ຂ່າວຫຼ້າສຸດ

ຈັນທະບູລີ ເກັບລາຍຮັບເຂົ້າງົບປະມານໄດ້ເກີນແຜນ

1.162 17 ມ.ກ. 2020 ຂ່າວໜ້າ​ໜຶ່ງ
ຈັນທະບູລີ ເກັບລາຍຮັບເຂົ້າງົບປະມານໄດ້ເກີນແຜນ

   ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ ປີ 2019 ເຫັນ​ວ່າ ມີ 5 ເມືອງ ຢູ່​ນະ­ຄອນ ຫຼວງ​ວຽງ​ຈັນ (ນວ) ທີ່​ສາ­ມາດ​ປະ­ຕິ­ບັດ​ໄດ້​ເກີນ​ຄາດ­ໝາຍ​ທີ່​ຂັ້ນ​ເທິງ​ວາງ​ໃຫ້ ໃນ​ນັ້ນ ກໍ​ມີ​ເມືອງ​ຈັນ­ທະ​ບູ​ລີ ທັງ​ນີ້ ກໍ​ຍ້ອນ​ນຳ​ໃຊ້​ລະ­ບົບ​ທັນ​ສະ­ໄໝ​ເຂົ້າ​ຊ່ວຍ ຄວາມ​ຕື່ນ​ຕົວ​ຂອງ​ປະ­ຊາ­ຊົນ ແລະ ຄວາມ​ເອົາ­ໃຈ­ໃສ່​ຂອງ​ພະ­ນັກ­ງານ​ໃນ​ການ​ປະ­ຕິ­ບັດ​ໜ້າ­ທີ່​ວິ­ຊາ​ສະ­ເພາະ​ຂອງ​ຕົນ​ເປັນ​ຢ່າງ​ດີ.

   ທ່ານ ນາງ ໄຊ​ສົມ­ບັດ ວົງ​ພັກ­ດີ ຫົວ­ໜ້າ​ຫ້ອງ­ການ ການ​ເງິນ​ເມືອງ​ຈັນ­ທະ​ບູ​ລີ ໃຫ້​ສຳ­ພາດ​ວັນ​ທີ 14 ມັງ­ກອນ 2020 ວ່າ: ເມືອງ​ຈັນ­ທະ​ບູ​ລີ ມີ​ພື້ນ­ຖານ​ທຸ­ລະ​ກິດ​ທັງ​ໝົດ 7.849 ພື້ນ­ຖານ ໃນ​ນັ້ນ ກົມ​ສ່ວຍ​ສາ​ອາ­ກອນ​ຄຸ້ມ​ຄອງ 132 ພື້ນ­ຖານ ພະ​ແນກ​ສ່ວຍ​ສາ​ອາ­ກອນ ນວ ຄຸ້ມ​ຄອງ 1.394 ພື້ນ­ຖານ ແລະ ເມືອງ​ຈັນ­ທະ​ບູ​ລີ ຄຸ້ມ​ຄອງ 6.323 ພື້ນ­ຖານ ໃນ​ນັ້ນ ຂັ້ນ​ເມືອງ​ຄຸ້ມ​ຄອງ​ຈັດ​ເກັບ 4.993 ພື້ນ­ຖານ ແລະ ຂັ້ນ​ບ້ານ​ຄຸ້ມ​ຄອງ​ຈັດ​ເກັບ 1.330 ພື້ນ­ຖານ  ສ່ວນ​ການ​ຈັດ​ເກັບ​ລາຍ​ຮັບ ປີ 2019 ເມືອງ​ໄດ້​ຮັບ​ແຜນ­ການ 75,02 ຕື້​ກີບ ເພີ່ມ​ຂຶ້ນ​ຈາກ​ແຜນ­ການ​ປີ 2018 ຈຳ­ນວນ 2 ຕື້​ກີບ ເພີ່ມ​ຈາກ​ການ​ປະ­ຕິ­ບັດ ປີ 2018 ສະ­ເລ່ຍ​ເປັນ​ເງິນ 3,74 ຕື້​ກີບ ໃນ​ນັ້ນ ສ່ວຍ​ສາ​ອາ­ກອນ 74,45 ຕື້​ກີບ ແລະ ຊັບ​ສິນ​ຂອງ​ລັດ 570 ລ້ານ​ກີບ ເຊິ່ງ​ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ ໄດ້ 79,74 ຕື້​ກີບ ເທົ່າ​ກັບ 106,29% ຂອງ​ແຜນ­ການ​ປີ ທຽບ­ໃສ່​ປີ­ຜ່ານ­ມາ ເພີ່ມ​ຂຶ້ນ 11,27% ເປັນ​ເງິນ 8,46 ຕື້​ກີບ ໃນ​ນັ້ນ ສ່ວຍ​ສາ​ອາ­ກອນ​ປະ­ຕິ­ບັດ​ໄດ້ 79,10 ຕື້​ກີບ ເທົ່າ​ກັບ 106,25% ແລະ ຊັບ​ສິນ​ຂອງ​ລັດ​ປະ­ຕິ­ບັດ​ໄດ້ 635,92 ລ້ານ​ກີບ ເທົ່າ​ກັບ 111,57% ສາ­ມາດ​ປະ­ຕິ­ບັດ​ໄດ້​ເກີນ​ແຜນ­ທີ່​ຂັ້ນ​ເທິງ​ວາງ​ໃຫ້ 6,29% ເປັນ​ເງິນ 4 ຕື້​ກວ່າ​ກີບ ສາ­ເຫດ​ທີ່​ພາ­ໃຫ້​ເກັບ​ລາຍ​ຮັບ​ໄດ້​ເກີນ​ແຜນ ຍ້ອນ​ຫັນ​ມາ​ນຳ​ໃຊ້​ລະ­ບົບ​ທັນ​ສະ­ໄໝ (TaxRis) ເຂົ້າ​ມາ​ຊ່ວຍ​ໃນ​ການ​ເກັບ​ພາ­ສີ​ອາ­ກອນ ການ​ຫັນ​ໄປ​ເປັນ​ທັນ​ສະ­ໄໝ​ເອົາ​ລາຍ​ຮັບ​ຄ່າ​ທຳ­ນຽມ​ທາງ ແລະ ພາ­ສີ​ທີ່​ດິນ​ເຂົ້າ​ໃນ​ທະ­ນາ­ຄານ ເຊິ່ງ​ການ​ນຳ​ໃຊ້​ລະ­ບົບ​ນີ້​ເຮັດ​ໃຫ້​ເຫັນ​ຕົວ​ເລກ​ຄ້າງ​ຈ່າຍ​ຂອງ​ບັນ­ດາ​ຫົວ­ໜ່ວຍ​ທຸ­ລະ​ກິດ ທີ່​ສາ­ມາດ​ນຳ​ເກັບ​ກູ້​ໜີ້​ສິນ​ຄ້າງ​ຈ່າຍ​ຄືນ​ມາ​ເປັນ​ຈຳ­ນວນ​ຫຼວງ­ຫຼາຍ ພິ­ເສດ​ແມ່ນ​ເກັບ​ອາ­ກອນ​ຄ່າ​ເຊົ່າ​ຂອງ​ບາງ​ທະ​ນາ ຄານ​ໃຫຍ່​ເປັນ​ອັນ​ພົ້ນ​ເດັ່ນ​ໃນ​ການ​ເກັບ​ອາ­ກອນ​ຄ່າ​ເຊົ່າ ໄດ້ 6 ຕື້​ກວ່າ​ກີບ ນອກ​ນີ້ ຍ້ອນ​ການ​ຊີ້​ນຳ-ນຳ­ພາ​ຈາກ​ຂັ້ນ​ເທິງ ອົງ­ຄະ​ນະ​ພັກ​ເມືອງ ນວ ຂະ­ແໜງ​ສາຍ​ຕັ້ງ​ສ່ວຍ​ສາ​ອາ­ກອນ ທີ່​ໄດ້​ເອົາ­ໃຈ­ໃສ່​ຊຸກ­ຍູ້​ຕິດ­ຕາມ​ທັງ​ທາງ​ກົງ ແລະ ທາງ​ອ້ອມ ໂດຍ​ລັດ­ຖະ­ບານ​ໄດ້​ສຸມ​ໃສ່​ລະ­ບົບ​ທັນ​ສະ­ໄໝ ຈຶ່ງ​ເຮັດ​ໃຫ້­ການ​ຈັດ​ເກັບ​ລາຍ​ຮັບ​ມີ​ຄວາມ​ໂປ່ງ​ໃສ​ຂຶ້ນ ຫົວ­ໜ່ວຍ​ທຸ­ລະ​ກິດ​ພາຍ​ໃນ​ມີ​ຄວາມ​ຕື່ນ​ຕົວ​ໃນ​ການ​ປະ­ກອບ­ສ່ວນ​ມອບ​ພັນ­ທະ ຄຽງ​ຄູ່​ກັບ​ຈຸດ​ດີ ກໍ​ຍັງ​ມີ​ຈຸດ​ອ່ອນ​ການ​ຫັນ​ໄປ​ທັນ​ສະ­ໄໝ​ເກັບ​ຄ່າ​ທຳ­ນຽມ​ທາງ ແລະ ພາ­ສີ​ທີ່​ດິນ​ຍັງ​ບໍ່​ທັນ​ເກັບ​ໝົດ ບາງ​ພື້ນ​ທີ່­ຢູ່​ຫ່າງ​ໄກ​ບໍ່​ສາ­ມາດ​ເຂົ້າ​ມາ​ເສຍ​ຢູ່​ທະ­ນາ­ຄານ ຈຶ່ງ​ເຮັດ​ໃຫ້­ການ​ເກັບ​ສາ​ສີ​ທີ່​ດິນ​ເກັບ​ບໍ່​ໄດ້​ຄົບ​ທຽບ ໃສ່​ປີ­ຜ່ານ­ມາ ພິ­ເສດ​ປີ 2019 ເມືອງ​ໄດ້​ລົງ​ໄປ​ບໍ­ລິ­ການ​ເກັບ​ຄ່າ​ທຳ­ນຽມ​ທາງ​ຕາມ​ແຄມ​ທາງ ໂດຍ​ສົມ­ທົບ​ກັບ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ ຖ້າ​ພົບ​ເຫັນ​ບໍ່​ທັນ​ເສຍ​ຄ່າ​ທາງ​ກໍ​ໄດ້​ລະ­ດົມ​ໃຫ້​ເຈົ້າ​ຂອງ​ພາ­ຫະ­ນະ​ເສຍ​ກັບ​ທີ່ ເຖິງ​ວ່າ​ບໍ່​ໄດ້​ຫຼາຍ​ແຕ່​ກໍ​ເຮັດ​ໃຫ້​ຜູ້​ປະ­ກອບ​ການ ແລະ ປະ­ຊາ­ຊົນ​ເຂົ້າ­ໃຈ​ຫຼາຍ​ຂຶ້ນ​ຕື່ມ ອັນ​ເປັນ​ພື້ນ­ຖານ​ໃຫ້​ໄລ­ຍະ​ຍາວ.

   ເຖິງ​ວ່າ​ປັດ­ຈຸ­ບັນ​ເມືອງ​ຍັງ​ບໍ່​ທັນ​ໄດ້​ຮັບ​ຕົວ​ເລກ​ເກັບ​ລາຍ​ຮັບ​ເຂົ້າ​ງົບ­ປະ­ມານ ປີ 2020 ຈາກ​ຂັ້ນ​ເທິງ ກໍ​ຕາມ ແຕ່​ເມືອງ​ກໍ​ມີ​ແຜນ­ການ​ຈັດ​ເກັບ​ໃຫ້​ໄດ້​ຕາມ​ແຜນ ແລະ ລື່ນ​ແຜນ­ການ​ຄື​ປີ­ຜ່ານ­ມາ ໂດຍ​ຈະ​ນຳ​ໃຊ້​ລະ­ບົບ​ທັນ​ສະ­ໄໝ​ເຮັດ​ແນວ­ໃດ​ການ​ເກັບ​ລາຍ​ຮັບ​ໄດ້​ເຂົ້າ​ເຖິງ​ຊຸມ​ຊົນ​ຫຼາຍ​ຂຶ້ນ ຫັນ​ລົງ​ຫົວ­ໜ່ວຍ​ທຸ­ລະ​ກິດ ແລະ ບ້ານ ແບບ​ລົງ​ໃຫ້​ທົ່ວ​ເຖິງ ເພື່ອ​ໃຫ້​ປະ­ຊາ­ຊົນ​ໄດ້​ເຂົ້າ­ໃຈ ແລະ ຮັບ​ຮູ້​ລະ­ບຽບ​ການ ສືບ­ຕໍ່​ລົງ​ເຜີຍ­ແຜ່​ລະ­ບຽບ​ນິ­ຕິ​ກຳ ແລະ ເຝິກ­ອົບ­ຮົມ​ວຽກ​ງານ​ຕ່າງໆ ເປັນ­ຕົ້ນ ວຽກ​ທັນ​ສະ­ໄໝ​ໃຫ້​ພະ­ນັກ­ງານ​ຢ່າງ​ທົ່ວ​ເຖິງ ເພື່ອ​ໄປ​ອະ­ທິ­ບາຍ​ໃຫ້​ປະ­ຊາ­ຊົນ ພ້ອມ​ນີ້ ກໍ​ຮຽກ­ຮ້ອງ​ມາ​ຍັງ​ຜູ້​ທີ່​ບໍ່​ທັນ​ເສຍ​ຄ່າ​ທາງ​ປີ­ຜ່ານ­ມາ​ກໍ​ໃຫ້​ມາ​ເສຍ ສະ­ເພາະ​ການ​ເສຍ​ຄ່າ​ທາງ ປີ 2020 ໄດ້​ເລີ່ມ​ເສຍ​ແລ້ວ ນັບ​ແຕ່​ນີ້​ເປັນ­ຕົ້ນ​ໄປ ສະ­ດວກ​ບ່ອນ​ໃດ​ກໍ​ເສຍ​ບ່ອນ​ນັ້ນ ເປັນ­ຕົ້ນ ທາງ​ອອນ​ລາຍ ທະ­ນາ­ຄານ ແລະ ຫ້ອງ­ການ ການ​ເງິນ​ເມືອງ.

ຂ່າວທີ່ກ່ຽວຂ້ອງ