ຂ່າວຫຼ້າສຸດ

ຈີນ - ມຽນ​ມາ ລົງ​ນາມ​ເອກະສານ​ການ​ຮ່ວມ​ມື​ຫຼາຍ​ສະບັບ

1.156 21 ມ.ກ. 2020 ຂ່າວຕ່າງປະເທດ
ຈີນ - ມຽນ​ມາ ລົງ​ນາມ​ເອກະສານ​ການ​ຮ່ວມ​ມື​ຫຼາຍ​ສະບັບ

    ແຫຼ່ງ​ຂ່າວ​ຂອງ​ຈີນ ລາຍ​ງານ​ວ່າ ໃນ​ຕອນ​ຄ່ຳ​ວັນ​ທີ 18 ມັງກອນ​ນີ້ ທ່ານ​ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ສຳເລັດ​ການ​ຢ້ຽມຢາມ​ມຽນ​ມາ ຢ່າງ​ເປັນ​ທາງ​ການ ແລະ ເດີນທາງ​ກັບ​ຄືນ​ປະເທດ​ໃນ​ວັນ​ດຽວ​ກັນ.

     ໃນ​ຂອບ​ການເຄື່ອນໄຫວ​ຢ້ຽມຢາມ​ມຽນ​ມາ​ນັ້ນ ໃນ​ວັນ​ທີ 17 ມັງກອນ ປະທານ ສີ​ຈິ້ນ​ຜິງ ໄດ້​ພົບ​ປະ​ກັບ​ປະທານາທິບໍດີ ວິນ​ມິນ ຂອງ​ມຽນ​ມາ ຢູ່​ທີ່​ນະຄອນຫຼວງ​ເນ​ປີ​ດໍ ໂດຍ​ປະທານ ສີ​ຈິ້ນ​ຜິງ ກ່າວ​ວ່າ ຈີນ ແລະ ມຽນ​ມາ ຄວນ​ຖື​ເອົາ​ການ​ສ້າງຕັ້ງ​ສາຍ​ພົວພັນ​ທາງ​ການ​ທູດ​ຈີນ-ມຽນ​ມາ ຄົບຮອບ 70 ປີ ເປັນ​ກາລະ​ໂອກາດ ຮ່ວມ​ກັນ​ສ້າງ​ຄູ່​ຮ່ວມ​ຊາຕາກຳ​ຈີນ-ມຽນ​ມາ ແລະ  ເປີດ​ສັງກາດ​ໃໝ່​ແຫ່ງ​ການ​ພົວພັນ​ລະຫວ່າງ​ສອງ​ປະເທດ ຈີນ​ຍິນ​ດີ​ຮ່ວມ​ກັນ​ກັບ​ມຽນ​ມາ ໃນ​ການ​ເສີມ​ຂະຫຍາຍ​ຄວາມ​ຮັກແພງ​ກັນ​ຖານ​ອ້າຍ​ນ້ອງ​ທີ່​ເປັນ​ມູນເຊື້ອ ຮ່ວມ​ກັນ​ວາງ​ແຜນຜັງ​ແຫ່ງ​ການ​ພັດທະນາ ແລະ  ເປີດ​ສັງກາດ​ໃໝ່​ແຫ່ງ​ກາ​ພົວພັນ​ຈີນ-ມຽນ​ມາ.

    ທາງ​ດ້ານ​ປະທານາທິບໍດີ ວິນ​ມິນ ໄດ້​ຕາງໜ້າ​ລັດຖະບານ ແລະ ປະຊາຊົນ​ມຽນ​ມາ ສະແດງ​ຄວາມ​ຍິນ​ດີ​ຕ້ອນຮັບ​ຢ່າງ​ອົບ​ອຸ່ນ​ຕໍ່​ທ່ານ​ປະທານ​ສີ​ຈິ້ນ​ຜິງ ທີ່​ຢ້ຽມຢາມ​ມຽນ​ມາ ຢ່າງ​ເປັນ​ທາງ​ການ ແລະ  ກ່າວ​ດ້ວຍ​ຄວາມ​ເຊື່ອ​ໝັ້ນ​ວ່າ ການ​ຢ້ຽມຢາມ​ຄັ້ງ​ນີ້ ຍ່ອມ​ຈະ​ເປັນ​ການ​ຢ້ຽມຢາມ​ຄັ້ງ​ປະຫວັດສາດ ແລະ  ເປັນ​ການ​ເປີດ​ໜ້າ​ໃໝ່​ແຫ່ງ​ການ​ພົວພັນ​ຈີນ-ມຽນ​ມາ ປະທານາທິບໍດີ ວິນ​ມິນ ສະແດງ​ຄວາມ​ຊົມເຊີຍ ຕໍ່​ຜົນສຳເລັດ​ອັນ​ຍິ່ງ​ໃຫຍ່​ຂອງ​ຈີນ ນັບ​ແຕ່​ສະຖາປະນາ ​ສປ ຈີນ ໃນ 70 ປີ​ມາ​ນີ້ ພ້ອມ​ທັງ​ຫວັງ​ວ່າ ຈີນ​ສາມາດ​ແບ່ງປັນ​ບົດຮຽນ​ການ​ປົກຄອງ​ປະເທດ ແລະ  ການ​ຄຸ້ມ​ຄອງ​ລັດ​ຂອງ​ຈີນ ໃຫ້​ປະເທດ​ພວມ​ພັດທະນາ ຊຶ່ງ​ລວມ​ທັງ​ມຽນ​ມາ ໂດຍ​ເຊື່ອ​ວ່າ ບົດຮຽນ​ສຳເລັດ​ຜົນ​ຂອງ​ຈີນ ຈະ​ສາມາດ​ຊ່ວຍເຫຼືອ​ມຽນ​ມາ ໃນ​ການ​ພັດທະນາ​ເສດຖະກິດ ປັບປຸງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ ແລະ  ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ.

    ຂ່າວ​ໃຫ້​ຮູ້​ຕື່ມ​ວ່າ ໃນ​ຕອນ​ເຊົ້າ​ວັນ​ທີ 18 ມັງກອນ​ນີ້ ປະທານ​ສີ​ຈິ້ນ​ຜີງ ໄດ້​ພົບ​ປະ​ເຈລະຈາ​ຢ່າງ​ເປັນ​ທາງ​ການ ກັບ​ທ່ານ​ນາງ ອອງ​ຊານ​ຊູ​ຈີ ທີ່​ປຶກສາ​ແຫ່ງ​ລັດ​ຂອງ​ມຽນ​ມາ ຢູ່​ນະຄອນຫຼວງ​ເນ​ປີ​ດໍ ພາຍຫຼັງ​ການ​ເຈລະຈາ​ແລ້ວ ຜູ້ນຳ​ສອງ​ປະເທດ​ກໍ​ໄດ້​ເຂົ້າ​ຮ່ວມ​ພິທີ​ແລກປ່ຽນ​ເອກະສານ​ຮ່ວມ​ມື​ສອງ​ຝ່າຍ​ຫຼາຍ​ສະບັບ ຊຶ່ງ​ກ່ຽວ​ພັນ​ເຖິງ​ການເມືອງ ເສດຖະກິດ-ການ​ຄ້າ ການ​ລົງທຶນ ວັດທະນະທຳ ທ້ອງຖິ່ນ​ແລະ ຂົງເຂດ​ອື່ນໆ ໃນ​ມື້​ດຽວ​ກັນ ຈີນ-ມຽນ​ມາ ຍັງ​ໄດ້​ອອກ “ຖະແຫຼງການ​ຮ່ວມ​ລະຫວ່າງ​ສາທາລະນະ​ລັດ​ປະຊາຊົນ​ຈີນ​ແລະ ສາທາລະນະ​ລັດ​ສະຫະພັນ​ມຽນ​ມາ”./.

ຂ່າວທີ່ກ່ຽວຂ້ອງ