີ່​ໜ້າ​ສົນ­ໃຈ ທີ່​ບອກ​ວ່າ: ຫວຽດ­ນາມ​ຄວນ​ສົ່ງ​ຜະ­ລິດ​ຕະ​ພັນ​ປຸງ​ແຕ່ງ ເພື່ອ​ເຈາະ​ຕະ­ຫຼາດ​ສະ­ຫະ­ພາບ​ເອີ​ຣົບ ຈະ​ໄດ້​ດີ​ກວ່າ​ສິນ­ຄ້າ​ທີ່​ບໍ່​ໄດ້​ປຸງ​ແຕ່ງ ຫຼື ເຄິ່ງ​ປຸງ​ແຕ່ງ.

ຂ່າວທີ່ກ່ຽວຂ້ອງ