ຂ່າວຫຼ້າສຸດ

ເຈົ້າຄອງ ເນັ້ນໃຫ້ບ້ານວຽງຈະເລີນ ປະຕິບັດວຽກຈຸດສຸມ 3 ຫຼຸດ 3 ເພີ່ມ

1.411 17 ມ.ກ. 2020 ຂ່າວໜ້າ​ໜຶ່ງ
ເຈົ້າຄອງ ເນັ້ນໃຫ້ບ້ານວຽງຈະເລີນ ປະຕິບັດວຽກຈຸດສຸມ 3 ຫຼຸດ 3 ເພີ່ມ

   ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ໄດ້​ລົງ​ເຄື່ອນ​ໄຫວ​ຢ້ຽມ­ຢາມ ແລະ ພົບ​ປະ​ໂອ້​ລົມ​ກັບ​ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ ບ້ານ​ວຽງ​ຈະ­ເລີນ ວັນ​ທີ 14 ມັງ­ກອນ 2020 ທີ່​ວັດ​ບ້ານ​ດັ່ງ­ກ່າວ ຖືກ​ຕ້ອນ­ຮັບ​ຈາກ​ທ່ານ ພຸດ​ທະ​ພອນ ໂຄດ​ປັນ­ຍາ ຮອງ​ເຈົ້າ­ເມືອງ​ໄຊ​ເສດ​ຖາ ພ້ອມ​ດ້ວຍ​ຫົວ­ໜ້າ​ຫ້ອງ­ການ​ກ່ຽວ­ຂ້ອງ​ອ້ອມ​ຂ້າງ​ເມືອງ ແລະ ອຳ­ນາດ​ການ​ປົກ­ຄອງ​ບ້ານ​ວຽງ​ຈະ­ເລີນ.

   ທ່ານ ຊາຍ​ທະ​ນົງ ອຸ່ນ​ສີ­ດາ ນາຍ­ບ້ານ​ວຽງ​ຈະ­ເລີນ ໄດ້​ລາຍ​ງານ​ສະ­ພາບ​ການ​ລວມ​ໂດຍ​ຫຍໍ້ ການ​ຈັດ ຕັ້ງ​ປະ­ຕິ­ບັດ​ວຽກ​ງານ​ໄລ­ຍະ 6 ເດືອນ​ຜ່ານ​ມາ ຍົກ​ໃຫ້​ເຫັນ​ດ້ານ​ຕັ້ງ­ໜ້າ ດ້ານ​ຄົງ​ຄ້າງ​ສິ່ງ​ທ້າ​ທາຍ ແລະ ທິດ​ທາງ​ແຜນ­ການ ປີ 2020 ວ່າ: ບ້ານ​ວຽງ​ຈະ­ເລີນ ມີ 637 ຫຼັງ­ຄາ​ເຮືອນ ແບ່ງ​ອອກ​ເປັນ 45  ໜ່ວຍ ມີ 565 ຄອບ­ຄົວ ມີ​ພົນ­ລະ­ເມືອງ​ທັງ​ໝົດ 2.931 ຄົນ ຍິງ 1.459 ຄົນ  ໃນ​ປີ­ຜ່ານ­ມາ​ໄດ້​ປັບ­ປຸງ​ອົງ­ການ​ປົກ­ຄອງ​ບ້ານ​ຕາມ 5 ໜ່ວຍ​ງານ ພ້ອມ​ນັ້ນ ການ​ແກ້​ໄຂ​ຂໍ້​ຂັດ​ແຍ່ງ​ຂັ້ນ​ບ້ານ​ໄດ້​ຮັບ​ຄຳ​ຮ້ອງ ທັງ​ໝົດ 9 ເລື່ອງ​ແກ້​ໄຂ​ໄດ້​ທັງ​ໝົດ ໃນ​ນີ້ ສາຍ​ຜົວ​ເມຍ 4 ເລື່ອງ ໜີ້​ສິນ 5 ເລື່ອງ ມີ​ຫົວ­ໜ່ວຍ​ທຸ­ລະ​ກິດ 89 ພື້ນ ຖານ ນວ ຄຸ້ມ​ຄອງ 9 ພື້ນ­ຖານ ເມືອງ​ຄຸ້ມ​ຄອງ 53 ພື້ນ­ຖານ ແລະ ບ້ານ​ຄຸ້ມ​ຄອງ 27 ພື້ນ­ຖານ  ເກັບ​ຄ່າ​ທຳ­ນຽມ​ທີ່​ດິນ ປີ 2019 ຕົວ​ເລກ​ແຜນ­ການ 64,19 ລ້ານ​ກີບ ປະ­ຕິ­ບັດ​ໄດ້ 47,75 ລ້ານ​ກີບ ເທົ່າ​ກັບ 74% ເກັບ​ຄ່າ​ທຳ­ນຽມ​ອາ­ກອນ​ຕົວ​ເລກ​ແຜນ­ການ 27,68 ລ້ານ​ກີບ ປະ­ຕິ­ບັດ​ໄດ້ 22,22 ລ້ານ​ກີບ ນອກ​ນີ້​ໄດ້​ສະ­ເໜີ​ໃຫ້​ເຈົ້າ​ຄອງ ນວ ຊ່ວຍ​ພິ­ຈາ­ລະ­ນາ ເປັນ­ຕົ້ນ ງົບ­ປະ­ມານ​ເພື່ອ​ຍົກ​ລະ­ດັບ​ເສັ້ນ­ທາງ​ຮ່ອມ 14 ທາງ​ເຂົ້າ​ຫ້ອງ­ການ​ບ້ານ ຈາກ​ທາງ​ດິນ​ແດງ​ໃຫ້​ເປັນ​ທາງ​ເບ​ຕົງ ເພາະ­ວ່າ​ມີ​ປະ­ຊາ­ຊົນ​ນຳ​ໃຊ້​ເສັ້ນ­ທາງ​ຮ່ອມ​ນີ້​ຫຼາຍ ນອກ­ຈາກ​ບ້ານ​ວຽງ​ຈະ­ເລີນ​ແລ້ວ ຍັງ​ມີ​ບ້ານ​ໂພນ​ພະ​ເນົາ ທີ່​ມາ​ນຳ​ໃຊ້ ໃນ​ນີ້ ບ້ານ​ວຽງ​ຈະ­ເລີນ ມີ 9 ໜ່ວຍ ມີ 115 ຄອບ­ຄົວ ມີ​ຫ້ອງ​ແຖວ​ໃຫ້​ເຊົ່າ 115 ຫ້ອງ ມີ​ດິນ​ເປົ່າ​ຫວ່າງ 15 ຕອນ ສ່ວນ​ບ້ານ​ໂພນ​ພະ​ເນົາ ມີ 47 ຄອບ­ຄົວ ມີ​ຫ້ອງ​ແຖວ​ໃຫ້​ເຊົ່າ 10 ຫຼັງ ລວມ​ທັງ​ໝົດ 177 ຄອບ­ຄົວ ທີ່​ຜ່ານ​ເສັ້ນ­ທາງ​ນີ້ ນອກ​ນັ້ນ ຊ່ວຍ​ພິ­ຈາ­ລະ­ນາ​ສ້ອມ­ແປງ​ຂົວ​ເບ​ເລ​ຂ້າມ​ນ້ຳ​ຮ່ອງ​ແຊງ ຈາກ​ບ້ານ​ວຽງ​ຈະ­ເລີນ ໄປ​ຫາ​ບ້ານ​ໂພນ​ພະ​ເນົາ ໃນ​ລະ­ດູ­ຝົນ​ຜ່ານ​ມາ​ກໍ​ເກີດ​ອຸ­ບັດ­ເຫດ​ລົດ­ຈັກ​ລົ້ມ​ຢູ່​ຂົວ​ແຫ່ງ​ນີ້ ເຮັດ​ໃຫ້​ມີ​ເດັກ­ນ້ອຍ​ຕົກ­ລົງ​ນ້ຳ​ເສຍ​ຊີ­ວິດ.

   ໂອ­ກາດ​ນີ້ ທ່ານ​ເຈົ້າ​ຄອງ ນວ ໄດ້​ມີ​ຄຳ​ເຫັນ​ພ້ອມ​ທັງ​ໃຫ້​ທິດ​ຊີ້​ນຳ ກ່ອນ​ອື່ນ​ທ່ານ​ໄດ້​ຍ້ອງ­ຍໍ​ຊົມ­ເຊີຍ​ອຳ­ນາດ​ການ​ປົກ­ຄອງ​ບ້ານ ຕະ­ຫຼອດ​ຮອດ​ປະ­ຊາ­ຊົນ​ທີ່​ໄດ້​ພ້ອມ​ກັນ​ເອົາ­ໃຈ­ໃສ່ ໃນ​ການ​ສ້າງ­ສາ​ພັດ­ທະ­ນາ​ບ້ານ​ຂອງ​ຕົນ​ເອງ ໃຫ້​ມີ​ຄວາມ​ຈະ­ເລີນ​ເປັນ​ກ້າວໆ ມີ​ຄວາມ​ສະ­ຫງົບ ສ່ວນ​ສອງ​ບັນ­ຫາ​ທີ່​ນາຍ­ບ້ານ​ສະ­ເໜີ​ມາ​ນັ້ນ​ແມ່ນ​ມອບ​ໃຫ້­ການ​ນຳ​ເມືອງ ແລະ ຫ້ອງ­ການ​ກ່ຽວ­ຂ້ອງ​ຊ່ວຍ​ກັນ​ພິ­ຈາ­ລະ­ນາ​ເປັນ​ໝູ່​ຄະ­ນະ ໃນ​ການ​ແກ້​ໄຂ​ບັນ­ຫາ​ດັ່ງ­ກ່າວ ແລະ ການ​ປະ​ເມີນ​ກອງ​ປະ­ຊຸມ​ໃຫຍ່​ຂອງ​ໜ່ວຍ​ພັກ ບ້ານ​ວຽງ​ຈະ­ເລີນ 6 ເດືອນ​ຜ່ານ​ມາ ເຫັນ​ວ່າ ປະ­ຕິ­ບັດ​ໄດ້​ສຳ­ເລັດ​ຕາມ​ເນື້ອ​ໃນ​ວາງ​ອອກ ໂດຍ​ພື້ນ­ຖານ​ໃຫ້​ນຳ​ເອົາ​ບົດ­ຮຽນ​ການ​ປະ​ເມີນ​ຢູ່​ບ້ານ​ວຽງ​ຈະ­ເລີນ ນຳ­ໄປ​ຈັດ​ຕັ້ງ​ປະ­ຕິ­ບັດ​ຢູ່​ໃນ​ບ້ານ​ອື່ນໆ ເຮັດ​ໃຫ້­ການ​ປະ​ເມີນ​ມີ​ຄວາມ​ສະ­ດວກ​ສະ­ບາຍ ພ້ອມ​ນັ້ນ ຍັງ​ໄດ້​ເນັ້ນ​ໃຫ້​ສືບ­ຕໍ່​ປະ­ຕິ­ບັດ​ມະ­ຕິ​ກົມ​ການ­ເມືອງ ວ່າ​ດ້ວຍ​ການ​ສ້າງ​ບ້ານ​ພັດ­ທະ­ນາ​ໃຫ້​ສູງ​ຂຶ້ນ ໃນ​ນີ້ ໃຫ້​ກວດ­ເບິ່ງ​ແຕ່​ລະ​ໂຕ​ຊີ້​ວັດ​ອັນ​ໃດ​ເຮັດ​ບໍ່​ໄດ້​ໃຫ້​ຜັນ​ຂະ­ຫຍາຍ​ເປັນ​ບັນ­ຫາ​ພື້ນ­ຖານ​ຂອງ​ບ້ານ ຈັດ​ຕັ້ງ​ປະ­ຕິ­ບັດ​ມະ­ຕິ​ອົງ­ຄະ​ນະ​ພັກ ນວ ພື້ນ­ຖານ​ຈັດ​ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ 6 ຂອງ​ອົງ­ຄະ​ນະ​ພັກ ນວ ໃຫ້​ກວດ­ເບິ່ງ​ແຕ່​ລະ​ໂຄງ­ການ ແລະ ປະ­ຕິ­ບັດ​ຕາມ​ແຜນ​ວຽກ​ຈຸດ​ສຸມ 3 ຫຼຸດ 3 ເພີ່ມ ແນ­ໃສ່​ຫຼຸດ­ຜ່ອນ​ບັນ­ດາ​ປາ­ກົດ­ການ​ຫຍໍ້­ທໍ້​ຕ່າງໆ​ທີ່​ເກີດ​ຂຶ້ນ​ໃນ​ສັງ­ຄົມ ທັງ​ເປັນ​ການ​ເພີ່ມ​ຄວາມ​ຮັບ­ຜິດ­ຊອບ ແລະ ສ້າງ​ລາຍ​ຮັບ​ໃຫ້​ສູງ​ຂຶ້ນ​ເປັນ​ກ້າວໆ.

ຂ່າວທີ່ກ່ຽວຂ້ອງ