ຂ່າວຫຼ້າສຸດ

ນວ ມີພະນັກງານ-ລັດຖະກອນເກືອບ 10 ພັນຄົນ

1.651 17 ມ.ກ. 2020 ຂ່າວໜ້າ​ໜຶ່ງ

   ກອງ​ປະ­ຊຸມ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ເຄື່ອນ​ໄຫວ​ວຽກ​ງານ​ຄຸ້ມ​ຄອງ ພະ­ນັກ­ງານ-ລັດ­ຖະ­ກອນ ປີ 2019 ແລະ ວຽກ​ຈຸດ​ສຸມ ປີ 2020 ຂອງ​ພະ​ແນກ​ພາຍ​ໃນ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 16 ມັງ­ກອນ 2020 ທີ່​ພະ​ແນກ​ພາຍ​ໃນ ນວ ເປັນ​ປະ­ທານ​ຂອງ​ທ່ານ ບຸນ​ໜາ ຜາ​ທຸມ​ມະ​ວົງ ຫົວ­ໜ້າ​ພະ​ແນກ​ພາຍ​ໃນ ນວ ມີ​ຕາງ­ໜ້າ​ຈາກ​ກະ­ຊວງ​ພາຍ​ໃນ ພະ​ແນກ ການ​ອ້ອມ​ຂ້າງ ຫົວ­ໜ້າ​ຫ້ອງ­ການ​ພາຍ​ໃນ 9 ເມືອງ ແລະ ພະ­ນັກ­ງານ-ລັດ­ຖະ­ກອນ​ເຂົ້າ​ຮ່ວມ.

   ທ່ານ ກາບ​ແກ້ວ ນາມ​ມະ​ຈັກ ຮອງ​ຫົວ­ໜ້າ​ພະ​ແນກ​ພາຍ​ໃນ ນວ ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ເຄື່ອນ​ໄຫວ​ວຽກ​ງານ ປີ 2019 ແລະ ວຽກ​ຈຸດ​ສຸມ ປີ 2020 ເຫັນ​ວ່າ ວຽກ​ງານ​ລັດ­ຖະ­ກອນ​ເປັນ​ຂົງ­ເຂດ​ໜຶ່ງ​ທີ່​ສຳ­ຄັນ​ໃນ​ການ​ຄົ້ນ­ຄວ້າ ແລະ ຜັນ​ຂະ­ຫຍາຍ​ແນວ­ທາງ​ຍຸດ​ທະ​ສາດ​ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ​ໃຫ້​ເປັນ​ແຜນ​ງານ ໂຄງ­ການ ແຜນ­ການ ແລະ ນິ­ຕິ​ກຳ​ຕ່າງໆ ທີ່​ກ່ຽວ­ຂ້ອງ​ກັບ​ວຽກ​ງານ​ຄຸ້ມ​ຄອງ​ລັດ­ຖະ­ກອນ ໂດຍ​ເລີ່ມ​ຈາກ​ການ​ບັນ­ຈຸ ຈົນ​ໄປ​ເຖິງ​ການ​ພັກ­ຜ່ອນ​ຮັບ​ບຳ­ນານ ລວມ​ທັງ​ການ​ປະ​ເມີນ​ຜົນ ແລະ ພັດ­ທະ­ນາ​ລັດ­ຖະ­ກອນ​ການ​ປະ­ຕິ­ບັດ​ນະ­ໂຍ­ບາຍ ແລະ ຜົນ​ປະ­ໂຫຍດ​ຕ່າງໆ​ຂອງ​ລັດ­ຖະ­ກອນ ການ​ຄຸ້ມ​ຄອງ​ຂໍ້​ມູນ​ລັດ­ຖະ­ກອນ​ໃນ​ທົ່ວ ນວ ໂດຍ​ຫັນ​ເຂົ້າ​ສູ່​ລະ­ບົບ​ທັນ​ສະ­ໄໝ ເຊິ່ງ​ຕ້ອງ​ໄດ້​ເອົາ­ໃຈ­ໃສ່​ການ​ຄຸ້ມ​ຄອງ​ທາງ​ດ້ານ​ຈຳ ນວນ ແລະ ຄຸນ​ນະ​ພາບ​ຂອງ​ລັດ­ຖະ­ກອນ.

   ການ​ບັນ­ຈຸ​ລັດ­ຖະ­ກອນ​ໃໝ່ ແມ່ນ​ປະ­ຕິ­ບັດ​ບົນ​ພື້ນ­ຖານ​ຫຼັກ­ການ​ຄວາມ​ສະ­ເໝີ­ພາບ ເປີດ­ເຜີຍ​ພາ­ວະ​ວິ­ໄສ ແລະ ເປັນ​ທຳ ພາຍ­ຫຼັງ​ໄດ້​ຮັບ​ການ​ແບ່ງ­ປັນ​ຕົວ​ເລກ​ລັດ­ຖະ­ກອນ​ຈາກ​ລັດ­ຖະ­ບານ ຕາມ​ຂໍ້​ຕົກ­ລົງ​ຂອງ​ນາ­ຍົກ­ລັດ­ຖະ­ມົນ­ຕີ ວ່າ​ດ້ວຍ​ການ​ແບ່ງ​ຕົວ​ເລກ​ລັດ­ຖະ­ກອນ​ໃໝ່ ປີ 2019 ນວ ໄດ້​ຮັບ​ໂກ​ຕາ​ລັດ­ຖະ­ກອນ 6 ໂກ​ຕາ ໄດ້​ບັນ­ຈຸ​ໃສ່​ຕຳ­ແໜ່ງ​ທີ່​ຍັງ​ຂາດ ແລະ ຈຳ­ເປັນ ຕາມ​ການ​ສະ­ເໜີ​ຂອງ​ແຕ່​ລະ​ພາກ­ສ່ວນ ໂດຍ​ອີງ​ຕາມ​ຄຳ​ແນະ­ນຳ​ຂອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ກ່ຽວ​ກັບ​ການ​ສອບ­ເສັງ​ເຂົ້າ​ເປັນ​ລັດ­ຖະ­ກອນ​ຢ່າງ​ເຄັ່ງ​ຄັດ ຫຼີກ​ລ່ຽງ​ການ​ຮັບ​ເອົາ​ພະ­ນັກ­ງານ​ອາ­ສາ​ສະ­ໝັກ​ເຂົ້າ​ເປັນ​ລັດ­ຖະ­ກອນ​ຢ່າງ​ຂາດ​ຕົວ ໃນ​ນີ້ ໄດ້​ແບ່ງ­ປັນ​ໃຫ້​ອົງ­ການ​ຊ່ວຍ​ວຽກ​ງານ​ຂັ້ນ ນວ 3 ໂກ​ຕາ ແລະ ອົງ­ການ​ຊ່ວຍ​ວຽກ​ຂັ້ນ​ເມືອງ 3 ໂກ​ຕາ.

   ໃນ​ປີ 2019 ທົ່ວ ນວ ມີ​ພະ­ນັກ­ງານ-ລັດ­ຖະ­ກອນ ທັງ​ໝົດ 9.964 ຄົນ ຍິງ 5.416 ຄົນ ໃນ​ນີ້ ລັດ­ຖະ­ກອນ​ຂັ້ນ ນວ ມີ 1.953 ຄົນ ຍິງ 766 ຄົນ (ລັດ­ຖະ­ກອນ​ສາຍ​ຂວາງ 412 ຄົນ ຍິງ 179 ຄົນ ລັດ­ຖະ­ກອນ​ສາຍ​ຕັ້ງ 1.541 ຄົນ ຍິງ 587 ຄົນ) ລັດ­ຖະ­ກອນ​ຂັ້ນ​ເມືອງ 2.947 ຄົນ ຍິງ 1.408  ຄົນ (ລັດ­ຖະ­ກອນ​ສາຍ​ຂວາງ 647 ຄົນ ຍິງ 306 ຄົນ ລັດ­ຖະ­ກອນ​ສາຍ​ຕັ້ງ 2.300 ຄົນ ຍິງ 1.102 ຄົນ) ລັດ­ຖະ­ກອນ​ຄູ 5.064 ຄົນ ຍິງ 3.242 ຄົນ (ລັດ­ຖະ­ກອນ​ຄູ​ຂັ້ນ ນວ 343 ຄົນ ຍິງ 190 ຄົນ ລັດ­ຖະ­ກອນ​ເມືອງ 4.659 ຄົນ ຍິງ 3.064 ຄົນ ຖ້າ​ທຽບ­ໃສ່​ປີ 2018 ເຫັນ​ວ່າ​ມີ​ຈຳ­ນວນ​ຫຼຸດ​ລົງ ເນື່ອງ​ມາ​ຈາກ​ການ​ເຂົ້າ​ຮັບ​ອຸດ​ໜູນ​ບຳ­ນານ ການ​ຍົກ­ຍ້າຍ​ຕິດ​ພັນ​ກັນ​ນັ້ນ ​ກໍ​ມີ​ການ​ກວດ­ກາ​ຈຳ­ນວນ​ພົນ​ເປັນ​ບັນ­ຊີ​ດຽວ ແລະ ຜ່ານ​ລະ­ບົບ​ກວດ­ກາ​ທີ່​ທັນ​ສະ­ໄໝ ເຮັດ​ໃຫ້​ມີ​ຄວາມ​ຊັດ​ເຈນ​ດ້ານ​ຈຳ­ນວນ​ພົນ​ທີ່​ມີ­ໜ້າ​ຕົວ​ຈິງ​ຫຼາຍ​ຂຶ້ນ.

   ພ້ອມ​ນີ້ ປີ­ຜ່ານ­ມາ​ໄດ້​ມີ​ການ​ເລື່ອນ​ຊັ້ນ-ຂັ້ນ​ປົກ­ກະ­ຕິ ມີ 47 ພາກ­ສ່ວນ ມີ 1.454 ຄົນ ຍິງ 659 ຄົນ ການ​ເລື່ອນ​ຊັ້ນ-ຂັ້ນ​ຕາມ​ອາ­ຍຸ​ການ (ພົ້ນ​ຊັ້ນ) ມີ 7 ພາກ­ສ່ວນ ມີ 17 ຄົນ ຍິງ 2 ຄົນ ການ​ເລື່ອນ​ລັດ­ຖະ­ກອນ​ເຝິກ​ງານ 95% ຂຶ້ນ​ເປັນ 100% ມີ 11 ພາກ­ສ່ວນ 14 ຄົນ ຍິງ 8 ຄົນ ແລະ​ອື່ນໆ.

ຂ່າວທີ່ກ່ຽວຂ້ອງ