ຂ່າວຫຼ້າສຸດ

ນາ​ຊາຍ​ທອງ ຈັດ​ກິດຈະກຳ​ພັດທະນາ​ທັກ​ສະ​ກີລາ​ບານເຕະ

676 22 ມ.ກ. 2020 ວົງຈອນກີລາ
ນາ​ຊາຍ​ທອງ ຈັດ​ກິດຈະກຳ​ພັດທະນາ​ທັກ​ສະ​ກີລາ​ບານເຕະ

    ຄະນະ​ຊາວ​ໜຸ່ມ ​ປປລ ເມືອງ​ນາ​ຊາຍ​ທອງ ນະຄອນ​ຫຼວຽງ​ຈັນ (ນວ) ໄຂ​ງານ​ແຂ່ງຂັນ​ບານເຕະ​ຊີງ​ຂັນ​ທ່ານ​ເຈົ້າເມືອງ​ນາ​ຊາຍ​ທອງ ຄັ້ງ​ທີ 18 ຂຶ້ນ​ວັນ​ທີ 17 ມັງກອນ 2020 ຢູ່​ສະໂມສອນ​ກີລາ TPC ບ້ານ​ອີ່​ໄລ​ໃຕ້ ໂດຍ​ມີ​ທ່ານ ວິລະ​ສັກ ນາມ​ມຸນຕີ ເຈົ້າເມືອງ​ນາ​ຊາຍ​ທອງ ທ່ານ ພັນ​ປະສົງ    ໄຊ​ຍະ​ວົງສາ ຮອງ​ເລຂາ​ຄະນະ​ບໍລິຫານ​ງານ​ຊາວ​ໜຸ່ມ ​ປປລ ນວ ພ້ອມ​ດ້ວຍ​ນັກກີລາ​ເຂົ້າ​ຮ່ວມ 40 ທີມ.

    ທ່ານ​ນາງ ປາ​ວິ​ນາ ສຸ​ຂະ​ບັນດິດ ເລຂາ​ຄະນະ​ບໍລິຫານ​ງານ​ຊາວ​ໜຸ່ມ ​ປປລ ເມືອງ​ນາ​ຊາຍ​ທອງ​ກ່າວ​ວ່າ: ການ​ແຂ່ງຂັນ​ບານເຕະ​ຄັ້ງ​ນີ້ ແມ່ນ​ໜຶ່ງ​ໃນ​ກິດຈະກຳ ກໍ​ຄື​ວຽກ​ຈຸດ​ສຸມ ປະຈຳ​ປີ 2019 ຂອງ​ຄະນະ​ບໍລິຫານ​ງານ​ຊາວ​ໜຸ່ມ​ເມືອງ​ນາ​ຊາຍ​ທອງ ເຊິ່ງ​ໄດ້​ຮັບ​ການ​ຊີ້​ນຳ​ຢ່າງ​ໃກ້ຊິດ​ຈາກ​ຄະນະ​ພັກ​ເມືອງ​ນາ​ຊາຍ​ທອງ ໃນ​ການ​ກະກຽມ​ຂັ້ນ​ຕອນ​ຕ່າງໆ ເປັນຕົ້ນ​ສະຖານທີ່ ງົບປະມານ ແລະ ນັກກີລາ ຈຸດ​ປະ ສົງ​ເພື່ອ​ສ້າງ​ຂະ​ບວນ​ການ​ຄຳນັບ-ຊົມເຊີຍ​ກອງ​ປະຊຸມ​ໃຫຍ່ ຄັ້ງ​ທີ IX ຜູ້​ແທນ​ຊາວ​ໜຸ່ມ​ທົ່ວ​ເມືອງ​ນາ ຊາຍ​ທອງ ແລະ ຄຳນັບ-ຊົມເຊີຍ​ວັນ​ສຳຄັນ​ຂອງ​ຊາດ-ຂອງ​ພັກ ພິເສດ​ເພື່ອ​ສ້າງ​ຂະ​ບວນ​ການ​ຮັບ​ຕ້ອນ​ກອງ​ປະຊຸມ​ໃຫຍ່ ຄັ້ງ​ທີ VII ຂອງ​ອົງຄະ​ນະ​ພັກ​ເມືອງ​ນາ​ຊາຍ​ທອງ ກອງ​ປະຊຸມ​ໃຫຍ່ ຄັ້ງ​ທີ VIII ຜູ້​ແທນ​ຊາວ​ໜຸ່ມ​ທົ່ວ ນວ ທັງ​ເປັນ​ການ​ສ້າງ​ຄວາມ​ສາມັກຄີ​ໃນ​ຖັນ​ແຖວ​ຊາວ​ໜຸ່ມ​ສຳນັກງານ​ຫ້ອງການ ໂຮງຮຽນ ກຸ່ມ​ບ້ານ ທຸລະ​ກິດ-ບໍລິສັດ ​ປກສ-​ປກຊ ເພ​​ືື່ອ​ພັດທະນາ​ທັກ​ສະ​ກີລາ​ບານເຕະ​ໃຫ້​ມີ​ປະ​ສິດທິ ຜົນ ສົ່ງເສີມ​ໃຫ້​ສະມາຊິກ​ຊາວ​ໜຸ່ມ ຫັນ​ມາ​ຫຼີ້ນ​ກິລາ ເພື່ອ​ໃຫ້​ມີ​ສຸຂະພາບ​ແຂງແຮງ.

    ການ​ແຂ່ງຂັນ​ຄັ້ງ​ນີ້ ຈະ​ດຳເນີນ​ແຕ່​ວັນ​ທີ 17 ມັງກອນ-ທ້າຍ​ເດືອນກຸມພາ 2020 ແຂ່ງຂັນ​ແບບ​ສາຍ ຕົກ​ຮອບ ສຳລັບ​ທີມ​ຊະນະ​ເລີດ ຈະ​ໄດ້​ຮັບ​ຂັນ 1 ໜ່ວຍ ພ້ອມ​ເງິນ​ລາງວັນ 1 ລ້ານ ທີ 2 ຂັນ 1 ໜ່ວຍ ພ້ອມ​ເງິນ​ລາງວັນ 700.000 ກີບ ທີ 3 ຂັນ 1 ໜ່ວຍ ພ້ອມ​ເງິນ​ລາງວັນ 500.000 ກີບ.

ຂ່າວທີ່ກ່ຽວຂ້ອງ