ຂ່າວຫຼ້າສຸດ

ສ ເກົາຫຼີ ຊະນະ ຊອກ​ດາ​ນີ ຜ່ານ​ເຂົ້າ​ຮອບ 4 ທີມ U23

592 21 ມ.ກ. 2020 ວົງຈອນກີລາ
ສ ເກົາຫຼີ ຊະນະ ຊອກ​ດາ​ນີ ຜ່ານ​ເຂົ້າ​ຮອບ 4 ທີມ U23

     ການ​ແຂ່ງຂັນ​ເຕະບານ​ຊາຍ ຮຸ່ນ​ອາຍຸ​ບໍ່​ເກີນ 23 ປີ ຊີງ​ແຊັມ​ອາຊີ 2020 ທີ່​ປະເທດ​ໄທ ເປັນ​ເຈົ້າພາບ ໃນ​ລະຫວ່າງ​ວັນ​ທີ 8–26 ມັງກອນ 2020 ວັນ​ທີ 19 ມັງກອນ​ນີ້ ໃນ​ຮອບ 8 ທີມ​ສຸດ​ທ້າຍ ທີມ​ຊາດ ສ ເກົາຫຼີ ອັນ​ດັບ 1 ກຸ່ມ C ເອົາ​ຊະນະ ທີມ​ຊາດ​ຊອກ​ດາ​ນີ ອັນ​ດັບ 2 ກຸ່ມ D 2-1 ສ ເກົາຫຼີ ໄດ້​ປະຕູ​ຂຶ້ນ​ນຳ​ກ່ອນ​ຈາກ Cho Kyu-seong ນາທີ ທີ 16 ຊອກ​ດາ​ນີ ຕີ​ສະເໝີ​ຈາກ Al-Naimat ນາທີ ທີ 75 ແຕ່ Lee Dong-gyeong ຍິງ​ປະຕູ​ໄຊ​ໃນ​ນາທີ ທີ 90+5.

    ຂະນະ​ທີ່ ທີມ​ຊາດ​ອຸດ​ສະ​ເບ​ກິດ​ສະຖານ ແຊັມ​ເກົ່າ ອັນ​ດັບ 2 ກຸ່ມ C ຖະ​ຫຼົ່ມ ທີມ​ຊາດ​ສະຫະລັດ ອາ​ຣັບ​ເອ​ມີ​ເຣດ ອັນ​ດັບ 1 ກຸ່ມ D ໄປ​ແບບ​ຂາດ​ຮອຍ 5-1 ສະຫະລັດ ອາ​ຣັບ​ເອ​ມິ​ເຣດ ໄດ້​ປະຕູ​ຂຶ້ນ​ນຳ​ກ່ອນ​ຈາກ Al-Ameri ນາທີ ທີ 13 ແຕ່​ຖືກ ອຸດ​ສະ​ເບ​ກິດ​ສະຖານ ຍິງ​ແຊງ 5 ປະຕູ​ລວດ​ຈາກ Alijanov ນາທີ ທີ 16 Kobilov ຍິງ​ຈຸດ​ໂທດ ນາທີ ທີ 26 Bozorov ນາທີ ທີ 41 Yakhshiboev ນາທີ ທີ 84 ແລະ Tukhtasinov ນາທີ ທີ 90+3.

    ສຳລັບ​ຮອບ 4 ສຸດ​ທ້າຍ ຈະ​ແຂ່ງຂັນ​ໃນ​ວັນ​ທີ 22 ມັງກອນ​ນີ້ ເວລາ 17:15 ໂມງ ທີມ​ຊາດ​ອຸດ​ສະ​ເບ​ກິດ​ສະຖານ ພົບ​ກັບ ທີມ​ຊາດ​ຊາ​ອຸ​ດິ​ອາ​ຣາ​ເບຍ ແຂ່ງ​ທີ່​ສະໜາມ​ຣາ​​ຊ​ມັງ​ຄາ​ລາ ແລະ ເວລາ 20:15 ໂມງ ທີມ​ຊາດ ສ ເກົາຫຼີ ພົບ​ກັບ ອົດ​ສະ​ຕຣາ​ລີ ແຂ່ງ​ທີ່​ສະໜາມ​ທຳ​ມະ​ສາດ ຂະນະ​ທີ່​ຮອບ​ຊີງ​ອັນ​ດັບ 3 ແລະ ຊີງ​ນະ​ນະ​ເລີດ​ຈະ​ແຂ່ງຂັນ​ໃນ​ວັນ​ທີ 26 ມັງກອນ​ນີ້ ໂດຍ​ທີມ​ແຊັມ ຮອງ​ແຊັມ ແລະ ອັນ​ດັບ 3 ຈະ​ໄດ້​ສິດ​ເປັນ​ຕົວ​ແທນ​ທະວີບອາຊີ ເຂົ້າ​ຮ່ວມ​ແຂ່ງຂັນ​ເຕະບານ​ຊາຍ​ໃນ​ງານ​ມະ​ຫະ​ກຳ​ກີລາ​ໂອ​ລິມ​ປີກ ຄັ້ງ​ທີ 32 ທີ່​ປະເທດ​ຢີ່​ປຸ່ນ ລະຫວ່າງ​ວັນ​ທີ 24 ກໍລະກົດ ຫາ​ວັນ​ທີ 9 ສິງຫາ 2020.

ຂ່າວທີ່ກ່ຽວຂ້ອງ