ຂ່າວຫຼ້າສຸດ

ການ​ແຂ່ງຂັນ​ຣັກ​ບີ້ ວຽງ​ຈັນ​ເທັນ ກຽມ​ຈັດ​ຂຶ້ນ​ທ້າຍ​ອາທິດ​ນີ້

345 22 ມ.ກ. 2020 ວົງຈອນກີລາ
ການ​ແຂ່ງຂັນ​ຣັກ​ບີ້ ວຽງ​ຈັນ​ເທັນ ກຽມ​ຈັດ​ຂຶ້ນ​ທ້າຍ​ອາທິດ​ນີ້

     ພິທີ​ຖະແຫຼງ​ຂ່າວ​ການ​ແຂ່ງຂັນ​ກີລາ​ຣັກ​ບີ້​ນາໆຊາດ ວຽງ​ຈັນ​ເທັນ ຄັ້ງ​ທີ 13 ຈັດ​ຂຶ້ນ​ວັນ​ທີ 20 ມັງ ກອນ 2020 ຢູ່​ໂຮງແຮມ​ໂປ​ລີ ວຽງ​ຈັນ ໂດຍ​ມີ​ທ່ານ ວິລະ​ຢຸດ ຣາ​ທິ​ກຸນ ປະທານ​ສະຫະພັນ​ກີລາ​ຣັກບີ້​ແຫ່ງ​ຊາດ​ລາວ ພ້ອມ​ດ້ວຍ​ຄະນະ​ບໍລິຫານ​ງານ​ສະຫະພັນ​ຣັກ​ບີ້​ແຫ່ງ​ຊາດ ຜູ້​ໃຫ້ການ​ສະໜັບສະໜູນ (ບໍລິສັດ DHL ແລະ ບໍລິສັດ ANZ) ຄູ​ເຝິກ ແລະ ນັກກີລາ ເຂົ້າ​ຮ່ວມ. 

    ທ່ານ ວິລະ​ຢຸດ ຣາ​ທິ​ກຸນ ກ່າວ​ວ່າ:ການ​ແຂ່ງຂັນ​ຄັ້ງ​ນີ້ ແມ່ນ​ເປີດ​ໂອກາດ​ໃຫ້​ກັບ​ບັນດາ​ທີມ​ໃນ​ລະດັບ​ຕ່າງໆ ເປັນຕົ້ນ ທີມ​ໃນ​ລະດັບ​ມະຫາວິທະຍາໄລ ຫຼື​ສະໂມສອນ ໃນ​ທົ່ວ​ພູມິ​ພາກ​ໄດ້​ມີ​ໂອກາດ ເຂົ້າ​ຮ່ວມ ການ​ແຂ່ງຂັນ ທາງ​ສະຫະພັນ​ມີ​ຄວາມ​ພາກພູມ​ໃຈ​ເປັນ​ຢ່າງ​ຍິ່ງ ທີ່​ໄດ້​ມີ​ສ່ວນ​ຮ່ວມ​ໃນ​ການ​ຈັດການ​ແຂ່ງຂັນ​ຄັ້ງ​ນີ້ ເຊິ່ງ​ກາຍ ເປັນ​ທ່າແຮງ​ໜຶ່ງ​ຈະ​ຊ່ວຍ​ພັດທະນາ​ສະໂມສອນ​ຣັກ​ບີ້​ໃນ ​ສປປ ລາວ ທັງ​ຍັງ​ເປັນ​ການ​ສ້າງ​ຄວາມ​ອາດ​ສາມາດ ໃຫ້​ແກ່​ພະນັກງານ​ຂອງ​ສະຫະພັນ ໃນ​ການ​ຈັດການ​ບໍລິຫານ​ການ​ແຂ່ງຂັນ​ໃນ​ລະດັບ​ສາກົນ. 

    ສຳລັບ​ການ​ແຂ່ງຂັນ​ຄັ້ງ​ນີ້ ຈະ​ມີ​ທີມ​ຈາກ​ສະໂມສອນ​ພາຍ​ໃນ ແລະ ຕ່າງປະເທດ ເຂົ້າ​ຮ່ວມ 32 ທີມ (ທີມ​ຊາຍ-ຍິງ) ເຊັ່ນ:ປະເທດ​ອັງກິດ ອົດ​ສະ​ຕຣາ​ລີ ສະຫະລັດ​ອາ​ເມ​ຣິ​ກາ ຮົງ​ກົງ ໄທ ​ສປ ຈີນ ​ສສ ຫວຽດນາມ ແລະ ​ສປປ ລາວ ເຊິ່ງ​ຈະ​ແຂ່ງຂັນ​ໃນ​ລະຫວ່າງ​ວັນ​ທີ 25-26 ມັງກອນ 2020 ຢູ່​ສະໜາມ​ກີລາ ເຈົ້າ​ອາ​ນຸ​ວົງ ນະຄອນຫຼວງ​ວຽງ​ຈັນ ນອກຈາກ​ນີ້ ສະຫະພັນ​ຣັກ​ບີ້​ແຫ່ງ​ຊາດ ຍັງ​ຈະ​ໄດ້​ຈັດການ​ແຂ່ງຂັນ​ຣັກ​ບີ້ ຮຸ່ນ​ອາຍຸ​ບໍ່​ເກີນ 18 ປີ ຊາຍ-ຍິງ (ປະເພດ​ຫຼິ້ນ​ຕຳ) ແລະ ຮຸ່ນ​ອາຍຸ​ບໍ່​ເກີນ 13 ປີ (ປະເພດ​ດຶງ​ສາຍ​ແທັກ) ເພື່ອ ເປັນ​ການ​ສ້າງ​ສີສັນ ແລະ ພັດທະນາ​ນັກກີລາ​ຣັກ​ບີ້​ຮຸ່ນ​ສືບ​ທອດ​ໃນ​ອະນາຄົດ.

                                                                                    

ຂ່າວທີ່ກ່ຽວຂ້ອງ