ຂ່າວຫຼ້າສຸດ

ນະຄອນຫຼວງ ເລືອກ​ໄດ້ 31 ນັກ​ກະຕໍ້ ຫວັງ​ຫຼຽນ​ຄຳ ຊຽງ​ຂວາງ ເກມ

443 21 ມ.ກ. 2020 ວົງຈອນກີລາ
ນະຄອນຫຼວງ ເລືອກ​ໄດ້ 31 ນັກ​ກະຕໍ້ ຫວັງ​ຫຼຽນ​ຄຳ ຊຽງ​ຂວາງ ເກມ

    ເມື່ອ​ວັນ​ທີ 16 ມັງກອນ ຜ່ານ​ມາ ທີ່​ໂຮງຮຽນ​ມິດຕະພາບ ວຽງ​ຈັນ-ຮ່າ​ໂນ້ຍ ຫຼື ມ.ປາຍ ສີ​ໂຄດ​ຕະບອງ​ເກົ່າ ທັບ​ນັກ​ກິລາ​ກະຕໍ້​ນະຄອນຫຼວງ​ວຽງ​ຈັນ ໄດ້​ເກັບ​ຕົວ​ຝຶກ​ຊ້ອມ ເພື່ອ​ກຽມ​ເຂົ້າ​ຮ່ວມ​ລ່າ​ຫຼຽນ​ຄຳ ຊຽງ​ຂວາງ ເກມ 2020 ໂດຍ ທ່ານ ຮວງ​ຄຳ ນັນທະ​ລັງສີ ຫົວໜ້າ​ຄູ​ຝຶກ​ທັບ​ນັກ​ກິລາ​ກະຕໍ້​ນະຄອນຫຼວງ​ວຽງ​ຈັນ (ນວ) ໃຫ້​ສຳພາດ ໃນ​ວັນ​ທີ 16 ມັງກອນ 2020 ວ່າ: ປັດຈຸບັນ​ສາມາດ​ຄັດ​ເລືອກ​ນັກກີລາ​ໄດ້​ຄົບ​ຕາມ​ຈຳນວນ 31 ຄົນ ຍິງ 12 ຄົນ ແລະ ໃນ​ວັນ​ທີ 20 ມັງກອນ​ນີ້ ເລີ່ມ​ເອົາ​ນັກກີລາ​ທັງ​ໝົດ​ເຂົ້າ​ນອນ​ສູນ​ທີ່​ສະໂມສອນ​ກີລາ​ໃນ​ຮົ່ມ ພະ​ແນກ​ສຶກ​ສາ​ທິ​ການ ແລະ ກີລາ ນວ ເຂດ​ບ້ານ​ບຶງ​ຂະ​ຫຍອງ ເມືອງ​ສີ​ສັດຕະ​ນາກ ເພື່ອ​ເກັບ​ຕົວ​ເຝິກຊ້ອມ​ຢ່າງ​ເປັນ​ທາງ​ການ ໃນ​ໄລຍະ​ນີ້ ກໍ​ພົບ​ບັນຫາ​ຫຍຸ້ງຍາກ​ຫຼາຍ​ບັນຫາ ເປັນຕົ້ນ​ແມ່ນ​ນັກກີລາ​ບາງ​ຄົນ ກໍ​ຍັງ​ສຶກ​ສາ​ວິຊາ​ຊີບ ແລະ ເປັນ​ນັກຮຽນ.

    ສະນັ້ນ ການ​ເດີນທາງ​ມາ​ເຝິກຊ້ອມ ກໍ​ຍັງ​ບໍ່​ທັນ​ສະ​ໝ່ຳ​ສະເໝີ ແລະ ອຸປະກອນ​ຈຳນວນ​ໜຶ່ງ​ກໍ​ຍັງ​ຂາດເຂີນ ຈຶ່ງ​ຖື​ໂອກາດ​ນີ້ ຂໍ​ຮຽກຮ້ອງ​ມາ​ຍັງ​ບັນດາ​ພາກສ່ວນ​ຫົວໜ່ວຍ​ທຸລະ​ກິດ ແລະ ບໍລິສັດ​ຕ່າງໆ ກໍ​ຄື ພໍ່​ແມ່​ປະຊາຊົນ​ຊາວ​ນະຄອນຫຼວງ ໃຫ້​ຄວາມ​ຊ່ວຍເຫຼືອ​ພວກ​ເຮົາ​ດ້ວຍ ບໍ່​ວ່າ​ຈະ​ເປັນ​ເຂົ້າສານ​ອາຫານ​ແຫ້ງ ປ່ອງ​ປາ ແລະ ອື່ນໆ ທັງ​ໝົດ​ເຫຼົ່ານັ້ນ​ແມ່ນ​ຈະ​ຊ່ວຍ​ບຳລຸງ​ໃຫ້​ນັກກີລາ​ມີ​ກຳລັງ​ໃຈ​ເຂົ້າ​ຮ່ວມ​ສູ້​ຊົນ​ສ້າງ​ຜົນງານ ໃນ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 22 ມີນາ ຫາ 1 ເມສາ 2020.

     ສຳລັບ​ນັກກີລາ​ກະຕໍ້​ທັງ 2 ປະເພດ​ດັ່ງກ່າວ ລ້ວນ​ແຕ່​ເປັນ​ນັກກີລາ​ມື​ໃໝ່ ແລະ ຍັງ​ບໍ່​ທັນ​ມີ​ປະສົບ​ການ ແຕ່​ເຊື່ອ​ວ່າ​ໃນ​ໄລຍະ​ເຝິກຊ້ອມ​ປະສົບ​ການ​ຄູ​ເຝິກ​ທັງ 4 ຄົນ ພວກ​ເຮົາ ຈະ​ສາມາດ​ສ້າງ​ເຂົາເຈົ້າ​ມີ​ການ​ພັດທະນາ ແລະ ສູ້​ກັບ​ແຂວງ​ອື່ນໆ ໃນ​ຊຽງ​ຂວາງ ເກມ ໄດ້​ດີ​ຢ່າງ​ແນ່ນອນ ຂໍ​ໃຫ້ການ​ນຳ​ຂັ້ນ​ສູງ ນວ ກໍ​ຄື ຄະນະ​ບໍລິຫານ​ງານ​ສະຫະພັນ​ກະຕໍ້ ນວ ຕະຫຼອດ​ຮອດ ພໍ່​ແມ່​ປະຊາຊົນ​ຊາວ ນວ ຈົ່ງ​ເຊື່ອ​ໝັ້ນ ແລະ ພວກ​ເຮົາ​ຈະ​ພະຍາຍາມ​ສູ

ຊົນ​ເຮັດ​ໃຫ້​ດີ​ທີ່​ສຸດ ເພື່ອ​ນຳພາ​ທັບ​ນັກກີລາ ກະຕໍ້​ຊິນ​ລອນ ແລະ ກະຕໍ້ ນວ ສ້າງ​ຜົນງານ​ໃຫ້​ດີ​ທີ່​ສຸດ.

     ໃນ​ການ​ແຂ່ງຂັນ​ກະຕໍ້ ຊຽງ​ຂວາງ ເກມ ຄັ້ງ​ນີ້ ແມ່ນ​ຈະ​ມີ​ການ​ແຂ່ງຂັນ​ທີ່​ສະໂມສອນ ດອກ​ປີກ​ໄກ່ ກອງ​ບັນຊາ​ການ​ທະຫານ​ແຂວງ ຈະ​ມີ​ການ​ຊີງ​ທັງ​ໝົດ 14 ລາຍການ ໃນ​ນັ້ນ ສະເພາະ​ກະຕໍ້​ຊິນ​ລອນ ມີ 8 ລາຍການ ປະກອບ​ມີ ປະເພດ​ດິ​ວິ​ຊັນ 1 ຍິງ-ຊາຍ ດິ​ວິ​ຊັນ 2 ຍິງ-ຊາຍ ດິ​ວິ​ຊັນ 3 ຍິງ-ຊາຍ ແລະ ດິ​ວິ​ຊັນ 4 ຍິງ-ຊາຍ ແຕ່​ລະ​ດິ​ວິ​ຊັນ ການ​ໃຫ້​ຄະແນນ​ແມ່ນ​ເລີ່ມ​ທ່າ​ຍາກ​ງ່າຍ​ຂອງ​ນັກກີລາ​ແຕ່​ລະ​ແຂວງ ສ່ວນ​ກະຕໍ້​ແມ່ນ​ມີ​ການ​ຊີງ 6 ລາຍການ ຄື: ປະເພດ​ທີມ​ດ່ຽວ​ຍິງ-ຊາຍ ທີມ​ຄູ່​ຍິງ-ຊາຍ ແລະ ທີມ​ຄູ່​ຊຸດ ຍິງ-ຊາຍ ໃນ​ນັ້ນ ທັບ​ນັກກີລາ​ກະຕໍ້ ນວ ສົ່ງ​ເຂົ້າ​ຮ່ວມ 31 ຄົນ ຍິງ 12 ຄົນ ແລະ ຄະນະ​ນຳ​ພ້ອມ​ຄູ​ເຝິກ 4 ຄົນ ແລະ ຈະ​ລົງ​ແຂ່ງຂັນ​ຄົບ​ທຸກ​ລາຍການ ກໍ​ຄື ປະເພດ​ຊິນ​ລອນ ຍິງ 8 ແລະ ຊາຍ 8 ສ່ວນ​ກະຕໍ້ ຊາຍ 11 ແລະ ຍິງ 5 ຄົນ. 

ຂ່າວທີ່ກ່ຽວຂ້ອງ