ຂ່າວຫຼ້າສຸດ

ສະຫຼອງວັນສ້າງຕັ້ງກອງທັບ ແລະ ວັນສ້າງຕັ້ງເຫຼົ່າຮົບສືບຂ່າວ

926 20 ມ.ກ. 2020 ຂ່າວໜ້າ​ໜຶ່ງ
ສະຫຼອງວັນສ້າງຕັ້ງກອງທັບ ແລະ ວັນສ້າງຕັ້ງເຫຼົ່າຮົບສືບຂ່າວ

   ການ­ສະ­ແດງ​ກຳ­ລັງ​ຂອງ​ເຫຼົ່າ​ຮົບ​ສືບ​ຂ່າວ​ການ​ທະ­ຫານ ກອງ­ທັບ​ປະ­ຊາ­ຊົນ​ລາວ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 71 ປີ (20/1/1949-20/1/2020) ແລະ ວັນ​ສ້າງ­ຕັ້ງ​ເຫຼົ່າ​ຮົບ​ສືບ​ຂ່າວ ກອງ­ທັບ​ປະ­ຊາ­ຊົນ​ລາວ ຄົບ­ຮອບ 65 ປີ (25/12/1954-25/12/2020) ຈັດ​ຂຶ້ນ​ວັນ​ທີ 17 ມັງ­ກອນ 2020 ທີ່​ວິ­ທະ­ຍາ­ຄານ​ກົມ​ມະ​ດຳ ກະ­ຊວງ​ປ້ອງ​ກັນ​ປະ­ເທດ ມີ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ພົນ​ເອກ ຈັນ​ສະ­ໝອນ ຈັນ​ຍາ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ທ່ານ ຄຳ​ພັນ ພົມ​ມະ​ທັດ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ນາຍ ແລະ ພົນ­ທະ­ຫານ ແລະ ມວນ​ຊົນ​ບ້ານ​ອ້ອມ​ຂ້າງ​ເຂົ້າ​ຮ່ວມ.

   ໃນ​ພິ­ທີ ທ່ານ​ພັນ​ໂທ ສີ​ເພັງ ສຸ­ລະ​ເດດ ຫົວ­ໜ້າ​ຫ້ອງ­ການ​ເສ­ນາ​ທິ​ການ ກົມ 213 ຜູ້​ບັນ­ຊາ​ພາກ​ສະ­ໜາມ ໄດ້​ຂຶ້ນ​ລາຍ​ງານ​ແຜນ­ການ​ຊ້ອມ​ຮົບ ຍິງ​ລູກ­ປືນ​ແທ້​ພາຍ​ໃຕ້​ລະ­ຫັດ​ຄົມ​ໃນ​ຟັກ-01 2020 ວ່າ: ຈຸດ­ປະ­ສົງ​ໃນ​ການ​ຫັດ​ແອບ​ຊ້ອມ​ຮົບ ເພື່ອ​ຮັບ­ປະ­ກັນ​ໃຫ້​ກຳ­ລັງ ກົມ​ກອງ​ເຫຼົ່າ​ຮົບ​ສືບ​ຂ່າວ ໄດ້​ຮັບ​ການ​ອົບ­ຮົມ​ຫັດ​ແອບ​ຢ່າງ​ຕໍ່​ເນື່ອງ ປະ­ຕິ­ບັດ​ລະ­ບຽບ​ພາກ​ສະ­ໜາມ ຊຳ­ນິ​ຊຳ­ນານ​ທາງ​ດ້ານ​ສິ­ລະ​ປະ­ຍຸດ ຍຸດ­ທະ­ວິ­ທີ​ສືບ​ຂ່າວ ເຕັກ­ນິກ​ການ​ນຳ​ໃຊ້​ອາ­ວຸດ-ກະ​ສູນ ອຸ­ປະ­ກອນ​ປະ­ກອບ​ສະ­ເພາະ​ສືບ​ຂ່າວ ຮູບ​ແບບ​ການ​ປະ­ຕິ­ບັດ​ໜ້າ­ທີ່​ສູ້​ຮົບ​ປະ­ສານ​ກັບ​ເຫຼົ່າ​ທະ­ຫານ​ອາ­ກາດ ກຽມ­ພ້ອມ​ປະ­ຕິ­ບັດ​ໜ້າ­ທີ່​ແກ້​ໄຂ​ສະ­ພາບ​ການ​ຕ່າງໆ ຕາມ​ຄຳ​ສັ່ງ​ຂອງ​ຂັ້ນ​ເທິງ​ໃນ​ສະ­ເພາະ​ໜ້າ ແລະ ຍາວ​ນານ.

   ໃນ​ຫຼາຍ​ປີ­ຜ່ານ­ມາ ກຳ­ລັງ​ກົມ​ກອງ​ເຫຼົ່າ​ຮົບ​ສືບ​ຂ່າວ ກອງ­ທັບ​ປະ­ຊາ­ຊົນ​ລາວ ໄດ້​ຈັດ​ຕັ້ງ​ອົບ­ຮົມ-ຫັດ​ແອບ​ຕາມ​ຄຳ​ສັ່ງ​ອົບ­ຮົມ​ຫັດ​ແອບ​ປະ­ຈຳ​ປີ​ຂອງ​ກົມ​ອົບ­ຮົມ ກົມ​ໃຫຍ່​ເສ­ນາ​ທິ​ການ​ກອງ­ທັບ​ຢ່າງ​ຕໍ່​ເນື່ອງ ໂດຍ​ສຸມ​ໃສ່​ອົບ­ຮົມ-ຫັດ​ແອບ​ການ​ທະ­ຫານ ການ​ບັນ­ຊາ ໃນ​ນີ້ ໄດ້​ສຸມ​ໃສ່​ອົບ­ຮົມ-ຫັດ​ແອບ​ສິ­ລະ​ປະ­ຍຸດ ຍຸດ­ທະ­ວິ­ທີ​ສືບ​ຂ່າວ​ເປັນ​ຈຸດ​ໜັກ ເພື່ອ​ໃຫ້​ເຫັນ​ເຖິງ​ການ​ເຕີບ​ໃຫຍ່​ຢ່າງ​ເຂັ້ມ­ແຂງ ແລະ ຍິ່ງ​ໃຫຍ່​ຂອງ​ເຫຼົ່າ​ຮົບ​ສືບ​ຂ່າວ ເຊິ່ງ​ການ­ຈັດ­ຕັ້ງ​ຊ້ອມ​ຮົບ​ຍິງ​ລູກ­ປືນ​ແທ້​ຄັ້ງ​ນີ້ ໄດ້​ສັງ​ລວມ​ເອົາ 9 ເນື້ອ​ໃນ​ມາ​ສະ­ແດງ ຄື: ການ­ສະ­ແດງ​ສິ­ລະ​ປະ​ຂອງ​ເຫຼົ່າ​ຮົບ​ສືບ​ຂ່າວ ກອງ­ພັນ​ນ້ອຍ​ສືບ​ຂ່າວ​ສະ­ເພາະ​ກິດ 233 ສະ­ແດງ​ມວຍ​ສືບ​ຂ່າວ ຈຳ­ນວນ​ພົນ 163 ຄົນ ໃນ​ນີ້ ມວຍ​ຫັດ​ຊາຍ 90 ຄົນ ມວຍ​ສູ້​ຮົບ​ຍິງ-ຊາຍ 23 ຄົນ ສືບ​ຂ່າວ​ຜ່ານ​ສິ່ງ​ກີດ­ຂວາງ 20 ຄົນ ມວຍ​ສືບ​ຂ່າວ​ກຳ­ລັງ​ພາຍ​ໃນ 20 ຄົນ ກອງ­ຮ້ອຍ​ສືບ​ຂ່າວ​ຍຸດ​ໂດດ​ຈ້ອງ 50 ຄົນ ໜ່ວຍ​ສືບ​ຂ່າວ​ສະ­ເພາະ​ກິດ ສືບ​ຂ່າວ​ຍຸດ­ທະ­ວິ­ທີ​ຂອງ 2 ງ 233 ແລະ ງ 433 ຍິງ​ປືນ​ຈຳ­ນວນ​ພົນ 33 ຄົນ ໜ່ວຍ​ສືບ​ຂ່າວ​ຍຸດ­ທະ­ວິ­ທີ ງ 433 ຈຳ­ນວນ​ພົນ 15 ຄົນ ປະ­ກອບ​ອາ­ວຸດ​ລັບ​ສະ­ເພາະ​ຄົບ​ຊຸດ ສູ້​ຮົບ​ປິດ​ລັບ​ພາງ​ຕົວ ຕິດ​ແທດ​ເປົ້າ​ໝາຍ​ຈຸດ​ໜັກ ປະ­ຕິ­ບັດ​ໜ້າ­ທີ່​ຕີ-ຈັບ​ບັກ​ຜູ້​ບັນ­ຊາ​ແກນ​ນຳ ໄມ້​ມື​ໃນ​ກຸ່ມ​ຊຸມ­ນຸມ​ປະ​ທ້ວງ ໜ່ວຍ​ສືບ​ຂ່າວ​ສະ­ເພາະ​ກິດ ງ 233 ຈຳ­ນວນ​ພົນ 35 ຄົນ ປະ­ກອບ​ອາ­ວຸດ​ລັບ​ສະ­ເພາະ​ຄົບ​ຊຸດ​ສູ້​ຮົບ ເພີ່ມ​ທະ­ວີ​ຍົນ​ຂຶ້ນ​ຊື່ 1 ລຳ ປິດ​ລັບ​ບັງ­ເອີນ​ໂຢດ​ກຳ­ລັງ​ລົງ​ທາງ​ອາ­ກາດ ສົມ­ທົບ​ພາກ​ພື້ນ​ດິນ ພ້ອມ​ກັນ​ແຕກ​ສຽງ​ປືນ​ພາບ​ດຽວ​ແຕ່​ເທິງ​ລົງ​ລຸ່ມ-ຕີ​ແຕ່​ລຸ່ມ​ຂຶ້ນ​ເທິງ ດັບ​ສູນ​ໄມ້​ມື​ອັນ­ຕະ­ລາຍ​ປະ­ກອບ​ອາ­ວຸດ ຈັບ​ບັກ​ຜູ້​ບັນ­ຊາ​ແກນ​ນຳ ກອບ​ກູ້​ຊ່ວຍ­ເຫຼືອ​ຕົວ​ປະ­ກັນ​ປອດ​ໄພ ໜ່ວຍ​ສືບ​ຂ່າວ​ໂດດ​ຈ້ອງ​ຍຸດ­ທະ­ວິ­ທີ ງ 433 ຈຳ­ນວນ​ພົນ 30 ຄົນ ປະ­ກອບ​ອາ­ວຸດ​ຄົບ​ຊຸດ​ສູ້​ຮົບ ເພີ່ມ​ທະ­ວີ​ມວນ​ສານ​ລະ­ເບີດ​ສະ­ເພາະ​ຍົນ​ຂຶ້ນ​ຊື່ 2 ລຳ ໂດດ​ລົງ​ແນວ​ຫຼັງ ປິດ​ລັບ​ບັງ­ເອີນ​ຫຼອນ​ຕີ​ທຳ­ລາຍ​ຂຸມ​ປືນ​ໃຫຍ່ 155 ມມ ຂອງ​ສັດ­ຕູ​ຢູ່​ຈຸດ​ສູງ 189 (2919) ກອງ­ຮ້ອຍ​ສືບ​ຂ່າວ​ຍຸດ­ທະ­ວິ­ທີ ງ 433 ຈຳ­ນວນ​ພົນ 35 ຄົນ ປະ­ກອບ​ອາ­ວຸດ​ຄົບ​ຊຸດ​ສູ້​ຮົບ ເພີ່ມ​ທະ­ວີ​ມວນ​ສານ​ລະ­ເບີດ​ສະ­ເພາະ ຍົນ​ຂຶ້ນ​ຊື່ 2 ລຳ ໂຢດ​ພົນ​ລົງ​ແນວ​ຫຼັງ​ປິດ​ລັບ​ບັງ­ເອີນ ຫຼອນ​ຕີ​ທຳ­ລາຍ​ສຳ­ນັກ​ບັນ­ຊາ ງທຮ ຂອງ​ສັດ­ຕູ​ຢູ່​ຈຸດ​ສູງ 224 (2920) ແລະ ຍົນ​ສູ້​ຮົບ​ບິນ​ສະ­ແດງ 2 ລຳ 2-3 ຮອບ ອັນ​ໄດ້​ສ້າງ​ຄວາມ​ສົນ­ໃຈ​ໃຫ້​ແກ່​ຜູ້​ເຂົ້າ​ຮ່ວມ​ຊົມ ທີ່​ເຫັນ​ເຖິງ​ການ​ເຕີບ​ໃຫຍ່​ຂະ­ຫຍາຍ­ຕົວ ແລະ ການ​ພັດ­ທະ­ນາ​ຂອງ​ກອງ­ທັບ​ປະ­ຊາ­ຊົນ​ລາວ ໂດຍ​ສະ­ເພາະ ເຫຼົ່າ​ຮົບ​ສືບ​ຂ່າວ​ໃນ​ໄລ­ຍະ​ຜ່ານ​ມາ.

ຂ່າວທີ່ກ່ຽວຂ້ອງ