ຂ່າວຫຼ້າສຸດ

ອົດ​ສະ​ຕຣາ​ລີ ໃຫ້​ຄວາມ​ຊ່ວຍເຫຼືອ​ຟື້ນ​ຟູ​ການທ່ອງທ່ຽວ ຫຼັງ​ໄຟ​ໄໝ້​ປ່າ

1.198 21 ມ.ກ. 2020 ຂ່າວຕ່າງປະເທດ
ອົດ​ສະ​ຕຣາ​ລີ ໃຫ້​ຄວາມ​ຊ່ວຍເຫຼືອ​ຟື້ນ​ຟູ​ການທ່ອງທ່ຽວ ຫຼັງ​ໄຟ​ໄໝ້​ປ່າ

    ລັດຖະບານ​ອົດ​ສະ​ຕຣາ​ລີ ແຈ້ງ​ໃຫ້​ຮູ້ເມື່ອ​ວັນ​ທີ 19 ມັງກອນ​ນີ້​ວ່າ ຈະ​ໃຫ້​ຄວາມ​ຊ່ວຍເຫຼືອ​ເປັນ​ມູນ​ຄ່າ 76 ລ້ານ​ໂດ​ລາ​ອົດ​ສະ​ຕຣາ​ລີ (ເທົ່າ​ກັບ 52 ລ້ານ​ໂດ​ລາ​ສະຫະລັດ) ໃຫ້​ແກ່​ຂະແໜງ​ການທ່ອງທ່ຽວ​ຂອງ​ປະເທດ​ນີ້ ທີ່​ໄດ້​ຖືກ​ຜົນ​ກະທົບ​ໜັກໜ່ວງ ຈາກ​ເຫດການ​ໄຟ​ໄໝ້​ປ່າ​ແກ່ຍາວ ໃນ​ໄລຍະ​ທີ່​ຜ່ານ​ມາ.

    ໃນ​ຖະແຫຼງການ​ຮ່ວມ​ກັບ​ນາຍົກລັດຖະມົນຕີ​ອົດ​ສະ​ຕຣາ​ລີ ສະ​ກອດ ມໍ​ຣິ​ສັນ ນັ້ນ​ທ່ານ ຊີ​ມອນ ເບີກ​ມິງ​ແຮມ ລັດຖະມົນຕີ​ການທ່ອງທ່ຽວ​ຂອງ​ອົດ​ສະ​ຕຣາ​ລີ ເວົ້າ​ວ່າ ໄຟ​ໄໝ້​ປ່າ​ໄດ້ “ໂມ່ງ​ບາດ​ຄ້ອນ​ແຮງ​ທີ່​ສຸດ” ໃສ່​ຂະແໜງ​ການທ່ອງທ່ຽວ​ຂອງ​ອົດ​ສະ​ຕຣາ​ລີ ໂດຍ​ທີ່​ປະລິມານ​ນັກ​ທ່ອງ​ທ່ຽວ​ຈາກ​ບັນດາ​ຕະຫຼາດ​ຕ່າງປະເທດ​ທີ່​ສຳຄັນ ຊຶ່ງ​ຈອງ​ບ່ອນ​ໄວ້​ກ່ອນ ໄດ້​ຫຼຸດ​ລົງ 30-40%.

    ຕາມ​ການ​ຄິດໄລ່​ຂອງ​ບັນດາ​ອົງ​ການທ່ອງທ່ຽວ​ອົດ​ສະ​ຕຣາ​ລີ ຊີ້​ໃຫ້​ເຫັນ​ວ່າ ໄພພິບັດ​ຈາກ​ໄຟ​ໄໝ້​ປ່າ ນັບ​ແຕ່​ເດືອນ​ກັນຍາ ປີ 2019 ເປັນຕົ້ນ​ມາ ໄດ້​ເຮັດ​ໃຫ້​ເກີດ​ຄວາມ​ເສຍ​ຫາຍ​ເປັນ​ມູນ​ຄ່າ 1 ຕື້​ໂດ​ລາ​ອົດ​ສະ​ຕຣາ​ລີ ແລະ ເມື່ອ​ຮອດ​ທ້າຍ​ປີ 2020 ຕົວ​ເລກ​ນີ້​ອາດ​ມີ​ຄວາມ​ສ່ຽງ​ບັນລຸ​ເກີນ 4,5 ຕື້​ໂດ​ລາ​ອົດ​ສະ​ຕຣາ​ລີ ປະມານ 80% ຂອງ​ເຂດ​ສາຍພູ ເກຣດ​ເຕີ ບລູ ຊຶ່ງ​ເປັນ​ມໍລະດົກ​ໂລກ​ນັ້ນ ໄດ້​ຖືກ​ເຜົາ​ໄໝ້​ຍ້ອນ​ໄຟ​ໄໝ້​ປ່າ.

    ໃນ​ຂະນະ​ດຽວ​ກັນ ຂະແໜງ “ອຸດສາຫະກຳ​ໄຮ້​ຄວັນ” ພວມ​ນັບ​ມື້​ນັບ​ກາຍເປັນ​ສ່ວນ​ໜຶ່ງ​ທີ່​ສຳຄັນ​ຂອງ​ເສດຖະກິດ​ອົດ​ສະ​ຕຣາ​ລີ ໃນ​ເມື່ອ​ໄດ້​ນຳ​ມາ​ຊຶ່ງ​ແຫຼ່ງ​ລາຍ​ຮັບ  152 ຕື້​ໂດ​ລາ​ອົດ​ສະ​ຕຣາ​ລີ ແລະ ກວມ​ເອົາ​ກວ່າ 3% ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ໃນ​ແຕ່​ລະ​ປີ ຂອງ​ອົດ​ສະ​ຕຣາ​ລີ.

    ຝົນ​ທີ່​ຕົກລົງ​ມາ​ໃນ​ຫຼາຍ​ມື້​ມໍ່ໆມານີ້ ໄດ້​ເຮັດ​ໃຫ້​ຫຼຸດ​ໄຟ​ໄໝ້​ປ່າ​ຫຼຸດ​ລົງ​ຫຼາຍ​ຈຸດ ໃນ​ທົ່ວ​ເຂດ​ທິດຕາເວັນອອກ ແລະ ທິດໃຕ້​ອົດ​ສະ​ຕຣາ​ລີ ໂດຍ​ລົງ​ສູ່​ຕ່ຳ​ກວ່າ 100 ຈຸດ ເປັນ​ເທື່ອ​ທຳ​ອິດ ໃນ​ຮອບ​ຫຼາຍ​ອາທິດ​ທີ່​ຜ່ານ​ມາ ເຖິງ​ຢ່າງໃດ​ກໍ​ຕາມ ປັດຈຸບັນ​ນີ້ ກອງ​ກຳລັງ​ດັບ​ເພີງ ກໍ​ຍັງ​ບໍ່​ທັນ​ຄວບ​ຄຸມ​ໄດ້​ເກືອບ 30% ຈາກ​ຈຳນວນ​ໄຟ​ໄໝ້​ປ່າ 69 ຈຸດ​ຢູ່​ໃນ​ລັດ ນີວ ເຊົາ ແວ​​ລ ໃນ​ຂະນະ​ທີ່​ໄຟ​ໄໝ້​ປ່າ​ອີກ 14 ຈຸດ ກໍ​ຍັງ​ສືບຕໍ່​ໄໝ້​ຢູ່​ໃນ​ລັດ ວິກ​ຕໍ​ເຣຍ.

    ທາງ​ດ້ານ​ເຈົ້າ​ໜ້າທີ່​ອຸຕຸນິຍົມ​ວິທະຍາ ໃຫ້ການ​ພະຍາກອນ​ວ່າ ພາຍຸ​ຝົນ​ຂະໜາດ​ໃຫຍ່ ຈະ​ເຮັດ​ໃຫ້​ຝົນ​ເທ​ລົງ​ທິດໃຕ້ ແລະ ທິດຕາເວັນອອກ​ຂອງ​ອົດ​ສະ​ຕຣາ​ລີ ພ້ອມ​ທັງ​ແຈ້ງ​ເຕືອນ​ເຫດການ​ທີ່​ຈະ​ເກີດ​ນ້ຳນອງ​ຮ້າຍ​ແຮງ​ຢູ່​ໃນ​ລັດ ວິກ​ຕໍ​ເຣຍ ພາຍ​ໃນ​ວັນ​ທີ 19  ແລະ  20 ມັງກອນ​ນີ້.

ຂ່າວທີ່ກ່ຽວຂ້ອງ