ຂ່າວຫຼ້າສຸດ

ງານບຸນກອງເຂົ້າໃຫຍ່ເມືອງສັງທອງ ໄດ້ມີຫຼາຍກິດຈະກຳໃຫ້ທ່ຽວຊົມ

1.388 17 ມ.ກ. 2020 ຂ່າວໜ້າ​ໜຶ່ງ
ງານບຸນກອງເຂົ້າໃຫຍ່ເມືອງສັງທອງ ໄດ້ມີຫຼາຍກິດຈະກຳໃຫ້ທ່ຽວຊົມ

   ເພື່ອ​ເປັນ​ການ​ປະ­ຕິ­ບັດ​ຕາມ​ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ​ວາງ​ອອກ ໃນ​ການ​ຊຸກ­ຍູ້​ສົ່ງ­ເສີມ​ການ­ທ່ອງ­ທ່ຽວ​ທາງ​ດ້ານ​ທຳ​ມະ​ຊາດ ວັດ­ທະ­ນະ­ທຳ ແລະ ປະ­ຫວັດ­ສາດ ເຊິ່ງ​ເຮັດ​ໃຫ້​ມີ​ຫຼາຍ​ເຫດ­ການ​ທີ່​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຜ່ານ​ມາ ເຊັ່ນ: ການ​ເປີດ​ປີ​ທ່ອງ​ທ່ຽວ​ລາວ ປີ​ທ່ອງ​ທ່ຽວ ລາວ-ຈີນ ທີ່​ໄດ້​ມີ​ການ​ຕອບ​ຮັບ ແລະ ມີ​ຄວາມ​ສົນ­ໃຈ​ຈາກ​ນັກ​ທ່ອງ​ທ່ຽວ​ເປັນ​ຢ່າງ​ດີ ອັນ​ໄດ້​ເຮັດ​ໃຫ້​ທຸ­ລະ​ກິດ​ດ້ານ​ການ­ທ່ອງ­ທ່ຽວ​ມີ​ການ​ຂະ­ຫຍາຍ­ຕົວ​ທີ່​ສູງ​ຂຶ້ນ ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ໃຫ້​ມີ​ຄວາມ​ສົນ­ໃຈ ເຂົ້າ​ມາ​ທ່ອງ​ທ່ຽວ​ຢູ່​ໃນ​ປະ­ເທດ​ລາວ​ນັບ​ມື້​ມີ​ຈຳ­ນວນ​ເພີ່ມ​ສູງ​ຂຶ້ນ ເວົ້າ​ລວມ ເວົ້າ​ສະ­ເພາະ ຢູ່​ນະ­ຄອນ­ຫຼວງ​ວຽງ​ຈັນ ໃນ​ປີ 2019 ມີ​ເຖິງ 2 ລ້ານ​ເທື່ອ​ຄົນ ເຊິ່ງ​ມາ​ຮອດ​ປີ 2020 ລັດ­ຖະ­ບານ​ໄດ້​ມີ​ນະ­ໂຍ­ບາຍ​ສົ່ງ­ເສີມ​ການ­ທ່ອງ­ທ່ຽວ ໃຫ້​ມີ​ການ​ຂະ­ຫຍາຍ­ຕົວ​ຕາມ​ທ່າ­ແຮງ​ຂອງ​ທ້ອງ­ຖິ່ນ ເພື່ອ​ເປັນ​ການ​ສ້າງ​ພື້ນ­ຖານ​ເສດ­ຖະ­ກິດ-ສັງ­ຄົມ​ໃຫ້​ດີ​ຂຶ້ນ ມີ​ການ​ກະ­ຈາຍ​ລາຍ​ໄດ້​ໄປ​ສູ່​ປະ­ຊາ­ຊົນ​ທ້ອງ­ຖິ່ນ ແລະ ສາ­ມາດ​ແກ້​ໄຂ​ຊີ­ວິດ​ການ​ເປັນ​ຢູ່​ໃຫ້​ດີ​ຂຶ້ນ​ເທື່ອ​ລະ​ກ້າວ.

   ສະ­ນັ້ນ ໂດຍ​ການ​ຊີ້​ນຳ ນຳ­ພາ​ຂອງ​ການ​ນຳ ນະ­ຄອນ­ຫຼວງ​ວຽງ​ຈັນ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ໂດຍ​ຖາ­ນະ​ເປັນ​ຂະ­ແໜງ­ການ​ວິ­ຊາ​ສະ­ເພາະ ໄດ້​ເອົາ­ໃຈ­ໃສ່​ໃນ​ການ​ກະ­ຕຸກ​ຊຸກ­ຍູ້ ອຳ­ນວຍ​ຄວາມ​ສະ­ດວກ​ຢ່າງ​ແຂງ­ແຮງ​ໃຫ້​ບັນ­ດາ​ທຸ­ລະ​ກິດ  ຜູ້​ປະ­ກອບ​ການ​ໃຫ້​ມີ​ສ່ວນ​ຮ່ວມ ສ້າງ​ກິດ­ຈະ­ກຳ​ການ­ທ່ອງ­ທ່ຽວ​ໃຫ້​ມີ​ຫຼາຍ​ຮູບ​ແບບ ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ທັງ​ເປັນ​ການ​ສົ່ງ­ເສີມ​ການ­ທ່ອງ­ທ່ຽວ​ລາວ​ທ່ຽວ​ລາວ ຈຶ່ງ​ໄດ້​ມີ​ກິດ­ຈະ­ກຳ​ຄາ​ຣາ​ວານ​ລົດ​ທ່ອງ​ທ່ຽວ ສູ່​ງານ​ບຸນ​ກອງ​ເຂົ້າ​ເມືອງ​ສັງ​ທອງ​ຂຶ້ນ ຕິດ​ພັນ​ກັບ​ວັດ­ທະ­ນະ­ທຳ ວິ­ຖີ​ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ທ້ອງ­ຖິ່ນ.

   ກິດ­ຈະ­ກຳ​ຄາ​ຣາ​ວານ​ລົດ​ທ່ອງ​ທ່ຽວ​ສູ່​ງານ​ບຸນ​ກອງ​ເຂົ້າ ເມືອງ​ສັງ​ທອງ ໄດ້​ມີ​ຂຶ້ນ​ວັນ​ທີ 16 ມັງ­ກອນ 2020  ເຂົ້າ​ຮ່ວມ​ຂະ​ບວນ​ການ​ດັ່ງ­ກ່າວ​ມີ ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ນາງ ຈັນ​ເພັດ ຄຳ​ຟອງ ຫົວ­ໜ້າ​ກົມ​ວັດ­ທະ­ນະ­ທຳ ມະ­ຫາ­ຊົນ ກະ­ຊວງ ຖວ​ທ ແລະ ທ່ານ ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ ຖວ​ທ ນວ ພ້ອມ​ດ້ວຍ​ການ​ນຳ ນວ ພະ­ແນກ­ການ ຂະ­ແໜງ­ການ ນັກ­ທຸ­ລະ­ກິດ ແລະ ພະ­ນັກ­ງານ​ຈາກ​ພະ­ແນກ­ການ​ຕ່າງໆ ເຊິ່ງ​ມີ​ລົດ​ເຂົ້າ​ຮ່ວມ​ຄາ​ຣາ​ວານ​ທັງ​ໝົດ ເກືອບ 100 ຄັນ.

   ຂະ​ບວນ​ການ​ດັ່ງ­ກ່າວ​ໄດ້​ເຕົ້າ­ໂຮມ​ຢູ່​ທີ່​ສວນ​ເຈົ້າ­ຟ້າ​ງຸ່ມ ແລ້ວ​ເຄື່ອນ​ຂະ​ບວນ​ໄປ​ແວ່​ຊົມ​ວັດ​ຖ້ຳ​ຄອກ​ມ້າ ບ້ານ​ຫ້ວຍ​ຫ້ອມ ເມືອງ​ສີ​ໂຄດ​ຕະ­ບອງ ເພື່ອ​ທຳ­ບຸນ​ເອົາ​ເລີກ​ເອົາ​ໄຊ ປີ​ໃໝ່ 2020 ໃນ​ນີ້ ໄດ້​ຖວາຍ​ນ້ຳ​ດື່ມ ຈຳ­ນວນ 20 ແກັດ ພ້ອມ​ສັດ­ທາ​ຂອງ​ຜູ້​ເຂົ້າ​ຮ່ວມ​ຄາ​ຣາ​ວານ ເພື່ອ​ສົມ­ທົບ​ທຶນ​ສ້າງ​ອົງ​ພະ​ໃຫຍ່​ຢູ່​ວັດ​ດັ່ງ­ກ່າວ  ຫຼັງ​ຈາກ​ນັ້ນ ໄດ້​ເຄື່ອນ​ຂະ​ບວນ​ໄປ​ສູ່​ສຳ­ນັກ­ງານ​ປົກ­ຄອງ​ເມືອງ​ເພື່ອ​ເຕົ້າ­ໂຮມ ແລ້ວ​ຄະ­ນະ​ກໍ​ໄດ້​ເຂົ້າ​ຮ່ວມ​ຂະ​ບວນ​ແຫ່​ກັບ 6 ກ້ອນ​ກຳ­ລັງ ຄື: ຂັນ​ໝາກ­ເບັງ ກັນ​ຕົ້ນ ຊາວ​ໜຸ່ມ-ເຍົາ­ວະ​ຊົນ ປກສ-ປກຊ ແລະ ກ້ອນ​ມວນ​ຊົນ ເພື່ອ​ແຮ່​ເຂົ້າ​ສູ່​ພິ­ທີ​ເປີດ​ງານ​ຢ່າງ​ເປັນ​ທາງ​ການ​ຂອງ​ງານ​ບຸນ​ກອງ​ເຂົ້າ.

   ໃນ​ພິ­ທີ ທ່ານ ໝອນ ອິນ​ສຸດ​ຕາ ປະ­ທານ​ແນວ​ລາວ​ສ້າງ​ຊາດ ບ້ານ​ເພຍ​ລາດ ໄດ້​ຂຶ້ນ​ຜ່ານ​ປະ­ຫວັດ​ຄວາມ​ເປັນ​ມາ​ຂອງ​ບຸນ​ກອງ​ເຂົ້າ​ໂດຍ​ຫຍໍ້​ໃຫ້​ຄະ­ນະ​ນຳ​ຊາບ ໂອ­ກາດ​ນີ້ ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ກໍ​ໄດ້​ຂຶ້ນ​ລາຍ​ງານ​ກ່ຽວ​ກັບ​ການ​ກະ­ກຽມ ແລະ ກ່າວ​ເປີດ​ບຸນ​ກອງ​ເຂົ້າ ຕິດ​ພັນ​ກັບ​ຕະ­ຫຼາດ­ນັດ ປະ­ຈຳ​ປີ 2020 ວ່າ: ໄລ­ຍະ​ຜ່ານ​ມາ​ການ​ຈັດ​ງານ​ບຸນ​ກອງ​ເຂົ້າ ແມ່ນ​ໄດ້​ຈັດ​ຢູ່​ບ້ານ​ໃຫຍ່​ນາ​ຈະ­ເລີນ ແຕ່​ເນື່ອງ​ດ້ວຍ​ສະ­ຖານ­ທີ່​ຄັບ­ແຄບ ສະ­ນັ້ນ ອົງ­ການ​ປົກ­ຄອງ​ເມືອງ​ຈຶ່ງ​ໄດ້​ຕົກ­ລົງ​ເປັນ​ເອ­ກະ​ພາບ​ຖື​ເອົາ​ບ້ານ​ເພຍ​ລາດ ເຊິ່ງ​ເປັນ​ບ້ານ​ເທດ­ສະ­ບານ​ເມືອງ ແລະ ເປັນ​ປີ​ທຳ​ອິດ​ຂອງ​ເມືອງ ບຸນ​ກອງ​ເຂົ້າ​ແມ່ນ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ຂອງ​ເຜົ່າ ເຊິ່ງ​ແມ່ນ​ມູນ​ມໍ­ລະ­ດົກ​ອັນ​ລ້ຳ​ຄ່າ​ຂອງ​ບັນ­ພະ­ບຸ­ລຸດ​ຂອງ​ຊາດ​ລາວ​ໄດ້​ປະ­ຕິ­ບັດ​ສືບ​ທອດ​ກັນ​ມາ​ຫຼາຍ​ຍຸກ​ສະ­ໄໝ​ຫຼາຍ­ເຊັ່ນ­ຄົນ ພໍ​ຮອດ​ເດືອນ​ຍີ່​ປະ­ຊາ­ຊົນ​ຊາວ​ພຸດ​ໄດ້​ສຳ­ເລັດ​ໃນ​ການ​ເກັບ​ກູ້​ຜົນ​ລິດ​ໃນ​ລະ­ດູ­ຝົນ ປີ​ນີ້​ໄດ້​ຍົກ​ລະ­ດັບ​ຈາກ​ຂັ້ນ​ບ້ານ ມາ​ເປັນ­ຄວາມ​ຮັບ­ຜິດ­ຊອບ​ຂັ້ນ​ເມືອງ ຮ່ວມ​ກັບ​ບັນ­ດາ​ອົງ­ການ​ປົກ­ຄອງ​ບ້ານ 35 ບ້ານ ແລະ ປະ­ຊາ­ຊົນ​ບັນ­ດາ­ເຜົ່າ ຊາວ​ເມືອງ​ສັງ​ທອງ ໄດ້​ພ້ອມ​ກັນ​ສຸມ​ໃສ່​ສ້າງ​ກອງ​ເຂົ້າ 9 ກອງ ໃນ​ນີ້ ກອງ​ໃຫຍ່ 1 ກອງ​ຄວາມ​ກວ້າງ 8 ແມັດ ສູງ 12 ແມັດ ກອງ​ນ້ອຍ 8 ກອງ ກວ້າງ 3 ແມັດ ສູງ 4,5 ແມັດ ນອກ​ນັ້ນ ຍັງ​ມີ​ວັດ­ຖຸ​ອຸ­ປະ­ກອນ​ການ​ຜະ­ລິດ​ຕ່າງໆ ເຊິ່ງ​ເປັນ​ເຄື່ອງ­ມື​ການ​ຜະ­ລິດ ເປັນ​ຫົວ­ຄິດ​ປະ­ດິດ​ສ້າງ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ.

   ພາຍ​ໃນ​ງານ​ໄດ້​ມີ​ການ­ສະ­ແດງ​ຜົນ­ງານ​ຂອງ​ກົມ​ກອງ ແລະ ຂາຍ​ສິນ­ຄ້າ​ກະ­ສິ­ກຳ ຫັດ­ຖະ­ກຳ ມີ​ການ​ທ່ຽວ​ຊົມ​ກອງ​ເຂົ້າ​ໃຫຍ່ ເຄື່ອງ­ມື​ການ​ຜະ­ລິດ ວິ­ຖີ​ການ​ດຳ­ລົງ​ຊີ­ວິດ​ແບບ​ດັ່ງ​ເດີມ ເພື່ອ​ມີ​ການ​ສົມ​ທຽບ​ໃນ​ການ​ຜະ­ລິດ​ປັດ­ຈຸ­ບັນ ແລະ ມີ​ການ​ຄັດ​ເລືອກ​ອາ­ຫານ​ພື້ນ​ບ້ານ ພ້ອມ​ນັ້ນ ຍັງ​ມີ​ການ​ຄັດ​ເລືອກ​ນາງ​ສາວ​ເຂົ້າ​ຫອມ  ຕະ­ຫຼອດ​ໃນ​ແຕ່​ລະ​ຄືນ​ຈະ​ໄດ້​ທ່ຽວ​ຊົມ​ການ­ສະ­ແດງ​ສິ­ລະ​ປະ​ວັນ­ນະ­ຄະ­ດີ​ຈາກ​ສູນ​ກາງ 4 ລາຍ­ການ ນະ­ຄອນ­ຫຼວງ 4 ລາຍ­ການ ແລະ ເມືອງ 22 ລາຍ­ການ ພິ­ເສດ​ຍັງ​ໄດ້​ພົບ​ກັບ​ການ­ສະ­ແດງ​ສົດ​ດ້ານ​ໜ້າ​ເວ­ທີ​ຈາກ​ໜ່ວຍ​ສິ­ລະ​ປະ ປະ­ເທດ​ໃກ້​ຄຽງ ກາ­ນວາງ­ສະ­ແດງ-ຂາຍ​ສິນ­ຄ້າ​ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ການ​ລະ​ຫຼິ້ນ​ຕ່າງໆ​ຕະ­ຫຼອດ 8 ວັນ (16-23/1/2020).

ຂ່າວທີ່ກ່ຽວຂ້ອງ