ຂ່າວຫຼ້າສຸດ

ຜູ້ນຳ​ຣັດ​ເຊຍ ໃຫ້​ຄວາມ​ເອົາໃຈໃສ່​ຫຼາຍ​ບັນຫາ​ຂອງ​ປະເທດ

1.004 20 ມ.ກ. 2020 ຂ່າວຕ່າງປະເທດ
ຜູ້ນຳ​ຣັດ​ເຊຍ ໃຫ້​ຄວາມ​ເອົາໃຈໃສ່​ຫຼາຍ​ບັນຫາ​ຂອງ​ປະເທດ

     ຂ່າວສານ TASS ຂອງ​ຣັດ​ເຊຍ ລາຍ​ງານ​ວ່າ ໃນ​ຖະແຫຼງການ​ຄັ້ງ​ທີ 16 ຊຶ່ງ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ອ່ານ​ເມື່ອ​ວັນ​ທີ 15 ມັງກອນ​ທີ່​ຜ່ານ​ມາ​ນັ້ນ ທ່ານ​ໄດ້   ເລີ່ມ​ຕົ້ນ​ດ້ວຍ​ການ​ອະທິບາຍ ເຖິງ​ສາເຫດ ທີ່​ເຫດການ​ນີ້​ເກີດ​ຂຶ້ນ​ຕັ້ງແຕ່​ຕົ້ນ​ປີ 2020 ແມ່ນ​ເພື່ອ​ແກ້​ໄຂ​ບັນດາ​ບັນຫາ​ສັງຄົມ ເສດຖະກິດ ໃນ​ຂອບ​ຂະໜາດ​ໃຫຍ່ ທີ່​ຣັດ​ເຊຍ​ພວມ​ປະ​ເຊີນ​ຢູ່​ນັ້ນ ໃຫ້​ໄດ້​ຢ່າງ​ໄວວາ.

    ບັນຫາ​ທຳ​ອິດ​ທີ່​ປະທານາທິບໍດີ ປູ​ຕິນ ຍົກ​ອອກ​ມາ​ຢູ່​ໃນ​ຖະແຫຼງການ​ກໍ​ແມ່ນ​ເລື່ອງ​ປະຊາກອນ ຊຶ່ງ​ຕາມ​ທ່ານ​ແລ້ວ​ກໍ​ແມ່ນ ປັດຈຸບັນ​ນີ້ ຣັດ​ເຊຍ ມີ​ປະຊາກອນ​ເກືອບ 147 ລ້ານ​ຄົນ ແຕ່​ວ່າ​ຣັດ​ເຊຍ​ໄດ້​ກ້າວ​ເຂົ້າ​ສູ່​ສະໄໝ​ທີ່​ມີ​ຄວາມ​ເຄັ່ງ​ຕຶງ​ດ້ານ​ປະຊາກອນ ຜູ້ນຳ​ຣັດ​ເຊຍ ໄດ້​ວາງ​ວິທີ​ການ​ແກ້​ໄຂ​ເລື່ອງ​ດັ່ງກ່າວ​ອອກ​ມາ ຊຶ່ງ​ຕາມ​ນັ້ນແລ້ວ​ກໍ​ແມ່ນ ເມື່ອ​ຮອດ​ປີ 2024 ອັດຕາ​ສ່ວນ​ການ​ເກີດ​ຢູ່​ໃນ​ຣັດ​ເຊຍ ຈະ​ບັນລຸ 1,7% ແທນ​ທີ່​ໃຫ້​ແກ່ 1,5% ໃນ​ປັດຈຸບັນ.

    ນອກຈາກ​ນັ້ນແລ້ວ ບັນດາ​ບັນຫາ​ດ້ານ​ການ​ປະກອບ​ເອກະສານ ກໍ​ຄວນ​ໃຫ້​ງ່າຍດາຍ​ຂຶ້ນ​ຍິ່ງ​ຫຼາຍ​ກໍ​ຍິ່ງ​ດີ ເພື່ອ​ໃຫ້​ບັນດາ​ຄອບຄົວ​ທີ່​ມີ​ເດັກນ້ອຍ ຈະ​ໄດ້​ຮັບ​ຜົນ​ປະໂຫຍດ​ຫຼາຍ​ກວ່າ​ເກົ່າ ປະທານາທິບໍດີ ປູ​ຕິນ ໄດ້​ນຳ​ສະເໜີ ການ​ສະໜອງ​ບ້ວງ​ເງິນ​ຊຳລະ​ຄ່າ​ໃຊ້​ຈ່າຍ​ປະຈຳ​ເດືອນ​ໃຫ້​ແກ່​ເດັກນ້ອຍ ທີ່​ມີ​ອາຍຸ​ແຕ່ 3-7 ປີ ເລີ່ມ​ແຕ່​ວັນ​ທີ 1 ມັງກອນ ປີ 2020 ເປັນຕົ້ນ​ໄປ ໃນ​ຂະນະ​ດຽວ​ກັນ ລັດຖະບານ​ຣັດ​ເຊຍ ກໍ​ໄດ້​ຈັດ​ສັນ​ງົບປະມານ​ສ່ວນ​ກາງ ເພື່ອ​ຊ່ວຍເຫຼືອ​ທ້ອງຖິ່ນ​ຕ່າງໆ ໃນ​ການ​ສ້າງ​ເຮືອນ​ລ້ຽງ​ເດັກ​ໃໝ່ 200.000 ກວ່າ​ແຫ່ງ​ໃນ​ທົ່ວ​ຣັດ​ເຊຍ.

    ໃນ​ຂະນະ​ດຽວ​ກັນ ປະທານາທິບໍດີ ປູ​ຕິນ ໄດ້​ຢືນຢັນ​ວ່າ ການ​ຍົກ​ສູງ​ລະດັບ​ລາຍ​ຮັບ​ຂອງ​ປະຊາຊົນ​ຣັດ​ເຊຍ ເປັນ​ໜ້າທີ່​ທີ່​ສຳຄັນ​ທີ່​ສຸດ ຂອງ​ລັດຖະບານ​ຣັດ​ເຊຍ ແລະ ທະນາຄານ​ກາງ​ຣັດ​ເຊຍ (CBR) ທ່ານ ປູ​ຕິນ ເວົ້າ​ວ່າ ປັດຈຸບັນ​ນີ້ ໂດຍ​ອີງໃສ່​ປຶກ​ແຜ່ນ​ເສດຖະກິດ​ມະຫາ​ພາກ​ທີ່​ໝັ້ນຄົງ ແມ່ນ​ຕ້ອງ​ໄດ້​ສ້າງ​ເງື່ອນໄຂ​ຕ່າງໆ​ອອກ​ມາ ສຳລັບ​ການ​ຍົກ​ສູງ​ຫຼາຍ​ພໍ​ສົມຄວນ ຢູ່​ໃນ​ລາຍ​ຮັບ​ຂອງ​ພົນລະເມືອງ.

ຂ່າວທີ່ກ່ຽວຂ້ອງ