ຂ່າວຫຼ້າສຸດ

ຝ່າຍ​ຕ່າງໆ​ເຫັນ​ດີ​ກັບ​ວິທີ​ການ​ແກ້​ໄຂ​ໂດຍ​ທາງ​ການເມືອງ​ໃຫ້​ແກ່​ບັນຫາ​ລີ​ບີ

1.155 21 ມ.ກ. 2020 ຂ່າວຕ່າງປະເທດ
ຝ່າຍ​ຕ່າງໆ​ເຫັນ​ດີ​ກັບ​ວິທີ​ການ​ແກ້​ໄຂ​ໂດຍ​ທາງ​ການເມືອງ​ໃຫ້​ແກ່​ບັນຫາ​ລີ​ບີ

     ນາຍົກລັດຖະມົນຕີ​ເຢຍ​ລະ​ມັນ ແອນ​ເຈີ​ລາ ເມີ​ເກລ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ຫຼັງ​ຈາກ​ສິ້ນ​ສຸດ​ກອງ​ປະຊຸມ​ສັນຕິພາບ​ສາກົນ ກ່ຽວ​ກັບ​ລີ​ບີ ເມື່ອ​ຄ່ຳ​ຄືນ​ຂອງ​ວັນ​ທີ 19 ມັງກອນ​ນີ້ ວ່າ​ທຸກໆ​ຝ່າຍ​ທີ່​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ ແບກ​ແລັງ ຂອງ​ເຢຍ​ລະ​ມັນ ນັ້ນ​ໄດ້​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ການ​ແກ້​ໄຂ​ໂດຍ​ທາງ​ການເມືອງ​ຢ່າງຮອບດ້ານ ເພື່ອ​ແກ້​ໄຂ​ການ​ພິພາດ​ຢູ່​ໃນ​ລີ​ບີ.

    ນາຍົກລັດຖະມົນຕີ ເມີ​ເກລ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ດັ່ງກ່າວ ຊຶ່ງ​ມີ​ເລຂາທິການ​ໃຫຍ່ ສະຫະ​ປະຊາ​ຊາດ ອັນໂຕ​ນີ​ໂອ ກູ​ເຕີ​ເຣ​​ສ ລວມ​ເຖິງ​ລັດຖະມົນຕີ​ການ​ຕ່າງປະເທດ​ເຢຍ​ລະ​ມັນ  ເຮ​ໂກ ມາ​ອາ​​ສ ແລະ ທູດ​ພິເສດ​ຂອງ​ສະຫະ​ປະຊາ​ຊາດ​ປະຈຳ​ລີ​ບີ ​ກັສ​ຊານ ຊາ​ລາມ ເຂົ້າ​ຮ່ວມ​ນຳ​ນັ້ນ ວ່າ​ຝ່າຍ​ຕ່າງໆ​ທີ່​ເຂົ້າ​ຮ່ວມ​ກອງ​ປະຊຸມ ໄດ້​ດຳເນີນ​ການ​ເຈລະຈາ​ຢ່າງ​ມີ​ການ​ຮ່ວມ​ມື ເຂັ້ມ​ງວດ ແລະ ໝາກຜົນ​ທີ່​ບັນລຸ​ໄດ້​ຢູ່​ໃນ​ກອງ​ປະຊຸມ ໄດ້​ເປັນ​ການ​ປະກອບສ່ວນ​ທີ່​ສຳຄັນ ເຂົ້າ​ໃນ​ຄວາມ​ພະຍາຍາມ​ຊຸກຍູ້​ສັນຕິພາບ​ໃຫ້​ແກ່​ລີ​ບີ.

     ທ່ານ​ນາງ ເມີ​ເກລ ຍັງ​ໃຫ້​ຮູ້​ວ່າ ການ​ພົບ​ປະ​ຢູ່​ໃນ​ນະຄອນຫຼວງ​ແບກ​ແລັງ ໃນ​ເທື່ອ​ນີ້ ໄດ້​ກໍ່ໃຫ້ເກີດ​ຄວາມ​ຕັດສິນ​ໃຈ​ຂອງ​ຝ່າຍ​ຕ່າງໆ ໃນ​ການ​ມຸ່ງ​ໄປ​ສູ່​ບັນດາ​ບາດກ້າວ​ຕໍ່​ໄປ ໃນ​ນັ້ນ​ຝ່າຍ​ຕ່າງໆ​ໄດ້​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ຂະ​ບວນ​ການ​ຜູກ​ມັດ​ກັບ​ໜ້າທີ່​ຮັບຜິດຊອບ​ຂອງ​ຝ່າຍ​ຕ່າງໆ​ທີ່​ກ່ຽວຂ້ອງ ໃນ​ການ​ມຸ່ງ​ໄປ​ສູ່​ການ​ປະຕິບັດ​ຄຳ​ສັ່ງ​ຢຸດ​ຍິງ​ຢ່າງຮອບດ້ານ.

ຂ່າວທີ່ກ່ຽວຂ້ອງ