ຂ່າວຫຼ້າສຸດ

ປີ 2019 ເປັນ​ປີ​ທີ່​ຮ້ອນ​ອັນ​ດັບ​ສອງ​ໃນ​ຮອບ 140 ປີຜ່ານມາ

1.008 20 ມ.ກ. 2020 ຂ່າວຕ່າງປະເທດ
ປີ 2019 ເປັນ​ປີ​ທີ່​ຮ້ອນ​ອັນ​ດັບ​ສອງ​ໃນ​ຮອບ 140 ປີຜ່ານມາ

    ອົງການ​ອຸຕຸນິຍົມ​ໂລກ (WMO) ຢືນຢັນ​ເມື່ອ​ວັນ​ທີ 15 ມັງກອນ​ທີ່​ຜ່ານ​ມາ​ວ່າ ປີ 2019 ໄດ້​ກາຍເປັນ​ປີ​ທີ່​ຮ້ອນ​ສ້າງ​ສະຖິຕິ​ເປັນ​ອັນ​ດັບ​ທີ 2 ຂອງ​ໂລກ ໃນ​ຮອບ 140 ປີ​ທີ່​ຜ່ານ​ມາ ນັບ​ແຕ່​ເວລາ​ທີ່​ສະຖິຕິ​ໄດ້​ຮັບ​ການ​ຢັ້ງຢືນ​ເປັນຕົ້ນ​ມາ.

WMO ໃຫ້​ຮູ້​ວ່າ ອຸ່ນ​ຫະ​ພູມ​ສູງ ອາດ​ຈະ​ເປັນ​ສາເຫດ​ທີ່​ເຮັດ​ໃຫ້​ເກີດ​ປະກົດ​ການ​ອາກາດ​ຮຸນ​ແຮງ ເຊັ່ນ​ໄຟ​ໄໝ້​ປ່າ​ຮ້າຍ​ແຮງ ທີ່​ພວມ​ເກີດ​ຂຶ້ນ​ຢູ່​ໃນ​ອົດ​ສະ​ຕຣາ​ລີ ດັ່ງນີ້​ເປັນຕົ້ນ WMO ຊີ້​ໃຫ້​ເຫັນ​ວ່າ ອຸ່ນ​ຫະ​ພູມ​ໂດຍ​ສະເລ່ຍ​ໃນ​ປີ 2019 ໄດ້​ສູງ​ກວ່າ 1,1 ອົງສາ C ເມື່ອ​ທຽບໃສ່​ລະດັບ​ສະເລ່ຍ​ຂອງ​ຍຸກ​ກ່ອນ​ອຸດສາຫະກຳ.

     ທ່ານ ໂອ​ມາ ບັດ​ດູ ຊ່ຽວຊານ​ຈາກ WMO ເວົ້າ​ວ່າ ປີ 2019 ເປັນ​ປີ​ທີ່​ຮ້ອນ​ເປັນ​ສະຖິຕິ​ອັນ​ດັບ​ສອງ ໂດຍ​ເປັນ​ຮອງ​ຈາກ​ປີ​ທີ່​ຮ້ອນ​ທີ່​ສຸດ ຄື​ປີ 2016 ຍ້ອນ​ຜົນ​ກະທົບ​ຂອງ​ປະກົດ​ການ ແອ​​ລ ນີ​ໂຍ (El Nino) ໃນ​ປີ​ນັ້ນ  ຖ້າ​ຫາກ​ບໍ່​ມີ​ອາກາດ​ຮ້ອນ​ທີ່​ສຸດ​ໃນ​ປີ 2016 ແລ້ວ ກໍ​ແມ່ນ​ປີ 2019 ກາຍເປັນ​ປີ​ທີ່​ຮ້ອນ​ທີ່​ສຸດ ໂດຍ​ທີ່​ບໍ່​ມີ​ປະກົດ​ການ El Nino ຕາມ​ນັ້ນແລ້ວ ປີ 2019 ກໍ​ເປັນ​ປີ​ທີ່​ສິ້ນ​ສຸດ​ໄລຍະ 5 ປີ​ທີ່​ຮ້ອນ​ທີ່​ສຸດ (2015-2019).

     ພວກ​ນັກວິທະຍາສາດ ໃຫ້​ຮູ້​ວ່າ ດິນ​ຟ້າ​ອາກາດ​ປ່ຽນແປງ ເບິ່ງ​ຄື​ວ່າ​ໄດ້​ເປັນ​ການ​ປະກອບສ່ວນ ເຮັດ​ໃຫ້​ອາດ​ໃນ​ປີ 2019 ກັບ​ກາຍເປັນ​ຮ້າຍ​ແຮງ​ຢ່າງ​ຍິ່ງ ຊຶ່ງ​ພົ້ນ​ເດັ່ນ​ກໍ​ແມ່ນ​ເກີດ​ສະພາບ​ອາກາດ​ຮ້ອນ​ເປັນ​ປະຫວັດ​ການ​ຢູ່​ໃນ​ທະວີບ​ເອີ​ຣົບ ຫຼື​ພາຍຸ ໂດ​ຣຽນ (Dorian) ທີ່​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 50 ຄົນ ໃນ​ຂະນະ​ທີ່​ພັດ​ຂຶ້ນ​ຝັ່ງ ບາ​ຮາ​ມາ​​ສ ເມື່ອ​ເດືອນ​ກັນຍາ ປີ 2019./.

ຂ່າວທີ່ກ່ຽວຂ້ອງ