ຂ່າວຫຼ້າສຸດ

ຈີນ​ເຜີຍແຜ່ “ບົດ​ລາຍ​ງານ​ທ່ວງ​ທ່າ​ເສດຖະກິດ​ຈີນ​ປີ 2020”

1.144 20 ມ.ກ. 2020 ຂ່າວຕ່າງປະເທດ
ຈີນ​ເຜີຍແຜ່ “ບົດ​ລາຍ​ງານ​ທ່ວງ​ທ່າ​ເສດຖະກິດ​ຈີນ​ປີ 2020”

    ເມື່ອ​ວັນ​ທີ 15 ມັງກອນ​ທີ່​ຜ່ານ​ມາ ສະ​ຖາ​ບັນ​ຄົ້ນຄວ້າ​ເສດຖະກິດ​ປະລິມານ ແລະ ເສດຖະກິດ​ເຕັກນິກ​ຂອງ​ສະພາ​ບັນດິດ​ວິທະຍາສາດ-ສັງຄົມ​ຈີນ ແລະ ສະ​ຖາ​ບັນ​ຄົ້ນຄວ້າ​ທ່ວງ​ທ່າ​ດ້ານ​ເສດຖະກິດ​ຈີນ ຂອງ​ສຳນັກງານ​ໜັງສືພິມ​ເສດຖະກິດ​ລາຍ​ວັນ​ຂອງ​ຈີນ ໄດ້​ເຜີຍແຜ່ “ບົດ​ລາຍ​ງານ​ທ່ວງ​ທ່າ​ເສດຖະກິດ​ຈີນ​ປີ 2020” ໂດຍ​ລະບຸ​ວ່າ ປີ 2020 ແມ່ນ​ປີ​ທີ່​ຈີນ​ຈະ​ສ້າງ​ສັງຄົມ​ທີ່​ອີ່ມ​ໜຳ​ສຳລານ​ໃຫ້​ສຳເລັດ​ຢ່າງຮອບດ້ານ ແລະ ເປັນ​ປີ​ສຸດ​ທ້າຍ​ໃນ “ແຜນການ 5 ປີ​ຄັ້ງ​ທີ 13” ເສດຖະກິດ​ຈີນ​ໄດ້​ພັດທະນາ​ຢ່າງ​ໜັກ​ແໜ້ນ ແລະ ມີ​ທ່ວງ​ທ່າ​ໄປ​ໃນ​ທິດ​ທາງ​ທີ່​ດີ​ຄືເກົ່າ.

     ໃນ​ນັ້ນ ການ​ປະກອບ​ອາຊີບ ແລະ  ລາຄາ​ສິນຄ້າ​ໄດ້​ຮັກສາ​ທ່ວງ​ທ່າ​ທີ່​ໝັ້ນ​ທ່ຽງ​ໂດຍ​ພື້ນຖານ ໂຄງ​ປະກອບ​ອຸດສາຫະກຳ ສືບຕໍ່​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ ແລະ  ຄຸນ​ນະ​ພາບ​ດ້ານ​ການ​ເຕີບ​ໂຕ​ສູງ​ຂຶ້ນ​ກວ່າ​ເກົ່າ.

ບົດ​ລາຍ​ງານ​ຍັງ​ລະບຸ​ວ່າ ເພື່ອ​ຈັດ​ຕັ້ງ​ປະຕິບັດ​ເນື້ອ​ໃນ​ຈິດໃຈ​ກອງ​ປະຊຸມ​ເສດຖະກິດ​ສູນ​ກາງ ເຮັດ​ໃຫ້​ເສດຖະກິດ​ປີ 2020 ພັດທະນາ​ໄດ້​ເປັນ​ຢ່າງ​ດີ​ນັ້ນ ແມ່ນ​ຄວນ​ປະຕິບັດ​ນະໂຍບາຍ​ການ​ເງິນ​ທີ່​ຕັ້ງໜ້າ ປັບປຸງ​ນະໂຍບາຍ​ເງິນຕາ ແລະ ປ່ຽນແປງ​ບົດບາດ​ທີ່​ເປັນ​ອົງ​ປະກອບ​ຂອງ​ນະໂຍບາຍ​ມະຫາ​ພາກ​ແບບ​ລະມັດລະວັງ ພິຈາລະນາ​ການ​ພົວພັນ​ລະຫວ່າງ ການ​ເຕີບ​ໂຕ​ຢ່າງ​ໜັກ​ແໜ້ນ ກັບ​ການ​ແກ້​ໄຂ​ຄວາມ​ສ່ຽງ ເລັ່ງ​ລັດ​ການ​ສ້າງ ແລະ ປັບປຸງ​ກົນ​ໄກ​ໄລຍະ​ຍາວ ໃນ​ການ​ຊຸກຍູ້​ການ​ບໍລິໂພກ​ໃຫ້​ສົມບູນ​ຂຶ້ນ.

ຂ່າວທີ່ກ່ຽວຂ້ອງ