ຂ່າວຫຼ້າສຸດ

ຮ່ວມໃຈສາມັກຄີມິດໄມຕີ ສືບສານຮີດຄອງປະເພນີອັນດີງາມຂອງເຜົ່າຜູ້ໄທ

1.463 22 ມ.ກ. 2020 ຫົວຂໍ້ຂ່າວອື່ນໆ
ຮ່ວມໃຈສາມັກຄີມິດໄມຕີ ສືບສານຮີດຄອງປະເພນີອັນດີງາມຂອງເຜົ່າຜູ້ໄທ

   ອີງ​ຕາມ​ຂໍ້​ມູນ​ຈາກ http://insidelaos.com/ ເຫັນ​ໄດ້​ວ່າ: ຜູ້­ໄທ ເປັນ​ເຜົ່າ​ໜຶ່ງ​ໃນ 50 ຊົນ­ເຜົ່າ​ທີ່​ດຳ­ລົງ​ຊີ­ວິດ​ຢູ່​ຜືນ​ແຜ່ນ­ດິນ​ລາວ ໂດຍ​ສ່ວນ​ໃຫຍ່​ແລ້ວ ເຜົ່າ​ຜູ້­ໄທ​ດຳ­ລົງ​ຊີ­ວິດ​ຢູ່​ແຂວງ​ຄຳ​ມ່ວນ​ເປັນ​ບາງ​ສ່ວນ ແລະ ສະ­ຫວັນ​ນະ​ເຂດ ກວມ​ເອົາ​ສ່ວນ​ໃຫຍ່​ຂອງ​ພົນ­ລະ­ເມືອງ ເຜົ່າ​ຜູ້­ໄທ​ມີ​ຮີດ­ຄອງ​ປະ­ເພ­ນີ ວັດ­ທະ­ນະ­ທຳ ແລະ ພາ­ສາ​ປາກ​ເວົ້າ​ຄ້າຍ­ຄື​ກັບ​ເຜົ່າ​ລາວ ແຕ່​ກໍ​ມີ​ບາງ​ຢ່າງ​ທີ່​ແຕກ​ຕ່າງ​ກັນ ແລະ ມີ​ເອ­ກະ­ລັກ​ສະ­ເພາະ​ຕົນ ທີ່​ລວມ​ເຖິງ​ປະ­ເພ­ນີ​ບຸນ​ໄຂ​ປະ­ຕູ​ເລົ້າ ຄື: ປະ­ເພ­ນີ​ທີ່​ມີ​ຄວາມ​ໂດດ​ເດັ່ນ ແລະ  ເປັນ​ເອ­ກະ­ລັກ​ເປັນ​ທີ່​ຮູ້­ຈັກ​ກັນ​ຢ່າງ​ແຜ່​ຫຼາຍ.

   ເມື່ອ​ເວົ້າ​ເຖິງ​ເຜົ່າ​ຜູ້­ໄທ​ແລ້ວ ຫຼາຍ​ທ່ານ​ກໍ​ຄົງ​ຈະ​ຄິດ​ເຖິງ​ບົດ​ເພງ​ປາ­ຄໍ່​ໃຫຍ່ ເປັນ​ຜົນ­ງານ​ຂອງ​ທ່ານ ດອກ​ເພັກ ແດນ​ຈຳ​ພອນ (ຄຳ​ສິດ ພົມ­ມະ­ຈັນ) ເປັນ​ບົດ​ເພງ​ທີ່​ແຕ່ງ​ຂຶ້ນ​ເພື່ອ​ສ່ອງ​ແສງ​ເຖິງ​ຮີດ­ຄອງ​ປະ­ເພ­ນີ ວິ­ຖີ​ຊີ­ວິດ ແລະ ວັດ­ທະ­ນະ­ທຳ​ອັນ​ດີ­ງາມ​ຂອງ​ເຜົ່າ​ຜູ້­ໄທ ໂດຍ​ສະ­ເພາະ ບຸນ​ເດືອນ 3 ອອກ​ໃໝ່ 3 ຄ່ຳ ສຳ­ລັບ​ໃນ​ເນື້ອ​ເພງ​ທີ່​ໄດ້​ເອົາ​ປາ­ຄໍ່​ໃຫຍ່​ມາ​ສົມ​ທຽບ ເພາະ­ວ່າ​ປາ­ຄໍ່​ໃຫຍ່​ເປັນ​ສ່ວນ​ປະ­ກອບ​ຢ່າງ​ໜຶ່ງ​ຂອງ​ປະ­ເພ­ນີ ເພາະ​ປຽບ​ເປັນ​ຕົວ​ແທນ​ຂອງ​ເຂົ້າ​ໃໝ່​ປາ​ມັນ ຄວາມ​ອຸ­ດົມ­ສົມ­ບູນ ແລະ ຍັງ​ບົ່ງ​ບອກ​ເຖິງ​ຍາມ​ໄຂ​ປະ­ຕູ​ເລົ້າ ເພາະ­ວ່າ​ໃນ​ເມື່ອ​ກ່ອນ ກໍ​ຄື ປັດ­ຈຸ­ບັນ​ເຜົ່າ​ຜູ້­ໄທ ເມື່ອ​ເກັບ​ມ້ຽນ​ເຂົ້າ​ມາ​ແລ້ວ​ກໍ​ແບ່ງ​ໄວ້​ກິນ​ພໍ­ປະ­ມານ ສ່ວນ​ທີ່​ເຫຼືອ​ແມ່ນ​ເອົາ​ຂຶ້ນ​ເລົ້າ​ປິດ​ປະ­ຕູ​ໄວ້​ບໍ່​ໃຫ້​ໄຂ​ຈົນ​ເຖິງ​ມື້​ຂຶ້ນ 3 ຄ່ຳ ເດືອນ 3 ເປັນ​ລືກ​ງາມ​ຍາມ​ດີ ນອກ­ຈາກ​ນີ້ ປະ­ຊາ­ຊົນ​ຍັງ​ມີ​ຄວາມ​ເຊື່ອ​ຖື​ວ່າ ເປັນ​ຍາມ​ທີ່ “ກົບ​ບໍ່​ມີ​ປາກ ນາກ​ບໍ່​ມີ​ຮູ​ຂີ້ ສີ​ໃຄ​ອອກ­ດອກ” ໝາຍ​ເຖິງ “ກິນ​ບໍ່​ບົກ ຈົກ​ບໍ່​ລົງ” ໃນ​ອີກ​ຄວາມ​ໝາຍ​ໜຶ່ງ​ລະ­ດູ​ນີ້​ແມ່ນ​ກົບ​ເຂົ້າ​ເງີບ ຫຼື ເຂົ້າ​ໄງ​ຈຳ​ສິນ​ຢູ່​ໃນ​ຮູ ບໍ່​ຮ້ອງ​ຈົນ​ກວ່າ​ເຖິງ​ຍາມ​ຝົນ ແລະ ນາກ​ບໍ່​ອອກ​ຫາ​ກິນ​ປາ​ຄື​ກັບ​ຍາມ​ຝົນ ເຮັດ​ໃຫ້​ຍາມ​ນີ້​ຈຶ່ງ​ບໍ່​ປາ­ກົດ​ເຫັນ​ຂີ້­ນາກ​ຢູ່​ຕາມ​ແຄມ​ຫ້ວຍ​ນ້ຳ​ລຳ­ເຊ​ຕ່າງໆ ແລະ ເປັນ​ລະ­ດູ​ເສັດ​ສິ້ນ​ຈາກ​ການ​ເກັບ​ກ່ຽວ ຈຶ່ງ​ເໝາະ​ແກ່​ການ​ເອົາ​ເຂົ້າ​ໃໝ່​ອອກ​ມາ​ໄຂ​ເພື່ອ​ສະ­ເຫຼີມ­ສະ­ຫຼອງ​ຜົນ­ສຳ­ເລັດ ພ້ອມ​ທັງ​ເຮັດ­ບຸນ ເພື່ອ​ອຸ­ທິດ​ຫາ​ຜູ້​ມີ​ພະ​ຄຸນ ນອກ­ຈາກ​ນີ້​ແລ້ວ ເຜົ່າ​ຜູ້­ໄທ​ຍັງ​ຖື​ວ່າ​ບຸນ​ດັ່ງ­ກ່າວ​ເປັນ​ບຸນ­ປີ­ໃໝ່​ຂອງ​ຕົນ​ອີກ​ດ້ວຍ.

   ບຸນ​ໄຂ​ປະ­ຕູ​ເລົ້າ ມີ​ຄວາມ​ຄ້າຍ­ຄື​ກັບ​ບຸນ​ຄູນ​ລານ​ຂອງ​ຊົນ­ເຜົ່າ​ລາວ ຕ່າງ​ແຕ່​ເຜົ່າ​ຜູ້­ໄທ​ແມ່ນ​ເຮັດ​ພ້ອມ­ພຽງ​ກັນ​ໃນ​ມື້​ດຽວ ແລະ ເປັນ​ວັນ​ເຕົ້າ­ໂຮມ​ຍາດ​ພີ່­ນ້ອງ​ເພື່ອ​ສັງ​ສັນ​ສ້າງ​ຄວາມ​ສາ­ມັກ­ຄີ​ແກ່​ບັນ­ດາ​ມິດ​ສະ­ຫາຍ ຈົນ​ກາຍ­ເປັນ​ປະ­ເພ­ນີ​ທີ່​ລ່ຳ​ລື​ໃຫ້​ຮູ້­ຈັກ​ກັນ ທົ່ວ​ສັງ­ຄົມ​ລາວ ແລະ ຊາວ​ຕ່າງ­ປະ­ເທດ​ໃຫ້​ມາ​ຢ້ຽມ­ຢາມ​ທ່ຽວ ຊົມ​ຮີດ­ຄອງ​ປະ­ເພ­ນີ​ດັ່ງ­ກ່າວ ທັງ​ເປັນ​ການ​ສົ່ງ­ເສີມ ແລະ ຮັກ­ສາ​ໄວ້​ໃຫ້​ຄົງ​ຢູ່​ຄູ່​ກັບ​ວັດ­ທະ­ນະ­ທຳ​ລາວ​ຕະ­ຫຼອດ​ໄປ ຈຶ່ງ​ເຮັດ​ໃຫ້​ເຜົ່າ​ຜູ້­ໄທ​ໃນ​ຫຼາຍໆ​ທ້ອງ­ຖິ່ນ​ໄດ້​ຈັດ​ງານ​ດັ່ງ­ກ່າວ​ຂຶ້ນ​ໃນ​ທຸກໆ​ປີ ໃນ​ນັ້ນ ລວມ​ໄປ​ເຖິງ​ສວນ​ຜູ້­ໄທ​ທີ­ລະ ທີ່​ໄດ້​ຮ່ວມ​ສືບ​ສານ​ປະ­ເພ­ນີ​ບຸນ​ໄຂ​ປະ­ຕູ​ເລົ້າ.

   ສວນ​ຜູ້­ໄທ​ທິ​ລະ ເປັນ​ສະ­ຖານ­ທີ່​ທ່ອງ​ທ່ຽວ​ທາງ​ດ້ານ​ວັດ­ທະ­ນະ­ທຳ​ໃນ​ນະ­ຄອນ­ຫຼວງ​ວຽງ​ຈັນ ທີ່​ໄດ້​ຮີບ​ໂຮມ​ເອົາ​ເອ­ກະ­ລັກ ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ເຜົ່າ​ຜູ້­ໄທ​ມາ​ຢູ່​ຈຸດ​ດຽວ ບໍ່​ວ່າ​ຈະ​ເປັນ​ເຮືອນ​ທີ່​ຖືກ​ອອກ​ແບບ​ຂຶ້ນ​ມາ​ໃຫ້​ຖືກ​ກັບ​ເອ­ກະ­ລັກ​ຂອງ​ຜູ້­ໄທ ມີ​ການ​ນຸ່ງ​ຖືກ ເຄື່ອງ​ດົນ­ຕີ ເຄື່ອງ­ໃຊ້​ສອຍ​ຕ່າງໆ​ຂອງ​ເຜົ່າ​ຜູ້­ໄທ ເພື່ອ​ເປັນ​ການ​ປົກ​ປັກ​ຮັກ­ສາ​ເອ­ກະ­ລັກ​ຂອງ​ເຜົ່າ​ຜູ້­ໄທ​ໄວ້​ຈົນ​ເຖິງ​ຮຸ່ນ​ຄົນ​ຕໍ່ໆ​ໄປ ພ້ອມ​ນັ້ນ ກໍ​ຍັງ​ເປັນ​ຈຸດ​ຮຽນ​ຮູ້​ປະ­ຫວັດ​ຄວາມ​ເປັນ​ມາ​ດ້ານ​ຕ່າງໆ​ຂອງ​ເຜົ່າ​ຜູ້­ໄທ​ນຳ​ອີກ

   ໃນ​ປີ 2019 ຜ່ານ​ມາ ສວນ​ຜູ້­ໄທ​ທີ­ລະ ໄດ້​ຈັດ​ງານ​ບຸນ​ໄຂ​ປະ­ຕູ​ເລົ້າ ຫຼື ປີ​ໃໝ່​ຜູ້­ໄທ ເຊິ່ງ​ພາຍ​ໃນ​ງານ​ໄດ້​ມີ​ພິ­ທີ­ກຳ​ຕ່າງໆ ລວມ​ໄປ​ເຖິງ​ງານ​ສະ­ແດງ​ສິ­ລະ​ປະ​ຂັບ​ລຳ ການ​ປຸງ​ແຕ່ງ­ອາ­ຫານ ແລະ ອື່ນໆ​ທີ່​ເປັນ​ເອ­ກະ­ລັກ​ຂອງ​ເຜົ່າ​ຜູ້­ໄທ ເຊິ່ງ​ງານ​ໃນ​ຄັ້ງ​ນັ້ນ ແມ່ນ​ໄດ້​ຮັບ​ຄວາມ​ສົນ­ໃຈ​ຈາກ​ມວນ​ຊົນ​ທັງ​ໃນ​ນະ­ຄອນ­ຫຼວງ​ວຽງ​ຈັນ ແລະ ບັນ­ດາ​ແຂວງ​ໃກ້​ຄຽງ​ຢ່າງ​ຫຼວງ­ຫຼາຍ ພິ­ເສດ​ແມ່ນ​ໄດ້​ຮັບ​ກຽດ​ເຂົ້າ​ຮ່ວມ​ຂອງ​ບັນ­ດາ​ການ ນຳ​ພັກ-ລັດ ກໍ​ຄື ການ​ນຳ​ນະ­ຄອນ­ຫຼວງ​ວຽງ​ຈັນ.

   ເພື່ອ​ສືບ​ທອດ​ປະ­ເພ­ນີ​ດັ່ງ­ກ່າວ ໃນ​ປີ 2020 ນີ້ ທາງ​ເຈົ້າ​ຂອງ​ສວນ​ຜູ້­ໄທ​ທີ­ລະ​ຈະ​ໄດ້​ຈັດ​ງານ​ບຸນ​ດັ່ງ­ກ່າວ​ຂຶ້ນ ເຊິ່ງ​ໃນ​ປີ​ນີ້​ຈັດ​ຂຶ້ນ​ໃນ​ຫົວ­ຂໍ້ “ຮ່ວມ​ໃຈ​ສາ­ມັກ­ຄີ​ມິດ​ໄມ­ຕີ​ຊາວ​ຜູ້­ໄທ ດີ​ເຈີ​ປະ​ທັບ​ໃຈ​ໃນ​ວັດ­ທະ­ນະ­ທຳ ຮ່ວມ​ສືບ​ສານ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ເຜົ່າ​ຜູ້­ໄທ” ງານ​ບຸນ​ໃນ​ປີ​ນີ້ ແມ່ນ​ຈະ​ຈັດ​ຂຶ້ນ​ໃນ​ມື້​ຂຶ້ນ 8 ຄ່ຳ ເດືອນ 3 ກົງ​ກັບ​ວັນ​ທີ 1 ກຸມ­ພາ 2020 ງານ​ຈະ​ເລີ່ມ​ແຕ່​ເວ­ລາ 14:00 ໂມງ ຈະ​ເປັນ​ການ​ເຕົ້າ­ໂຮມ​ຂະ​ບວນ​ການ​ແຫ່​ແຕ່​ລະ​ພາກ­ສ່ວນ 15:00 ໂມງ ພິ­ທີ​ແຫ່​ບຸນ​ໄຂ​ປະ­ຕູ​ເລົ້າ ແລະ 16:00 ໂມງ​ເປັນ­ຕົ້ນ​ໄປ​ເຂົ້າ​ສູ່​ພິ­ທີ​ສູດ​ຂວັນ​ເຂົ້າ ກິນ​ເຂົ້າ​ພາ­ແລງ ແລະ ຊົມ​ການ­ສະ­ແດງ​ສິ­ລະ​ປະ​ດົນ­ຕີ​ຈາກ​ທ້ອງ­ຖິ່ນ​ຕ່າງໆ.

   ດັ່ງ­ນັ້ນ ຈຶ່ງ​ຂໍ​ເຊື້ອ​ເຊີນ​ມາ​ຍັງ​ຊັ້ນ​ຄົນ​ຕ່າງໆ​ເຂົ້າ​ຮ່ວມ​ສືບ​ທອດ​ວັດ­ທະ­ນະ­ທຳ ແລະ ປະ­ເພ­ນີ​ອັນ​ເປັນ​ເອ­ກະ­ລັກ​ຂອງ​ເຜົ່າ​ຜູ້­ໄທ ທີ່​ສວນ​ຜູ້­ໄທ​ທີ­ລະ ຖະ­ໜົນ 450 ປີ ບ້ານ​ໜອງ​ແປນ​ເໜືອ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ