ຂ່າວຫຼ້າສຸດ

ມີ​ຜູ້​ເສຍ​ຊີວິດ​ຕື່ມ​ອີກ 1 ຄົນ ຍ້ອນ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່​ຢູ່​ໃນ​ຈີນ

1.075 21 ມ.ກ. 2020 ຂ່າວຕ່າງປະເທດ
ມີ​ຜູ້​ເສຍ​ຊີວິດ​ຕື່ມ​ອີກ 1 ຄົນ ຍ້ອນ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່​ຢູ່​ໃນ​ຈີນ

     ເຈົ້າ​ໜ້າທີ່​ສາທາລະນະ​ສຸກ​ໃນ​ນະຄອນ​ຫວູ​ຮັນ ທີ່​ຂຶ້ນ​ກັບ​ແຂວງ ຫູ​ເປີຍ (ພາກ​ກາງຂອງ​ຈີນ) ແຈ້ງ​ໃຫ້​ຮູ້ເມື່ອ​ວັນ​ທີ 20 ມັງກອນ​ນີ້​ວ່າ ຢູ່​ໃນ​ແຂວງ​ດັ່ງກ່າວ ມີ​ການ​ຢັ້ງຢືນ​ຜູ້​ເສຍ​ຊີວິດ​ຕື່ມ​ອີກ 1 ຄົນ ຍ້ອນ​ຕິດ​ໄວ​​ຣັສ​ໂຄ​ໂຣ​ນາ​ສາຍ​ພັນ​ໃໝ່ ທີ່​ເຮັດ​ໃຫ້​ເກີດ​ປອດ​ອັກເສບ​ທີ່​ແປກ​ປະຫຼາດ ນີ້​ເປັນ​ກໍລະນີ​ການ​ເສຍ​ຊີວິດ​ຜູ້​ທີ 3 ຢູ່​ໃນ​ປະເທດ​ຈີນ ຊຶ່ງ​ພົວພັນ​ເຖິງ​ພະຍາດ​ດັ່ງກ່າວ.

    ຂ່າວ​ແຈ້ງວ່າ ໄລ່​ມາ​ຮອດ​ປັດຈຸບັນ​ນີ້ ຢູ່​ໃນ​ນະຄອນ​ຫວູ​ຮັນ ມີ​ຜູ້​ໄດ້​ຮັບ​ການບົ່ງມະຕິ​ພະຍາດ 198 ຄົນ ທີ່​ຕິດພະຍາດ​ປອດ​ອັກເສບ​ທີ່​ແປກ​ປະຫຼາດ ໃນ​ນັ້ນ ສະເພາະ​ແຕ່​ພາຍ​ໃນ 2 ວັນ​ທ້າຍ​ອາທິດ​ທີ່​ຜ່ານ​ມາ ມີ​ຜູ້​ຕິດພະຍາດ​ດັ່ງກ່າວ​ເປັນ​ລາຍ​ໃໝ່ ຈຳນວນ 136 ຄົນ ນອກຈາກ​ນັ້ນແລ້ວ ກໍ​ຍັງ​ມີ​ອີກ 3 ກໍລະນີ ທີ່​ໄດ້​ຮັບ​ການ​ຢັ້ງຢືນ​ວ່າ​ຕິດພະຍາດ​ດັ່ງກ່າວ ຢູ່​ໃນ​ພື້ນ​ທີ່​ນະຄອນຫຼວງ​ປັກ​ກິງ ແລະ  ແຂວງ​ກວາງຕຸ້ງ.

    ກ່ອນ​ໜ້າ​ນັ້ນ ທາງ​ການ​ນະຄອນ​ຫວູ​ຮັນ ແຈ້ງ​ໃຫ້​ຮູ້ເມື່ອ​ວັນ​ທີ 19 ມັງກອນ​ນີ້​ວ່າ ຈຳນວນ​ຜູ້​ຕິດພະຍາດ​ດັ່ງກ່າວ ທີ່​ເກີດ​ຈາກ​ໄວ​​ຣັສ ໂຄ​ໂຣ​ນາ ສາຍ​ພັນ​ໃໝ່ ບໍ່​ໄດ້​ມີ​ປະຫວັດ​ສຳ​ພັດ​ກັບ​ຕະຫຼາດ​ອາຫານ​ທະເລ ທີ່​ຖື​ວ່າ​ເປັນ​ຈຸດ​ລະບາດ​ພະຍາດ​ດັ່ງກ່າວ.

    ໄວ​​ຣັສ ໂຄ​ໂຣ​ນາ​ສາຍ​ພັນ​ໃໝ່ ໄດ້​ກວດ​ພົບ​ເປັນ​ເທື່ອ​ທຳ​ອິດ ເມື່ອ​ທ້າຍ​ເດືອນ​ທັນວາ ປີ 2019 ຢູ່​ທີ່​ນະຄອນ​ຫວູ​ຮັນ ສ່ວນ​ໄວ​​ຣັສ​ໂຄ​ໂຣ​ນາ​ສາຍ​ພັນ​ທຳ​ມະ​ດາ ໄດ້​ຖືກ​ຄົ້ນ​ພົບ​ຢູ່​ໃນ​ພວກ​ນົກ ແລະ ສັດລ້ຽງ​ລູກ​ດ້ວຍ​ນົມ ໂດຍ​ທີ່​ໄວ​​ຣັສ​ສາຍ​ພັນ​ຕ່າງໆ​ນັ້ນ ມີ​ຄວາມ​ຄ້າຍຄື​ກັນ​ໃນ​ດ້ານ​ຮູບ​ໂສມ ແລະ  ໂຄງ​ສ້າງ​ທາງ​ເຄ​ມີ.

    ໄວ​​ຣັສ ໂຄ​ໂຣ​ນາ​ສາຍ​ພັນ OC43 ແລະ ໄວ​​ຣັສ​ໂຄ​ໂຣ​ນາ​ສາຍ​ພັນ 229E ພາໃຫ້​ເກີດ​ພະຍາດ​ທາງ​ເດີນ​ຫາຍໃຈ​ທົ່ວ​ໄປ ເຊັ່ນ​ໄຂ້​ຕົວ​ເຢັນ ແລະ ໄຂ້ຫວັດໃຫຍ່ ໃນ​ຂະນະ​ດຽວ​ກັນ ກໍ​ມີ​ບາງ​ສາຍ​ພັນ​ທີ່​ໜັກ​ກວ່າ ເຊັ່ນ​ໄວ​​ຣັສ​ໂຄ​ໂຣ​ນາ ສາຍ​ພັນ​ທີ່​ເຮັດ​ໃຫ້​ເກີດ​ພະຍາດ​ທາງ​ເດີນ​ຫາຍໃຈ​ຮຸນ​ແຮງ (SARS) ຫຼື​ສາຍ​ພັນ​ທີ່​ເຮັດ​ໃຫ້​ເກີດ​ອາການ​ທາງ​ລະບົບ​ຫາຍໃຈ​ໃນ​ເຂດ​ຕາເວັນ​ອອກ​ກາງ (MERS) ເຖິງ​ຢ່າງໃດ​ກໍ​ຕາມ ສາຍ​ພັນ​ຕ່າງໆ​ດັ່ງກ່າວ ຕ່າງ​ກໍ​ບໍ່​ແມ່ນ​ສາຍ​ພັນ​ໃໝ່​ທີ່​ເຮັດ​ໃຫ້​ເກີດ​ປອດ​ອັກເສບ ທີ່​ເກີດ​ຂຶ້ນ​ຢູ່​ໃນ​ນະຄອນ​ຫວູ​ຮັນ ໃນ​ປັດຈຸບັນ.

ຂ່າວທີ່ກ່ຽວຂ້ອງ