ຂ່າວຫຼ້າສຸດ

ຊຳລະຄ່າລົດເມດ້ວຍ QR Code ຜ່ານລະບົບ ທພລ

1.406 17 ມ.ກ. 2020 ຂ່າວໜ້າ​ໜຶ່ງ
ຊຳລະຄ່າລົດເມດ້ວຍ QR Code ຜ່ານລະບົບ ທພລ

   ທະ­ນາ­ຄານ​ພັດ­ທະ­ນາ​ລາວ (ທພລ) ຮ່ວມ​ມື​ກັບ​ລັດ​ວິ​ສາ​ຫະ​ກິດ​ລົດ­ເມ ນະ­ຄອນ­ຫຼວງ​ວຽງ​ຈັນ (ນວ) ເພື່ອ​ເພີ່ມ​ຊ່ອງ​ທາງ​ໃນ​ການ​ຊຳ­ລະ​ສະ​ສາງ​ຄ່າ​ໂດຍ­ສານ ດ້ວຍ​ການ​ສະ​ແກນ QR Code ຜ່ານ​ລະ­ບົບ ທພລ ເປັນ​ນິ­ມິດ​ໝາຍ​ທີ່​ດີ​ແກ່​ມວນ​ຊົນ ທີ່​ສັນ­ຈອນ​ບົນ​ຖະ­ໜົນ​ທັງ​ພາຍ​ໃນ ນວ ຕ່າງ​ແຂວງ ແລະ ຕ່າງ­ປະ­ເທດ ທີ່​ໂດຍ­ສານ​ໄປ​ກັບ​ລັດ​ວິ​ສາ​ຫະ​ກິດ​ລົດ­ເມ ນວ ມີ​ຄວາມ​ສະ­ດວກ​ສະ­ບາຍ.

   ພິ­ທີ​ເຊັນ​ສັນ­ຍາ​ຮ່ວມ​ມື​ຈັດ​ຂຶ້ນ ວັນ​ທີ 16 ມັງ­ກອນ 2020 ທີ່​ສຳ­ນັກ­ງານ​ໃຫຍ່ ທພລ ຮ່ວມ​ລົງ​ນາມ​ລະ­ຫວ່າງ ທ່ານ ອາ­ຄົມ ປຣະ​ເສີດ ຜູ້­ອຳ­ນວຍ­ການ​ໃຫຍ່ ທພລ ແລະ ທ່ານ ແກ້ວ​ວັນ​ພອນ ວອນ​ທີ​ວົງ​ສີ  ຜູ້­ອຳ­ນວຍ­ການ​ໃຫຍ່ ລັດ​ວິ​ສາ​ຫະ​ກິດ​ລົດ­ເມ ນວ ມີ​ທ່ານ ວຽງ​ສະ​ຫວັດ ສີ​ພັນ​ດອນ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ບັນ­ດາ​ຄະ­ນະ​ກົມ ຄະ­ນະ​ສະ­ພາ​ບໍ­ລິ­ຫານ ແລະ ຄະ­ນະ​ອຳ­ນວຍ​ການ​ສອງ​ຝ່າຍ​ເຂົ້າ​ຮ່ວມ.

   ເພື່ອ​ຊຳ­ລະ​ສະ​ສາງ​ຄ່າ​ໂດຍ­ສານ​ດ້ວຍ​ການ​ສະ​ແກນ QR Code ຜ່ານ​ລະ­ບົບ ທພລ ເປັນ​ການ​ປະ­ກອບ­ສ່ວນ​ອັນ​ສຳ­ຄັນ ເຂົ້າ​ໃນ​ການ​ພັດ­ທະ­ນາ​ຍົກ​ລະ­ດັບ​ລະ­ບົບ​ການ​ບໍ­ລິ­ການ ຊຳ­ລະ​ສະ​ສາງ​ພາຍ​ໃນ ໃຫ້​ຫັນ​ເຂົ້າ​ສູ່​ລະ­ບົບ​ການ​ຊຳ­ລະ​ຜ່ານ​ທະ­ນາ­ຄານ​ໃຫ້​ຫຼາຍ​ຂຶ້ນ ທັງ​ເປັນ​ການ​ຫຼຸດ­ຜ່ອນ​ການ​ຊຳ­ລະ​ສະ​ສາງ​ດ້ວຍ​ການ​ນຳ​ໃຊ້​ເງິນ­ສົດ ປະ­ຢັດ​ເວ­ລາ ຮັບ­ປະ­ກັນ​ບໍ່​ຕົກ­ເຮ່ຍ​ເສຍ​ຫາຍ ສາ­ມາດ​ນຳ​ລາຍ​ຮັບ​ເປັນ​ທຶນ​ເຂົ້າ​ໃນ​ການ​ພັດ­ທະ­ນາ​ປະ­ເທດ​ຊາດ ເຊິ່ງ​ລັດ​ວິ​ສາ​ຫະ​ກິດ​ລົດ­ເມ​ສ້າງ­ຕັ້ງ​ມາ 40 ກວ່າ​ປີ ມີ​ລົດ­ເມ 89 ຄັນ ໃຫ້­ການ​ບໍ­ລິ­ການ​ຂົນ­ສົ່ງ​ສາ­ທາ­ລະ­ນະ ມີ 24 ສາຍ​ທາງ ກຸ່ມ​ລູກ​ຄ້າ​ສ່ວນ​ໃຫຍ່​ແມ່ນ​ມວນ​ຊົນ ໂດຍ​ຫຼັກ​ກໍ​ມີ ນັກ­ຮຽນ-ນັກ​ສຶກ​ສາ ກວມ​ອັດ­ຕາ​ໃນ​ການ​ນຳ​ໃຊ້​ສູງ​ກວ່າ​ໝູ່ ໂດຍ​ມີ​ສາຍ​ທາງ​ດົງ​ໂດກ (ເຂດ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ) ກວມ 65-70% ຂອງ​ກຸ່ມ​ລູກ​ຄ້າ​ທັງ​ໝົດ ນອກ​ນັ້ນ ມີ​ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ນຳ​ໃຊ້​ສ່ວນ​ໃຫຍ່​ໃນ​ສາຍ​ທາງ​ທ່າ​ເດື່ອ ຂົວ​ມິດ­ຕະ­ພາບ​ລາວ-ໄທ ແລະ ດຽວ­ນີ້​ກຳ­ລັງ​ມີ​ການ​ປັບ­ປຸງ ໂດຍ​ເລັ່ງ​ໃສ່​ປະ­ຊາ­ສຳ­ພັນ​ທາງ​ສື່​ມວນ​ຊົນ ລວມ​ທັງ​ການ​ບໍ­ລິ­ການ​ດີ ຮັບ­ປະ­ກັນ​ດ້ານ​ເຕັກ­ນິກ ມີ​ຄວາມ​ປອດ​ໄພ​ເປັນ​ຫົວ­ໃຈ ແລະ ມີ​ຜູ້­ໂດຍ­ສານ​ນັບ​ມື້​ເພີ່ມ​ຂຶ້ນ​ໃນ​ແຕ່​ລະ​ປີ ປະ­ມານ 5-10% ແລະ ຍັງ​ມີ​ແຜນ​ເພີ່ມ​ຊ່ອງ​ທາງ​ການ​ຊຳ­ລະ​ຄ່າ​ໂດຍ­ສານ ແລະ ລົດ​ໃຫ້​ບໍ­ລິ­ການ​ຕື່ມ ຂະ­ໜາດ 28 ບ່ອນ​ນັ່ງ 45 ບ່ອນ​ນັ່ງ ປະ­ມານ 40 ຄັນ.

   ທພລ ເປັນ​ທະ­ນາ­ຄານ​ທຸ­ລະ​ກິດ​ລັດ ປັດ­ຈຸ­ບັນ ມີ 18 ສາ­ຂາ 79 ໜ່ວຍ​ບໍ­ລິ­ການ 18 ໜ່ວຍ​ແລກ­ປ່ຽນ ມີ​ຕູ້ ATM 245 ຕູ້​ໃນ​ທົ່ວ​ປະ­ເທດ ແລະ ໄດ້​ຫັນ​ເອົາ​ການ​ບໍ­ລິ­ການ​ຂອງ​ທະ­ນາ­ຄານ​ໄປ​ສູ່​ຄວາມ​ທັນ​ສະ­ໄໝ ບໍ­ລິ­ການ​ຮັບ​ໃຊ້​ສັງ­ຄົມ ສ້າງ​ຄວາມ​ສະ­ດວກ ວ່ອງ­ໄວ ສາ­ມາດ​ແຂ່ງ­ຂັນ​ໃນ​ດ້ານ​ການ​ບໍ­ລິ­ການ ແລະ ລົງ­ທຶນ​ນຳ​ເອົາ​ເຕັກ​ໂນ​ໂລ​ຊີ​ເຂົ້າ​ມາ​ຮັບ​ໃຊ້​ໃນ​ການ​ບໍ­ລິ­ການ​ຈາກ Bank 2000 ມາ​ເປັນ Core Banking [T24] ທີ່​ເປັນ​ມາດ­ຖານ​ສາ­ກົນ ພ້ອມ​ນີ້ ຍັງ​ພັດ­ທະ­ນາ​ບຸ​ຄະ­ລາ​ກອນ ຜະ­ລິດ​ຕະ​ພັນ ການ​ບໍ­ລິ­ການ​ທີ່​ທັນ​ສະ­ໄໝ ເປັນ­ຕົ້ນ ມີ​ລະ­ບົບ Mobile Banking ຫຼື LDB Trust ທີ່​ສາ­ມາດ​ຊຳ­ລະ​ສະ​ສາງ​ຄ່າ​ສາ​ທາ​ລະ​ນຸ​ປະ​ໂພກ​ຕ່າງໆ ຄ່າ​ໂທລະ­ສັບ ຊື້​ຫວຍ ຊຳ­ລະ​ອາ­ກອນ ຊຳ­ລະ​ສິນ​ເຊື່ອ AEON KOLAO ກວດ​ຜົນ​ຫວຍ ແລະ ອື່ນໆ.

ຂ່າວທີ່ກ່ຽວຂ້ອງ