ຂ່າວຫຼ້າສຸດ

ຄະນະນຳກະຊວງປ້ອງກັນປະເທດ ເຂົ້າອວຍພອນ ສະຫາຍເລຂາທິການໃຫຍ່

1.000 20 ມ.ກ. 2020 ຂ່າວໜ້າ​ໜຶ່ງ
ຄະນະນຳກະຊວງປ້ອງກັນປະເທດ ເຂົ້າອວຍພອນ ສະຫາຍເລຂາທິການໃຫຍ່

   ຄະ­ນະ​ນຳ​ກະ­ຊວງ​ປ້ອງ​ກັນ​ປະ­ເທດ ນຳ​ໂດຍ ສະ­ຫາຍ ພົນ​ເອກ ຈັນ​ສະ­ໝອນ ຈັນ​ຍາ​ລາດ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ​ພ້ອມ​ດ້ວຍ​ຄະ­ນະ ໄດ້​ນຳ​ເອົາ​ກະ­ຕ່າ​ດອກ​ໄມ້ ແລະ ກະ­ຕ່າ​ຂອງ­ຂວັນ​ເຂົ້າ​ອວຍ­ພອນ ສະ­ຫາຍ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ແຫ່ງ ສປປ ລາວ ຢູ່​ທີ່​ເຮືອນ​ພັກ​ຂອງ​ເພິ່ນ ວັນ​ທີ 16 ມັງ­ກອນ 2020 ເນື່ອງ​ໃນ​ໂອ­ກາດ​ວັນ​ສ້າງ­ຕັ້ງ​ກອງ­ທັບ ປະ­ຊາ­ຊົນ​ລາວ ຄົບ­ຮອບ 71 ປີ (20 ມັງ­ກອນ 1949-20 ມັງ­ກອນ 2020).

   ໂອ­ກາດ​ນີ້ ສະ­ຫາຍ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ຕາງ­ໜ້າ​ໃຫ້​ແກ່​ພະ­ນັກ­ງານ-ນັກ­ຮົບ​ໃນ​ທົ່ວ​ກອງ­ທັບ ກ່າວ​ສະ­ແດງ​ຄວາມ​ກະ­ຕັນ­ຍູ​ຮູ້​ບຸນ­ຄຸນ ຈົດ​ຈຳ​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ ທີ່​ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ປະ­ກອບ­ສ່ວນ​ໃຫ້​ແກ່​ພາ­ລະ­ກິດ ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ໂດຍ​ສະ­ເພາະ ແມ່ນ​ການ​ຊີ້​ນຳ-ນຳ­ພາ ແລະ ກໍ່­ສ້າງ​ກອງ­ທັບ​ປະ­ຊາ­ຊົນ​ລາວ ໃຫ້​ເຕີບ​ໃຫຍ່​ເຂັ້ມ­ແຂງ ກາຍ­ເປັນ​ກອງ­ທັບ​ປະ­ຕິ­ວັດ ທີ່​ມີ​ລະ­ບຽບ​ແບບ­ແຜນ​ທັນ​ສະ­ໄໝ ພ້ອມ​ທັງ​ອວຍ­ພອນ​ໃຫ້​ສະ­ຫາຍ ບຸນ​ຍັງ ວໍ­ລະ​ຈິດ ຈົ່ງ​ມີ​ສຸ­ຂະ­ພາບ​ແຂງ­ແຮງ ມີ​ພາ­ລະ​ໄມ​ສົມ­ບູນ ເປັນ​ທຸງ­ໄຊ ເຕົ້າ­ໂຮມ​ຄວາມ​ສາ­ມັກ­ຄີ​ຂອງ​ປວງ​ຊົນ​ລາວ​ບັນ­ດາ­ເຜົ່າ ໃກ້­ຊິດ­ຕິດ­ແທດ​ຊຸກ­ຍູ້​ສົ່ງ­ເສີມ ແລະ ກໍ່­ສ້າງ​ກອງ­ທັບ​ປະ­ຊາ­ຊົນ​ລາວ​ໃຫ້​ມີ​ບາດ­ກ້າວ​ອັນ​ໃໝ່ ເພາະ​ສະ­ຫາຍ​ກໍ​ແມ່ນ​ຜູ້​ໜຶ່ງ​ທີ່​ໄດ້​ເຄື່ອນ​ໄຫວ​ປະ­ຕິ­ວັດ ແລະ ພົວ­ພັນ​ກັບ​ກອງ­ທັບ​ມາ​ແຕ່​ຫົວ­ທີ ເປັນ​ຜູ້​ມີ​ບົດ­ຮຽນ ປະ­ສົບ​ການ​ໃນ​ວຽກ​ງານ​ຕົວ​ຈິງ​ຜ່ານ​ມາ ແນ­ໃສ່​ເພື່ອ​ເຮັດ​ໃຫ້​ກອງ­ທັບ​ປະ­ຊາ­ຊົນ​ລາວ ເປັນ​ກອງ­ທັບ​ທີ່​ມີ​ແບບ­ແຜນ​ທັນ​ສະ­ໄໝ ແລະ ນັບ​ມື້​ເຂັ້ມ­ແຂງ​ກ້າວ​ຂຶ້ນ​ຢ່າງ​ບໍ່​ຢຸດ​ຢັ້ງ.

   ໂອ­ກາດ​ດຽວ​ກັນ​ນີ້ ສະ­ຫາຍ ບຸນ​ຍັງ ວໍ­ລະ​ຈິດ ກໍ​ໄດ້​ສະ­ແດງ​ຄວາມ​ຂອບ­ໃຈ ຕໍ່​ຄະ­ນະ​ນຳ​ກະ­ຊວງ​ປ້ອງ​ກັນ​ປະ­ເທດ ທີ່​ມາ​ອວຍ­ພອນ​ໃນ​ຄັ້ງ​ນີ້ ພ້ອມ​ທັງ​ກ່າວ​ອວຍ­ພອນ​ໃຫ້​ພະ­ນັກ­ງານ-ນັກ­ຮົບ​ທຸກ​ຖ້ວນ​ໜ້າ ເນື່ອງ​ໃນ​ໂອ­ກາດ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 71 ປີ ຈົ່ງ​ມີ​ສຸ­ຂະ­ພາບ​ແຂງ­ແຮງ ເຮັດ​ສຳ­ເລັດ​ໜ້າ­ທີ່​ການ­ເມືອງ​ຂອງ​ຕົນ ທີ່ ພັກ-ລັດ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ​ມອບ​ໝາຍ​ໃຫ້ ເວ­ລາ​ໃດ​ກໍ​ຈົ່ງ​ເປັນ​ກຳ­ແພງ​ອັນ​ແໜ້ນ­ໜາ ແລະ ເປັນ​ເສົາ­ຄ້ຳ ແຂງ​ແກ່ນ​ຂອງ​ປະ­ເທດ​ຊາດ ສົມ​ກັບ​ເປັນ​ກອງ­ທັບ​ວີ­ລະ​ຊົນ​ຂອງ​ຊາດ​ລາວ ວີ­ລະ​ຊົນ​ຄົນ​ອາດ​ຫານ.

ຂ່າວທີ່ກ່ຽວຂ້ອງ