ຂ່າວຫຼ້າສຸດ

ສິດທິ​ເດດ ຫວັງ​ປ້ອງ​ກັນ​ແຊັມ 3 ຫຼຽນ​ຄຳ ຊຽງ​ຂວາງ ເກມ

556 21 ມ.ກ. 2020 ວົງຈອນກີລາ
ສິດທິ​ເດດ ຫວັງ​ປ້ອງ​ກັນ​ແຊັມ 3 ຫຼຽນ​ຄຳ ຊຽງ​ຂວາງ ເກມ

    ທ້າວ ສິດ​ທິ​​ີ​ເດດ ສັກ​ບ່ຽງ ນັກກີລາ​ສະນຸກ​ເກີ​ທີມ​ຊາດ​ລາວ ແລະ ແຂວງ​ສະຫວັນ​ນະ​ເຂດ ແຈ້ງ​ໃຫ້​ຊາບ​ວ່າ: ຫຼັງ​ຈາກ​ກັບ​ມາ​ແຕ່​ການ​ເຂົ້າ​ຮ່ວມ​ງານ​ກີລາ​ຊີເກມ 2019 ທີ່​ປະເທດ​ຟີ​ລິບ​ປິນ ກໍ​ມີ​ຫຼາຍ​ແຂວງ ໂດຍ​ສະເພາະ​ແມ່ນ​ເຈົ້າພາບ ແຂວງ​ຊຽງ​ຂວາງ ທີ່​ໄດ້​ຕິດຕໍ່​ມາ​ຫາ​ນ້ອງ ເພື່ອ​ທາບ​ທາມ​ໃຫ້​ຕາງໜ້າ​ແຂວງ​ເຂົ້າ​ຮ່ວມ​ງານ​ມະ​ຫະ​ກີລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ​ເກມ ພ້ອມ​ຍືນ​ຂໍ້​ສະເໜີ​ນະໂຍບາຍ​ພິເສດ​ໃຫ້​ຢ່າງ​ຫຼວງຫຼາຍ ແຕ່​ຍ້ອນ​ອີງໃສ່​ຈິດໃຈ​ຮັກ​ບ້ານ​ເກີດ​ເມືອງ​ນອນ​ແຂວງ​ສະຫວັນ​ນະ​ເຂດ ເຊິ່ງ​ເປັນ​ຜືນ​ແຜ່ນດິນ​ເກີດ​ຂອງ​ແມ່ ສະນັ້ນ ເພື່ອ​ຢາກ​ທົດ​ແທນ​ບຸນຄຸນ​ຂອງ​ແມ່ ຈຶ່ງ​ໄດ້​ຕັດສິນ​ໃຈ​ສືບຕໍ່​ຫຼິ້ນ​ໃຫ້​ແຂວງ​ດັ່ງກ່າວ ເຂົ້າ​ຮ່ວມ​ແຂ່ງຂັນ ຊຽງ​ຂວາງ ເກມ ຢ່າງໃດ​ກໍ​ຕາມ ເມື່ອ​ບໍ​ດົນ​ມາ​ນີ້ ກໍ​ໜ້າ​ເສຍດາຍ​ທີ່​ບໍ່​ໄດ້​ເຂົ້າ​ຮ່ວມ​ແຂ່ງຂັນ​ກີລາ​ສະນຸກ​ເກີ ແຊັມ​ດວນ​ແຊັມ ລາຍການ ຊະບາ ສະນຸກ​ເກີ ຄັບ 2020 ທີ່​ແຂວງ​ປະທຸມ​ທານີ ປະເທດ​ໄທ ຈັດ​ຂຶ້ນ​ລະຫວ່າງ​ວັນ​ທີ 10-15 ມັງກອນ ຜ່ານ​ມາ ຍ້ອນ​ວ່າ​ຕິດ​ພາລະກິດ​ສ່ວນ​ຕົວ ເຖິງ​ຢ່າງໃດ​ກໍ​ດີ ນ້ອງ​ກໍ​ຍັງ​ໝັ່ນ​ເຝິກຝົນ​ຫຼໍ່​ຫຼອມ​ຕົນ​ເອງ​ຢູ່​ສະເໝີ ເພື່ອ​ຮັກສາ​ມາດຕະຖານ​ການ​ຫຼິ້ນ​ໃຫ້​ຄົງ​ເດີມ ປັດຈຸບັນ ແມ່ນ​ພ້ອມ​ທີ່​ຈະ​ໄປ​ປ້ອງ​ກັນ​ແຊັມ​ຫຼຽນ​ຄຳ ໃນ​ຊຽງ​ຂວາງ ເກມ 2020.

     ການ​ແຂ່ງຂັນ​ສະນຸກ​ເກີ ຊຽງ​ຂວາງ ເກມ 2020 ປີ​ນີ້ ມີ​ການ​ຊີງ​ທັງ​ໝົດ 3 ລາຍການ ຈາກ​ປະເພດ​ສະນຸກ​ເກີ ດ່ຽວ​ຊາຍ ທີມ​ຄູ່​ຊາຍ ແລະ ທີມ​ຊາຍ ໃນ​ນັ້ນ ສະເພາະ​ແຂວງ​ສະຫວັນ​ນະ​ເຂດ ແມ່ນ​ສົ່ງ​ນັກກີລາ​ທັງ​ໝົດ ຈຳນວນ 4 ຄົນ ມີ​ຄະນະ​ນຳ 3 ທ່ານ ແລະ ຄູ​ເຝິກ 1 ທ່ານ ສຳລັບ​ຜົນງານ​ຂອງ ສິດທິ​ເດດ ສັກ​ບ່ຽງ ເຄີຍ​ສ້າງ​ປະຫວັດສາດ​ຄວ້າ 3 ຫຼຽນ​ຄຳ ໃຫ້​ແຂວງ​ສະຫວັນ​ນະ​ເຂດ ໃນ​ງານ​ກີລາ​ແຫ່ງ​ຊາດ ຄັ້ງ​ທີ Vlll ທີ່​ແຂວງ​ຈຳປາ​ສັກ ເປັນ​ເຈົ້າພາບ ເມື່ອ​ປີ 2008 ຈາກ​ປະເພດ​ດ່ຽວ​ຊາຍ ທີມ​ຄູ່​ຊາຍ ແລະ ທີມ​ຊາຍ ນອກ​ນັ້ນ ກໍ​ຍັງ​ສ້າງ​ປະຫວັດສາດ​ຢ່າງ​ຍິ່ງ​ໃຫຍ່​ໃຫ້ ​ສປປ ລາວ ດ້ວຍ​ການ​ຄວ້າ​ຫຼຽນ​ຄຳ ງານ​ກີລາ​ຊີເກມ ຄັ້ງ​ທີ XXlX ທີ່​ປະເທດ​ມາ​ເລ​ເຊຍ ເມື່ອ​ປີ 2017 ແລະ ຫຼ້າ​ສຸດ ກໍ​ສາມາດ​ຍາດ​ໄດ້​ຫຼຽນ​ທອງ ຈາກ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ XXX ທີ່​ປະເທດ​ຟີ​ລິບ​ປິນ ເປັນ​ເຈົ້າພາບ ເມື່ອ​ປີ 2019 ຜ່ານ​ມາ. 

ຂ່າວທີ່ກ່ຽວຂ້ອງ